30 C
Phnom Penh

អ្នក​ភូមិខេត្ត​ស្ទឹងត្រែង​​ទទួលយក​ការផ្តល់សំណង​ជា​ដីថ្មី​​ដើម្បី​ចាកចេញ​ពី​កន្លែង​សាង​សង់​ទំនប់​វារី​អគ្គិសនី​

ដោយ ឌឹ ខេមបូឌា ដេលី

បទវិភាគ

អ្នកភូមិ​៧០គ្រួសារ​នៅក្នុង​ខេត្ត​ស្ទឹង​ត្រែង​ កាលពី​ថ្ងៃសៅរ៍​បានទទួលយក​ការ​ផ្តល់​សំណង​​ជា​ដីថ្មីរបស់​រដ្ឋាភិបាល​ផ្លូវ​ការ​​​ចំពោះ​​ស្រែចម្ការ​ដែលពួកគាត់​បាន​បាត់បង់​ដោយសារ​​ទំនប់វារី​អគ្គិសនី​សេសាន​២​កំពុង​សាងសង់​​​ ជាការ​ទទួលយក​សំណង​លើក​ដំបូង។

យ៉ាង​ហោច​ណាស់ អ្នកភូមិ​១៦គ្រួសារ​ក្នុង​ចំណោម​អ្នក​ភូមិ​​ប្រហែល​៨០០គ្រួសារ​​​ត្រូវ​បាន​បណ្តេញ​ចេញ​ដើម្បី​បើក​ផ្លូវ​សម្រាប់​ការ​សាង​សង់​ទំនប់​វារី​អគ្គិសនី​កម្លាំង​៤០០​មេហ្គា​វ៉ាត់​នោះ បានទទួល​យក​សំណង​ជា​ប្រាក់​រួច​ហើយ​រហូត​ដល់​​២០.០០០ដុល្លារ​។

ប៉ុន្តែ​ លោក ដួង​ ពៅ អភិបាល​រង​ខេត្ត​​បាន​មាន​ប្រសាសន៍​កាលពី​ម្សិលមិញ​ថា អ្នកភូមិ​​៧០​គ្រួសារ​មកពី​ភូមិស្រែ​ស្រណុក និង​ភូមិ​ជ្រាប់​គឺ​ជា​អ្នកភូមិ​ដំបូង​ដែលទទួលយក​សំណង​​ជា​ដី នៅ​កន្លែង​តាំងទី​លំនៅ​ថ្មី ដែល​ក្នុងមួយ​គ្រួសារ​ៗ​ទទួលបានដី​ទំហំ​៥ហិកតា​ និង​ដីសម្រាប់​សង់​លំនៅ​ដ្ឋាន​ទំហំ​​២០ម៉ែត្រ​គុណនឹង​៥០ម៉ែត្រ។

លោក​បាន​មាន​ប្រសាសន៍ថា គ្រួសារ​អ្នកភូមិ​​ក៏មាន​ជម្រើស​ក្នុងការ​ទទួលយក​ប្រាក់​ចំនួន​៦.០០០ដុល្លារ​ដើម្បី​សង់​ផ្ទះ​ថ្មី​នៅនឹង​កន្លែង​ ឬ​ផ្ទះថ្មី​ដែលត្រូវ​បានសាងសង់​សម្រាប់ពួកគាត់​ដោយ​ក្រុមហ៊ុន​ចិន​នៅពី​ក្រោយ​ទំនប់វារី​អគ្គិសនី Hydrolancang International Energy។

មិន​ថាជម្រើស​មួយ​ណាដែលពួកគាត់​ទទួល​យក​នោះទេ គ្រួសារ​អ្នកភូមិ​​នឹង​ទទួលបាន​សំណង​​សម្រាប់​របស់របរ​​នៅ​សេស​សល់​ផ្សេង​ៗ​ទៀត ហើយ​នឹង​ចាក​ចេញ​នៅ​ដើម​ខែ​ក្រោយ​នេះ។

លោក​បានមាន​ប្រសាសន៍​ថា “​ពួកគាត់​ត្រូវបាន​ផ្តល់​សំណងសម្រាប់​ដំណាំ​ហូប​ផ្លែ ផ្ទះ​សំបែង ទ្រុង​ជ្រូក​ ក្រោល​គោ និង​របស់​របរ​នៅ​សេស​សល់​ផ្សេង​ៗ​ទៀត​ផងដែរ”។

ដោយ​ការ​សាង់​សង់​ទំបន់វារីអគ្គិសនី​នេះ​បាន​២៨ភាគរយ​ហើយ​នោះ លោក​ ពៅ បាន​មាន​ប្រសាសន៍ថា គ្រួសារ​អ្នកភូមិ​គ្មាន​ជម្រើស​ក្រៅ​ពី​ចាកចេញ​ឡើយ។ លោក​បាន​មាន​ប្រសា​សន៍​ថា “​ទំបន់វារីអគ្គិសនី​នេះ​ត្រូវ​ដំណើរការ​ទៅមុខ។ វាមិន​អាច​ឈប់បានឡើយ”។

លោក ជា ខេង បាននិយាយ​ថា គ្រួសារ​របស់លោក​​ស្ថិត​ក្នុង​ចំណោម​អ្នកភូមិ​៧០គ្រួសារ​​ដែល​ទទួល​យក​​ការ​ផ្តល់​ដីនេះ ហើយ​បានចូលរួម​​ក្នុង​ពិធី​ដែលពួកគាត់​ទាំងអស់​​ទទួលយក​​ដីថ្មី​តាមរយៈ​ការ​ចាប់​ឆ្នោត​។

លោក​បាននិយាយ​ថា ពួកគាត់​​មិន​ចង់​ចាក​ចេញ​ទេ ប៉ុន្តែ​ខ្លាចត្រូវ​គេ​បង្ខំ​ឲ្យ​ចាក​ចេញ ហើយ​ថា មាន​អ្នកភូមិ​​១០០គ្រួសារ​ទៀត​​នៅក្នុង​ភូមិ​របស់លោក​​ដែល​ក៏បាន​ចុះ​ហត្ថលេខា​សម្រាប់​កិច្ច​ព្រម​ព្រៀង​នេះ​ផង​ដែរ។

លោក​បាននិយាយ​ថា “​អ្នកភូមិ​​បាន​យល់ព្រម​ចាក​ចេញ​ ពីព្រោះ​រដ្ឋាភិបាល​កំពុង​សាង​សង់​ទំនប់វារី​អគ្គិសនី​នេះ។ យើង​បារម្ភពី​ការ​ជន់​លិច។ យើង​គ្មាន​ជម្រើស​ឡើយ”។

ដីទំហំ​៥ហិកតា​នឹង​ធំជាង​ដី​ទំហំ​១,៥​ហិកតា​ដែល​លោក​មាន​ក្នុង​ពេល​ឥឡូវ​នេះ។ ប៉ុន្តែ​​លោក ខេង​ មិន​ទាន់​បាន​ឃើញ​កន្លែងដី​ថ្មី​នៅ​ឡើយ​ទេ ហើយ​លោក​បារម្ភថា វា​ប្រហែល​ជាដី​គ្មានជី​ជាតិ ជាការ​ត្អូញ​ត្អែរ​ដែល​អ្នកត្រូវ​បាន​បណ្តេញចេញ​ផ្សេង​ទៀត​​នៅក្នុង​ប្រទេស​កម្ពុជា​​ជួប​ប្រទះ​នៅ​កន្លែង​តាំង​ទី​លំនៅ​ថ្មី​។

លោក គឹម ឌឿង​ បាននិយាយ​ថា អ្នកភូមិ​មិនដល់​​ពាក់កណ្តាល​ផង​ក្នុង​ចំណោម​អ្នកភូមិ​១៣០គ្រួសារ​​ក្នុង​ភូមិ​របស់លោក​ទទួលយក​​ការ​ផ្តល់សំណង​ជា​ប្រាក់ និង​ដីថ្មី​របស់រដ្ឋាភិបាល ប្រសិន​បើ​រដ្ឋាភិបាល​យល់ព្រម​ផ្តល់​សំណង​ជា​ប្រាក់​បន្ថែមទៀត​ដល់​ពួកគាត់។ លោក​មិន​បាន​និយាយថា​ តើ​ពួកគាត់​ចង់បាន​ប៉ុន្មាន​នោះឡើយ។

លោក​បានិយាយ​ថា ចំពោះ​អ្នកនៅ​សេស​សល់ ​”ពួកគាត់​​បារម្ភពីការ​បាត់​បង់​​ការ​ធ្វើ​ស្រែ​ចម្ការ​តាម​ប្រពៃណី​ ការ​ធ្វើ​កសិកម្ម​​ពនេចរ ការ​បាត់បង់​ផ្នូរ​ដូនតារបស់ខ្លួន​ជាដើម…។ ពួក​គាត់​សុខ​ចិត្ត​ស្លាប់​ក្នុង​​ទឹក​ជំនន់”៕ សារុន​​​​​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស