27 C
Phnom Penh

លោក ហ៊ុន សែន រិះ​​​គន់​​​ចំពោះ​​​ការ​​​សម្រេច​​​នៅ​​​ក្នុង​​​ការ​​​ប្រកួត​​​ប្រដាល់​​​ប្រចាំ​​​សតវត្សរ៍​​​

ដោយ ឌឹ ខេមបូឌា ដេលី

បទវិភាគ

លោក​​​នាយក​​​រដ្ឋ​​​មន្ត្រី ហ៊ុន សែន បាន​​​គាំទ្រ​​​អ្នក​​​ប្រដាល់​​​ហ្វីលីពីន ម៉ាន្នី ប៉ាកគីអាវ​ យ៉ាង​​​ពេញ​​​ទំហឹង​​​កាល​​​ពី​​​ម្សិលមិញ​​​ ដោយបាន​​​​​​​ចំណាយ​​​​ពេល​​​ប្រហែល​​​១៥​​​នាទី​​​ និយាយ​​​អំពី​​​ភាពអយុត្តិធម៌​​​នៃការ​​​សម្រេច​​​ជា​​​ឯកច្ឆន្ទ​​​កាល​​​ពី​​​យប់​​​ថ្ងៃ​​​សៅរ៍ ក្នុង​​​ការ​​​ដាក់​​​ពិន្ទុ​​​ឲ្យ​​​អ្នក​​​ប្រដាល់​​​អាមេរិក ផ្លយ​​ មេវ៉េ​ដឺ ​ឈ្នះ​​​ក្នុង​​​អ្វី​​​ដែល​​​គេ​​​ចាត់​​​ទុក​​​ថា​​​ជា “ការ​​​ប្រកួត​​​ប្រចាំ​​​សតវត្សរ៍​​​”។

លោក​​​នាយក​​​រដ្ឋ​​​មន្ត្រី ដែល​​​ជា​​​អ្នក​​​គាំទ្រ​​​ខាង​​​វិស័យ​​​កីឡា​​​យ៉ាង​​​ខ្លាំង​​​នោះ​​​បាន​​​លើក​​​ឡើង​​​ថា ផ្លយ​​ មេវ៉េ​ដឺ ​បាន​​​ឈ្នះ​​​ការ​​​ប្រកួត​​​គឺ​​​ដោយសារ​​​តែ​​​ការ​​​ប្រកួត​​​នេះ​​​ធ្វើ​​​ឡើង​​​នៅ​​​ទឹក​​​ដី​​​អាមេរិក​​​​​​​​​ ហើយ​​​ចៅ​​​ក្រម​​​អាមេរិក​​​ជា​​​អ្នក​​​ដាក់​​​ពិន្ទុ ដោយ​​​លោក​​​គូស​​​បញ្ជាក់​​​ថា ម៉ាន្នី ប៉ាកគីអាវ​​​​ វាយ​​​ចេញ​​​បាន​​​ច្រើន​​​ជាង​​​គូ​​​ប្រកួត​​​របស់​​​លោក​​​។

លោក​​​ ហ៊ុន សែន បាន​​​មាន​​​ប្រសាសន៍​​​អំឡុង​​​ពិធី​​​​​​បញ្ចុះ​​​បឋម​​​សីលា​​​​​​បើក​​​ការ​​​ដ្ឋាន​​​ស្ថាបនា​​​ផ្លូវ​​​ជាតិ​​​លេខ​​​៥៥​​​ក្នុង​​​​​​ខេត្ត​​​ពោធិ៍សាត់​​​ថា “ម្សិលមិញ​​​ រក​​​ពិន្ទុ​​​ដាក់​​​ឲ្យ​​​អា ផ្លយ​​ អត់​​​ឃើញ​​​ទេ​​​ យើង​​​អ្នក​​​មើល​​​ ប៉ុន្តែ អាប៊ីត​​​ទាំង​​​បី​​​​​​​​​ឯកច្ឆន្ទ​​​ឲ្យ​​​អា ផ្លយ​​ ឈ្នះ”។

លោក​​​បាន​​​មានប្រសាសន៍​​​បន្ថែម​​​ថា “សូម​​​ផ្តាំ​​​ទៅ​​​អាប៊ីត​​​របស់​​​អាមេរិក​​​ សូម​​​ធ្វើ​​​ការ​​​ពន្យល់​​​ មូល​​​ហេតុ​​​អ្វី​​​បាន​​​ជា​​​អា ផ្លយ​​ ឈ្នះ។ អា ផ្លយ​​ គិត​​​តែ​​​ពី​​​រត់​​​ ហើយ​​​រង​​​ ហើយ​​​គេច​​​ ប៉ាកគីអាវ​​​​  ចូល​​​វៃ៉​​​រហូត​​​ វ៉ៃ​​​ខ្ទុប​​​នឹង​​​ខ្សែ​​​រិញ”។

លោក ហ៊ុន​​​ សែន បាន​​​លើក​​​ឡើង​​​ថា លោក​​​បាន​​​ភ្នាល់​​​៥.០០០ដុល្លារ​​​ក្នុង​​​ការ​​​ប្រកួត​​​នេះ  ប៉ុន្តែ​​​ថា លោក​​​​​​នឹង​​​មិន​​​ឲ្យ​​​ប្រាក់​​​ដែល​​​ចាញ់​​​េនះ​​​ទេ ដើម្បី​​​តវ៉ា​​​ចំពោះ​​​សេចក្តី​​​សម្រេច​​​នេះ​។

លោក​​​បាន​​​មាន​​​ប្រសាសន៍​​​ថា “ឥឡូវ​​​បើ​​​គិត​​​តាម​​​ការ​​​ភ្នាល់​​​ពីម្សិល​​​ ខ្ញុំ​​​​​​ត្រូវ​​​ជំពាក់​​​លោក​​​ឯង​​​ តែ​​​អញ​​​មិន​​​ឲ្យ​​​”។ លោក​​​បាន​​​លើក​​​ឡើង​​​ទៀត​​​ថា ប្រសិន​​​បើ​​​មាន​​​ការ​​​ប្រកួត​​​ម្តង​​​ទៀត​​​រវាង​​​អ្នក​​​ប្រដាល់​​​ទាំង​​​ពីរ​​​នាក់​​​នេះ​​​គួរ​​​តែ​​​ធ្វើ​​​ឡើង​​​នៅ​​​​​​ប្រទេស​​​ចិន​​​ដើម្បី​​​ជៀស​​​វាង​​​​​​រង​​​ឥទ្ធិពល​​​របស់​​​អាមេរិក។

លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “ទេ​​​មិន​​​នឹក​​​ស្មាន​​​​អាមេរិក​​​កាំង​​​អន់​​​​​​ដល់​​​ប៉ុណ្ណឹង​​​​​​​​​ ខ្ញុំ​​​ទើប​​​តែ​​​​​​ស្គាល់​​​អាមេរិក​​​ច្បាស់​​​នៅ​​​ពេល​​​នេះ​​​ហើយ​​​។ អាប៊ីត​​​​​​បាន​​​សម្រេច​​​ជា​​​ឯកច្ឆន្ទ​​​ឲ្យ​​​អ្នក​​​ឈ្នះ​​​ក្លាយ​​​ជា​​​អ្នក​​​ចាញ់​​​”។

លោក​​​នាយក​​​រដ្ឋ​​​មន្ត្រី​​​ ដែល​​​និយាយ​​​លួង​​​លោម​​​កុំ​​​ឲ្យ​​​ពល​​​រដ្ឋ​​​ហ្វីលីពីន​​​មាន​​​ការ​​​តូច​​​ចិត្ត​​​នោះ​​​បាន​​​លើក​​​ឡើង​​​ថា មាន​​​តែ​​​ផ្លូវ​​​តែ​​​ម្យ៉ាង​​​គត់​​​ដែល​​​ចៅ​​​ក្រម​​​ផ្តល់​​​ពិន្ទុ​​​ឲ្យ​​​ ម៉ាន្នី ប៉ាកគីអាវ​​​​ ឈ្នះ​​​គឺ​​​លុះ​​​ត្រា​​​តែ​​​ ម៉ាន្នី ប៉ាកគីអាវ​​​​ ​​​វាយ ផ្លយ​​ មេវ៉េ​ដឺ ​ឲ្យ​ស្លាប់​​​នៅ​​​លើ​​​រិញ​​​។

