28 C
Phnom Penh

ចៅសង្កាត់​​​ជាប់​​​សង្ស័យ​​​ក្នុង​​​ការ​​​គប់​​​គ្រាប់​​​បែក​​​ត្រូវ​​​បាន​​​ផ្តន្ទា​​​ទោស​​​ឲ្យ​​​ជាប់ពន្ធនាគារ​​​ជុំវិញ​​​វិវាទ​​​ដី​​​ធ្លី​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​មន្ត្រី​​​តុលាការ​​​បាន​​​ឲ្យ​​​ដ​​​ឹង​​​ថា កាល​​​ពីម្សិលមិញ សាលា​​​ដំបូង​​​រាជ​​​ធានី​​​ភ្នំពេញ​​​បាន​​​ផ្តន្ទា​​​ទោស​​​អតីត​​​ចៅ​​​សង្កាត់​​​​​​ម្នាក់​​​ឲ្យ​​​ជាប់​​​ពន្ធនាគារ​​​​​​រយៈពេល​​​បី​​​ឆ្នាំ​​​​​​ពីបទ​​​បដិសេធ​​​មិន​​​ព្រម​​​អនុវត្ត​​​តាម​​​សេចក្តី​​​សម្រេច​​​របស់​​​តុលាការ​​​កំពូល​​​កាល​​​ពី​​​ឆ្នាំ​​​២០០៨​​​ ជុំ​​​វិញ​​​វិវាទ​​​ដី​​​ធ្លី​​​មួយ​​​។

លោក​​​ ភី ណុប អតីត​​​ចៅ​​​សង្កាត់​​​គោករកា ខណ្ឌ​​​ព្រែក​​​ព្នៅ​​​ ត្រូវ​​​បាន​​​ឃុំ​​​ខ្លួន​​​ជា​​​បណ្តោះ​​​អាសន្ន​​​រួច​​​ហើយ​​​ក្រោយ​​​ការ​​​ចាប់ខ្លួន​​​កាល​​​ពី​​​ខែ​​​ធ្នូ​​​ ពីបទ​​​សង្ស័យ​​​ថា បាន​​​បញ្ជា​​​ឲ្យ​​​មាន​​​ការ​​​គប់​​​គ្រាប់​​​បែក​​​ដែល​​​បណ្តាល​​​ឲ្យ​​​ក្មេង​​​ប្រុស​​​អាយុ​​​១១​​​ឆ្នាំ​​​ម្នាក់​​​បាត់​​​បង់​​​ជីវិត​​​។

លោក​ ភី ណុប អតីត​ចៅ​សង្កាត់​គោករកា​ ត្រូវ​ប៉ូលិស​បណ្តើរ​ចេញ​ពី​តុលាការ​ក្រុង​ភ្នំពេញ​ កាលពី​ម្សិលមិញ។ រូប​ថត​ៈ ស៊ីវ ចាន់​ណា​

បន្ទាប់​​​ពី​​​ការ​​​បើក​​​សវនាការ​​​កាល​​​ពី​​​ថ្ងៃ​​​ទី​​​២៤ ខែ​​​មេសា​​​ លោក អីុ ថាវរៈ ​​​ចៅ​​​ក្រម​​​ប្រធាន​​​ចៅ​​​ក្រុម​​​ប្រឹក្សា​​​ជំនុំ​​​ជម្រះ​​​បាន​​​ប្រកាស​​​កាល​​​ពី​​​ម្សិល​​​មិញ​​​ថា លោក ភី ណុប ត្រូវ​​​បាន​​​ផ្តន្ទា​​​ទោស​​​ឲ្យ​​​ជាប់​​​ពន្ធនាគារ​​​រយៈ​​​ពេល​​​បី​​​ឆ្នាំ និង​​​បង្គាប់​​​ឲ្យ​​​បង់​​​ប្រាក់​​​ពិន័យ​​​៤លាន​​​រៀល​​​។

លោក​​​បាន​​​មាន​​​ប្រសាសន៍​​​ថា “តុលាការ​​​បាន​​​ផ្តន្ទា​​​ទោស​​​ជន​​​ជាប់​​​ចោទ​​​ឈ្មោះ ភី ណុប អាយុ​​​៤៦​​​ឆ្នាំ ឲ្យ​​​ជាប់​​​ពន្ធនាគារ​​​រយៈ​​​ពេល​​​បី​​​ឆ្នាំ​​​ និង​​​ពិន័យ​​​ជា​​​ប្រាក់​​​៤​​​លាន​​​រៀល​​​ ក្រោម​​​ការ​​​ចោទ​​​ប្រកាន់​​​ពី​​​បទ​​​បដិសេធ​​​មិន​​​ព្រម​​​ធ្វើ​​​តាម​​​​​​សេចក្ដី​​​សម្រេច​​​របស់​​​តុលាការ​​​ [កំពូល​​​]។

លោក កែវ យ៉ា មេធាវី​​​ដើម​​​ចោទ​​​ម្នាក់​​​​​​​​​ក្នុង​​​ចំណោម​​​ដើម​​​ចោទ​​​ផ្សេង​​​ៗទៀត​​​ឈ្មោះ​​​ ង៉ូវ​​​ ឆាយ​​​ស្រ៊ុន បាន​​​លើក​​​ឡើង​​​ថា កូន​​​ក្តី​​​របស់​​​លោក​​​បាន​​​ដាក់​​​ពាក្យ​​​បណ្តឹង​​​កាល​​​ពី​​​ខែ​​​មិថុនា​​​ ជុំវិញ​​​ការ​​​បន្ត​​​បដិសេធ​​​របស់​​​លោក ភី ណុប ​​​មិន​​​អនុញ្ញាត​​​ឲ្យ​​​ខ្លួន​​​នឹង​​​មនុស្ស​​​ពីរ​​​នាក់​​​ផ្សេង​​​ទៀត​​​ឈ្មោះ សីុវ វួច​​​សួន និង​​​ លីម តឺ​​​ កាន់​​​កាប់​​​ដី​​​ដែល​​​មាន​​​វិវាទ​​​មួយ​​​កន្លែង​​​។

លោក កែវ យ៉ា បាន​​​លើក​​​ឡើង​​​ទៀត​​​ថា បន្ទាប់​​​ពី​​​តុលាការ​​​កំពូល​​​បាន​​​ផ្តល់​​​ដី​​​នេះ​​​ទៅ​​​ឲ្យ​​​ភាគី​​​ចំនួន​​​បី​​​កាល​​​ពី​​​ឆ្នាំ​​​២០០៨​​​ ព្រះរាជ​​​អាជ្ញារង​​​អម​​​សាលា​​​ដំបូង​​​​​​រាជ​​​ធានី​​​ម្នាក់ និង​​​មន្ត្រី​​​សុរិយោដី​​​បាន​​​បែង​​​ចែក​​​ដី​​​មួយ​​​កន្លែង​​​នេះ​​​ទៅ​​​ឲ្យភាគ​​​ីទាំង​​​បី​​​កាល​​​ពី​​​ឆ្នាំ​​​២០០៩។​​​ ហេតុ​​​ដូច្នេះ​​​ដើម​​​ចោទ​​​បាន​​​ដាក់​​​ឯកសារ​​​សំខាន់​​​ៗ ទៅ​​​​​​លោក ភី ណុប ​​​ជា​​​អ្នក​​​ដែល​​​គេ​​​រំពឹង​​​ថា នឹង​​​ចុះ​​​ហត្ថលេខា​​​លើ​​​ឯកសារ​​​ទាំង​​​នេះ​​​ដើម្បី​​​សម្រេច​​​ជា​​​ចុង​​​ក្រោយ​​​ឲ្យ​​​ពួក​​​គេ​​​កាន់​​​កាប់​​​ដី​​​នេះ​​​ដោយ​​​ស្រប​​​ច្បាប់​​​។​​​​​​​​​

លោក​​​ កែវ យ៉ា បាន​​​ពន្យល់ថា “ប៉ុន្តែ លោក ភី ណុប បាន​​​លើក​​​ឡើង​​​ថា ឯកសារ​​​ទាំង​​​នេះ​​​មិន​​​ត្រឹម​​​ត្រូវ​​​ទេ”។

លោក អ៊ុច ស៊ីណា មេធាវីរបស់​​​លោក ភី ណុប បាន​​​​​​លើក​​​ឡើង​​​ថា ការ​​​ផ្តន្ទាទោស​​​កូន​​​ក្តី​​​របស់​​​លោក​​​គឺ​​​មិន​​​យុត្តិធម៌​​​ទេ​​​។

លោក​​​បាន​​​មានប្រសាសន៍​​​ថា “កូន​​​ក្តី​​​របស់​​​ខ្ញុំ​​​ចង់​​​បញ្ជាក់​​​ឯកសារ​​​ពាក់​​​ព័ន្ធ​​​ទាំ​​​ង​​​អស់​​​ថា តើ​​​វា​​​ត្រឹម​​​ត្រូវ​​​ដែរ​​​ឬ​​​អត់ មុន​​​ពេល​​​ចុះ​​​ហត្ថលេខា​​​។ ប្រសិន​​​បើ​​​គាត់​​​​​​​​​ចេះ​​​តែ​​​ចុះ​​​ហត្ថលេខា​​​ ហើយ​​​ដី​​​នេះ​​​វា​​​ត្រួត​​​ស៊ីគ្នា​​​ ពួក​​​គេ​​​ប្រហែល​​​ជា​​​នឹង​​​​​​ដាក់​​​ពាក្យ​​​បណ្តឹង​​​ ហើយ​​​គាត់​​​នឹង​​​មាន​​​បញ្ហា​​​ ព្រោះ​​​គាត់​​​ជា​​​អ្នក​​​ទទួល​​​ខុស​​​ត្រូវ​​​”។

វិវាទ​​​ដី​​​ធ្លី​​​នេះ​​​ក៏​​​សង្ស័យ​​​ថា ស្ថិត​​​នៅ​​​ពី​​​ក្រោយ​​​ការ​​​គ្រប់​​​គ្រាប់​​​បែក​​​កាល​​​ពី​​​ខែ​​​តុលា ដែល​​​​​​ធ្វើ​​​ឲ្យ​​​កូន​​ប្រុស​​​របស់​​​អ្នក​​​រក​​​ស៊ី​​​​​​ផ្នែក​​​អចលនទ្រព្យ​​​ម្នាក់​​​ស្លាប់​​​ និង​​​មួយ​​មនុស្ស​​​មួយ​​​ចំនួន​​​ទៀត​​​រង​​​របួស​​​ ខណៈ​​​ពួក​​​គេ​​​កំពុង​​​ទទួល​​​ទាន​​​អាហារ​​​ពេល​​​​​​ល្ងាច​​​ក្នុង​​​ផ្ទះ​​​របស់​​​ខ្លួន​​​ក្នុង​​​​​​សង្កាត់​​​គោក​​​រកា​​​ផង​​​ដែរ។

​​​កាល​​​ពី​​​ខែ​​​ធ្នូ​​​ កង​​​រាជ​​​អាវុធ​​​ហត្ថ​​​បាន​​​ចាប់ខ្លួន​​​​​​បុរស​​​អាយុ​​​២៧​​​ឆ្នាំ​​​ម្នាក់​​​ពី​​​បទ​​​គប់​​​គ្រាប់​​​បែក​​​ចេញ​​ពី​​​ម៉ូតូ​​​មួយ​​​គ្រឿង​​​ដែល​​​បុរស​​​រូប​​​នេះ​​​ជិះ​​​ឆ្លង​​​កាត់​​​​​​ផ្ទះ​​​ជន​​​រងគ្រោះ​​​ ហើយ​ក្រោយ​​​មក​​​មិន​​​យូរ​​​ប៉ុន្មាន​​​ ​​លោក ភី ណុប ត្រូវ​​​បាន​​​ចាប់​​​ខ្លួន​​​​​​ពី​​​បទ​​​សង្ស័យ​​​ថា បាន​​​បញ្ជា​​​ឲ្យ​​​មាន​​​ការ​​​គប់​​​គ្រាប់​​​បែក​​​នេះ​​​៕ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស