37.6 C
Phnom Penh

គណបក្ស​​​ប្រជា​​​ជន​​​​​​ចេញ​​​បទ​​​បញ្ជា​​​ឲ្យ​​​មន្ត្រី​​​​​​តាម​​​ដាន​​​ការ​​​ប្រើ​​​ប្រាស់​​​ពាក្យ​​​ពេចន៍​របស់​​​គណបក្ស​​​សង្គ្រោះ​​​ជាតិ​​​

ដោយ ឌឹ ខេមបូឌា ដេលី

បទវិភាគ

អគ្គ​លេខាធិការ​គណបក្ស​ប្រជាជន​កម្ពុជា​ បាន​ចេញ​បទ​បញ្ជា​ឲ្យ​​មន្ត្រី​គណបក្ស​កាន់​អំណាច​តាមដាន​មន្ត្រី​គណបក្ស​​សង្គ្រោះ​ជាតិ​ដើម្បី​ធ្វើ​សេចក្ដី​​រាយការណ៍​​ នៅ​ពេល​​ពួកគេ​ប្រើ​ពាក្យ​ដូចជា​” អាយ៉ង​យួន” ឬ “កុម្មុយនិស្ត​ផ្ដាច់ការ”​ ដើម្បី​រៀប​រាប់​ពី​​មេ​ដឹក​នាំ​​គណបក្ស​ប្រជាជន​កម្ពុជា​​ ជា​ពាក្យ​ប្រមាថ​ដែល​អគ្គ​លេខាធិការ​រូប​នេះ​​លើក​ឡើង​ថា​ប៉ះ​ពាល់​ដល់​​ភាព​រីក​ចម្រើន​ផ្នែក​នយោបាយ​ក្នុង​ពេល​បច្ចុប្បន្ន។​

​ លោក​ សាយ​ ឈុំ​ អគ្គ​លេខាធិការ​ ​គណបក្ស​ប្រជាជន​កម្ពុជា​ត្រូវ​បាន​ចាត់​តាំង​ដោយ​លោក​នាយក​រដ្ឋ​មន្ត្រី​ ហ៊ុន​ សែន​ ​កាលពី​ថ្ងៃ​ច័ន្ទ​ ឲ្យ​តាម​ដាន​ពាក្យ​អុជអាល​ផ្នែក​នយោបាយ​ណាមួយ​ដែល​ចេញ​ពី​គណ​បក្ស​សង្គ្រោះ​ជាតិ​ បន្ទាប់​ពី​លោក​នាយក​រដ្ឋ​មន្ត្រី​​បាន​វាយ​ប្រហារ​លោក​ កឹម​ សុខា​ អនុប្រធាន​គណបក្ស​សង្គ្រោះ​ដែល​ចាត់​ទុក​​រដ្ឋាភិបាល​ថា​ ជា​រដ្ឋាភិបាល​”​​កុម្មុយនិស្ត​”​កាលពី​ខែ​មុន​នោះ។​

នៅ​ក្នុង​លិខិត​មួយ​កាលពី​ថ្ងៃ​អង្គារ​ លោក​ សាយ​ ឈុំ​ បាន​ចេញ​បទ​បញ្ជា​ឲ្យ​មាន​ការ​ដាក់​ពង្រាយ​​​មន្ត្រី​គណ​បក្ស​ប្រជាជន​​ដើម្បី​ធានា​ឲ្យ​បាន​ថា​ គណបក្ស​សង្គ្រោះ​ជាតិ​​​អនុវត្ត​តាម​”វប្បធម៌​នៃ​ការ​សន្ទនា”​​ ដែល​បង្កើត​ឡើង​​ដោយ​​លោក​ សម រង្ស៊ី​ និង​លោក​ ហ៊ុន សែន​។

លោក សាយ​ ឈុំ​ បាន​សរ​សេរ​ថា “​បន្ទាប់ពី​កិច្ចការ​បច្ចុប្បន្ន​​ដែល​គណបក្ស​ទាំងពីរ​[គណបក្ស​ប្រជាជន​កម្ពុជា​និង​គណបក្ស​សង្គ្រោះ​ជាតិ​] កំពុង​ជំរុញ​ឲ្យ​មាន​ការ​អនុវត្ត​​វប្ប​ធម៌​នៃ​ការសន្ទនា​ នៅ​មាន​​មេ​ដឹក​នាំ​​គណបក្ស​សង្គ្រោះ​មួយ​ចំនួន​ ជាពិសេស​លោក​ កឹម​ សុខា​ ដែល​​បន្ត​វាយ​ប្រហារ​​និង​ប្រមាថ​គណបក្ស​និង​មេដឹកនាំ​គណបក្ស​ប្រជាជន​កម្ពុជា​នៅ​តាម​វេទិកា​នានា​​ក្នុង​ផ្លូវ​មិន​សមរម្យ​ និង​ប្រឆាំង​នឹង​វប្ប​ធម៌​នៃ​ការ​សន្ទនា​ដែល​គណ​បក្ស​ប្រជា​ជន​កម្ពុជា​មិន​អាច​ទទួល​បាន​”។​

​ លិខិត​នេះ​មាន​ខ្លឹមសារ​បន្ត​ថា”​បន្ថែម​ពីលើ​នេះ​ទៅទៀត​ លោក​នាយក​រដ្ឋ​មន្ត្រី​ហ៊ុន សែន​បាន​បញ្ជាក់​បន្ថែម​ថា វប្បធម៌​នៃ​ការ​សន្ទនា​តម្រូវ​ឲ្យ​មាន​ការ​​ស្មោះ​ត្រង់​​និង​គោរព​គ្នា​ទៅវិញ​ទៅមក​ ហើយ​គ្មាន​ការ​ប្រមាថ​និង​គំរាម​ និង​[តម្រូវ​ឲ្យ​គណបក្ស] ឲ្យ​តម្លៃ​គ្នា​ទៅវិញ​ទៅមក​ផង​ដែរ”។​ ​​​​​​​​​​​

​​​​​​​​លិខិត​​​នេះ​​​មាន​​​ខ្លឹម​​​សារ​​​បន្ថែម​​​ទៀត​​​ថា “ផ្អែក​​​លើ​​​បញ្ហា​​​នេះ​​​ គណៈកម្មការ​​​កណ្តាល​​​បាន​​​ស្នើ​​​ឲ្យ​​​ប្រធាន​​​ក្រុមប្រឹក្សា​​​បក្ស​​​តាម​​​បណ្តា​​​ខេត្ត​​​ និង​​​រាជ​​​ធានី​​​​​​ចាត់​​​តាំង​​​មន្ត្រី​​​របស់​​​យើង​​ដើម្បី​​​តាម​​​ដាន​​​​​​ ស្តាប់​​​ និង​​​កត់​​​ត្រា​​​ឲ្យ​​​បាន​​​ច្បាស់​​​អំពី​​​ការ​​រំលោភ​​​បំពាន​​​ដោយ​​​បន្ត​​​ប្រមាថ​​​ និងវាយ​​​ប្រហារ​​​គណបក្ស និង​​​មេដឹក​​​នាំ​​​គណបក្ស​​​ប្រជា​​​ជន​​​កម្ពុជា​​​”។

លោក សាយ ឈុំ បាន​​​ស្នើ​​​ឲ្យ​​មន្ត្រី​​​បក្ស​​​កត់​​​ត្រា​​​ ជា​​​ពិសេស​​​ “ការ​​​ប្រើ​​​ប្រាស់​​​ពាក្យ​​​ថា ក្បាល​​​យួន​​​ខ្លួន​​​ខ្មែរ​​ កុម្មុយនិស្ត​​​ផ្តាច់​​​ការ​​​ អាយ៉ង​​​យួន​​​ ជន​​​ក្បត់​​​ជាតិ​​​ ជន​​​លក់​​​ជាតិ​​​ មេដឹក​​​នាំ​​​ចោរ​​​ និង​​​ការ​​​ប្រើ​​​ពាក្យ​​​ប្រមាថ​​​ផ្សេង​​​ៗ​​​ទៀត​​​បែប​​​នេះ​​​”។

លោក​​​ សុខ ឥសាន អ្នក​​​នាំ​​​ពាក្យ​​​គណបក្ស​​​ប្រជា​​​ជន​​​កម្ពុជា​​​បាន​​​​​​លើក​​​ឡើង​​​កាល​​​ពី​​​ម្សិល​​​មិញ​​​ថា លិខិត​​​របស់​​​លោក សាយ ឈុំ គឺមាន​​​បំណង​​​​​​ចង់​​​ឲ្យ​​​គណបក្ស​​​ប្រឆាំង​​​អនុវត្ត​​​តាម​​​វប្បធម៌​​​នៃ​​​ការ​​​សន្ទនា​​​ បន្ទាប់​​​ពី​​​ការ​​​វាយ​​​ប្រហារ​​​ជា​​​សារធារណៈរបស់​​​លោក កឹម សុខា លើ​​​គណបក្ស​​​កាន់​​​អំណាច​​​កាល​​​ពី​​​សប្តាហ៍​​​មុន។

លោក​​​បាន​​​មាន​​​ប្រសាសន៍​​​ថា “តាម​​​ពិត​​​ពាក់​​​ព័ន្ធ​​​នឹង​​​ការ​​​អនុវត្ត​​​ មក​​​ទល់​​​ពេល​​​នេះ​​​ គណបក្ស​​​ប្រជាជន​​​កម្ពុជា​​​ចាប់​​​តាំង​​​ពី​​​ថ្នាក់​​​លើ​​​ដល​​​់ថ្នាក់​​​ក្រោម​​​បាន​​​អនុវត្ត​​​​​​បាន​​​យ៉ាង​​​ល្អ​​​ ប៉ុន្តែ គណបក្ស​​​ដៃ​​​គូ​​​ធ្វើ​​​មិន​​​សូវ​​​បាន​​​ល្អ​​​ទេ​​​។ មេដឹក​​​នាំ​​​និយាយ​​​ល្អ​​​ ប៉ុន្តែ អនុប្រធាន​​​ និង​​មន្ត្រី​​​ថ្នាក់​​​ទាប​​​មួយ​​​ចំនួន​​​​​​និយាយ​​​មិន​​​គប្បី​​​ ហើយ​​​មិន​​​អនុវត្ត​​​តាម​​​វប្បធម៌​​​នៃ​​​ការ​​​សន្ទនា​​​ឲ្យ​​​បាន​​​ត្រឹម​​​ត្រូវ​​​ឡើយ​​​”។

លោក យឹម សុវណ្ណ អ្នក​​​នាំ​​​ពាក្យ​​​គណបក្ស​​​សង្គ្រោះ​​​ជាតិ​​​​​​បាន​​​លើ​​​ក​​​ឡើង​​​ថា លោក​​​មិន​​​ខ្វាយ​​​ខ្វល់​​​អំពី​​​គណបក្ស​​​ប្រជា​​​ជន​​​កម្ពុជា ដែល​​​ចេញ​​​បទ​​​បញ្ជា​​​​ឲ្យ​​​មន្ត្រី​​​របស់​​​ខ្លួន​​​តាម​​​ដាន​​​​​​គណបក្ស​​​ប្រឆាំង​​​នោះ​​​ឡើយ​​​ ប្រសិន​​​បើ​​​វា​​​ធ្វើ​​​ឲ្យ​​​វប្បធម៌​​​នៃ​​​ការ​​​សន្ទនា​​​ថ្មី​​​​​​ប្រសើ​​​រឡើង​​​នោះ​​​។

លោក​​​បាន​​​មាន​​​ប្រសាសន៍​​​ថា “យើង​​​គាំទ្រ​​​រាល់​​​គំនិត​​​ផ្តួច​​​ផ្តើម​​​​​​ដែល​​​លើក​​​កម្ពស់​​​​​​វប្បធម៌​​​នៃ​​​ការ​​​សន្ទនា​​​គ្រប់​​​លំដាប់​​​ថ្នាក់​​​ទាំង​​​អស់​​​ចាប់​​​ពី​​​ថ្នាក់​​​ជាតិ​​​រហូត​​​ដល់​​​ថ្នាក់​​​មូល​​​ដ្ឋាន​​​ ហើយ​​​យើង​​​បាន​​​ពិភាក្សា​​​ក្នុង​​​ចំណោម​​​មេដឹក​​​នាំ​​​គណបក្ស​​​សង្គ្រោះជាតិ​​​​​​រួច​​​ហើយ​​​ ដើម្បី​​​ធ្វើ​​​សេចក្តី​​​ព្រាង​​​ក្រម​​​សីលធម៌​​​ក្នុង​​​ការ​​​គាំទ្រ​​​​​​វប្បធម៌​​​នៃ​​​ការ​​​សន្ទនា​​​នេះ​​​”។

លោក​​​ យឹម សុវណ្ណ បាន​​​បន្ថែម​​​ថា គណបក្ស​​​សង្គ្រោះ​​​ជាតិ​​​​​​បាន​​​ប្ដេជ្ញា​​​រួចហើយ​ក្នុង​ការ​បញ្ចប់​ការ​​​​ប្រើ​​​ពាក្យ​​​ថា “យួន” ដែល​​​គណបក្ស​​​ប្រឆាំង​​​ធ្លាប់​​​ប្រើ​​​ជាយូរ​​​មក​​​ហើយ​​ ដើម្បី​​​វាយ​​​ប្រហារ​​​លោក ហ៊ុន សែន និង​​​គណបក្ស​​​ប្រជា​​​ជន​​​កម្ពុជា​​​​​​នៅ​​​ពេល​​​ចោទ​​​ប្រកាន់​​​ពួក​​​គេ​​​ថា​​​ ជា​​​អាយ៉ង​​​ហាណូយ​​​​​​។

លោក​​​បាន​​​មាន​​​ប្រសាសន៍​​​បន្ថែម​​​ថា “ពាក្យ​​​នោះ​​​យើង​​​បាន​​​បោះ​​​បង់​​​ចោល​​​រួច​​​ហើយ​​​​​​ យើង​​​មិន​​​ចង់​​​និយាយ​​​ពាក្យ​​​នេះ​​​ទៀត​​​ទេ​​​។ យើង​​​ក៏​​​មិន​​​ចង់​​​ប្រើ​​​ពាក្យ​​​ហិង្សា​​​ណា​​​មួយ​​​ ឬ​​​ពាក្យ​​​ជេរ​​​ប្រមាថ​​​ ឬ​​​ពាក្យ​​​អាក្រក់​​​ណា​​​មួយ​​​ដែល​​​មិន​​​មែន​​​ជា​​​គំរូ​​​ល្អ​​​សម្រាប់​​​ពល​​​រដ្ឋ​​ខ្មែរ​​​ និង​​​ក្មេង​​​ជំនាន់​​​ក្រោយ​​​ដែរ”​​​​​​។

នៅ​​​ក្នុង​​​សុន្ទរកថា​​​មួយ​​​កាល​​​ពីខែ​​​មីនា​​​ លោក​​​ ហ៊ុន សែន បាន​​​គំរាម​​​ប្រើ​​​កម្លាំង​​​យោធា​​​លើ​​​លោក កឹម សុខា​​​ ឬ​​​ចាប់​​​លោក​​​ដាក់​​​ពន្ធនាគារ​​​ ហើយ​​​ក៏​​​បាន​​​គំរាម​​​ម្តង​​​ហើយ​​​ម្តង​​​ទៀត​​​ដក​​​​​​លោក​​​ចេញ​​​ពី​​​តំណែង​​​ជា​​​អនុប្រធាន​​​រដ្ឋ​​​សភា​​​ផង​​​ដែរ​​​។

ប៉ុន្តែ លោក​​​​​​ យឹម សុវណ្ណ​​​ បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា លោក​​​​​​មិន​​​​​​ព្រួយ​​​បារម្ភ​​​ខ្លាច​​​​ក្រែង​​​​​​គណបក្ស​​​ប្រជា​​​ជន​​​កម្ពុជា​​​អាច​​​រំលោភ​​​បំពាន “វប្បធម៌​​​នៃ​​​ការ​​​សន្ទនា​​​” ដើម្បី​​​បង្ខំ​​​ឲ្យ​​​គណបក្ស​​​ប្រឆាំង​​​មិន​​​ហាន​​​ធ្វើ​​​អ្វី​​​នោះ​ឡើយ។

តែ​ចំពោះ​ លោក​​​ ម៉ៃ ឌីន សមាជិក​​​គណបក្ស​​​សង្គ្រោះ​​​ជាតិ​​​ ដែល​​​មាន​​​តួនាទី​​​ជា​​​ជំទប់​​​ឃុំ​​​ឡា​​​បាន​​​សៀក​​​ ខេត្ត​​​រតនគិរី​​​វិញ​ បាន​​​លើក​​​ឡើង​​​ថា លោក​​​ព្រួយ​​​បារម្ភ​​​ខ្លាច​​​ក្រែង​​​បទ​​​បញ្ជា​​​លោក សាយ​​​ ឈុំ​​​ នេះ​អាច​​​ធ្វើ​​​ឲ្យ​​​មន្ត្រី​​​ថ្នាក់​​​ទាប​របស់​​​​គណបក្ស​​​សង្គ្រោះ​​​ជាតិ​​​​​​​​​​​​មិន​​​ហ៊ាន​​​និយាយ​​​​​ស្ដី​អ្វី​ឡើយ​​​​​​​​។

លោក​​​បាន​​​និយាយ​​​ថា “សម្រាប់​​​អ្នក​​​ទាំង​​​នោះ​​​​​​ដែល​​​ប្រមាថ​​​គណបក្ស​​​ផ្សេង​​​ នោះ​​​គឺ​​​ជា​​​បញ្ហា​​​បុគ្គល​​​មិន​​​មែន​​​ជា​​​ជំហរ​​​របស់​​​បក្ស​​​ឡើយ​​​។ នៅ​​​ពេល​​​មាន​​​អ្វី​​​មិន​​​ត្រឹម​​​ត្រូវ​​​ យើង​​​រិះ​​​គន់​​​ [គណបក្ស​​​ប្រជា​​​ជន​​​កម្ពុជា] ហើយ​​​ខ្ញុំ​​​សង្ឃឹម​​​ថា ការ​​​រិះ​​​គន់​​​នេះ​​​នឹង​​​មិន​​​ត្រូវ​​​បាន​​​គេ​​​យក​​​មក​​​បក​​ស្រាយ​​​ថា​​​ជា​​​ការ​​​ប្រមាថ​​​នោះ​​​ឡើយ​​​”។

ទោះ​​​ជា​​​​​​យ៉ាង​​​ណា លោក ឡៅ ប៊ុន្នី សមាជិក​​គណបក្ស​​​ប្រជា​​​ជន​​​កម្ពុជា​​​ ដែល​​​មាន​​​​​​តួនាទី​​​ជា​​​មេឃុំ​​​​មួយ​នៅ​ខេត្ត​​​កំពត​​​​​​បាន​​​លើក​​​ឡើង​​​ថា លោក​​​​​​គាំទ្រ​​​ការ​​​អំពាវ​​​នាវ​​​របស់​​​លោក សាយ ឈុំ ហើយ​​​នឹង​​​ធ្វើ​​​ការ​​​យ៉ាង​​​សកម្ម​​​ដើម្បី​​​​​ប្រមូល​​​ផ្ដុំ​​​របាយការណ៍​​​នៃ​​​​​​ការ​​​ធ្វើ​​​មិន​​​ត្រឹម​​​ត្រូវ​​​របស់​​​គណបក្ស​​​សង្គ្រោះ​ជាតិ​​​។

លោក​​​បាន​​​និយាយ​​​ថា “ខ្ញុំ​​​បាន​​​កត់​​​សម្គាល់​​​ឃើញ​​​ថា មាន​​​មន្ត្រី​​​ និង​​​សមាជិក​​​គណបក្ស​​​សង្គ្រោះ​​​ជាតិ​​​ជា​​​ច្រើន​​​​​​ ដែល​​​នៅ​​​តែ​​​បន្ត​​​ប្រមាថ​​​មេដឹក​​​នាំ​​​គណបក្ស​​​ប្រជា​​​ជន​​​កម្ពុជា​​​​​​តាម​​​រយៈ​​​បណ្តាញ​ទំនាក់​​​ទំនង​​​សង្គម​​​ដូច​​​ជា ហ្វេស​​​ប៊ុក​​​ជា​​​ដើម​​​”។

លោក​​​បាន​​​និយាយ​​​បន្ត​​​ថា “ខ្ញុំ​​​នឹង​​​ចាត់​​​តាំង​​​មន្ត្រី​​​របស់​​​ខ្ញុំ​​​ដើម្បី​​​តាម​​​ដាន​​​អ្នក​​​ទាំ​​​ងនោះ​​​ដែល​​​​​​ពូ​​​កែ​​​ខាងប្រើ​​​ពាក្យ​​​​​​ប្រមាថ​​​មេ​​​ដឹក​នាំ​របស់​​​យើង​​​តាម​​​ហ្វេសប៊ុក​​​ ហើយ​​​ធ្វើ​​​របាយ​​​ការណ៍​​​ជូន​​​ថ្នាក់​​​លើ​​​”៕ស៊ុយឈាង​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស