សន្យាឈរឈ្មោះជានាយករដ្ឋមន្ត្រីដោយជោគជ័យនៅឆ្នាំ២០១៨
កាលពីម្សិលមិញ លោក ហ៊ុន សែន បានប្រកាសថា លោកនឹងជំនួសតំណែងលោក ជា សីុម ជាប្រធានគណបក្សប្រជាជនកម្ពុជា ប្រសិនបើបុរសវ័យ៨០ឆ្នាំប្លាយដែលមានសុខភាពចុះខ្សោយរូបនេះទទួលមរណភាព ហើយបានសន្យារក្សាការក្តោបក្តាប់អំណាចរយៈបីទសវត្សរ៍របស់លោកក្នុងនាមជាបេក្ខភាពនាយករដ្ឋមន្ត្រីរបស់បក្សកាន់អំណាចនៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៨។
សុន្ទរកថាបែបនេះបានធ្វើឡើងក្រោយដំណើរទស្សនកិច្ចទៅកាន់ប្រទេសម៉ាឡេស៊ីកាលពីចុងសប្តាហ៍កន្លងទៅ ដែលក្នុងនោះលោក ហ៊ុន សែន បានធ្វើជាម្ចាស់កម្មវិធីក្នុងព្រឹត្តិការណ៍សាធារណៈមួយជាមួយលោក សម រង្ស៊ី ប្រធានគណបក្សប្រឆាំង ហើយបានលើកឡើងអំពីលទ្ធភាពដែលប្រធានគណបក្សសង្គ្រោះជាតិរូបនេះអាចនឹងជំនួសតំណែងលោកជានាយករដ្ឋមន្ត្រី។
ទោះជាយ៉ាងណាកាលពីម្សិលមិញ លោក ហ៊ុន សែន បានប្រកាសឧត្តមភាពរបស់លោកលើគណបក្សកាន់អំណាច ហើយបានច្រានចោលការប៉ាន់ស្មានណាមួយដែលលើកឡើងថា លោកមានគម្រោងប្រគល់អំណាចដែលលោកបានពង្រឹងដោយយកចិត្តទុកដាក់ចាប់តាំងពីក្លាយជានាយករដ្ឋមន្ត្រីកាលពីបីទសវត្សរ៍មុនមកនេះ។
លោកបានមានប្រសាសន៍នៅឯពិធីសម្ពោធរោងចក្រចម្រាញ់ដូងប្រេងរបស់ឧកញ៉ា ម៉ុង ឫទ្ធី សមាជិកព្រឹទ្ធសភាមកពីគណបក្សប្រជាជនកម្ពុជាថា “ក្នុងការដែលសម្តេច [ជា ស៊ីម] មរណកាល អ្នកដែលធ្វើជាប្រធានបក្ស គឺ ហ៊ុន សែន ។ បើ ហ៊ុន សែន មិនធ្វើជាប្រធាននៅថ្ងៃនេះ ក៏ដឹកនាំបក្សនេះរហូតទៅហើយ”។
លោកនាយករដ្ឋមន្ត្រីបានលើកឡើងបន្តថា លោកនឹងបន្តបួងសួងសុំឲ្យលោក ជា ស៊ីម មានសុខភាពល្អ ប៉ុន្តែថាគណបក្សប្រជាជនកម្ពុជា “រង់ចាំតែការបោះឆ្នោតប៉ុណ្ណោះ” ដើម្បីឲ្យលោកឡើងធ្វើជាប្រធានថ្មីជាផ្លូវការ។ លោកក៏បានមានប្រសាសន៍ដែរថា លោក សាយ ឈុំ អគ្គលេខាធិការគណបក្សប្រជាជនកម្ពុជានឹងជំនួសតំណែងលោក ជា ស៊ីម ជាប្រធានព្រឹទ្ធសភា។
ដោយសារតែគណបក្សប្រជាជនកម្ពុជាប្រឈមនឹងការគំរាមកំហែងធំបំផុតចំពោះប្រជាប្រិយភាពរបស់ខ្លួនចាប់តាំងពីការបោះឆ្នោតឆ្នាំ១៩៩៣ដែលទទួលបានការឧបត្ថម្ភ និងរៀបចំដោយអង្គការសហប្រជាជាតិមកនោះ លោក ហ៊ុន សែន បានសន្យាយកជ័យជម្នះលើគណបក្សសង្គ្រោះជាតិឲ្យបាននៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៨។ ក្រោយថ្លែងអំណរគុណលោក ជា ស៊ីម និងលោក ហេង សំរិន ប្រធានរដ្ឋសភាចំពោះការបន្តគាំទ្ររបស់លោកទាំងពីរឲ្យលោកធ្វើជាបេក្ខភាពនាយករដ្ឋមន្ត្រីរបស់បក្ស លោក ហ៊ុន សែន បានប្រាប់អ្នកចូលរួមកាលពីម្សិលមិញឲ្យ “ស្តាប់ឲ្យច្បាស់”។
លោកបានមានប្រសាសន៍យ៉ាងដូច្នេះថា “ហ៊ុន សែន កំពុងធ្វើជានាយករដ្ឋមន្ត្រីក្នុងអាណត្តិទី៥ ហើយ ហ៊ុន សែន នឹងឈ្នះក្នុងអាណត្តិទី៦។ គណបក្សប្រជាជននឹងឈ្នះម្តងទៀត។ ដោយសារតែគណបក្សប្រជាជនឈ្នះ ទើបយើងអាចរស់នៅជាមួយគ្នាបានសុខបែបនេះ”។
លោក ហ៊ុន សែន បានបញ្ជាក់ថា សង្គ្រាមនឹងផ្ទុះឡើង ប្រសិនបើលោកមិនជាប់ឆ្នោត។ លោកបានចោទសួរថា “មានចាំទេការផ្លាស់ប្តូរនៅឆ្នាំ១៩៧០ក្រោយផ្តួលរំលំសម្តេចព្រះ នរោត្តម សីហនុ ? សង្គ្រាមបានផ្ទុះឡើងទូទាំងប្រទេស។ អ៊ីចឹងទេ សូមបញ្ជាក់បេក្ខភាពអាណត្តិទី៦នៅតែជា ហ៊ុន សែន អត់មាននរណាមកជំនួសទេ”។
សុខភាពរបស់លោក ជា ស៊ីម វ័យ៨២ឆ្នាំ បានធ្លាក់ដុនដាបជាយូរមកហើយ។ ប្រធានគណបក្សប្រជាជនកម្ពុជារូបនេះបានខកខានការចូលរួមសមាជបក្សកាលពីខែមករាដោយសារតែលោកទៅព្យាបាលជំងឺក្នុងប្រទេសវៀតណាម។
ទោះជាយ៉ាងណា លោក ម៉ន ប៊ុននាង អ្នកនាំពាក្យព្រឹទ្ធសភា បានមានប្រសាសន៍កាលពីម្សិលមិញថា សុខភាពរបស់លោក ជា ស៊ីម គឺ “ធម្មតា”។ លោកបានបន្តថា “គាត់នៅតែដូចរាល់ថ្ងៃ គាត់ធម្មតាបែបនេះយូរឆ្នាំមកហើយ។ គាត់ពិសាអាហារបានធម្មតា ធ្វើការបានធម្មតា និងអានឯកសារបានធម្មតា”៕ សុខុម (រាយការណ៍បន្ថែមដោយ មិុច ដារ៉ា)