27.6 C
Phnom Penh

មន្ត្រី​ក្រសួង​មហាផ្ទៃ​ជួប​ពិភាក្សា​គ្នា​អំពី​សុវត្ថិភាព​សម្រាប់​ជន​បរទេស

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​ក្រសួង​មហាផ្ទៃ​បាន​ជួប​ប្រជុំ​គ្នា​ក្នុង​ក្រុង​ភ្នំពេញ​កាលពី​ថ្ងៃ​ច័ន្ទ ដើម្បី​ពិភាក្សា​គ្នា​អំពី​សន្តិសុខ​សម្រាប់​អ្នក​វិនិយោគ​និង​ទេសចរ​បរទេស ដោយ​ប្រធាន​អន្តោប្រវេសន៍​របស់​ប្រទេស​នេះ​លើក​ឡើង​ថា មាន​ការ​ចាត់​វិធានការ​ជា​ច្រើន​ដែរ ដើម្បី​ធានា​ថា ជន​បរទេស​មិន​នាំ​បញ្ហា​មក​ប្រទេស​កម្ពុជា។

លោក ស ខេង រដ្ឋមន្ត្រី​ក្រសួង​មហាផ្ទៃ​បាន​ប្រាប់​ក្រុម​មន្ត្រី​ថា ឧក្រិដ្ឋកម្ម​បាន​ធ្វើ​ឲ្យ​ការ​វិនិយោគ​និង​ទេសចរណ៍​ដ៏​មាន​សក្តា​នុពល​ញញើត​មិន​ហ៊ាន​ចូល និង​បាន​អំពាវនាវ​ឲ្យ​ពួកគេ​ទប់​ទល់​នឹង​និន្នាការ​នេះ។

លោក​បាន​មាន​ប្រសាសន៍​ថា “ការ​ឆក់​ប្លន់​…​និង​អំពើ​ហិង្សា​ក្នុង​ចំណោម​អ្នក​ស្រុក​មាន​ផល​ប៉ះពាល់​ខ្លាំង​ដល់​នយោបាយ​វិនិយោគ​និង​ទេសចរណ៍។ ឧក្រិដ្ឋកម្ម​មួយ​ចំនួន​បាន​កើត​ឡើង​ចំពោះ​ជន​បរទេស​ដែល​កំពុង​ស្នាក់​នៅ​ក្នុង​ប្រទេស​កម្ពុជា ខ្លះ​បាត់បង់​ជីវិត និង​ខ្លះ​រង​របួស ឬ​បាត់បង់​ទ្រព្យ​សម្បត្តិ ប្រាក់កាស និង​ឯកសារ​ធ្វើ​ដំណើរ”។

លោក ស ខេង បាន​មាន​ប្រសាសន៍​ថា “ដើម្បី​រួមចំណែក​ដល់​ការ​ទាក់ទាញ​អ្នក​វិនិយោគ​និង​ទេសចរ​បរទេស​មក​វិនិយោគ ឬ​ធ្វើ​ទស្សនកិច្ច​ប្រទេស​កម្ពុជា​…​យើង​ត្រូវ​ខិតខំ​ធ្វើ​យ៉ាងណា​ឲ្យ​សង្គម​ទាំងមូល​មាន​សុវត្ថិភាព ជា​ពិសេស អ្នក​វិនិយោគ​និង​ទេសចរ ដើម្បី​ឲ្យ​សកម្មភាព​របស់​ពួកគេ​ដំណើរការ​ដោយ​រលួន​និង​ស្រប​ច្បាប់​ដោយ​គ្មាន​ការ​រំខាន។

ផែនការ​ដាក់​ចេញ​នៅ​កិច្ច​ប្រជុំ​នោះ​អំពាវនាវ​ឲ្យ​មាន​ការ​ផ្សព្វផ្សាយ​លេខ​ទូរស័ព្ទ​សម្រាប់​ការ​ទាក់ទង​បន្ទាន់ ដែល​ជន​បរទេស​អាច​ទូរស័ព្ទ​ហៅ ប្រសិនបើ​ពួកគេ​ត្រូវការ​ជំនួយ​ចាំបាច់ សហ​ប្រតិបត្តិ​ការ​ល្អ​ប្រសើរ​ជាមួយ​ក្រុមហ៊ុន ដែល​ផ្តល់​សេវា​ភ្ញៀវ​ទេសចរ និង​រឹត​បន្តឹង​ការ​គ្រប់គ្រង​ក្រុមហ៊ុន ឬ បុគ្គល ដែល​ផ្តល់​ការ​ដឹក​ជញ្ជូន​ភ្ញៀវ​ទេសចរ។

លោក សុខ ផល អគ្គនាយក​នៃ​អគ្គនាយកដ្ឋាន​អន្តោប្រវេសន៍​ក្រសួង​មហាផ្ទៃ បាន​មាន​ប្រសាសន៍​ថា វិធានការ​ជាច្រើន​ក៏​ត្រូវ​បាន​ចាត់​ឡើង​ដែរ​ដើម្បី​ធានា​ថា ឧក្រិដ្ឋ​ជន​បរទេស​នឹង​មិន​អាច​ធ្វើ​ប្រតិបត្តិការ​ក្នុង​ប្រទេស​នេះ​បាន​ទេ។

លោក​ឧត្តម​សេនីយ៍ ផល បាន​មាន​ប្រសាសន៍​ថា “ឧក្រិដ្ឋកម្ម​ដែល​កើត​ឡើង​ចំពោះ​អ្នក​វិនិយោគ​និង​ទេសចរ​បរទេស​កើត​ចេញ​ពី​ប្រជាជន​របស់​យើង ប៉ុន្តែ​មួយ​ផ្នែក​កើត​ចេញ​ពី​ជន​បរទេស ដែល​មក​ពី​ក្រៅ​ស្រុក”។ លោក​បាន​បន្ថែម​ថា ក្រុង​ព្រះសីហនុ ក្រុង​សៀមរាប និង​ក្រុង​ភ្នំពេញ ជា​កន្លែង​សំខាន់​បំផុត​សម្រាប់​ឧក្រិដ្ឋកម្ម​ក្នុង​ចំណោម​ជន​បរទេស។

លោក​ឧត្តម​សេនីយ៍ ផល បាន​មាន​ប្រសាសន៍​ថា “មាន​ក្រុមហ៊ុន​ច្រើន​ដេញ​ជើង​គ្នា បណ្តាល​ឲ្យ​មាន​របួស​ទាំង​សងខាង និង​បង្ក​គ្រោះថ្នាក់​ចរាចរណ៍​ទៅ​វិញ​ទៅ​មក។ យើង​បាន​រក​ឃើញ​ថា មាន​ជន​បរទេស​ជាច្រើន​ដែល​មិន​គោរព​ច្បាប់​កម្ពុជា​យើង”។

លោក​ឧត្តម​សេនីយ៍ ផល មាន​ប្រសាសន៍​ទៀត​ថា អគ្គនាយកដ្ឋាន​អន្តោ​ប្រវេសន៍​បាន​ដាក់​បញ្ចូល​ជន​បរទេស​ជាង​៣.០០០​នាក់​ក្នុង “បញ្ជី​ខ្មៅ” ដើម្បី​បញ្ជាក់​ថា ពួកគេ​ត្រូវ​ជាប់​សង្ស័យ​ជា​ឧក្រិដ្ឋជន និង​កត់​សម្គាល់​ឃើញ​ថា ជន​បរទេស​មួយ​ចំនួន​ជាប់​ពាក់​ព័ន្ធ​ក្នុង​អង្គការ​ចាត់តាំង​ឧក្រិដ្ឋកម្ម​អន្តរជាតិ ចំណែក​ឯ​អ្នក​ផ្សេងទៀត​បាន​រត់​ពន្ធ​ទំនិញ​ឆ្លង​ព្រំដែន។

លោក​បាន​មាន​ប្រសាសន៍​ថា “បញ្ជី​ខ្មៅ​នេះ ចំពោះ​យើង គឺ​ដើម្បី​តាមដាន​ជន​បរទេស​ដែល​រស់នៅ​ក្រៅ​ប្រទេស​និង​ក្នុង​ប្រទេស ដើម្បី​ចាត់​វិធានការ​ទៅ​តាម​ច្បាប់​កម្ពុជា”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស