លោក ប៉ែន ប៊ុណ្ណា អតីតអ្នកយកព័ត៌មានវិទ្យុបារាំង RFI កាលពីម្សិលមិញត្រូវបានជ្រើសរើសជាប្រធានថ្មីនៃក្លឹបអ្នកកាសែតកម្ពុជា បន្ទាប់ពីលោក ប៉ែន សមិទ្ធិ ប្រធានក្លឹបអ្នកកាសែតនេះយូរមកហើយនោះបានស្លាប់កាលពីខែមុន។
សម្រាប់សមាជិកក្រុមប្រឹក្សាភិបាលប្រាំបួនរូបរបស់ក្លឹបអ្នកកាសែតនេះ បេក្ខជន១៣រូបបានឈរឈ្មោះបោះឆ្នោតក្នុងចំណោមសមាជិកក្លឹបអ្នកកាសែតកម្ពុជា១៤០រូបមានវត្តមាននៅភោជនីយដ្ឋានទន្លេបាសាក់២ ក្នុងរាជធានីភ្នំពេញ។
ដោយមានសំឡេងឆ្នោត១៣៤សំឡេងពីសមាជិកទាំងអស់ ដែលម្នាក់ៗបានបោះឆ្នោតជ្រើសរើសបេក្ខជនប្រាំបួនរូបសម្រាប់ក្រុមប្រឹក្សាភិបាលថ្មី លោក ប៉ែន ប៊ុណ្ណា បានស្ថិតក្នុងលំដាប់ទី១ ហើយបន្ទាប់មកលោកត្រូវបានក្រុមប្រឹក្សាភិបាលជ្រើសរើសជាប្រធាន។
លោក ប៉ែន បុណ្ណា ដែលបច្ចុប្បន្ននេះបានបម្រើការនៅស្ថានីយទូរទស្សន៍ PNN របស់ឧកញ៉ា លី យ៉ុងផាត់ ដែលនឹងដំណើរការនៅពេលឆាប់ៗនេះបានមានប្រសាសន៍ថា ” ខ្ញុំសូមថ្លែងអំណរគុណដល់សមាជិកក្លឹបអ្នកកាសែតកម្ពុជាទាំងអស់ដែលបានផ្ដល់ទំនុកចិត្តមកលើរូបខ្ញុំ ព្រមទាំងសមាជិកក្រុមប្រឹក្សាភិបាលទាំងអស់ដែលបានជ្រើសរើសខ្ញុំឲ្យធ្វើជាប្រធានក្លឹបអ្នកកាសែតកម្ពុជា ដើម្បីបន្តបេសកកម្មរបស់លោកប្រធាន ប៉ែន សមិទ្ធិ”។
លោកបានមានប្រសាសន៍ថា “នៅពេលអ្នកកាសែតត្រូវបានចាប់ខ្លួន ឬចោទប្រកាន់នោះ បុគ្គលិកក្លឹបអ្នកកាសែតរបស់យើងតែងតែទៅជួយធ្វើអន្តរាគមន៍។ យើងមិនលម្អៀងទៅគណបក្សកាន់អំណាចទេ ហើយក្នុងពេលកន្លងមក យើងបានព្យាយាមធ្វើយ៉ាងណាឲ្យក្លឹបអ្នកកាសែតរបស់យើងមានភាពឯករាជ្យ”៕ សារុន