លោក នេត សាវឿន អគ្គស្នងការនគរបាលជាតិ មានប្រសាសន៍កាលពីម្សិលមិញថា នគរបាល និងតុលាការគួរតែឈប់ផ្តល់សិទ្ធិពិសេសដល់កូនៗចរិតមិនល្អរបស់អ្នកមានស្ដុកស្ដម្ភ និងអ្នកមានអំណាច ហើយបន្តធ្វើការងារកែលម្អពន្ធនាគារដើម្បីលុបបំបាត់ថ្នាំញៀន និងបទល្មើស។
ថ្លែងនៅឯសន្និសីទបិទទ្វារមួយនៅសណ្ឋាគារកាំបូឌីយ៉ាណាក្នុងរាជធានីភ្នំពេញ នាយឧត្តមសេនីយ៍ នេត សាវឿន បានមានប្រសាសន៍ថា ពេលនេះនិទណ្ឌភាពលែងមាននៅក្នុងប្រទេសកម្ពុជាទៀតហើយ។
ខណៈពេលអង្គុយអែបលោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេស និងលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ លោក នេត សាវឿន បានមានប្រសាសន៍ថា “ចាប់ពីពេលនេះទៅ នៅពេលមានការបាញ់បោះ ឈប់សួរថា ‘ជាកូនអ្នកណា?’ ហើយត្រូវបញ្ជូនពួកគេទៅដាក់គុក។ បើមិនទាន់ចាប់ខ្លួនបាន ចាំបាច់ត្រូវតែចាប់ខ្លួនពួកគេឲ្យបាន។ មិនចាំបាច់រាយការណ៍ថា ជាកូនរបស់អ្នកណា ឬចៅរបស់ឧកញ៉ាណាឡើយ។ កុំនិយាយពីរឿងនេះ។ ពួកគេស្មើគ្នាក្នុងសង្គម និងចំពោះមុខច្បាប់។ បែបនេះធ្វើឲ្យប្រជាពលរដ្ឋស្ងប់ចិត្ត”។
អំឡុងសន្និសីទដែលមានឈ្មោះថា “ការពង្រឹងសមត្ថភាពតុលាការ និងនគរបាលយុត្តិធម៌ដើម្បីអនុវត្តច្បាប់ទប់ស្កាត់ និងបង្ក្រាបបទល្មើសព្រហ្មទណ្ឌ” នាយឧត្តមសេនីយ៍ នេត សាវឿន ក៏បានលើកឡើងដែរអំពីបញ្ហាជនល្មើសតូចតាចដែលត្រូវទទួលទោសជាប់ពន្ធនាការរយៈពេលយូរ ហើយធ្វើឲ្យជីវិតរបស់ពួកគេធ្លាក់ចូលទៅក្នុងបទល្មើសកាន់តែ
ធ្ងន់ធ្ងរ។
លោកបានមានប្រសាសន៍ថា “ពេលខ្លះ នៅពេលអ្នកទោសចូលក្នុងពន្ធនាគារ ពួកគេចូលចិត្តហាត់ក្បាច់គុន ហើយបន្ទាប់ពីពួកគេត្រូវបានដោះលែង ក្បាច់គុនរបស់ពួកគេក៏ប្រសើរឡើង។ កាលពីមុន ពួកគេប្រព្រឹត្តអំពើចោរកម្មតូចតាច ប៉ុន្តែ បន្ទាប់ពីជាប់ពន្ធនាគារជាមួយក្រុមចោរប្លន់ដែលមានលុយច្រើន ពួកគេនឹងប្រព្រឹត្តបទល្មើសកាន់តែច្រើន”។
នាយឧត្តមសេនីយ៍ នេត សាវឿន បានបន្តត្អូញត្អែរអំពីការជួញដូរថ្នាំញៀននៅក្នុងពន្ធនាគារនានាទូទាំងប្រទេសកម្ពុជា ដែលលោកមានប្រសាសន៍ថាដោយសារវិធីសាស្ត្រជួញដូរថ្មី រួមទាំងការឆ្លៀតឱកាសនៅពេលទៅសួរសុខទុក្ខអ្នកទោសផងដែរ។
លោកបានថ្លែងថា “ពួកគេជាសង្សារ ហើយនារីនោះទៅសួរសុខទុក្ខមិត្តប្រុសរបស់នាង ហើយយើងគ្មានកញ្ចក់មុខពីរដូចនៅក្នុងប្រទេសដទៃទៀតទេ និងសូម្បីតុតូចមួយបំបែកពួកគេ ធ្វើឲ្យពួកគេអាចថើបគ្នាបាន។ នៅក្នុងសម័យថ្មីនេះ ពួកគេថើបបឺតមាត់គ្នា ហើយនៅពេលពួកគេបឺតមាត់គ្នា ថ្នាំញៀនដែលនៅក្នុងមាត់របស់នារីនោះត្រូវបានរុញបញ្ចូលទៅក្នុងមាត់របស់សង្សារនាង ហើយសូម្បីកាមេរ៉ាក៏មើលមិនឃើញដែរ។ ពេលនេះនៅតាមពន្ធនាគារនានា គេចង់បញ្ឈប់សកម្មភាពបឺតមាត់គ្នានេះ”។
លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌បានមានប្រសាសន៍អំឡុងសន្និសីទនេះថា
ក្តីបារម្ភមួយទៀតដែលប្រព័ន្ធតុលាការកំពុងប្រឈម គឺការបាត់បង់សំណំុរឿងដែលលោកលើកឡើងថាបានបណ្តាលឲ្យមនុស្សបន្តជាប់ឃុំទាំងមិនដែលប្រឈមមុខនឹងសវនាការជំនុំជម្រះទោស។
លោកបានលើកឡើងអំពីយុវជនវ័យក្មេងម្នាក់ដែលកំពុងជាប់ឃុំក្នុងពន្ធនាគារមកធ្វើជាឧទាហរណ៍ថា “ខ្ញុំបានសង្កេតឃើញសំណុំរឿងប្រាំ ឬប្រាំមួយដែលមិនធ្លាប់បានឆ្លងកាត់សវនាការជំនុំជម្រះ ហើយមនុស្សកំពុងជាប់ពន្ធនាការនៅឡើយ។ គាត់ត្រូវបានចាប់ខ្លួននៅពេលគាត់មានអាយុ១៥ឆ្នាំ ហើយពេលនេះគាត់មានអាយុ១៨ឆ្នាំ។ គាត់កំពុងជាប់ពន្ធនាគារនៅឡើយ ដោយសារតែយើងមិនបានដោះស្រាយសំណុំរឿងនេះឲ្យគាត់ ហើយគាត់ក៏បន្តក្លាយជាជនរងគ្រោះ។ ពន្ធនាគារយល់ថា រឿងនេះមានការលំបាកដោយសារតែពួកគេមិនដឹងថា ត្រូវធ្វើយ៉ាងណា ពីព្រោះគ្មានសំណុំរឿង។ [នៅក្នុងពន្ធនាគារ] គាត់មិនដែលមានបញ្ហាទេ ប៉ុន្តែ ត្រង់ថាគាត់ត្រូវបានចាប់ខ្លួនខុស ឬក៏អត់នោះ គឺមិនច្បាស់ទេ”។
ទោះជាយ៉ាងណា លោក អង្គ វង្សវឌ្ឍនា បានមានប្រសាសន៍ថា លោកនៅតែរកមិនឃើញហេតុផលសមស្របដែលយល់ថាគួរតែដោះលែងយុវជនរូបនោះ ពីព្រោះលើកក្រោយវាអាចធ្វើឲ្យយុវជននោះជាប់ពន្ធនាគារពីបទមនុស្សឃាតក៏អាចថាបាន។ លោកបានបន្តថា “គេស្នើសុំឲ្យយើងដោះលែងយុវជននោះ ប៉ុន្តែ បន្ទាប់ពីការដោះលែង សំណុំរឿងប្រហែលជាត្រូវបានរកឃើញថា រូបគេគឺជាឃាតករ ដូច្នេះខ្ញុំនឹងខុស ហើយយើងមិនអាចដោះលែងគេបានទេ”៕ សុខុម