លោក​​​បាន​​​មានប្រសាសន៍​​​ថា “ឥឡូវ​​​ខ្ញុំ​​​បាន​​​ឭ​​​សម្តី​​​របស់​​​បង​​​ប្អូន​​​ប្រជា​​​ពល​​​រដ្ឋ​​​ហ្វីលីពីន​​​ដែល​​​ចង់​​​ឲ្យ​​​មាន​​​ការ​​​ប្រកួត​​​ម្តង​​​ទៀត​​​”។ លោក​​​បាន​​​មាន​​​ប្រសាសន៍​​​បន្ថែម​​​ថា “ទៅ​​​វ៉ៃ​​​លើ​​​ដី​​​គេ​​​ ចាំ​​​តែ​​​គេ​​​ឲ្យ​​​យើង​​​ឈ្នះ​​​តើ​​​ ទាល់​​​តែ​​​​​​វ៉ៃ​​​អា ផ្លយ​ ងាប់​​​ទើប​​គេ​​​ឲ្យ​​​យើង​​​ឈ្នះ​​​”។

អំឡុង​​​ការ​​​ប្រកួត​​​ដែល​​​ជា​​​ព្រឹត្តិការណ៍​​​រក​​​ប្រាក់​​​បាន​​​ច្រើន​​​បំផុត​​​ក្នុង​​​ប្រវត្តិ​​​នៃ​​​ការ​​​ប្រដាល់​​​​​​ ដោយ​​​ប្រាក់​​​ចំណូល​​​ត្រូវ​​​បាន​​​គេ​​​រំពឹង​​​ថា អាច​​​លើស​​​ពី​​​៤០០លាន​​​ដុល្លារ​​​ទៅទៀត​​​នោះ​​​ លោក ហ៊ុន សែន បាន​​​​​​លើក​​​ឡើង​​​ថា លោក​​​កំពុង​​​ចូល​​​រួម​​​ពិធី​​​មង្គល​​​ការ​​​របស់​​​សាច់​​​ញាតិ​​​នៃ​​​លោក​​​ឧបនាយក​​​រដ្ឋ​​​មន្ត្រី ប៊ិន ឈិន ។

លោក​​​នាយក​​​រដ្ឋ​​​មន្ត្រី​​​បាន​​​រៀប​​​រាប់​​​អំពី​​​កិច្ច​​​សន្ទនា​​​ជា​មួយ​មន្ត្រី​ជាន់​ខ្ពស់​​​គណបក្ស​​​ប្រជា​​​ជន​​​កម្ពុជា​​​​មួយ​​​​ចំនួន​​​នៅ​​​ក្នុង​​​ពិធី​​​មង្គល​​​ការ​​​ ក្នុង​​​នោះ​​​រួម​​​មាន​​​ដូច​​​ជា​​​លោក​​​ឧបនាយករដ្ឋ​​​មន្ត្រី សុខ អាន លោក ហេង សំរិន ប្រធាន​​​រដ្ឋ​​​សភា និង​​​លោក ឯក សំអុល ប្រធាន​​​ក្រុមប្រឹក្សា​​​ធម្មនុញ្ញ​​​ជា​​​ដើម​​​។

លោក ហ៊ុន សែន បាន​​​​​​មាន​​​ប្រសាសន៍​​​ថា “ដល់​​​ទឹក​​​ទី​​​១០​​​ ខ្ញុំ​​​និយាយ​​​ទៅ​​​បង​​​ ហេង សំរិន និយាយ​​​ទៅ​​​នែ​បង ឯក សំអុល ថា ម៉ោង​​​នេះ​​​ហើយ​​​ បើ​​​អា ផ្លយ វ៉ៃ ប៉ាកគីអាវ​​​​ មិន​​​ដួល​​​ទេ​​​ បាន​​​សេចក្តី​​​ថា ចាញ់​​​ពិន្ទុ​​​ហើយ​​​។ ពេល​​​ហ្នឹង​​​​​​ សុខ អាន ថា ប្រយ័ត្ន​​​ហាស៎​​​ អា ផ្លយ លេង​​​តែ​​​ទឹក​​​ចុង​​​ក្រោយ​​​ហ្នឹង​​​ហាស៎”។

តែ​​​ទោះ​​​ជា​​​យ៉ាង​​​ណា ទាំង​​​ ម៉ាន្នី ប៉ាកគីអាវ​​​​ ទាំង​ ផ្លយ​​ មេវ៉េ​ដឺ ​ មិន​​​បាន​​​ធ្វើ​​​ឲ្យ​​​នាទី​​​ចុង​​​ក្រោយ​​​នេះ​​​មាន​​​ការ​​​រន្ធត់​​​ឡើយ​​​ដោយ​​​អ្នក​​​ប្រដាល់​​​អាមេរិក​​​​​​បាន​​​ព្យាយាម​​​គេច​​​យ៉ាង​​​ឆាប់​​​រហ័ស​​​ពី​​​កណ្តាប់​​​ដៃ​​​ដែល​​​មិន​​​អាច​​​ស្មាន​​​ទុក​​​បាន​​​របស់​​​គ្រូ​​​ប្រកួត​​​ហ្វីលីពីន​​​របស់​​​ខ្លួន​​​។

មិន​​​មែន​​​តែ​​​លោក ហ៊ុន​​​ សែន ម្នាក់​​​ឯង​​​ទេ ដែល​​​មាន​​​ការ​​​ខក​​​ចិត្ត​​​ក្រោយ​​​ការ​​​ប្រកួត​​​ដែល​​​គេ​​​រង់​​​ចាំ​​​ជា​​​យូរ​​​មក​​​ហើយ ដោយ​​​ ផ្លយ​​ មេវ៉េ​ដឺ ទទួល​​​រង​​​ការ​​​រិះ​​​គន់​​​ដោយ​​​សារ​​​​​​វិធីសាស្ត្រ​​​បម្លាស់​ទី​​​យ៉ាង​​​ឆាប់​​​រហ័ស​​​ និង​​​ការ​​​វាយ​​​​​​កណ្ដាប់​​​ដៃ​​​ឆ្វេង​​​ចំៗ​ដើម្បី​​​យក​​​ឈ្នះ ​​​ម៉ាន្នី ប៉ាកគីអាវ​​​​។

ប៉ុន្មាន​​​នាទី​​​ក្រោយ​​​ការ​​​ប្រកួត​​​បាន​​​បញ្ចប់​​​អ្នក​​​ប្រដាល់​​​ហ្វីលីពីន​​​រូប​​​នេះ​​​បាន​​​លើក​​​ឡើង​​​ថា លទ្ធផល​​​មិន​​​យុត្តិធម៌​​​ទេ​​​ ទោះ​​​បី​​​ជា​​​ ផ្លយ​​ មេវ៉េ​ដឺ ​ វាយ​​​ចេញ​​​ចំគោលដៅ​បាន​​​១៤៨​​​កណ្តាប់​​​ដៃ​​បើ​​​ធៀប​​​ទៅ​​​នឹង​​​  ម៉ាន្នី ប៉ាកគីអាវ​​​​ វាយចំគោលដៅ​​​​បាន​​​៨១​​​កណ្តាប់​​ដៃ​​​ក៏ដោយ​​​​។

ម៉ាន្នី ប៉ាកគីអាវ​​​​ បាន​​​និយាយ​​​​​​នៅ​​​ក្នុង​​​កិច្ច​​​សម្ភាស​​​​​​​ក្រោយ​​​ការ​​​ប្រកួត​​​ថា “ខ្ញុំ​​​គិត​​​ថា ខ្ញុំ​​​ឈ្នះ​​​ការ​​​ប្រកួត​​​នេះ​​​។គាត់​​​ [ផ្លយ​​ មេវ៉េ​ដឺ]​​​​​​​​​ មិន​​​បាន​​​ធ្វើ​​​អ្វី​​​​​​ទាល់​​​តែ​​​សោះ​​​​​​”។

លោក​​​ ហ៊ុន សែន បាន​​​និយាយ​​​លួង​​​លោម  ម៉ាន្នី ប៉ាកគីអាវ​​​​ កាល​​​ពី​​​ម្សិលមិញ​​​ថា ការ​​​ចាញ់​​​នេះ​​​មិន​​​​​​មែន​​​ជាកំហុស​​​របស់​​​  ប៉ាកគីអាវ​​​​ ទេ។

លោក​​​បាន​​​មាន​​​ប្រសាសន៍​​​ថា “សូម​​​ ប៉ាកគីអាវ​​​​ កុំ​​​តូច​​​ចិត្ត ហ្នឹង​​​ជា​​​រឿង​​​អាយុត្តិធម៌​​​របស់​​​អាប៊ីត​​​។ ប្រសិន​​​ខ្ញុំ​​​ជា​​​អា  ផ្លយ ខ្ញុំ​​​នឹង​​​​​​ចាត់​​​ទុក​​​ [ការ​​​ប្រកួត]​​​ នេះ​​​ថា​​​ស្មើ”៕ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស