30 C
Phnom Penh

ប្រធាន​ គ.ជ.ប.ដាស់​តឿន លោក រ៉ុង ឈុន ឲ្យ​នៅ​ជា​អព្យាក្រឹត

ដោយ ឌឹ ខេមបូឌា ដេលី

បទវិភាគ

លោក រ៉ុង ឈុន មេដឹកនាំ​សហជីព​​ដែលត្រូវ​បាន​ជ្រើស​រើស​ដោយ​គណបក្ស​ប្រឆាំង​ឲ្យ​ធ្វើ​ជា​សមាជិក​គណៈ​កម្មាធិការ​ជាតិ​រៀប​ចំការ​បោះ​ឆ្នោតថ្មី (គ.ជ.ប.) កាលពី​ម្សិលមិញ​ត្រូវ​បាន​ប្រធាន​ស្ថាប័ន​ថ្មី​នេះ​ប្រាប់​ឲ្យ​ប្រឹងប្រែង​ធ្វើការ​បន្ថែមទៀត​ដើម្បី​​រក្សា​​អព្យា​ក្រឹត​ភាព​បន្ទាប់​ពី​លោក​ត្រូវ​បាន​គេ​ឃើញ​និយាយ​ជាមួយ​សមាជិក​សភាគណបក្ស​សង្គ្រោះ​ជាតិ​​នៅ​ទី​សាធារណៈកាលពី​សប្តាហ៍មុន។

កិច្ច​ប្រជុំរបស់គ.ជ.ប.​ត្រូវ​​បាន​ធ្វើឡើង​បន្ទាប់ពី​លោក រ៉ុង ឈុន ត្រូវ​បានបន្ទោស​ដោយ​លោក សួស យ៉ារ៉ា អ្នកនាំពាក្យ​គណបក្ស​ប្រជាជន​កម្ពុជា​​ចំពោះ​ការ​និយាយ​ជាមួយ​សមាជិក​សភា​អំឡុង​ការហែក្បួន​ដែល​លោក​បានចូល​រួម​នៅក្នុង​រាជ​ធានីភ្នំពេញ​ដើម្បី​អប​អរ​ទិវា​ពល​កម្ម​អន្តរជាតិ​កាលពី​ថ្ងៃ​សុក្រ។

លោក​ ហង្ស ពុទ្ធា អ្នក​នាំពាក្យ​​គ.ជ.ប.​បាន​ប្រាប់​អ្នក​យក​ព័ត៌មាន​បន្ទាប់ពី​កិច្ច​ប្រជុំដែល​ធ្វើ​ឡើង​នៅ​​ការិយាល័យ​គ.ជ.ប.នៅក្នុង​ក្រសួង​មហា​ផ្ទៃថា លោក ស៊ិក ប៊ុន​ហុក ប្រធាន​គ.ជ.ប.​​បាន​ដាស់​តឿន​សហសេវិក​របស់លោក​​ឲ្យ​រក្សា​អព្យាក្រឹត​ភាព។

លោក ហង្ស ពុទ្ធា បាន​មាន​ប្រសាសន៍​ថា “​លោក​បាន​ដាស់​តឿនសមាជិក​គ.ជ.ប.ទាំង​អស់​ឲ្យ​យក​ចិត្តទុក​ដាក់​​នៅពេល​ធ្វើ​អ្វីមួយ ឲ្យ​មាន​ការ​ប្រុង​ប្រយ័ត្នដើម្បី​ចៀស​វាង​​មតិ​សាធា​រណៈ​ដែល​អាច​ប៉ះពាល់​ដល់​ឯក​រាជ​ភាព និង​អព្យាក្រឹតភាព​របស់​គ.ជ.ប.”។

លោក​បាន​បន្ថែម​ថា “​សមាជិក​គ.ជ.ប.​ទាំង​អស់​​បាន​ប្តេជ្ញាប្រឹង​ប្រែង​អនុវត្ត​​ច្បាប់​ វិធាន និង​នីតិវិធីបោះ​​ឆ្នោត​ឲ្យ​បាន​ត្រឹម​ត្រូវ​ដើម្បីធានា​​ឯក​រាជភាព​និង​អព្យាក្រឹតភាព​របស់​គ.ជ.ប.”។

លោក ហង្ស ពុទ្ធា បានមាន​ប្រសាសន៍​ថា លោក រ៉ុង ឈុន នឹង​មិន​ប្រឈម​ការ​ដាក់ទោស​ទណ្ឌ​ចំពោះ​ការ​ចូលរួម​ព្រឹត្តិការ​ណ៍​កាលពី​សប្តាហ៍មុន​ទេ ហើយ​លោក​បាន​បន្ថែមថា គ.ជ.ប.​មិន​មាន​​ច្បាប់ណាមួយ​ដែល​ហាម​ឃាត់​សកម្មភាព​បែប​នេះទេ។

លោក ហង្ស ពុទ្ធា ដែល​ក៏​ជា​​សមាជិក​អព្យាក្រឹត​របស់​គ.ជ.ប.​ម្នាក់​គត់​នោះ​​បាន​បដិសេធ​មិន​ឆ្លើយ​សំណួរណាមួយ​បន្ថែម​ឡើយ។

លោក រ៉ុង ឈុន អតីត​មន្ត្រីសមាគម​គ្រូបង្រៀនដែលមាន​ទំនាក់​ទំនង​ជាមួយ​​គណបក្ស​ប្រឆាំងនោះ ​​បានមាន​ប្រសាសន៍​តាម​ទូរស័ព្ទ​បន្ទាប់ពី​កិច្ច​ប្រជុំថា លោក​មិន​ត្រូវ​បាន​បន្ទោស​ដោយ​សហសេវិក​របស់​លោក​ទេ។

លោក រ៉ុង ឈុន បានមាន​ប្រសាសន៍​ថា “​មិន​មាន​ការ​ស្តីបន្ទោស ឬអ្វីមួយ​ដូច​ជាការ​សរសេរ​លិខិត​នោះ​ឡើយ វា​គ្រាន់តែជា​ការ​ដាស់តឿន​ប៉ុណ្ណោះ”។ លោក​បាន​បន្ថែម​ថា ទោះ​យ៉ាង​ណា លោក​នឹងមិនបដិសេធ​ចំពោះ​ការ​ទៅ​ចូលរួម​ព្រឹត្ត​ិការ​ណ៍​ស្រដៀងគ្នានេះ​ទៀតនោះ​ឡើយ​។ លោក​បាន​មាន​ប្រសាសន៍​ថា “​ខ្ញុំមិន​អាច​និយាយ​អ្វី​មួយ​មុន​បាន​ទេ”។

លោក ស៊ិក ប៊ុនហុក អតីត​សមាជិក​សភា​គណបក្ស​ប្រជាជន​កម្ពុជា​​ដែល​ជា​សមាជិក​សំខាន់​នៃក្រុម​ចរចា​របស់គណបក្ស​នេះ​អំឡុង​ការ​ចរចា​ស្តីពី​កំណែ​ទម្រង់ការ​បោះ​ឆ្នោត​ដែរ​នោះ​ បាន​បញ្ជាក់ថា លោក រ៉ុង ឈុន មិនត្រូវ​បាន​ស្តីបន្ទោស​ផ្លូវ​ការ​ទេ។

លោក​បានមាន​ប្រសាសន៍​ថា “យើង​គ្រាន់តែ​​ពន្យល់​ពី​ចំណុ​ច​ដែល​គាត់​ខ្វះខាត​ដើម្បី​ឲ្យ​គាត់​​កែ​តម្រូវ​អាកប្បកិរិយា​របស់គាត់​តែប៉ុណ្ណោះ។ វាមិន​មែ​ន​ជាការ​ត្រឹមត្រូវ​ទេ ដែល​គាត់​បាន​ទៅ​ចូល​រួម​​ [កា​រហែក្បួន​កាលពី​ថ្ងៃសុក្រ] ​នោះ ពីព្រោះ​គាត់​លែង​ជា​មេដឹក​នាំ​សហជីព​ទៀត​​ហើយ”។

គ.ជ.ប.ថ្មី​ត្រូវ​បាន​បង្កើត​ឡើង​កាល​ពី​ដើម​ខែមុន​ រយៈពេល​៩ខែ​​បន្ទាប់ពី​ត្រូវ​បាន​សន្យា​ដោយ​លោក​នាយក​រដ្ឋមន្ត្រី​ ហ៊ុន​ សែន​ ជាផ្នែក​មួយ​នៃកិច្ច​ព្រម​ព្រៀង​​ដែលបាន​បញ្ចប់​ការ​ធ្វើ​ពហិការ​មិន​ចូល​សភា​របស់​គណបក្ស​​សង្គ្រោះ​ជាតិ​ក្រោយ​ការ​បោះ​ឆ្នោត។

គណបក្ស​សង្គ្រោះ​ជាតិ​​​បាន​ចោទប្រកាន់​​គ.ជ.ប.​​ចាស់​ដែលមាន​សមាជិក​លើស​លប់​ដោយ​គណបក្ស​ប្រជាជន​កម្ពុ​ជានោះ​ថា ​បាន​ជួយរៀប​ចំលទ្ធផល​ការ​បោះ​ឆ្នោត​កាលពី​ឆ្នាំ​២០១៣។ ​​​​​​​​​គ.ជ.ប. ថ្មី​នេះ​មាន​សមាជិក​បួន​រូប​ម្ខាងជ្រើស​រើស​ដោយ​គណបក្ស​នីមួយ​ៗ​​ ព្រម​ទាំង​លោក ហង្ស ពុទ្ធា ដើម្បី​ទប់ស្កាត់​វិវាទ​បែបនេះ​នៅពេល​អនាគត៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស