លោក នីកូឡៃ ដូរ៉ូសិនកូ ជនជាតិរុស្ស៊ីដែលជាប់ពន្ធនាគារនឹងស្ថិតនៅក្នុងពន្ធនាគារខេត្តព្រះសីហនុដដែលដោយមិនកំណត់ បន្ទាប់ពីមានការតវ៉ាជំទាស់នឹងសេចក្ដីសម្រេចរបស់សាលាឧទ្ធរណ៍ឲ្យគាត់នៅក្រៅឃុំ។
ដោយមិនពេញចិត្តនឹងសេចក្ដីសម្រេចកាលពីថ្ងៃទី១ ខែមេសាក្នុងការឲ្យលោក ដូរ៉ូសិន កូ អាយុ៥៤ឆ្នាំនៅក្រៅឃុំនោះ លោក អ៊ុក សាវុធ អគ្គព្រះរាជអាជ្ញាបានមានប្រសាសន៍កាលពីម្សិលមិញថា រយៈពេលជាប់ពន្ធនាគាររបស់គាត់នឹងត្រូវបន្ត នេះបើយោងតាមលោក ហែម រិទ្ធ ជាអគ្គព្រះរាជអាជ្ញារង។
លោក ហៀម រិទ្ធ បានមានប្រសាសន៍ថា ” អគ្គព្រះរាជអាជ្ញាបានប្ដឹងទាស់។ យើងមិនសប្បាយចិត្តនឹងសេចក្ដីសម្រេចរបស់សាលាឧទ្ធរណ៍ឡើយ”។
លោក អ៊ុក សាវុធ បានបដិសេធមិនធ្វើអត្ថាធិប្បាយទេ។ ឥឡូវនេះសំណើសុំនៅក្រៅឃុំនឹងត្រូវបញ្ជូនបន្តទៅតុលាការកំពូល ដែលតម្រូវឲ្យបើកសវនាការជំនុំជម្រះក្នុងរយៈពេល១៥ថ្ងៃ បន្ទាប់ពីទទួលបានពាក្យបណ្ដឹង។
លោក ដូរ៉ូសិនកូ ត្រូវកងរាជអាវុធហត្ថចាប់ខ្លួននៅភោជនីយដ្ឋាន Snake House របស់ក្រុមគ្រួសារលោកនៅក្រុងព្រះសីហនុកាលពីថ្ងៃទី២៥ ខែមីនា បន្ទាប់ពីលោកមិនបានបង្ហាញខ្លួនពីរលើកនៅសាលាដំបូងខេត្តព្រះសីហនុ ដើម្បីឆ្លើយបំភ្លឺពាក់ព័ន្ធការចោទប្រកាន់ពីបទឆបោកពីសំណាក់លោក សេរហ្គេ ប៉ូលុនស្គី ជាដៃគូវិនិយោគ។
មេធាវីតំណាងលោក ប៉ូលុនស្គី អតីតមហាសេដ្ឋីអាយុ៤២ឆ្នាំ ដែលគេតាមរកចាប់ខ្លួនក្នុងប្រទេសរុស្ស៊ីតាមការចោទប្រកាន់ពីបទកិបកេងប្រាក់រាប់លានដុល្លារនោះអះអាងថា លោក ដូរ៉ូសិនកូ បានក្លែងហត្ថលេខាលើឯកសារក្លែងក្លាយមួយដើម្បីឆបោកប្រាក់១០លានដុល្លារ ដែលកូនក្ដីរបស់លោកវិនិយោគនៅក្នុងក្រុមហ៊ុន Sea Snake Investment Group ជាក្រុមហ៊ុនរកស៊ីរួមគ្នា។
លោក អូសថេប កូនប្រុសរបស់លោក ដូរ៉ូសិនកូ ដែលជាអនុសេនីយ៍ឯកក្នុងកងកម្លាំងនគរបាលអន្តោប្រវេសន៍ខេត្តបានអះអាងនៅក្នុងសេចក្តីថ្លែងការណ៍កាលពីថ្ងៃទី២០ ខែមេសាថា លោក ប៉ូលុនស្គី បានបង់ប្រាក់សំណូក២៥០.០០០ដុល្លារឲ្យគេចាប់ឪពុករបស់លោកដាក់ពន្ធនាគារ។
នៅពេលត្រូវបានទាក់ទងកាលពីម្សិលមិញ លោក អូសថេប ដូរ៉ូសិនកូ បាននិយាយថា លោកមិនយល់ថាតើហេតុអ្វីបានជាឪពុករបស់លោកជាអ្នករស់នៅទីនោះយូរមកហើយ និងមានសញ្ជាតិខ្មែរទៀតនោះ មិនត្រូវបានដោះលែង។
លោកបាននិយាយថា “នេះគឺជាសំណួរដែលខ្ញុំសួរគ្រប់ពេលវេលាថា ហេតុអ្វី?។ ឪពុករបស់ខ្ញុំជាពលរដ្ឋម្នាក់។ មួយជីវិតរបស់គាត់រស់នៅទីនេះ។ គាត់នឹងមិនរត់ទៅណាទេ”។
លោក ណាច ទ្រី មេធាវីតំណាងលោក ដូរ៉ូសិនកូ បានបដិសេធមិនធ្វើអត្ថាធិប្បាយអំពីការប្ដឹងទាស់នេះទេ។ នៅពេលលោក ដូរ៉ូសិនកូ ទទួលបានការដោះលែងឲ្យនៅក្រៅឃុំកាលពីថ្ងៃច័ន្ទ សាលាឧទ្ធរណ៍បានលើកឡើងថា ខ្លួននឹងដកហូតលិខិតឆ្លងដែន ឯកសារកាន់កាប់ដីធ្លី និងប្រាក់សុទ្ធមួយចំនួនមិនបញ្ជាក់ឲ្យដឹងដែលជាប្រាក់ធានានោះ។
នៅពេលត្រូវបានទាក់ទងកាលពីម្សិលមិញ លោក កាស្បា៉ សេកូទីន មេធាវីរបស់លោក ប៉ូលុនស្គី បានអះអាងថា ពីមុនលោកបានដាក់ពាក្យសុំឲ្យដាក់កម្រិតទៅលើការលក់អចលទ្រព្យរបស់លោក ដូរ៉ូសិនកូ ដែលអចលនទ្រព្យមួយចំនួនលោក ប៉ូលុនស្គី បានអះអាងសិទ្ធិ
កាន់កាប់នោះ ហើយបានរកឃើញថា មិនមានឈ្មោះគាត់នៅក្នុងបញ្ជីទៀតទេ។
លោក សេកូទីន បាននិយាយថា ” បញ្ហាគឺថា លោក នីកូឡៃ មិនមានអចលនទ្រព្យទេ។ ខ្ញុំបានឃើញប័ណ្ណកម្មសិទ្ធិដី ហើយគាត់បានផ្ទេរទៅឲ្យកូនប្រុសគាត់ទាំងអស់ដែលជាមន្ត្រីនគរបាល”។
រយៈពេលមួយឆ្នាំកន្លះកន្លងមក លោក ប៉ូលុនស្គី បានជាប់ពន្ធនាគារប៉េហ្ស៊ីដែលមានសន្តិសុខមិនសូវតឹងរ៉ឹងក្នុងរាជធានីភ្នំពេញរង់ចាំការនិរទេសទៅប្រទេសរុស្ស៊ីវិញ បន្ទាប់ពីលោកត្រូវបានចាប់ខ្លួននៅកោះរ៉ុងនៃក្រុងព្រះសីហនុ តាមសំណើរបស់ក្រុងមូស្គូ។
ទោះជាយ៉ាងណា បន្ទាប់ពីជាប់ពន្ធនាគារអស់៣ខែ សាលាឧទ្ធរណ៍បានសម្រេចដោះលែងលោក ប៉ូលុនស្គី ដែលបានបដិសេធសំណើសុំធ្វើបត្យាប័នរបស់ប្រទេសរុស្ស៊ី ជាសេចក្ដីសម្រេចដែលត្រូវបានអះអាងកាលពីខែមេសាឆ្នាំមុន ដោយតុលាការកំពូល៕ សារុន