27.1 C
Phnom Penh

អគ្គនាយក​​​នៃ​​​អគ្គនាយកដ្ឋាន​​​អន្តោប្រវេសន៍​​​ចោទ​​​ប្រកាន់​​​អង្គការ​​​សហប្រជា​​​ជាតិ​​​ថា រត់​​​ពន្ធ​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​

ដោយ ឌឹ ខេមបូឌា ដេលី

បទវិភាគ

អគ្គនាយក​​​នៃអគ្គនាយកដ្ឋាន​​​អន្តោប្រវេសន៍​​​ក្រសួង​​​មហាផ្ទៃ​​​ បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា​​​ លោក​​​មិន​​​ដឹង​​​ថា ពេល​​​នេះ​​​មាន​​​ជន​​​ស្វែងរក​​​សិទ្ធិ​​​ជ្រក​​​កោន​​​ម៉ុងតាញ៉ា​​​ចំនួន​​​៤០នាក់​​​កំពុង​​​រង់​​​ចាំ​​​ការ​​​ចុះឈ្មោះ​​​នៅ​​​ក្នុង​​​រាជ​​​ធានីភ្នំពេញ​​​នោះ​​​ទេ ហើយ​​​បាន​​​ចោទ​​​ប្រកាន់​​​ទី​​​ភ្នាក់​​​ងារ​​​ជន​​​ភៀស​​​ខ្លួន​​​របស់​​​អង្គការ​​​សហ​​​ប្រជា​​ជាតិ​​​ថា បាន​​​នាំ​​​ជន​​​អន្តោប្រវេសន៍​​​វៀតណាម​​​ចូល​​​មក​​​ប្រទេសកម្ពុជា​​​ដោយ​​​ខុស​​​ច្បាប់​​​។

នាយឧត្តម​​​សេនីយ៍​​​ សុខ ផល អគ្គនាយក​​​នៃ​​​អគ្គនាយកដ្ឋាន​​​អន្តោប្រវេសន៍​​​បាន​​​លើក​​​ឡើង​​​ថា លោក​​​គ្រាន់​​​តែ​​​ដឹង​​​ថា មាន​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​១៣នាក់​​​​​​ប៉ុណ្ណោះ​​​ដែល​​​រដ្ឋាភិបាល​​​​​​​​​បាន​​​​​​ត្រួត​​​ពិនិត្យ​​​ និង​​​ផ្តល់​​​ឋានៈ​​​ជា​​​ជន​​​ភៀសខ្លួន​​​រួច​​​រាល់ ទោះ​​​បី​​​ជា​​​អង្គការ​​​សហប្រជា​​​ជាតិ​​​បាន​​​​​​បញ្ជាក់​​​កាល​​​ពី​​​ម្សិលមិញ​​​ថា ​​​ពេល​​​នេះ​​​មាន​​​​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​​​​៤០នាក់​​​បន្ថែម​​​ទៀត​​​កំពុង​​​ស្ថិត​​​នៅ​​​ក្នុង​​​រាជ​​​ធានីភ្នំពេញ​​​ក្តី។

លោក​​​បាន​​​មានប្រសាសន៍​​​ថា “ខ្ញុំ​​​មិន​​​ដឹងរឿង​​​​​​ទេ​​​ចំពោះ​​​ការ​​​មក​​​ដល់​​​របស់​​​ជន​​​អន្តោប្រវេសន៍​​​វៀត​​​ណាម​​​ក្នុង​​​រាជ​​​ធានីភ្នំពេញ​​​។ យើង​​​មិន​​​ចាំ​​​បាច់​​​ស្រាវជ្រាវ​​​រក​​​ជន​​​អន្តោប្រវេសន៍​​​វៀត​​​ណាម​​​ទាំង​​​នោះ​​​ទេ ប៉ុន្តែ យើង​​​នឹង​​​ចាប់​​​ខ្លួន​​​អ្នក​​​ទាំង​​​នោះ​​​ បើ​​​យើង​​​ឃើញ​​​ពួកគេ​​​ ពីព្រោះ​​​ពួក​​​គេ​​​បាន​​​ឆ្លង​​​ព្រំដែន​​​ខុស​​​ច្បាប់​​​”។

នាយ​​​ឧត្តម​​​សេនីយ៍​​​រូប​​​េនះ​​​បាន​​​ចោទ​​​ប្រកាន់​​​ការិយាល័យ​​​ឧត្តមស្នង​​​ការ​​​អង្គការ​​​សហ​​​ប្រជា​​ជាតិ​​​​​​ទទួល​​​បន្ទុក​​​ជន​​​ភៀស​​​ខ្លួន​​​​​​ហៅ​​​កាត់ UNHCR ថា បាន​​​សម​​​គំនិត​​​ជាមួយ​​​ “ជន​​​អន្តោប្រវេសន៍​​​វៀតណាម​​​ខុសច្បាប់”។

លោក​​​​មាន​​​ប្រសាសន៍​​​ថា “ខ្ញុំ​​​គិត​​​ថា UNHCR ខុស​​​ហើយ​​​ ពីព្រោះ​​​ពួកគេ​​​បាន​​​នា​​​ំ​​​​​​ជន​​​អន្តោប្រវេសន៍​​​ចូល​​​មក​​​ [កម្ពុជា​​​]​​​​​​​​​…។ ច្បាប់​​​ចែង​​​ថា បុគ្គល​​​ណា​​​ដែល​​​បាន​​​សម​​​គំនិត​​​ជា​​​មួយ​​​ជន​​​អន្តោប្រវេសន៍​​​​​​​​​ត្រូវ​​​តែ​​​ទទួល​​​ការ​​​ផ្តន្ទាទោស​​​តាម​​​ច្បាប់​​​”។

លើក​​​ឡើង​​​ពី​​​អនុក្រឹត្យ​​​លេខ​​​២២៤​​​​​​របស់​​​រដ្ឋាភិបាល​​​ស្តី​​​ពី​​​ជន​​​ភៀសខ្លួន​​​ លោក​​​បាន​​​លើក​​​ឡើង​​​បន្ថែម​​​ទៀត​​​ថា “ខ្ញុំ​​​ស្នើ​​​ឲ្យ​​​អស់​​​លោក​​​ប្រាប់​​​ទៅ UNHCR ថា ពួកគេ​​​អាច​​​នឹង​​​មាន​​​​​​ទោស​​​ពីព្រោះ​​​ពួកគេ​​​បាន​​​នាំ​​​ជន​​​អន្តោប្រវេសន៍​​​វៀតណាម​​​ខុស​​​ច្បាប់​​​ចូល​​​មក​​​កម្ពុជា​​​ដោយ​​​មិន​​​បាន​​​ជូន​​​​​​ដំណឹងមក​​​​​​អាជ្ញាធរ​​​អំពី​​​ករណី​​​នេះ​​​”។

អនុក្រឹត្យ​​​នោះ​​​​​​មិន​​​មាន​​​ចែង​​​អំពី​​​បុគ្គល​​​ដែល​​​សម​​​គំនិត​​​ដឹក​​​ជញ្ជូន​​​ជន​​​អន្តោប្រវេសន៍​​​ខុស​​​ច្បាប់​​​​​​ចូល​​​ក្នុង​​​ប្រទេស​​​កម្ពុជា​​​ឡើយ ប៉ុន្តែ វា​​​ពិត​​​ជា​​​ចែង​​​ថា ក្រសួង​​​មហា​​​ផ្ទៃ​​​ “ត្រូវ​​​ធានា​​​កិច្ច​​​សហប្រតិបត្តិការ​​​ពេញ​​​លេញ​​​ជាមួយ UNHCR នៅ​​​ក្នុង​​​ការ​​​អនុវត្ត​​​បទ​​ប្បញ្ញត្តិ​​​នៃ​​​អនុក្រឹត្យ​​​នេះ”។

ការ​​​ហូរ​​​ចូល​​​ថ្មី​​​បំផុត​​​នូវ​​​ជន​​​ជាតិ​​​ដើម​​​ភាគ​​​តិច​​​របស់​​​វៀតណាម​​​ ដែល​​​ភាគ​​​ច្រើន​​​បាន​​​ឆ្លង​​​ដែន​​​ចូល​​​មក​​​ក្នុង​​​ស្រុក​​​អូរយ៉ាដាវ​​​ និង​​​ស្រុក​​​លំផាត់​​​ ខេត្ត​​​រតនគិរី​​​នេះ​​​ បាន​​​ចាប់​​​ផ្តើម​​​កាល​​​ពី​​​ចុង​​​ខែ​​​តុលា​​​។ ពួកគេ​​​ទាំង​​​អស់​​​សុទ្ធ​​​តែ​​​អះ​​​អាង​​​ថា រត់​​​គេច​​​ពី​​​ការ​​​ធ្វើ​​​ទុក្ខ​​​បុក​​​ម្នេញ​​​ខាង​​​ជំនឿ​​​សាសនា​​​ និង​​​នយោបាយ​​​នៅ​​​ក្នុង​​​ប្រទេស​​​កំណើត​​​របស់​​​ខ្លួន​​​។

ទោះ​​​ជា​​​យ៉ាង​​​ណា មន្ត្រី​​​ក្រសួង​​​មហាផ្ទៃ និង​​​មន្ត្រី​​​ខេត្ត​​​រតនគិរី​​​ បាន​​​ហៅ​​​​​​ជន​​​ជាតិ​​​ម៉ុងតាញ៉ា​​​ម្តង​​​ហើយ​​​ម្តង​​​ទៀត​​​​​ថា​​​ជា​​​ “ជន​​​អន្តោប្រវេសន៍​​​ខុស​​​ច្បាប់​​​” ដោយ​​​គំរាម​​​និរទេស​​​ពួកគេ​​​ និង​​​ចាប់​​​ខ្លួន​​​ប្រជា​​​ពល​​​រដ្ឋ​​​ខ្មែរ​​​ណា​​​ដែល​​​អាជ្ញាធរ​​​រក​​​ឃើញ​​​ថា បាន​​​លាក់​​​បំពួន​​​ពួក​​​គេ​​​។

អង្គការ​​​សហប្រជាជាតិ​​​បាន​​​ផ្ទេរ​​​ក្រុម​​​ជន​​​ជាតិ​​​ម៉ុង​​​តាញ៉ា​​​ដំបូង​​​ដែល​​​មាន​​​ចំនួន​​​១៣​​​នាក់​​​មក​​​កាន់​​​រាជ​​​ធានី​​​ភ្នំពេញ​​​កាល​​​ពី​​​ខែ​​​ធ្នូ​​​​​​ ហើយ​​​បាន​​​ប្រគល់​​​ពួកគេ​​​ឲ្យទៅ​​​នាយកដ្ឋាន​​​ជនភៀសខ្លួន​​​នៃ​​​ក្រសួង​​​មហាផ្ទៃ​​​ ដែល​​​បាន​​​ទទួល​​​ស្គាល់​​​ពួក​​​គេ​​​ជា​​​ជន​​​ភៀស​​​ខ្លួន​​​ផ្លូវ​​​ការ​​​ ពោល​​​គឺមិនដល់​​​មួយ​​​សប្តាហ៍​​​ផង​​​ទេ ក្រោយ​​​ពី​​​ជន​​​ជាតិ​​​ម៉ុង​​​តាញ៉ា​​​ចំនួន​​​៣៦​​​នាក់​​​ផ្សេង​​​ទៀត​​​ត្រូវ​​​បាន​​​ចាប់ខ្លួន​​​ និង​​​និរទេស​​​ចេញ​​​ ខណៈ​​​ពេល​​​ពួក​​​​​​គេ​​​ប៉ុន​​​ប៉ង​​​ធ្វើ​​​ដំណើរ​​​មក​​​កាន់​​​រាជ​​​ធានីភ្នំពេញ​​​។

កាល​​​ពីម្សិលមិញ លោកស្រី វីវៀន តាន (Vivian Tan) មន្ត្រី​​​ផ្នែក​​​ព័ត៌​​​មាន​​​ប្រចាំ​​​តំបន់​​​របស់​​​ UNHCR មិន​​​បាន​​​ឆ្លើយ​​​សំណួរ​​​ពាក់​​​ពន្ធ​​​នឹង​​​ការ​​​គំរាម​​​ផ្តន្ទាទោស​​​ពី​​​សំណាក់​​​នាយ​​​ឧត្តម​​​សេនីយ៍ សុខ ផល នោះ​​​ឡើយ​​​​​​។

ទោះ​​​ជា​​​យ៉ាង​​​ណា ទាំង​​​លោកស្រី វីវៀន តាន និង​​​លោកស្រី​​​ វ៉ាន ហៀលី (Wan-Hea Lee) តំណាង​​​ម៉ុង​​​តាញ៉ា​​​ UNHCR ប្រចាំ​​​ប្រទេសកម្ពុជា បាន​​​មាន​​​ប្រសាសន៍​​​ថា ពេល​​​េនះ​​​​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​ចំនួន​​​៤០នាក់​​​កំពុង​​​ស្ថិត​​​ក្នុង​​​រាជ​​​ធានីភ្នំពេញ​​​។

លោកស្រី វ៉ាន ហៀលី បាន​​​លើក​​​ឡើង​​​ក្នុង​​​អីុម៉េលថា “យើង​​​ដឹង​​​ថា មាន​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​ចំនួន​​​៤០នាក់​​​កំពុង​​​ស្ថិត​​​​​​នៅ​​​ក្នុង​​​រាជ​​​ធានី​​​ភ្នំពេញ​​​ រង់​​​ចាំ​​​ឲ្យ​​​នាយក​​​ដ្ឋាន​​​ជន​​​ភៀស​​​ខ្លួន​​​ចុះឈ្មោះ​​​។ ពួកគេ​​​កំពុង​​​ទទួល​​​បាន​​​ការ​​​មើល​​​ថែទាំ​​​ពី UNHCR និង​​​បណ្តា​​​អង្គការ​​​មិនមែន​​​រដ្ឋាភិបាល​​​។ យើង​​​ដឹង​​​ថា មាន​​​មួយ​​​ចំនួន​​​ទៀត​​​​​​នៅ​​​ក្នុង​​​ខេត្ត​​​រតនគិរី។ យើង​​​បន្ត​​​ធ្វើ​​​ការ​​​ស៊ូមតិ​​​ និង​​​ផ្តល់​​​ជំនួយ​​​ដើម្បី​​​ឲ្យ​​​ពួួក​​​គេ​​​​​​ឆ្លង​​​កាត់​​​ដោយ​​​សុវត្ថិភាព​​​ជាមួយ​​​អាជ្ញាធរ​​​ដែល​​​មាន​​​ការ​​​ទទួល​​​ខុស​​​ត្រូវ ដែល​​​ត្រូវ​​​ទទួល​​​ខុស​​​ត្រូវ​​​ចំពោះ​​​ការ​​​​​​ធានា​​​ការ​​​ឆ្លង​​​កាត់​​​ដោយ​​​សុវត្ថិភាព​​​”៕សុខុម (រាយការណ៍​​​បន្ថែម​​​ដោយ​​​ George Wright)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស