29 C
Phnom Penh

ក្រសួង​មហាផ្ទៃ​ស៊ើប​អង្កេត​​ករណី​ជួញ​ដូរ​អាវុធ​

ដោយ ឌឹ ខេមបូឌា ដេលី

បទវិភាគ

មន្ត្រី​ក្រសួង​មហាផ្ទៃម្នាក់​បានឲ្យ​ដឹង​កាលពីម្សិលមិញ​ថា ក្រសួង​មហាផ្ទៃនឹង​សហការ​ជាមួយ​​នគរបាល​វៀត​ណាម​ស្វែង​រក​ប្រភព​កាំភ្លើង​ដែល​ជន​ជាតិ​ចិន​ម្នាក់​​​បាន​ប៉ុន​ប៉ង​ជួញដូរ​​ពី​ប្រទេស​កម្ពុជា​ទៅ​ប្រទេស​វៀត​ណាម។

ទីភ្នាក់ងារ​ព័ត៌មាន​ Thanh Nien របស់​វៀត​ណាម​​បាន​រាយការណ៍កាលពីថ្ងៃអង្គារ​ថា ​ លោក លៀន​ សៅមីង ត្រូវ​បាន​ចាប់ខ្លួន​កាលពី​ថ្ងៃទី​​១៥ ខែមីនា នៅក្នុង​ខេត្ត​ តៃនិញ ដែល​នៅ​ជាប់ព្រំ​​ប្រទល់​ខេត្ត​ស្វាយរៀង​ និង​ខេត្ត​កំពង​់​ចាមនៃប្រទេស​កម្ពុជា​ ខណៈដែល​បុរស​រូប​នេះ​បានត្រៀម​ទទួល​​កាំភ្លើង​ខ្លី​ពីរ​ដើម​​ម៉ាក Beretta ដែលគាត់​បាន​បង់​ប្រាក់​សម្ងាត់​ដើម្បី​​ជួញ​ដូរ​ឆ្លងព្រំដែន។

យោ​ង​តាម​របាយ​ការណ៍​ព័ត៌មាននេះ​បាន​ឲ្យដឹង​ថា លោក លៀន បាន​មក​ជួប​អ្នក​ចែក​ចាយ​អាវុធ​នៅក្នុង​ប្រទេស​កម្ពុជា​កាលពី​ថ្ងៃទី​១៤ ខែមីនា ហើយ​បាន​ទិញ​​កាំភ្លើង​ខ្លី​ទាំង​ពីរ​ដើម​នេះ​ក្នុង​តម្លៃ​១.០០០ដុល្លារ​ក្នុង​មួយ​ដើម​ជាមួយ​នឹង​គ្រាប់​​តម្លៃ​​៤០០ដុល្លារ​ក្នុង​បំណង​យក​ទៅលក់​ក្នុង​ប្រទេស​វៀត​ណាម​យក​ចំណេញ។ការ​ជួញដូរ​កាំភ្លើង​គឺខុស​ច្បាប់​ក្នុង​ប្រទេស​កម្ពុជា។

លោក ឆៃ ស៊ីណារិទ្ធ ប្រធាន​នាយកដ្ឋាន​សន្តិសុខ​ផ្ទៃក្នុង​​ក្រសួង​មហាផ្ទៃ​បានមាន​ប្រសា​សន៍ថា “​យើង​ចាំបាច់​ត្រូវ​ស៊ើប​អង្កេត​ករណី​នេះ។ ខ្ញុំនឹង​ទាក់ទង​នគរបាល​វៀត​ណាម ហើយ​យើង​នឹង​សហការ​ដើម្បី​ស្វែង​រក​​អ្នកលក់​កាំភ្លើង​នៅក្នុង​ប្រទេស​កម្ពុជា”។

ឧត្តម​សេនីយ៍ទោ ស៊ីណារិទ្ធ បានមាន​ប្រសាសន៍ថា នគរបាល​កម្ពុជា​​មិនដឹង​ពី​ការ​ចាប់ខ្លួន​នេះ​មុនពេល​អ្នកយក​ព័ត៌មាន​ជូន​ដំណឹងកាលពី​ម្សិលមិញឡើយ​។

ទីភ្នាក់ងារ​ព័ត៌មាន​ Thanh Nien បាន​រាយការណ៍ថា លោក លៀន បាន​មក​រស់​នៅ​ក្នុង​ទីក្រុង​ហូជីមីញ​តាំង​ពី​ឆ្នាំ​២០០១មក​ម៉្លេះ​ ក្រោម​ឈ្មោះថា ត្រាញ់​ ធៀនមីញ ដែល​តាម​ចោទថា គាត់បាន​រត់​គេច​ខ្លួន​បន្ទាប់ពី​ប្រព្រឹត្ត​អំពើ​មនុស្ស​ឃាត​នៅក្នុង​ខេត្ត​គ័ងដុង​ ភាគ​ខាងត្បូង​ប្រទេស​ចិន។

យោង​តាម​ទីភ្នាក់ងារ​ព័ត៌មាន​នេះ​បានឲ្យ​ដឹង​ថា នៅក្នុង​ប្រទេស​វៀត​ណាម គាត់​ប្រឈម​ការ​ចោទប្រកាន់​ពីបទ​​ជួញ​ដូរ​អាវុធ និង​ប្រឈម​ការ​ជាប់ពន្ធនាគារ​ពី​​៥ទៅ​១២ឆ្នាំ ប្រសិន​បើ​ត្រូវ​បាន​រក​ឃើញ​ពិរុទ្ធភាព។

ស្ថានទូតវៀត​ណាម​ប្រចាំ​រាជ​ធានី​ភ្នំពេញ​មិន​អាច​ទាក់​ទងសុំ​អត្ថាធិប្បាយ​បានទេ៕សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស