លោកស្រី មូរ សុខហួរ សមាជិកសភាជាន់ខ្ពស់គណបក្សសង្គ្រោះជាតិត្រូវបានកោះហៅមកសាកសួរនៅសាលាដំបូងរាជធានីភ្នំពេញនៅថ្ងៃច័ន្ទជុំវិញការតវ៉ានៅទីលានប្រជាធិបតេយ្យដែលបានក្លាយជាហិង្សាកាលពីថ្ងៃទី១៥ ខែកក្កដា នេះបើតាមមេធាវីរបស់លោកស្រីបានលើកឡើងកាលពីម្សិលមិញ។
លោកស្រីមេធាវី ម៉េង សុភារី បានមានប្រសាសន៍ថា “លោក កែវ មុនី ច្រៅក្រមស៊ើបសួរបានកោះហៅកូនក្តីរបស់ខ្ញុំគឺលោកស្រី មូរ សុខហួរ ឲ្យមកបង្ហាញខ្លួននៅតុលាការនៅថ្ងៃទី១១ដើម្បីធ្វើការសាកសួរបន្ថែមទាក់ទងនឹងហេតុការណ៍កាលពីថ្ងៃទី១៥ ខែកក្កដា”។
លោកស្រី មូរ សុខហួរ បានមានប្រសាសន៍ថា លោកស្រីនឹងគោរពដីកាកោះនេះបើទោះជាលោកស្រីមានអភ័យឯកសិទ្ធិរួចផុតពីការផ្តន្ទាទោសក្នុងនាមជាសមាជិកសភាក៏ដោយ។
លោកស្រីបានមានប្រសាសន៍ថា “ពិតណាស់ ខ្ញុំនឹងទៅ។ យើងទាំងអស់គ្នាដឹងថា រាល់ការចោទប្រកាន់ប្រឆាំងលោកស្រីធ្វើឡើងដោយតុលាការមិនឯករាជ្យ។ ដូច្នេះ ខ្ញុំនឹងទៅបង្ហាញខ្លួននៅតុលាការដើម្បីបង្ហាញថា ប្រព័ន្ធតុលាការកម្ពុជាមិនឯករាជ្យ”។
សមាជិកសភាគណបក្សប្រឆាំងប្រាំមួយនាក់ទៀតក៏ត្រូវបានចោទប្រកាន់ជុំវិញការតវ៉ាកាលពីឆ្នាំមុនផងដែរ ប៉ុន្តែលោកស្រី មូរ សុខហួរ បានមានប្រសាសន៍ថា លោកស្រីដឹងពីការកោះហៅនេះដោយខ្លួនឯង។
ដោយឡែក លោក ចាន់ ចេន មេធាវីតំណាងលោក មាជ សុវណ្ណរ៉ា មន្ត្រីគណបក្សសង្គ្រោះជាតិ និងសកម្មជនគណបក្ស១០នាក់ទៀតត្រូវបានចោទប្រកាន់ជុំវិញការតវ៉ាដូចគ្នានេះដែរបានមានប្រសាសន៍កាលពីម្សិលមិញថា តុលាការនឹងបើកសវនាការជំនុំជម្រះរឿងក្តីកូនក្តីរបស់លោកនៅថ្ងៃទី១៩ ខែឧសភា៕ សារុន