38 C
Phnom Penh

កម្មករ​សំណង់​​ម្នាក់​ធ្លាក់​ពី​អគារ​កម្ពស់​៧​ជាន់​​ស្លាប់​នៅ​ក្នុង​រាជធានី​ភ្នំពេញ​

ដោយ ឌឹ ខេមបូឌា ដេលី

បទវិភាគ

មន្ត្រី​បាន​ឲ្យ​ដឹង​ថា កម្មករ​សំណង់​វ័យ​២០​ឆ្នាំ​ម្នាក់​​បាន​​បាត់​បង់ជីវិត​កាលពី​ម្សិលមិញ​នៅ​ក្នុង​ខណ្ឌ​ទួលគោក​ រាជធានី​ភ្នំពេញ នៅ​ពេល​ខ្សែក្រវាត់​សុវត្ថិភាព​​​របស់​ជន​រងគ្រោះ​​ដាច់​ធ្វើ​ឲ្យ​ជន​រងគ្រោះ​​ធ្លាក់ពី​ជាន់ទី៧​មក​ដល់​ដី​។

យោង​តាម​លោក​ អុឹង​ មី អធិការ​រង​នគរ​បាល​ខណ្ឌទួលគោក​បាន​ឲ្យ​ដឹង​ថា ខណៈ​ពេល​​យុវជន​ ហួន ពេទ្យ ដែល​មក​ពី​ខេត្ត​តាកែវ កំពុង​វ៉ៃក្ដារ​ពុម្ព​ដើម្បី​ចាក់​សសរ​បេតុង រូប​ក៏​ស្រាប់​តែ​បាត់​បង់​ជំហរ​​ ហើយ​​ធ្លាក់​​​ចុះ​ពី​អគារ​អាផាតមិន​ដែល​កំពុង​ស្ថិត​ក្រោម​​ការ​សាង​សង់។

លោក​បាន​មាន​ប្រសាសន៍​ថា “ខ្សែក្រវាត់​សុវត្ថិភាព​​របស់​ជន​រងគ្រោះ​បាន​ដាច់​ ហើយ​នោះ​ជាមូល​ហេតុ​ដែល​ជន​រងគ្រោះ​ធ្លាក់​ចុះ​មក​ក្រោម។ ក​របស់​ជន​រងគ្រោះ​បាក់ ហើយ​ឈាម​ហូរ​​ចេញ​តាម​ក្បាល និង​ច្រមុះ។ ជន​រងគ្រោះ​បាន​ស្លាប់​ភ្លាមៗ​មួយ​រំពេច”។

លោក​បាន​លើក​ឡើង​បន្តថា ម្ចាស់​អគារ​ដែល​គេ​​មិន​ទាន់​ស្គាល់​អត្តសញ្ញាណ​នៅ​ឡើយ បាន​ជួល​កម្មករ​បណ្ដោះ​អាសន្ន​មួយ​ក្រុម​ឲ្យ​ធ្វើ​ការ​នៅ​ការដ្ឋាន​សំណង់​នេះ។

លោក ប៊ិន សូឈី អនុប្រធាន​មន្ទីរ​រៀបចំដែន​ដី នគរូបនីយកម្ម និង​សំណង់​រាជធានី​ភ្នំពេញ​ បាន​មាន​ប្រសាសន៍​ថា មន្ទីរ​របស់​លោក​​​មិន​ដែល​បាន​ចេញ​លិខិត​អនុញ្ញាត​ឲ្យ​សាង​សង់​អគារ​នេះ​ទេ។

លោក​បាន​​លើក​ឡើង​​ថា “ពេល​នេះ អាជ្ញាធរ​បាន​សម្រេច​ផ្អាក​ការ​សាង​សង់​​ហើយ​​រហូត​ដល់​ម្ចាស់​​បំពេញ​សំណុំ​ឯកសារ​ និង​ដោះ​ស្រាយ​ករណី​នេះ​​រួច​រាល់​។ ម្ចាស់​អគារ​ត្រូវ​ទទួល​ខុស​ត្រូវ​​ចំពោះ​រឿង​នេះ​ ហើយ​ក៏​ត្រូវ​ប្រឈម​នឹង​បណ្ដឹង​ផ្លូវ​ច្បាប់​ដែរ​​”។

បុរស​ឈ្មោះ កែវ ស៊ាង​ អាយុ​២៩​ឆ្នាំ ដែល​បាន​​បម្រើ​ការ​ងារ​នៅ​ការដ្ឋាន​សំណង់​នេះ​​អស់​រយៈ​ពេល​៩ខែ​មក​ហើយ និយាយ​ថា គាត់​កំពុង​​​នៅ​ជាន់​ផ្ទាល់​ដី​ នៅ​ពេល​គ្រោះ​ថ្នាក់​នេះ​កើត​ឡើង។

គាត់​​​បាន​និយាយ​ថា “​ពេល​នេះ​ខ្ញុំ​ព្រួយ​បារម្ភ​អំពី​សុវត្ថិភាព​ផ្ទាល់​ខ្លួន​របស់​ខ្ញុំ”។ គាត់​បាន​គូស​បញ្ជាក់​ថា ការដ្ឋាន​នេះ​គ្មាន​សំណាញ់​សុវត្ថិភាព ឬ​របាំង​ការ​ពារ​ដើម្បី​ទប់​ស្កាត់​​​កម្មករ​កុំ​ឲ្យ​ធ្លាក់​​ចុះ​ពី​អគារ​ឡើយ​។ គាត់​បាន​​និយាយ​ទៀត​​​​ថា ជន​រងគ្រោះ​​​ ហួន ពេទ្យ ចូល​​បម្រើ​ការ​ងារ​នៅ​ការដ្ឋាន​នេះ​មិន​ទាន់​បាន​៣ខែផង​ទេ។

នៅ​ក្នុង​ករណី​គ្រោះ​ថ្នាក់​ដោយ​ឡែក​មួយ​ កម្មករ​សំណង់​វ័យ​៣១​ឆ្នាំ​ម្នាក់​ បាន​ស្លាប់​​នៅ​ក្នុង​ក្រុង​បាវិត​ខេត្ត​ស្វាយ​រៀង កាលពី​​សប្ដាហ៍​មុន នៅ​ពេល​របង​រោងចក្រ​​ដែល​ខ្លួន​កំពុង​សាង​សង់​ បាន​បាក់​រលំ​អំឡុង​ពេល​មាន​ខ្យល់​ព្យុះ​ នេះបើ​យោង​តាម​ការ​ឲ្យ​ដឹង​ពី​លោក កែវ គង់ អធិការ​ក្រុង​បាវិត។ ជន​រងគ្រោះ​​ឈ្មោះ​ យឹម យ៉ុង បាន​ស្លាប់​ភ្លាមៗ​នៅ​នឹង​កន្លែង​ ចំណែក​ឯ​កម្មករ​បី​នាក់​ទៀត​បាន​រងរបួស​៕ សុខុម​ (រាយការណ៍​បន្ថែម​ដោយ ម៉ិច ដារ៉ា)​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស