34 C
Phnom Penh

ក្រុមហ៊ុន​សង​​​​សំណង​​​ដល់​​​ក្រុម​គ្រួសារ​ជន​រងគ្រោះ​ក្នុង​ការ​ដាច់​កន្ត្រក​យោង

ដោយ ឌឹ ខេមបូឌា ដេលី

បទវិភាគ

សមាជិក​គ្រួសារ​នៃ​ជន​រង​គ្រោះ​ស្លាប់​បី​នាក់​ដោយសារ​គ្រោះ​ថ្នាក់​ដាច់​កន្ត្រក​យោង​នៅ​ការដ្ឋាន​សំណង់​មួយ​ក្នុង​ក្រុង​ភ្នំពេញ​កាលពី​សប្តាហ៍​មុន បាន​​​​និយាយ​កាលពី​ថ្ងៃ​អាទិត្យ​ថា ពួកគេ​បាន​ទទួល​យក​សំណង​ពី​ក្រុមហ៊ុន​សំណង់ ហើយ​មិន​ដាក់​ពាក្យ​បណ្តឹង​ទៅ​បូ៉លិស​ទេ។

បុរស​បួន​នាក់​បាន​ជិះ​កន្ត្រក​យោង​នៅ​អគារ​ខុនដូ​កម្ពស់​១១​ជាន់ ក្នុង​សង្កាត់​ទួល​ទំពូង​២ ខណ្ឌ​ចំការ​មន កាលពី​ព្រឹក​ថ្ងៃ​ព្រហស្បតិ៍ ពេល​នោះ​ស្រាប់តែ​ដាច់​ខ្សែ​​កាប ដោយ​បណ្តាល​ឲ្យ​ពួកគេ​ធ្លាក់​ចុះ​ក្រោម​បួន​ជាន់។

មន្ត្រី​នគរបាល​ឈរ​ក្បែរ​ការដ្ឋាន​សំណង់​មួយ​កន្លែង​នៅ​ក្នុង​ក្រុង​ភ្នំ​ពេញ​ ដែល​មាន​បុរស​៣​នាក់​បាន​ស្លាប់​ដោយ​សារ​ខ្សែ​កន្ត្រក​យោង​បាន​ដាច់​ធ្លាក់​ កាលពី​ថ្ងៃ​ព្រហស្បតិ៍។ រូប​ថត​ៈ ស៊ីវ​ ចាន់​ណា​
មន្ត្រី​នគរបាល​ឈរ​ក្បែរ​ការដ្ឋាន​សំណង់​មួយ​កន្លែង​នៅ​ក្នុង​ក្រុង​ភ្នំ​ពេញ​ ដែល​មាន​បុរស​៣​នាក់​បាន​ស្លាប់​ដោយ​សារ​ខ្សែ​កន្ត្រក​យោង​បាន​ដាច់​ធ្លាក់​ កាលពី​ថ្ងៃ​ព្រហស្បតិ៍។ រូប​ថត​ៈ ស៊ីវ​ ចាន់​ណា​

ពីរ​នាក់​ក្នុង​ចំណោម​ពួកគេ ជា​កម្មករ​សំណង់​ឈ្មោះ វ៉ាន់ សារឿន អាយុ​១៨​ឆ្នាំ និង លី ឡុង អ្នក​លក់​កាហ្វេ អាយុ​៤១​ឆ្នាំ បាន​ស្លាប់​ភ្លាមៗ​នៅ​នឹង​កន្លែង ចំណែក​កម្មករ​ម្នាក់​ទៀត ឈ្មោះ មិត្ត សឿង អាយុ​១៦​ឆ្នាំ បាន​ស្លាប់​នៅ​មន្ទីរ​ពេទ្យ​មិត្តភាព​ខ្មែរ សូវៀត ដោយសារ​របួស​ធ្ងន់​ពេក។ មាន​តែ អាត ហ៊ាប ជា​កម្មករ​សំណង់​អាយុ​១៨​ឆ្នាំ​ប៉ុណ្ណោះ នៅ​មាន​ជីវិត។ ដៃ​ស្តាំ​របស់​គាត់​ដាច់​ក្នុង​គ្រោះ​ថ្នាក់​នោះ ហើយ​គាត់​ស្ថិត​ក្នុង​ស្ថានភាព​ធ្ងន់ធ្ងរ​នៅ​ឡើយ​នៅ​ក្នុង​មន្ទីរ​ពេទ្យ។

លោក អុឹង ដារ៉ា មេប៉ុស្តិ៍នគរបាលសង្កាត់​បាន​និយាយ​ថា ក្រុមហ៊ុន​សំណង់​បាន​សង​​​​សំណង​​​ដល់​​​គ្រួសារ​សព និង​លោក ហ៊ាប។ លោក​បាន​និយាយ​ថា លោក​មិន​ស្គាល់​ឈ្មោះ​ក្រុមហ៊ុន​នោះ ឬ​ចំនួន​ប្រាក់​សំណង​ប៉ុន្មាន​ត្រូវ​គេ​បង់​នោះ​ទេ។

លោក ប៊ិន សូឈី អនុប្រធាន​មន្ទីរ​រៀបចំ​ដែន​ដី នគរូប​នីយ​កម្ម និង​សំណង់​រាជធានី​ភ្នំពេញ បាន​និយាយ​ថា លោក​ក៏​មិន​ស្គាល់​ឈ្មោះ​ក្រុមហ៊ុន​នោះ​ដែរ។ លោក​បាន​និយាយ​ថា “ការដ្ឋាន​សំណង់​បិទ​ទ្វារ​រហូត​ទាល់តែ​ករណី​នេះ​ត្រូវ​បាន​ដោះស្រាយ​រួច​រាល់”។

សេចក្តី​ប្រកាស​ព័ត៌មាន​មួយ​ដាក់​លើ​ទំព័រ​ហ្វេសប៊ុក​របស់​នាយកដ្ឋាន​នេះ បាន​ឲ្យ​ដឹង​ថា ម្ចាស់​អគារ​នោះ ឈ្មោះ អុឹង ជុន​​​កេង​​​។

លោក ញ៉ែម អឿង អាយុ​៥៨​ឆ្នាំ ជា​ឪពុក​របស់​ជន​រងគ្រោះ ឈ្មោះ អាត ហ៊ាប បាន​និយាយ​កាលពី​ថ្ងៃ​អាទិត្យ​ថា តំណាង​ម្នាក់​របស់​ក្រុមហ៊ុន​សំណង់​នេះ​បាន​បង់​ប្រាក់​៨.០០០​ដុល្លារ​ឲ្យ​គ្រួសារ​លោក​កាលពី​ថ្ងៃ​សៅរ៍។

លោក​បាន​និយាយ​ថា “ខ្ញុំ​បាន​សម្រេច​ចិត្ត​ថា [មិន​ប្តឹង​] ទៅ​ប៉ូលិស​ទេ​ ពីព្រោះ​ក្រុម​ហ៊ុន​នេះ​ បាន​ផ្តល់​សំណង​ដើម្បី​ចំណាយ​លើការ​ព្យាបាល​កូន​ប្រុស​របស់​ខ្ញុំ​៉​”។

មួន ភឿក អាយុ​២៩ឆ្នាំ ជា​បង​ស្រី​របស់​ មិត្ត​ សឿង បាន​និយាយ​ថា ក្រុមហ៊ុន​បាន​បង់​ប្រាក់​ឲ្យ​គាត់​១៥.០០០​ដុល្លារ ពេល​ល្ងាច​កាលពី​គ្រោះ​ថ្នាក់​នោះ និង​៧០០​ដុល្លារ​ទៀត​ដើម្បី​ចំណាយ​ធ្វើ​បុណ្យ​សព​ និង​សោហុ៊យ​ដឹក​ជញ្ជូន​សព​ប្អូន​ប្រុស​របស់​នាង​ទៅ​ផ្ទះ​នៅ​ខេត្ត​កំពង់ធំ​។

អ្នក​ស្រី​ កង ចន្ធូ អាយុ​៤១​ឆ្នាំ​ ជា​ភរិយា​របស់ លី ឡុង បាន​និយាយ​ថា ក្រុមហ៊ុន​បាន​ឲ្យ​នាង​តិច​ណាស់​ គឺ​បាន​ត្រឹម​តែ​១.១០០ដុល្លារ​ទេជា​សំណង​សម្រាប់​ការស្លាប់​អ្នក​លក់​កាហ្វេ​។

អ្នក​ស្រី​បាន​និយាយ​ថា “[ក្រុមហ៊ុន]​ បាន​និយាយ​ថា ប្តី​របស់​ខ្ញុំ​មិន​មែន​ធ្វើ​ការ​នៅ​ការដ្ឋាន​នេះ​ទេ ហើយ​មិន​គួរ​ស្ថិត​នៅ​ការដ្ឋាន​នោះ​ឡើយ​”។

សមាជិក​គ្រួសារ​ទាំង​អស់​បាន​និយាយ​ថា ពួកគេ​ត្រូវ​បាន​គេប្រាប់​មិន​ឲ្យ​ប្រាប់​ឈ្មោះ​ក្រុម​ហ៊ុន​សំណង់​ទេ​ ហើយ​មិន​មាន​គម្រោង​ដាក់​ពាក្យ​បណ្តឹង​ទៅ​ប៉ូលិស​ឡើយ​។ សាច់​ញាតិ​របស់​ វ៉ាន់ សារឿន មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​។

លោក ជា ម៉េត​ ព្រះរាជ​អាជ្ញា​រង​តុលាការ​ក្រុង​ ដែល​បាន​ចុះ​ទៅពិនិត្យ​ការដ្ឋាន​សំណង់​កាលពី​ថ្ងៃ​ព្រហស្បតិ៍ បាន​និយាយ​កាល​ពី​ថ្ងៃអាទិត្យ​ថា បើ​ទោះ​ជា​គ្រួសារ​របស់​ជន​រង​គ្រោះ​មិន​ប្តឹង​ក៏ដោយ​ ក៏​ការ​ស៊ើប​អង្កេត​របស់​តុលាការ​ទៅ​លើ​​​​ករណី​​​​ដាច់​កន្ត្រក​យោង​នេះនឹង​បន្ត​។

លោក​បាន​និយាយ​ថា “យើង​កំពុង​​​​ស៊ើប​អង្កេត​​​​​នៅ​ឡើយ​។ យើង​នឹង​សម្រេច​ថា​តើ​យើង​ត្រូវ​ដាក់​ការ​ចោទ​ប្រកាន់​ ឬ​មិន​ដាក់ ថាតើ​វា​ជា​ឃាតកម្ម​អចេតនា​ ឬ​ក៏​អ្វី​ផ្សេងទៀត​​​​”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស