លោក នីកូឡៃ ដូរ៉ូសិនកូ ពាណិជ្ជករជនជាតិរុស្ស៊ីត្រូវបានសាលាឧទ្ធរណ៍សម្រេចឲ្យនៅក្រៅឃុំកាលពីម្សិលមិញ រយៈពេលជាង១ខែបន្ទាប់ពីលោកបានជាប់ពន្ធនាគារក្នុងក្រុងព្រះសីហនុ ជុំវិញការដែលលោកមិនបានបង្ហាញខ្លួនតាមដីកាកោះហៅរបស់តុលាការចំនួនពីរលើកពាក់ព័ន្ធវិវាទជាមួយលោក សេរហ្គេ ប៉ូលុនស្គី អតីតដៃគូវិនិយោគរបស់ខ្លួន។
លោក ឃុន លាងម៉េង ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍បន្ទាប់ពីសវនាការបិទទ្វារថា ” យើងបានសម្រេចដោះលែងគាត់ឲ្យនៅក្រៅឃុំ”។
ដោយបដិសេធមិនធ្វើអត្ថាធិប្បាយបន្ថែម លោកបានមានប្រសាសន៍បន្ថែមថា ” គាត់ជាពាណិជ្ជករម្នាក់ គាត់មានអាសយដ្ឋានពិតប្រាកដ គាត់បានប្រគល់លិខិតឆ្លងដែនទៅតុលាការ ហើយគាត់បានប្រគល់ឯកសារទាក់ទងអចលនទ្រព្យរបស់គាត់”។
យោងតាមលោក សម សុផល ប្រធានពន្ធនាគារខេត្តព្រះសីហនុបានឲ្យដឹងថា គិតត្រឹមម៉ោង៧យប់ម្សិលមិញ លោក ដូរ៉ូសិនកូ នៅជាប់ឃុំនៅឡើយ។
លោក សុផល បានមានប្រសាសន៍ថា ” យើងរង់ចាំមើលដីកាដោះលែងរបស់សាលាឧទ្ធរណ៍ បន្ទាប់មកយើងនឹងដោះលែងគាត់”។
លោក ដូរ៉ូសិនកូ អាយុ៥៤ឆ្នាំ ជាអ្នករស់នៅក្រុងព្រះសីហនុយូរមកហើយក៏មានសញ្ជាតិខ្មែរផងនោះ ត្រូវបានចាប់ខ្លួននៅភោជនីយដ្ឋាន Snake House របស់ក្រុមគ្រួសារលោកកាលពីថ្ងៃទី២៥ ខែមីនា បន្ទាប់ពីខកខានមិនបានបង្ហាញខ្លួននៅសាលាដំបូងខេត្តព្រះសីហនុចំនួនពីរលើកជំុវិញវិវាទមួយក្នុងចំណោមវិវាទជាច្រើនជាមួយលោក ប៉ូលុនស្គី អាយុ៤២ឆ្នាំដែលគេស្វែងរកចាប់ខ្លួនក្នុងប្រទេសរុស្ស៊ីជាប្រទេសកំណើតរបស់លោកពាក់ព័ន្ធការចោទប្រកាន់ពីបទកិបកេងប្រាក់រាប់លានដុល្លារផងដែរ។
បន្ទាប់ពីការចាប់ខ្លួន លោក ដូរ៉ូសិនកូ ត្រូវបានបញ្ជូនទៅពន្ធនាគារខេត្តដើម្បីរង់ចាំការជំនុំជម្រះតាមការចោទប្រកាន់ពីបទក្លែងហត្ថលេខា ប្រើប្រាស់ឯកសារក្លែងក្លាយ និងរំលោភសេចក្ដីទុកចិត្ត ជាបទឧក្រិដ្ឋដែលតាមចោទថា លោកបានឆបោកប្រាក់១០លានដុល្លារ ដែលលោក ប៉ូលុនស្គី បានធ្វើការវិនិយោគនៅក្នុងក្រុមហ៊ុន Sea Snake Investment Group រួមគ្នា។ សំណើសុំនៅក្រៅឃុំដំបូងរបស់លោកត្រូវបានច្រានចោលដោយសាលាដំបូងខេត្តកាលពីដើមខែនេះ។
បន្ទាប់ពីសាលាឧទ្ធរណ៍បានចេញសេចក្ដីសម្រេចកាលពីម្សិលមិញ លោក ណាច ទ្រី មេធាវីលោក ដូរ៉ូសិនកូ បានអះអាងថា លិខិតឆ្លងដែន និងឯកសារកាន់កាប់ដីរបស់កូនក្ដីលោកត្រូវបានប្រគល់ឲ្យ ហើយថា ទឹកប្រាក់ក្នុងចំនួនមិនជាក់លាក់ត្រូវបានដាក់នៅតុលាការជាប្រាក់ធានាផងដែរ។
ដោយបដិសេធមិនធ្វើអត្ថាធិប្បាយបន្ថែម លោក ណាច ទ្រី បានមានប្រសាសន៍ថា ” គាត់មិនអាចគេចខ្លួនពីប្រទេសកើតទេ ពីព្រោះពួកគេបានរក្សាទុកលិខិតឆ្លងដែន អចលនទ្រព្យ និងភាគហ៊ុនរបស់គាត់”។
លោក អូសថេប អាយុ៣៦ឆ្នាំ ជាកូនប្រុសរបស់លោក ដូរ៉ូសិនកូ ដែលក៏ជាអនុសេនីយ៍ឯកក្នុងកម្លាំងនគរបាលអន្តោប្រវេសន៍ខេត្តព្រះសីហនុផងដែរនោះ កាលពីសប្ដាហ៍មុនបានអះអាងនៅក្នុងសេចក្ដីថ្លែងការណ៍មួយថា លោក ប៉ូលុនស្គី បានចំណាយប្រាក់ចំនួន២៥០.០០០ដុល្លារដល់អាជ្ញាធរដើម្បីឲ្យគេចាប់ខ្លួនឪពុករបស់លោក ប៉ុន្តែមិនបានផ្ដល់ភ័ស្តុតាងដើម្បីគាំទ្រការអះអាងរបស់ខ្លួនឡើយ។
កាលពីថ្ងៃសុក្រ លោក បែនសុន សម័យ មេធាវីរបស់លោក ប៉ូលុនស្គី បានដាក់ពាក្យបណ្ដឹងទៅសាលាដំបូងខេត្តចោទប្រកាន់លោក អូសថេប ដូរ៉ូសិនកូ ពីបទបរិហារកេរ្តិ៍ជុំវិញការចោទប្រកាន់ពីបទផ្ដល់សំណូក។គេមិនអាចទាក់ទងលោក អូសថេប ដូរ៉ូសិនកូ បានទេកាលពីម្សិលមិញ។
លោក កាស្បា៉ សេកូទីន មេធាវីម្នាក់ទៀតរបស់លោក ប៉ូលុនស្គី បានមានប្រសាសន៍ថា លោកមានការភ្ញាក់ផ្អើលការដែលថា លោក ដូរ៉ូសិនកូ ត្រូវបានដោះលែងនៅក្រៅឃុំ។
លោកបានមានប្រសាសន៍ថា ” ខ្ញុំមានការភ្ញាក់ផ្អើលយ៉ាងខ្លាំងចំពោះសាលក្រមនេះ ពីព្រោះមានករណីច្រើនណាស់ប្រឆាំងរូបគាត់ ដោយមានភ័ស្តុតាងរឹងមាំទៀត។ ប្រហែលជាគាត់ត្រៀមខ្លួនប្រឈមមុខនឹងតុលាការ ហើយឆ្លើយបំភ្លឺ ឬគាត់អាចមានផែនការផ្សេងទៀត”៕ សារុន (រាយការណ៍បន្ថែមដោយ Matt Blomberg)