27 C
Phnom Penh

គ្រោះ​ថ្នាក់​ដាច់​កន្ត្រក​យោង​នៅ​ការដ្ឋាន​សំណង់​ស្លាប់​មនុស្ស​បី​នាក់

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បាន​និយាយ​ថា បុរស​បី​នាក់​បាន​ស្លាប់​កាលពី​ថ្ងៃ​ព្រហស្បតិ៍ និង​ម្នាក់​រង​របួស​ធ្ងន់ ពេល​ដែល​ខ្សែ​កាប​កន្ត្រក​យោង​ដែល​ពួកគេ​ជិះ​នៅ​ឯ​ការ​ដ្ឋាន​សំណង់​អគារ​ខ្ពស់​ក្នុង​ខណ្ឌ​ចំការ​មន ក្រុង​ភ្នំពេញ​បាន​ដាច់ ដែល​បណ្តាល​ឲ្យ​ពួកគេ​ធ្លាក់​ចុះ​ក្រោម​បួន​ជាន់។

លោក ប៊ិន សូឈី អនុប្រធាន​មន្ទីរ​រៀបចំ​ដែន​ដី នគរូបនីយ​កម្ម និង​សំណង់​រាជធានី​ភ្នំពេញ​ បាន​និយាយ​ថា អ្នក​ស្លាប់​ពីរ​នាក់​ជា​កម្មករ​សំណង់​នៅ​ការដ្ឋាន​នោះចំណែក​អ្នក​ស្លាប់​ទី​៣​ជា​អ្នក​លក់​កាហ្វេ​នៅ​កន្លែង​នោះ ដែល​ជិះ​កន្ត្រក​ចុះ​ពីរ​ការ​យក​កាហ្វេ​ទៅ​ឲ្យ​កម្មករ​នៅ​លើ​លោក សូឈី បាន​និយាយ​ថា “ខ្សែ​កាប​កន្ត្រក​យោង​បាន​ដាច់​នៅ​ជាន់​ទី៤។ កន្ត្រក​យោង​នោះ​គឺ​សម្រាប់​តែ​ដឹក​សម្ភារ​ទេ។ គេ​មិន​អនុញ្ញាត​ឲ្យ​មនុស្ស​ប្រើ​ទេ”។

មន្ត្រី​នគរបាល​ពិនិត្យ​កន្ត្រក​យោង​ ដែល​បាន​ដាច់ធ្លាក់​ពី​ជាន់​ទី​១៤​ ក្នុង​ការដ្ឋាន​សំណង់​មួយ​កន្លែង​នៅ​ក្នុង​ខណ្ឌ​ចំការមន​ ក្រុង​ភ្នំ​ពេញ​ កាលពី​ម្សិលមិញ ធ្វើ​ឲ្យ​កម្មករ​បី​នាក់​ស្លាប់​។ រូប​ថត​ៈ ស៊ីវ ចាន់​ណា
មន្ត្រី​នគរបាល​ពិនិត្យ​កន្ត្រក​យោង​ ដែល​បាន​ដាច់ធ្លាក់​ពី​ជាន់​ទី​១៤​ ក្នុង​ការដ្ឋាន​សំណង់​មួយ​កន្លែង​នៅ​ក្នុង​ខណ្ឌ​ចំការមន​ ក្រុង​ភ្នំ​ពេញ​ កាលពី​ម្សិលមិញ ធ្វើ​ឲ្យ​កម្មករ​បី​នាក់​ស្លាប់​។ រូប​ថត​ៈ ស៊ីវ ចាន់​ណា

បុរស​ពីរ​នាក់ គឺ​កម្មករ​សំណង់​ម្នាក់​និង​អ្នក​លក់​កាហ្វេ​ម្នាក់ បាន​ស្លាប់​ភ្លាមៗ​នៅ​កន្លែង​កើតហេតុ។ ពីរ​អ្នក​ផ្សេងទៀត​ត្រូវ​គេ​ដឹក​ទៅ​មន្ទីរ​ពេទ្យ​មិត្តភាព​កម្ពុជា សូវៀត ដែល​នៅ​ទី​នោះ​ម្នាក់​បាន​ស្លាប់​ដោយសារ​របួស​ធ្ងន់​ពេក​នា​ពេល​រសៀល។ បុរស​ម្នាក់​ទៀត​ស្ថិត​ក្នុង​ស្ថានភាព​ធ្ងន់​នៅ​ឡើយ​នៅ​ថ្ងៃ​ព្រហស្បតិ៍។

លោក សូឈី និង​មន្ត្រី​ប៉ូលិស​ខណ្ឌ​ដែល​អង្កេត​ករណី​នេះ​បាន​និយាយ​ថា គេ​មិន​ស្គាល់​ឈ្មោះ​ក្រុមហ៊ុន​នៅ​ពី​ក្រោយ​គម្រោង​សំណង់ ឬ​ម្ចាស់​នៃ​អគារ​មាន​១១​ជាន់​នេះ​ទេ។

នៅ​មន្ទីរ​ពេទ្យ​មិត្តភាព​ខ្មែរ សូវៀត សាច់​ញាតិ​បាន​ប្រាប់​ភិនភាគ​អ្នក​ស្លាប់ ខណៈ​ដែល​ប៉ូលិស​ពិនិត្យ​នៅ​ក្រៅ​កន្លែង​ដាក់​សព។

អ្នក​ស្រី ទិត សូវិន អាយុ​៤៥​ឆ្នាំ បាន​និយាយ​ថា កូន​ប្រុស វ៉ាន់ សារឿន អាយុ​១៨​ឆ្នាំ​របស់​អ្នក​ស្រី បាន​បាក់​ក បាក់​ជើង​ទាំង​ពីរ និង​ដៃ​ស្តាំ ហើយ​បាន​ស្លាប់​នៅ​មន្ទីរ​ពេទ្យ។

អ្នក​ស្រី សូវិន ដែល​ធ្វើការ​នៅ​ការដ្ឋាន​សំណង់​នោះ​ដែរ រួម​ជាមួយ​ប្តី​និង​កូន​បួន​នាក់​ផ្សេងទៀត បាន​និយាយ​ថា “យើង​មក​ពី​ខេត្ត​ព្រៃវែង​ធ្វើ​ការ​ចិញ្ចឹម​ជីវិត​នៅ​ទី​នេះ។ ឥឡូវ​នេះ ខ្ញុំ​មិន​ដឹង​ធ្វើ​យ៉ាង​ម៉េច​ទេ”។

អ្នក​ស្រី កង ចន្ធូរ អាយុ​៤១​ឆ្នាំ បាន​និយាយ​ថា ប្តី​របស់​គាត់ ឈ្មោះ លី ឡុង អាយុ​៤១​ឆ្នាំ​ដែរ មក​កន្លែង​ការដ្ឋាន​នេះ​រាល់​ថ្ងៃ​ដើម្បី​លក់​កាហ្វេ​ឲ្យ​កម្មករ។

អ្នក​ស្រី​បាន​និយាយ​ទាំង​ស្រក់​ទឹក​ភ្នែក​ថា “ឱ ព្រះ​អើយ ទើប​អាយុ​បាន​ប៉ុណ្ណឹង គាត់​ស្លាប់​ទៅ​ហើយ។ ឱ ព្រះ​អើយ គ្មាន​អ្នកណា​រកស៊ី​ចិញ្ចឹម​កូនៗ​ទេ​ឥឡូវនេះ”។

មិត្ត ស៊ី បាន​និយាយ​ថា បង​ប្រុស មិត្ត សឿង អាយុ​១៦​ឆ្នាំ​របស់​គាត់ ដែល​ស្លាប់​ពេល​ដាច់​កន្ត្រក​យោង​នោះ បាន​ចាប់​ផ្តើម​ធ្វើការ​នៅ​ការដ្ឋាន​នេះ​ទើបតែ​បាន​បួន​ថ្ងៃ​ទេ។

យោង​តាម​លោក ញ៉ែម អឿង ឪពុក​របស់​ជន​រងគ្រោះ ឈ្មោះ អាត ហ៊ាប អាយុ​១៨​ឆ្នាំ ជា​អ្នក​នៅ​រស់​តែ​ម្នាក់​ពី​គ្រោះ​ថ្នាក់​នេះ​បាន​ឲ្យ​ដឹង​ថា កូន​របស់​គាត់​រើប​ពី​ការ​ដាច់​ដៃ​ស្តាំ និង​បាក់​ក​ជើង​ទាំង​ពីរ។

គាត់​បាន​និយាយ​ថា “ក្រុម​វេជ្ជបណ្ឌិត​បាន​ប្រាប់​ខ្ញុំ​ថា មាន​សង្ឃឹម​តិចតួច​ណាស់ ពីព្រោះ​វា​រង​របួស​ធ្ងន់​ពេក។ កូន​ប្រុស​របស់​ខ្ញុំ​នឹង​ត្រូវ​ពិការ ហើយ​ខ្ញុំ​មិន​ដឹង​ថា វា​អាច​ធ្វើ​ការ​អី​បាន​ទេ បើ​វា​រស់​នោះ”។

រដ្ឋាភិបាល​មិន​បាន​តាម​ឲ្យ​ទាន់​វិស័យ​​សំណង់​កំពុង​រីក​ដុះដាល ដែល​នៅ​តែ​ជា​ផ្នែក​គ្មាន​និយតកម្ម​ត្រឹម​ត្រូវ ថ្វីបើ​វា​ជា​កត្តា​ជំរុញ​ដ៏​សំខាន់​មួយ​នៃ​ការ​វិនិយោគ​បរទេស​ក្នុង​ប្រទេស​នេះ​ក្តី ដោយ​ទុក​ឲ្យ​ក្រុមហ៊ុន​សំណង់​នានា​មើល​ខុស​ត្រូវ​ខ្លួន​ឯង។

លោក សូឈី បាន​និយាយ​ថា សំណង់​ត្រូវ​បាន​ផ្អាក​នៅ​ការដ្ឋាន​នោះ​កាលពី​ថ្ងៃ​ព្រហស្បតិ៍ រង់ចាំ​ការ​ស៊ើប​អង្កេត​ពី​អាជ្ញាធរ ប៉ុន្តែ​ថា មន្ទីរ​របស់​លោក​មិន​ទទួល​ខុស​ត្រូវ​ចំពោះ​ការ​ចុះ​ពិនិត្យ​សុវត្ថិភាព​ទេ។

លោក​បាន​និយាយ​ថា “យើង​ពិនិត្យ​ការ​អនុញ្ញាត​ច្បាប់ និង​លក្ខណៈ​បច្ចេក​ទេស។ [សុវត្ថិភាព] ជា​កិច្ចការ​របស់​ក្រុមហ៊ុន”។

ឧបទ្ទវ​ហេតុ​កាលពី​ថ្ងៃ​ព្រហស្បតិ៍​គឺ​ជា​លើក​ទី២​ហើយ​ក្នុង​សប្តាហ៍​នេះ ដែល​ការដ្ឋាន​សំណង់​ត្រូវ​បាន​បិទ​ក្នុង​ក្រុង​ភ្នំពេញ បន្ទាប់ពី​មាន​គ្រោះ​ថ្នាក់​ស្លាប់​មនុស្ស​ម្នាក់។

កម្មករ​សំណង់​អាយុ​២០​ឆ្នាំ​ម្នាក់​បាន​ស្លាប់​ក្នុង​ខណ្ឌ​ទួលគោក ក្នុង​ក្រុង​ភ្នំពេញ​កាលពី​ថ្ងៃ​អង្គារ នៅ​ពេល​ដែល​ខ្សែក្រវាត់​សុវត្ថិភាព​​​របស់​ជន​រងគ្រោះ​​ដាច់​ធ្វើ​ឲ្យ​ជន​រងគ្រោះ​​ធ្លាក់​ពី​ជាន់ទី៧​មក​ដល់​ដី។

លោក ឡេង តុង ប្រធាន​នាយកដ្ឋាន​ពេទ្យ​ការងារ នៃ​ក្រសួង​ការងារ និង​បណ្តុះ​បណ្តាល​វិជ្ជាជីវៈ បាន​និយាយ​ថា ក្រសួង​នឹង​ចាប់​ផ្តើម​ពិនិត្យ​ការដ្ឋាន​សំណង់​ធំៗ​នៅ​ពេល​ណាមួយ​ក្នុង​ខែ​នេះ។

លោក​បាន​និយាយ​ថា “ឥឡូវ​នេះ មាន​គ្រោះ​ថ្នាក់​កាន់​តែ​ច្រើន​ឡើង។ ដូច្នេះ រដ្ឋ​មន្ត្រី​កំពុង​ជំរុញ​យើង​ឲ្យ​ចាប់​ផ្តើម​ត្រួត​ពិនិត្យ”៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស