37 C
Phnom Penh

អាជ្ញាធរ​ប្រាប់​កសិករ​ឲ្យ​ឈប់​ធ្វើ​ស្រែចម្ការ​លើ​​ដី​វៀត​ណាម

ដោយ ឌឹ ខេមបូឌា ដេលី

បទវិភាគ

មន្ត្រីម្នាក់​បាននិយាយ​កាលពី​ម្សិលមិញ​ថា អាជ្ញាធរ​ខេត្ត​ត្បូង​ឃ្មុំ​​កាលពី​ម្សិលមិញ បាន​ប្រាប់​ក្រុម​អ្នក​ភូមិ​ឲ្យ​ឈប់​ធ្វើស្រែចម្ការ​​លើដី​មួយ​ផ្នែក​នៅ​ក្នុង​ស្រុក​មេមត់​ បន្ទាប់ពី​​លោក ហោ ណាំហុង រដ្ឋមន្ត្រី​ក្រសួង​ការ​បរទេស​​បាន​លើក​ឡើង​ថា ដីទំហំ​១៦,៦ហិកតា​នេះ​ជាដី​របស់​វៀត​ណាម។

លោក ម៉ៅ ពៅ ស្នងការ​នគរបាល​ខេត្ត​​បានមាន​ប្រសាសន៍ថា នគរបាល និង​មន្ត្រី​មូល​ដ្ឋាន​បាន​ចាប​់​ផ្តើម​ជូន​ដំណឹង​ដល់​អ្នកភូមិ​នៅ​ឃុំ​ជាំ ដែល​អះ​អាង​ថា ដំណាំរបស់ពួកគាត់​​ត្រូវ​បាន​បំផ្លាញ​ដោយ​ជន​ជាតិ​វៀត​ណាម​មួយ​ក្រុម​កាលពី​ខែមុនថា ដី​ដែលមាន​ទំនាស់​នេះ​មិន​ស្ថិត​ក្នុង​ទឹក​ដី​កម្ពុជាទេ។

លោក​បានមាន​ប្រសាសន៍ថា “​ពីមុន​ ប្រជាពលរដ្ឋ​មាន​ការ​ភាន់ច្រឡំ​ពី​ដីនេះ ដោយគិត​ថា វា​ស្ថិត​ក្នុង​ប្រទេស​កម្ពុជា។ ប៉ុន្តែឥឡូវ​នេះ​ វា​ច្បាស់ណាស់ថា ដីនេះ​ស្ថិតក្នុង​ទឹកដី​វៀត​ណាម”។

យុទ្ធនាការ​ “ដើម្បីអប់រំ​” អ្នកភូមិ​បន្ទាប់ពី​មានលិខិត​មួយ​ច្បាប់ដែលលោក​ ហោ ណាំហុង បាន​ផ្ញើទៅ​លោក ហេង សំរិន ប្រធានរដ្ឋសភា​ឆ្លើយ​តប​ទៅ​នឹង​សំណើ​របស់សមាជិក​សភា​គណបក្ស​សង្គ្រោះ​ជាតិ​សុំ​អន្តរាគមន៍របស់​​រដ្ឋមន្ត្រី​ក្រសួង​ការ​បរទេស​រូបនេះ នៅក្នុង​វិវាទ​នេះ។

នៅក្នុង​លិខិត​របស់លោក លោក ហោ ណាំហុង បានលើកឡើង​ថា ដំណាំរបស់កសិករ​​បាន​ដាំឆ្លង​បង្គោល​ព្រំដែន​ដែល​ត្រូវ​បាន​កែប្រែ​ជាផ្នែកមួយ​នៃ​អនុស្សរណៈនៃការ​យោគ​យល់ឆ្នាំ​២០០១​រវាង​កម្ពុជា​មិន​វៀត​ណាម។

ដោយមិនពេញ​ចិត្ត​នឹង​លិខិត​េនះ សហព័ន្ធនិស្ស​ិត​បញ្ញវន្ត​កម្ពុជា​បានចេញ​សេចក្តី​ថ្លែងការណ៍ ជំរុញ​ឲ្យ​លោក​នាយក​រដ្ឋមន្ត្រី បណ្តេញលោក ហោ​ ណាំហុង​ ចេញ។

សេចក្តី​ថ្លែង​ការណ៍នេះ​លើកឡើងថា “​សហព័ន្ធនិស្ស​ិត​បញ្ញវន្ត​កម្ពុជាសូម​អំពាវនាវ​ឲ្យ​លោក​នាយក​រដ្ឋមន្ត្រី​ ហ៊ុន សែន​ ដក​លោក ហោ ណាំហុង ចេញពី​តួនាទី​​របស់លោក​ ពីព្រោះ​គាត់​ធ្វើ​ផ្ទុយ​នឹង​រដ្ឋធម្មនុញ្ញ”។

បើ​ទោះ​ជា​មានការ​ព្រមាន​ពី​នគរបាល​មូលដ្ឋាន និង​ក្រុមមន្ត្រីក៏ដោយ ក៏លោក គី ទេត​ ជាកសិករ​បាននិយាយថា ដំណាំរបស់លោក​​ស្ថិត​ក្នុង​ចំណោម​ដំណាំ​ដែលត្រូវ​បាន​បំផ្លាញ​ដោយ​​ជីគីមីកាលពី​ថ្ងៃទី​១៩​ខែ​មេសា ។

លោក គី ទេត បាននិយាយ​ថា “​អាជ្ញាធរ​មិន​អាច​ហាមឃាត់​អ្នកភូមិ​​មិន​ឲ្យ​ទៅ​កាន់​ដី​របស់​ខ្លួន​បានឡើយ ពីព្រោះ​យើង​ពឹង​ផ្អែក​លើ​ដីនេះ”។

លោក​បានបន្ថែមថា វាមិន​អាច​ទៅរួចទេ ដែលថាដីដែលគាត់​បាន​ធ្វើ​ស្រែចម្ការ​តាំង​ពី​ការ​ដួលរលំ​របប​ខ្មែរក្រហមនោះ​ ជារបស់​វៀត​ណាមនោះ។

លោក​បាននិយាយថា “​ប្រសិន​បើ​ខ្ញុំនៅក្មេង ខ្ញុំ​អាច​រក​ការ​ងារ​ធ្វើនៅ​រោង​ចក្រ​បាន។ ប៉ុន្តែ​​ខ្ញុំអាយុ​ប្រហែល​៥០ឆ្នាំទៅ​ហើយ ដូច្នេះ ខ្ញុំ​ត្រូវ​ពឹង​ផ្អែក​លើ​ការ​ធ្វើ​ស្រែចម្ការ​នៅ​ទីនេះ”៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស