30 C
Phnom Penh

ជា​លើក​ដំបូង​ហើយ ដែល​ដី​គ្មាន​ព្រៃ​ឈើ​ច្រើន​លើស​ដី​មាន​ព្រៃ

ដោយ ឌឹ ខេមបូឌា ដេលី

បទវិភាគ

យោង​តាម​របាយការណ៍​មួយ​ដែល​ចេញ​នៅ​សប្តាហ៍​​នេះ​ដោយ​ទិន្នន័យ​អំពី​ការ​អភិវឌ្ឍ ហៅ​កាត់​ថា​អូ​ឌី​ស៊ី បាន​ឲ្យ​ដឹង​ថា ជា​លើក​ដំបូង​ហើយ​ចាប់​តាំងពី​ទិន្នន័យ​ផ្កាយ​រណប​អាច​រក​បាន​សម្រាប់​ប្រទេស​នេះ​បាន​បង្ហាញ​ថា ភាគរយ​នៃ​តំបន់​ដី​គោក​របស់​ប្រទេស​កម្ពុជា​ដែល​គ្រប​ដណ្តប់​ដោយ​ព្រៃ​ឈើ មាន​ទំហំ​តូច​ជាង​តំបន់​​នៃ​ដី​គ្មាន​ព្រៃ​គ្រប​ដណ្តប់។

របាយ​ការណ៍​របស់​ក្រុម​នេះ ដែល​ត្រូវ​បាន​ផ្សព្វ​ផ្សាយ​តាម​អីុនធឺណិត​កាលពី​ថ្ងៃ​ទី​១០​ ខែ​មេសា អម​ដោយ​ផែនទី​កំណត់​រយៈ​ពេល​របស់​ប្រទេស​នេះ​តាំង​ពី​ឆ្នាំ​១៩៧៣​មក បាន​និយាយ​ថា ទិន្នន័យ​ផ្កាយ​រណប​បង្ហាញ​ថា ចំនួន​តែ​៤៧,៧​ភាគរយ​នៃ​ផ្ទៃ​ដី​របស់​ប្រទេស​នេះ​គ្រប​ដណ្តប់​ដោយ​ព្រៃ​កាលពី​ឆ្នាំ​មុន (៨.៦៦០.១៥២​ហិកតា) ប្រៀបធៀប​ទៅ​នឹង៤៨,៤​ភាគ​រយ​ដែល​គ្មាន​ព្រៃ។ ផ្នែក​នៅ​សល់​គឺ​ជា​ផ្ទៃ​ទឹក។

ជា​ការ​ផ្ទុយ​ទាំង​ស្រុង កាលពី​ក្នុង​ឆ្នាំ​១៩៧៣ ចំនួន​៧២,១១​ភាគរយ​នៃ​ប្រទេស​នេះ គឺ​ត្រូវ​នឹង​១៣.០៩៦.១៤៨​ហិកតា គ្រប់​ដណ្តប់​ដោយ​ព្រៃ​ឈើ។

យោង​តាម​របាយការណ៍​នេះ​ឲ្យ​ដឹង​ថា “ព្រៃ​ក្រាស់” បាន​ថយ​ចុះ​ពី​៤២​ភាគរយ​មក​ត្រឹម​១៦​ភាគរយ នៅ​ចន្លោះ​ឆ្នាំ១៩៧៣​និង​ឆ្នាំ​២០១៤ ឯ​ចំនួន “ព្រៃ​ចម្រុះ” ដែល​រួម​មាន​វាល​ស្មៅ និង​សារពើ​រុក្ខជាតិ នៅ​សល់​ចំនួន​ប្រហែល​៣០​ភាគរយ។

រយៈ​ពេល​ប្រាំ​ឆ្នាំ​មក​ដល់​ឆ្នាំ​២០១៤ ឃើញ​មាន​ការ​កាប់​បំផ្លាញ​ព្រៃ​ឈើ​កើន​ឡើង​ជា​ខ្លាំង ដោយ​ភាគរយ​នៃ​គម្រប​ព្រៃ​ឈើ​បាន​ធ្លាក់​ចុះ​១២,៥​ភាគរយ ធៀប​នឹង​ការ​ធ្លាក់​ចុះ​២,៨៧​ភាគរយ នៅ​រវាង​ឆ្នាំ​២០០៤​និង​២០០៩។

ក្នុង​ឆ្នាំ​២០១៣ ក្រុម​ទិន្នន័យ​អំពី​ការ​អភិវឌ្ឍ​បាន​បោះ​ផ្សាយ​ផែនទី​បង្ហាញ​ថា ៤៦,៣​ភាគរយ​នៃ​តំបន់​ដី​គោក​របស់​ប្រទេស​នេះ​បាន​គ្រប​ដណ្តប់​ដោយ​ព្រៃ តិច​ជាង​៤៨,៤​ភាគរយ​នៅ​ក្នុង​ឆ្នាំ​២០១៤។

លោក ធី ទ្រី នាយក​ប្រតិបត្តិ ODC បាន​ពន្យល់​ថា នៅ​ពេល​ដែល​ទិន្នន័យ​ហាក់​ដូច​ជា​បង្ហាញ​កំណើន​គម្រប​ព្រៃ​ពី​ឆ្នាំ​២០១៣​ទៅ​ឆ្នាំ​២០១៤ ដុំ​ពពក​ដែល​ជា​ឧបសគ្គ​ចំពោះ​រូបភាព​ផ្កាយ​រណប​ក្នុង​ឆ្នាំ​២០១៣ បាន​ធ្វើ​ឲ្យ​ទិន្នន័យ​នៅ​ឆ្នាំ​នោះ​មិន​សូវ​ត្រឹម​ត្រូវ។

លោក ទ្រី បាន​និយាយ​តាម​រយៈ​សារ​អេឡិចត្រូនិក​កាលពី​ថ្ងៃ​ពុធ​ថា “តាម​ពិត នេះ​មិន​បង្ហាញ​កំណើន​គម្រប​ព្រៃ​ឈើ​នៅ​លើ​ដី​ទេ”។

លោក​បាន​និយាយ​ថា ជា​រួម ទិន្នន័យ​ផ្កាយ​រណប​គឺ​ជា​ភ័ស្តុតាង​ថា ព្រៃ​របស់​ប្រទេស​នេះ​កំពុង​ត្រូវ​រេច​រិល​។

លោក​បាន​មាន​ប្រសាសន៍​ថា “និន្នាការ​ជា​រួម​ដែល​បង្ហាញ​ក្នុង​ការ​វិភាគ​របស់​យើង គឺ​មាន​ការ​កាប់​បំផ្លាញ​ព្រៃ​ឈើ​រយៈ​ពេល​យូរ​និង​កំពុង​បន្ត​នៅ​ប្រទេស​កម្ពុជា ជា​ពិសេស​នៅ​តំបន់​ព្រៃ​ក្រាស់​តែ​ម្តង”៕​ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស