អ្នកភូមិប្រាំពីរនាក់ត្រូវបានសាលាដំបូងខេត្តព្រះវិហារធ្វើការសាកសួរកាលពីម្សិលមិញ ជុំវិញហេតុការណ៍មួយកាលពីខែធ្នូ ដែលអំឡុងពេលនោះពួកគាត់បានចាប់ត្រាក់ទ័រពីរគ្រឿងដែលត្រូវបានប្រើដើម្បីរានដីដែលមានវិវាទទុក ហើយបានចាប់អ្នកបើកបរជាចំណាប់ខ្មាំង។
ហេតុការណ៍នេះបានកើតឡើងពាក់ព័ន្ធវិវាទដីធ្លីមួយរវាងអ្នកភូមិជនជាតិដើមភាគតិចកួយ៣៦៧គ្រួសារ នៅក្នុងស្រុកត្បែងមានជ័យ ខេត្តព្រះវិហារ និងក្រុមហ៊ុនចិន Lan Feng ដែលទទួលបានដីសម្បទានទំហំ៩.០០០ហិកតា ដើម្បីធ្វើចម្ការអំពៅកាលពីឆ្នាំ២០១១លើដីដែលអ្នកភូមិជានជាតិដើមភាគតិចកួយនិយាយថា ពួកគាត់បានរស់នៅលើដីនោះច្រើនទសវត្សរ៍មកហើយ។
អ្នកភូមិបានឲ្យអ្នកបើកបរត្រាក់ទ័រពីរនាក់ត្រឡប់ទៅវិញបន្ទាប់ពីឃាត់ខ្លួនមួយថ្ងៃ ប៉ុន្តែបានចាប់គ្រឿងចក្រនោះទុក។
យោងតាមអ្នកភូមិដែលត្រូវបានកោះហៅបានឲ្យដឹងថា ក្រុមហ៊ុន Lan Feng បានដាក់ពាក្យបណ្ដឹងប្ដឹងពួកគាត់ពីបទបង្ខាំងមនុស្សខុសច្បាប់ និងប៉ុនប៉ងមនុស្សឃាតតាមការចោទប្រកាន់ថា ប្រដាប់ដោយកាំបិតគំរាមអារករអ្នកបើកបរទៀតផង។
លោក រឿង ខាន់ តំណាងសហគមន៍បានមានប្រសាសន៍ថា អ្នកភូមិប្រាំពីរនាក់ត្រូវបានសាកសួរកាលពីម្សិលមិញ ហើយពីរនាក់ទៀតគ្រោងសាកសួរនៅថ្ងៃនេះ។
លោក ភូ ភេត អាយុ៣៥ឆ្នាំ ជាមនុស្សម្នាក់ក្នុងចំណោមអ្នកដែលត្រូវបានសាកសួរបាននិយាយថា ” តុលាការបានសួរខ្ញុំថា តើហេតុអ្វីបានជាខ្ញុំចាប់ត្រាក់ទ័រទុក និងបង្ខាំងអ្នកបើកបរ។ ខ្ញុំបានប្រាប់គាត់ថា ពីព្រោះពួកគេបានឈូសឆាយដីស្រែរបស់ខ្ញុំ ហើយដោយសារយើងបានប្រាប់ពួកគេច្រើនលើកច្រើនសាមកហើយ ប៉ុន្តែពួកគេមិនដែលស្ដាប់ឡើយ។ ហេតុដូច្នោះហើយ យើងបានចាប់ពួកគេជាចំណាប់ខ្មាំងតែម្ដងទៅ”។
លោក ឡុង ស៊ីថា ព្រះរាជអាជ្ញារងអមសាលាដំបូងខេត្តដែលបានដឹកនាំការសាកសួរ និងក្រុមហ៊ុន Lan Feng មិនអាចទាក់ទងសុំអត្ថាធិប្បាយបានទេ៕ សារុន