38 C
Phnom Penh

សន្និសីទ​​​សង្គម​​​ស៊ីវិល​​​អាស៊ាន​​​ត្រូវ​​​បាន​​​ធ្វើ​​​ឲ្យ​​​ខក​​​ចិត្ត​​​ដោយ​​​រដ្ឋាភិបាល​​​មួយ​​​ចំនួន​​​

ដោយ ឌឹ ខេមបូឌា ដេលី

បទវិភាគ

បន្ទាប់​​​ពី​​​ការ​​​សម្រេច​​​របស់​​​រដ្ឋាភិបាល​​​កម្ពុជា​​​កាល​​​ពី​​​​​​សប្តាហ៍​​​មុន​​​ក្នុង​​​ការ​​​រារាំង​​​មេដឹក​​​នាំ​​​សង្គម​​​ស៊ីវិល​​​ ដែល​​ត្រូវ​​​បាន​​​ជ្រើស​​​រើស​​​ដោយ​​​ឯករាជ្យ​​​មិន​​​ឲ្យធ្វើ​​​ជា​​​តំណាង​​​កម្ពុជា​​​សម្រាប់​​​សន្និសីទ​​​សង្គម​​​ស៊ីវិល​​​អាស៊ាន​​​ (ACSC) ប្រធាន​​​សន្និសីទ​​​នេះ​​​បាន​​​លើក​​​ឡើង​​​នៅ​​​ក្នុង​​​សេចក្តី​​​ថ្លែង​​​ការណ៍​​​មួយ​​​ចេញ​​​កាល​​​ពី​​​ថ្ងៃ​​​ច័ន្ទ​​​ថា រដ្ឋាភិបាល​​​មួយ​​​ចំនួន​​​​​​បាន​​​ធ្វើ​​​ឲ្យ​​​ “មាន​​​ការ​​​ខក​​​ចិត្ត​​​យ៉ាង​​​ខ្លាំង​​​”។

ទោះ​​​បី​​​ជា​​​មាន​​​ការ​​​ជ្រើស​​​រើស​​​​​​លោក​​​ស្រី ធីតា ឃឹះ ប្រធាន​​​អង្គការ​​​មិន​​​មែន​​​រដ្ឋាភិបាលមួយ​​​ដោយ​​​អង្គការ​​​សង្គម​​​ស៊ីវិល​​​កាល​​​ពី​​​ដើម​​​ខែ​​​នេះ​​​ ដើម្បី​​​ធ្វើ​​​ជា​​​តំណាង​​​កម្ពុជា​​​សម្រាប់​​​កិច្ច​​​ប្រជុំ​​​ ដែល​​​ធ្វើ​​​ឡើង​​​​​​នៅ​​​ក្នុង​​​ទី​​​ក្រុង​​​គូឡាឡាំពួ​​​ក៏​​​ដោយ​​​ តែ​​​ក្រសួង​​​ការ​​​បរទេស​​​បាន​​​ច្រាន​​​ចោល​​​ការ​​​សម្រេច​​​នេះ​​​ ហើយ​​​បាន​​​​​​ជ្រើស​​​រើស​​​លោក ដួង​​​ វីរ័ត្ន អតីត​​​ប្រធាន​​​នាយកដ្ឋាន​​​​​​ សង្គម​​​ស៊ីវិល​​​​​​ អង្គការ​​​មិន​​​មែន​​​រដ្ឋាភិបាល និង​​​សិទ្ធិ​​​មនុស្ស​​​នៃ​​​ទី​​​ស្តី​​​ការ​​​គណៈរដ្ឋមន្ត្រី​​​ជំនួស​​​វិញ​​​។

នៅ​​​ក្នុង​​​កិច្ច​​​សម្ភាស​​​មួយ​​​កាល​​​ពី​​​ម្សិលមិញ​​​ លោក​​​ ជេ​​​រ៉ល ចូសេហ្វ (Jerald Joseph) ប្រធាន​​​សន្និសីទ​​​​​​សង្គម​​​ស៊ីវិល​​​អាស៊ាន​​​បាន​​​លើក​​​ឡើង​​​ថា ប្រទេស​​​កម្ពុជា​​​ និង​​​សិង្ហបុរី គឺ​​​ជា​​​ប្រទេស​​​តែ​​​ពីរ​​​គត់​​នៅ​​​ក្នុ​​​ងតំបន់​​​ដែល​​​បញ្ជូន​​​តំណាង​​​របស់​​​ខ្លួន​​​ ដោយ​​​គ្មាន​​​​​​ការ​​​ជ្រើស​​​រើស​​​ពី​​​អង្គការ​​​មូល​​​ដ្ឋាន​​​។

លោក​​​​​​បាន​​​មាន​​​ប្រសាសន៍​​​ថា “យើង​​បាន​​​សង្ឃឹម​​​ថា រដ្ឋាភិបាល​​​ទាំងអស់​​​នឹង​​​គោរព​​​​​​តាម​​​ដំណើរ​​​ការ​​នៃ​​​ការ​​​ធានា​​​ឲ្យ​​​មាន​​​​​​អង្គការ​​​សង្គម​​​ស៊ីវិលឯករាជ្យ​​​​​​ចូល​​​រួម​​​ពិភាក្សា​​​ជាមួយ​​​មេដឹក​​​នាំ​​​ [ប្រទេស] សមាជិក​​​អាស៊ាន​​​។ តែ​​​ជា​​​អកុសល​​​ រដ្ឋាភិបាល​​​កម្ពុជា​​​មិន​​​បាន​​​ធ្វើ​​​ដូច្នេះ​​​ឡើយ​​​”។

លោក​​​​​​បាន​​​មានប្រសាសន៍​​​បន្ថែម​​​ថា “ប្រសិន​​​បើ​​​អ្នក​​​ចង់​​​ចូល​​​រួម​​​នៅ​​​ក្នុង​​​កិច្ច​​​ពិភាក្សា​​​ជាមួយ​​​​​​មេដឹកនាំ​​ប្រទេស​​​នីមួយៗ​​​ អ្នក​​​ចាំបាច់​​​​​​ត្រូវ​​​តែ​​​ជ្រើស​​​រើស​​​អង្គការ​​​មិនមែន​​​រដ្ឋាភិបាល​​​ពិត​​​ប្រាកដ​​​ដើម្បី​​​ផ្តល់​​​ឲ្យ​​​អ្នក​​​នូវ​​​ការ​​​វាយ​​​តម្លៃ​​​​​​ដ៏​​​​​​ត្រឹម​​​ត្រូវ​​​ និង​​​ស្មោះ​​​ត្រង់​​​បំផុត​​​អំពី​​​អ្វី​​​ដែល​​​កំពុង​​​កើត​​​ឡើង​​​ពិត​​​ប្រាកដ​​​ មិនមែន​​​អ្នក​​​ដែល​​​នឹង​​​​​​និយាយ​​​ត្រាប់​​​ ឬ​​​និយាយ​​​ពី​​​អ្វី​​​ដែល​​​អ្នក​​​ចង់​​​ឮ​​​នោះទេ​​​”។ លោក​​​បាន​​​បន្ថែម​​​ថា ប្រទេស​​​កម្ពុជា​​​​​​ក៏​​​ជា​​​ប្រទេស​​​មួយ​​​ក្នុង​​​ចំណោម​​​ប្រទេស​​​ចំនួន​​​បី​​​ដែល​​​មិន​​​បញ្ជូន​​​​​​តំណាង​​​ដែល​​​ត្រូវ​​​បាន​​​ជ្រើស​​​រើស​​​ដោយ​​​ឯករាជ្យ​​​ដើម្បី​​​ចូល​​​រួម​​​ព្រឹត្តិការណ៍​​​​​​កាល​​​ពី​​​ឆ្នាំ​​​មុន​​​​​​ផង​​​ដែរ​​​។

នៅ​​​ក្នុង​​​សេចក្តី​​​ថ្លែង​​​ការណ៍មួយ​​​ចេញ​​​កាល​​​ពីថ្ងៃ​​​ច័ន្ទ លោក ចូសេហ្វ បាន​​​មាន​​​ប្រសាសន៍​​​ថា “នៅ​​​ក្នុង​​​រយៈ​​​​​​ពេល​​​១០​​​ឆ្នាំ​​​ចុង​​​ក្រោយ​​​ ចាប់​​​តាំ​​​ងពី​​​សន្និសីទ​​​សង្គម​​​ស៊ីវិល​​​អាស៊ាន​​​​​​លើក​​​ទី​​​១​​​នៅ​​​ក្នុង​​​ទី​​​ក្រុង​​​គូឡាឡាំពួ​​​មក​​​ កិច្ច​​​ប្រជុំ​​​នេះ​​​ពុំ​​​សូវ​​​មាន​​​ដំណើរ​​​ការ​​​ទៅ​​​មុខ​​​ដោយ​​​រលូន​​​ឡើយ​​​ ហើយ​​​​​​តែង​​​តែត្រូវ​​​បាន​​​ធ្វើ​​​ឲ្យ​​​​​​ខក​​​ចិត្ត​​​យ៉ាង​​​​​​ខ្លាំង​​​ដោយ​​​រដ្ឋាភិបាល​​​មួយ​​​ចំនួន​​​​​​ជា​​​ច្រើ​​​ន​​​លើក​​​ច្រើន​​​សារ​​​”។

លោក​​​ស្រី ធីតា ឃឹះ ដែល​​​ជា​​​នាយការ​​​អង្គការ​​​សីលការ និ​​​ងជា​​​សកម្មជន​​​ការ​​​ពារ​​​សិទ្ធិ​​​មនុស្ស​​​ដ៏លេច​​​ធ្លោ​​​មួយ​​​រូប​​​ បាន​​​លើក​​​ឡើង​​​ថា លោកស្រី​​​ត្រូវ​​​បាន​​​គេ​​​​​​ជូន​​​ដំណឹ​​​​ងថា លោកស្រី​​​នឹង​​​មិន​​​ត្រូវ​​​បាន​​​ជ្រើស​​​រើស​​​ឲ្យ​​​ធ្វើ​​​ជា​​​តំណាង​​​កម្ពុជា​​​​​​​​​ឡើយ​​​ប្រាំ​​​ថ្ងៃ​​​មុន​​​សន្និសីទ​​​កាល​​​ពី​​​សប្តាហ៍​​​មុន​​​។

លោកស្រី​​​បាន​​​មានប្រសាសន៍​​​ថា “រដ្ឋាភិបាល​​​កម្ពុជា​​​ឡើយ​​​មិន​​​បាន​​​ចាត់​​​ទុក​​​យើង​​​ជា​​​ស្ថាប័ន​​​ ឬ​​​តួ​​​អង្គ​​​សំខាន់​​​ឡើយ​​​។ ពួកគេ​​​​​​ធ្វើ​​​ការ​​​ជ្រើស​​​រើស​​​​​​តាម​​​តែ​​​ចិត្ត​​​ឯង​​​ ហេតុ​​​ដូច្នេះ​​​​​​វា​​​មិន​​​មែន​​​ជា​​​​​​​​​​​តំណាង​​​ឯករាជ្យ​​​របស់​​​អង្គការ​​​សង្គម​​​ស៊ីវិល​​​ឡើយ​​​”។

ពេល​​​ទាក់​​​ទង​​​កាល​​​ពី​​​ម្សិល​​​មិញ​​​ លោក វីរ័ត្ន បាន​​​លើក​​​ឡើង​​​ថា បច្ចុប្បន្ន​​​លោក​​​មិន​​​មែន​​​​​​ធ្វើ​​​ការ​​​នៅ​​​ទី​​​ស្តីការ​​​គណៈរដ្ឋមន្ត្រី​​​ឡើយ​​​​​​ដោយ​​​បង្វែរ​​​សំណួរ​​​អំពី​​​ដំណើរ​​​ជ្រើស​​​រើស​​​នេះ​​​ទៅ​​​លោក សួង​​​ ហួត ប្រធាន​​​​​​សមាគម​​​អ្នក​​​អប់​​​រំ​​​ជាតិ​​​​​​ដើម្បី​​​អភិវឌ្ឍន៍​​​​​​។

លោក សួង​​​ ហួត បាន​​​លើក​​​ឡើង​​​ថា អង្គការ​​​”សង្គម​​​ស៊ីវិល​​​កម្ពុជា​​​”  ជា​​​សម្ព័ន្ធ​​​អង្គការ​​​ដែល​​​លោក​​​និយាយ​​​ថា ​​​រួម​​​មាន​​​អង្គការ​​​សង្គម​​​ស៊ីវិល​​​ប្រមាណ​​​២០០​​​បាន​​​ជ្រើស​​​រើស​​​លោក​​​ វីរ័ត្ន ឲ្យទៅ​​​ចូល​​​រួម​​​សន្និសីទ​​​នេះ​​​។

លោក​​​បាន​​​មាន​​​ប្រសាសន៍​​​ថា “ប្រសិន​​​បើ​​​​​​និយាយ​​​អំពី​​​អង្គការ​​​សង្គមស៊ីវិល​​​ វា​​​មាន​​​អង្គការ​​​ខុស​​​ៗ​​​គ្នា​​​។ អង្គការ​​​របស់​​​ខ្ញុំ​​​បាន​​​ជ្រើស​​​រើស​​​លោក វីរ័ត្ន  ហើយ​​​អង្គការ​​​របស់​​​លោក​​​ស្រី ធីតា ឃឹះ បាន​​​ជ្រើស​​​រើស​​​លោក​​​ស្រី​​​ ប៉ុន្តែ បុគ្គល​​​ដែល​​​ត្រូវ​​​បាន​​​ជ្រើស​​​ត្រូវ​​​តែ​​​មាន​​​ការ​​​គាំទ្រ​​​ពី​​​រដ្ឋ​​​មន្ត្រីក្រសួង​​​ការ​​​បរទេស​​​”។

គេ​​​មិនអាច​​​ទាក់​​​ទង​​​អ្នក​​​នាំ​​​ពាក្យ​​​​​​ក្រសួង​​​ការបរទេស​​​បាន​​​ឡើយ​​​៕ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស