សមាគមរោងចក្រកាត់ដេរនៅកម្ពុជា ហៅកាត់ថា GMAC បានជ្រើសរើសលោក វ៉ាន់ ស៊ូអៀង ជាប្រធានជាបន្តទៀត ជាតំណែងមួយដែលលោកបានកាន់អស់រយៈពេលជិតពីរទសវត្សរ៍មកហើយ ក្នុងសន្និបាតប្រចាំឆ្នាំកាលពីថ្ងៃសៅរ៍ ប៉ុន្តែបានសម្រេចកំណត់ពីរអាណត្តិ ដោយមួយអាណត្តិមានពីរឆ្នាំ។
លោក កេន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា បាននិយាយថា គណៈកម្មាធិការប្រតិបត្តិមានសមាជិក២៥រូបក៏បានបោះឆ្នោតដែរ និងមានសមាជិកបន្ថែមមួយរូបត្រូវបន្ថែម ដើម្បីឲ្យប្រាកដថា រោងចក្រជាម្ចាស់ដោយអឺរ៉ុបរបស់សមាគមនេះ មានតំណាងត្រឹមត្រូវ។ សមាជិកស្ទើរតែទាំងអស់លើកលេងតែ៦នាក់ប៉ុណ្ណោះ មានឈ្មោះក្នុងគណៈកម្មាធិការនេះស្រាប់។
លោក លូ បាននិយាយថា “គណៈកម្មាធិការនេះស្រដៀងនឹងក្រុមប្រឹក្សានៃក្រុមហ៊ុនមួយ។ គឺមានអំណាចទាំងអស់ក្នុងការសម្រេចសេចក្តីណែនាំរបស់ GMAC”។
គឺជារយៈពេលពីរឆ្នាំដែលមានភាពវឹកវរសម្រាប់ឧស្សាហកម្មនាំចេញសម្លៀកបំពាក់មានតម្លៃ៦ពាន់លានដុល្លារនៅកម្ពុជា ដែលស្មើនឹងប្រហែលមួយភាគបីនៃផលិតផលសរុបក្នុងស្រុករបស់ប្រទេសកម្ពុជា។
កូដកម្មនិងការតវ៉ាក្នុងវិស័យកាត់ដេរដើម្បីបានប្រាក់ខែខ្ពស់បានកើតមានជាទូទៅនិងមានហិង្សាកាលពីឆ្នាំ២០១៣ ដោយបានបិទឧស្សាហកម្មនេះរយៈពេលពីរបីថ្ងៃ ហើយបានបញ្ចប់នៅពេលដែលកងរាជអាវុធហត្ថបានបាញ់រះទៅលើក្រុមបាតុករនៅថ្ងៃទី៣ខែមករាឆ្នាំ២០១៤ បណ្តាលឲ្យមនុស្សស្លាប់យ៉ាងតិចប្រាំនាក់។
អំពើហិង្សានិងការឈប់ធ្វើការងារនាំមកនូវការខាតបង់ ដែលបណ្តាលឲ្យក្រុមហ៊ុនបរទេសម៉ាកល្បីៗមួយចំនួនបានដាក់ការបញ្ជាទិញរបស់ខ្លួននៅកន្លែងផ្សេងវិញ។ ក្នុងឆ្នាំ២០១៤ ការនាំចេញសម្លៀកបំពាក់របស់ប្រទេសកម្ពុជាបានកើនឡើងវិញប្រហែលពាក់កណ្តាលល្បឿននៃឆ្នាំមុន ថ្វីបើធនាគារពិភពលោកបន្ទោសការប្រកួតប្រជែងស្វិតស្វាញពីប្រទេសផ្សេងទៀត និងការឡើងតម្លៃប្រាក់ដុល្លារក៏ដោយ ដែលរដ្ឋាភិបាលបានកំណត់តម្លៃតាម។
ឧស្សាហកម្មនេះក៏បានលៃដោះស្រាយការឡើងប្រាក់ខែ២៨ភាគរយលើប្រាក់ខែអប្បបរមារបស់កម្មករកាត់ដេរ ដែលបានចូលជាធរមានកាលពីខែមករា និងមានការមិនត្រូវគ្នាជាមួយសហជីពមួយចំនួនទាក់ទិននឹងច្បាប់សហជីព ដែលរដ្ឋាភិបាលសង្ឃឹមថានឹងអនុម័តនៅឆ្នាំនេះ។
លោក លូ បាននិយាយថា ទាំងច្បាប់សហជីព ក៏ដូចជាច្បាប់មួយផ្សេងទៀតដែលកំពុងព្រាង ដើម្បីដាក់កម្រិតអង្គការក្រៅរដ្ឋាភិបាលនិងសមាគម ត្រូវគេរំពឹងថា នឹងបញ្ចូលការកំណត់អាណត្តិសម្រាប់មេដឹកនាំ ជាផ្នែកមួយនៃមូលហេតុ ដែល GMAC បានសម្រេចកាលពីថ្ងៃសៅរ៍ ក្នុងការកំណត់អាណត្តិលើប្រធានរបស់ខ្លួន។
លោកបាននិយាយថា “នេះជាការសង្ឃឹមទុកជាមុននៃច្បាប់ពីរដែលនឹងចូលជាធរមាន ហើយច្បាប់មួយណាក៏ដោយដាក់កំហិតលើយើង”។
លោក លូ បាននិយាយថា ការកំណត់ត្រឹមពីរអាណត្តិ ក៏នឹងធ្វើឲ្យ GMAC ដើរស្របតាមការប្រតិបត្តិល្អបំផុតជាអន្តរជាតិ។
លោកបាននិយាយថា យ៉ាងនេះក៏ដោយ ការកំណត់នេះនឹងមិនអនុវត្តបានទេ ប្រសិនបើ ប្រធានកំពុងកាន់តំណែង បន្ទាប់ពីពីរអាណត្តិរួចហើយ ឈរឈ្មោះអាណត្តិទី៣ដោយគ្មានបេក្ខជនប្រកួតប្រជែង៕ និត