27 C
Phnom Penh

នគរបាល​ស្វែង​រក​ម្ចាស់​សិប្បកម្ម​កែច្នៃគ្រឿង​សង្ហារិម​​បន្ទាប់ពី​ការ​ឆ្មក់ចូល​

ដោយ ឌឹ ខេមបូឌា ដេលី

បទវិភាគ

ក្រុមមន្ត្រី​បានលើកឡើង​កាលពី​ម្សិល​មិញ​ថា អាជ្ញាធរ​ខេត្ត​ស្ទឹងត្រែង​​កំពុង​ស្វែង​រក​​ម្ចាស់​សិប្បកម្ម​កែច្នៃ​​គ្រឿង​សង្ហារិម​ចំនួនពីរ​ដែលត្រូវ​បាន​ឆ្មក់ចូល​ និង​បិទ​កាលពី​ថ្ងៃពុធ​​ចំពោះ​ការ​យក​ឈើ​ប្រភេទ​លេខ​១ធ្វើ​​ទ្វារ​និង​ស្លាប​បង្អួច​។

លោក ដួង ហុង នាយ​នគរបាល​ព្រហ្មទណ្ឌ​ស្រុក​ថាឡាបរិវ៉ាត់ បាន​មាន​ប្រសាសន៍​ថា មន្ត្រី​ប្រហែល​២០នាក់​​មក​ពី​ការិយាល័យ​នគរបាលប្រឆាំង​បទល្មើស​សេដ្ឋកិច្ចនៃនគរបាល​ខេត្ត​​​​បាន​ឆ្មក់ចូល​សិប្បកម្មនេះ​ជាមួយ​មន្ត្រី​មកពី​ខណ្ឌរដ្ឋបាល​ព្រៃឈើ​មូលដ្ឋាន។

លោក ហុង បានមានប្រសាសន៍ថា ទោះយ៉ាងណា លោក​ ខៃ សុផល អ្នករក​ស៊ីឈើ និង​ជាម្ចាស់​សិប្បកម្មនេះ​​បាន​គេច​ខ្លួន​​មុនពេល​អាជ្ញាធរ​មកដល់។

លោក​បាន​មាន​ប្រសាសន៍ថា “​គាត់​បាន​រត់គេច​ខ្លួន​ពី​កន្លែង​នោះ​មុនពេល​យើង​មក​ដល់។ យើង​កំពុង​ស្វែង​រក​គាត់។ យើង​បានសាកសួរ​​មនុស្ស​២០នាក់​ដែលបាន​ចូលរួមក្នុង​ប្រតិ​បត្តិការ​នេះ ប៉ុន្តែ​យើង​មិន​បាន​ចាប់ខ្លួន​ពួកគេ​ទេ ពីព្រោះ​​ពួកគេ​គ្រាន់តែជាកម្មករ​ប៉ុណ្ណោះ”។

លោក ហុង បានមាន​ប្រសាសន៍ថា យ៉ាង​ហោចណាស់​ស្លាបបង្អួច​​៥០​និង​ទ្វារ​មួយ​ចំនួន​ដែល​ធ្វើ​ពី​ឈើ​សុក្រម ជា​ឈើប្រភេទ​លេខ​១នោះ​ ត្រូវបាន​រឹប​អូស។

យោង​តាម​លោក សែម ស៊ីថា អធិការ​នគរបាល​ស្រុក​​បានឲ្យ​ដឹង​ថា សិប្បកម្ម​នេះ​​ស្ថិត​ក្នុង​ឃុំ​សំ​អាង​បាន​ធ្វើ​ប្រតិបត្តិការ​កាលពី​សប្តាហ៍មុន ប៉ុន្តែ​បាន​ធ្វើ​ឲ្យមានការ​កាប់ឈើ​ខុស​ច្បាប់​កាន់តែ​ធ្ងន់ធ្ងរ​នៅក្នុង​តំបន់នេះរួច​ទៅហើយ។

លោក​បានមាន​ប្រសាសន៍ថា “​យើង​បាន​ធ្វើការ​បង្ក្រាប​​ ពីព្រោះសិប្បកម្ម​នេះ​កែច្នៃឈើ​ខុស​ច្បាប់ ហើយ​កាប់ឈើ​ខុស​ច្បាប់​នៅក្នុង​តំបន់។ ពួកគេជំរុញ​ឲ្យ​អ្នកភូមិមូលដ្ឋាន​កាប់ឈើ ហើយ​លក់​ឈើនោះ​​ទៅ​ឲ្យ​ពួកគេ​”។

លោក វ៉ា សុខា នាយ​រង​ខណ្ឌ​រដ្ឋបាល​ព្រៃឈើ​ថាឡាបរិវ៉ាត់ ដែល​បានដឹក​នាំការ​ឆ្មក់ចូល​កាលពី​ថ្ងៃពុធ​​​បាន​មាន​ប្រសាសន៍ថា កន្លែង​លាក់ខ្លួន​របស់លោក សុផល គេមិន​ដឹង​ទេ។ លោក​បាន​បន្ថែមថា មន្ត្រីរបស់លោក​​កំពុង​ធ្វើ​សន្និធិ​​ឈើ​ដែលរឹបអូសនេះ​នៅឡើយ។

លោក​បានមាន​ប្រសាសន៍ថា “​យើង​រឹបអូស​ឈើ​សុក្រម​បាន​ជាច្រើន​ដុំ ប៉ុន្តែ​ខ្ញុំ​មិន​ប្រាកដ​ថា តើ​មាន​ប៉ុន្មាន​ឡើយ ពីព្រោះ​យើង​ត្រូវ​រៀបចំ​វា​ជាមុន​សិន”។

លោក សុខា បានមានប្រសាសន៍ថា តុចំនួនបួន​ក៏ត្រូវ​បានរឹបអូស​ផងដែរ ហើយ​ថា ឈើ​ដែល​រឹប​អូស​ទាំង​អស់​ត្រូវ​បានយកទៅ​រក្សា​ទុក​នៅ​ទីស្នាក់ការ​ខណ្ឌរបស់លោក៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស