រដ្ឋមន្ត្រីក្រសួងអប់រំបានមានប្រសាសន៍កាលពីថ្ងៃព្រហស្បតិ៍ថា ក្រសួងអប់រំនឹងបន្តការធ្វើអធិការកិច្ចលើសាកលវិទ្យាល័យនៅខែក្រោយ បន្ទាប់ពីការកែទម្រង់បញ្ចប់នូវស្ថាប័នទទួលស្គាល់គុណភាពអប់រំឧត្តមសិក្សារបស់រដ្ឋាភិបាល ជាមួយនឹងផែនការដំបូងៗសម្រាប់អ្នកជំនាញវាយតម្លៃសាកលវិទ្យាល័យលើគេចំនួន១០របស់ប្រទេសនេះ មុនការពង្រីកការផ្តួចផ្តើម។
កាលពីមុនស្ថិតនៅក្រោមការមើលខុសត្រូវរបស់ទីស្តីការគណៈរដ្ឋមន្ត្រី តែក្រោយការបោះឆ្នោតជាតិឆ្នាំ២០១៣ គណៈកម្មាធិការទទួលស្គាល់គុណភាពអប់រំនៃកម្ពុជា (ACC) ត្រូវបានបញ្ចូលក្នុងក្រសួងអប់រំ។ ក្រសួងនេះបានផ្អាកការចុះឈ្មោះសាកលវិទ្យាល័យថ្មីៗ ខណៈដែលខ្លួនបានខិតខំកែប្រែស្ថាប័ននេះដោយមានជំនួយពីធនាគារពិភពលោកនិងអង្គការយូនីសេហ្វ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និង កីឡា បានមានប្រសាសន៍កាលពីថ្ងៃព្រហស្បតិ៍ នៅក្រៅវេទិកាលើកទី២ស្តីពីការអប់រំឧត្តមសិក្សាក្នុងក្រុងភ្នំពេញថា “ការវាយតម្លៃគុណភាពនេះជាការវាយតម្លៃគ្រប់ជ្រុងជ្រោយលើសាកលវិទ្យាល័យ ដោយចាប់ផ្តើមជាមួយសាកលវិទ្យាល័យចំនួន១០ ដែលនឹងឲ្យសាធារណជនដឹងថែមទៀតអំពីអ្វីដែលសាកលវិទ្យាល័យកម្ពុជាផ្តល់និងជួយពួកគេឲ្យមានជម្រើសកាន់តែប្រសើរ”។
លោករដ្ឋមន្ត្រីបានមានប្រសាសន៍ថា គុណភាពអប់រំដែលផ្តល់ដោយ១០៥សាកលវិទ្យាល័យនៅកម្ពុជា មិនអាចបំពេញបានតម្រូវការរបស់និយោជកនិងវិនិយោគិនទេ ក្នុងពេលដែលប្រទេសកម្ពុជារំពឹងថានឹងពង្រីកការអភិវឌ្ឍឧស្សាហកម្មរបស់ខ្លួន និងបង្កើតការងារជំនាញខ្ពស់ថែមទៀតនោះ។
លោកបានមានប្រសាសន៍ថា “ជាង៧០ភាគរយនៃនិស្សិតបញ្ចប់ការសិក្សាពិតជាមិនអាចបំពេញតម្រូវការរបស់និយោជក (និយោជកក្នុងស្រុក ឬវិនិយោគិនផ្ទាល់ក្រៅប្រទេស) បានទេ។ ក្នុងចំណោមនិស្សិត៥០.០០០នាក់បញ្ចប់ការសិក្សារាល់ឆ្នាំ មានតែបីភាគរយប៉ុណ្ណោះ [រៀន]កសិកម្ម។ នោះជាបញ្ហា ពីព្រោះប្រទេសកម្ពុជាជាប្រទេសកសិកម្ម”។
យោងតាមលោក ជួនណារ៉ុន បានឲ្យដឹងថា គណៈកម្មាធិការទទួលស្គាល់គុណភាពអប់រំនៃកម្ពុជានឹងចាប់ផ្តើមធ្វើអធិការកិច្ចសាកលវិទ្យាល័យ១០លើគេនៅកម្ពុជានៅខែមិថុនា ដែលមានសាកលវិទ្យាល័យ៦ក្នុងចំណោមនោះជារបស់រដ្ឋ និង៤ជារបស់ឯកជន។
ផ្នែកឧត្តមសិក្សារបស់ប្រទេសនេះបានរីកយ៉ាងឆាប់រហ័សក្នុងពេលប៉ុន្មានឆ្នាំថ្មីៗនេះ រហូតដល់ការមើលខុសត្រូវរបស់រដ្ឋាភិបាលមិនទាន់។ ក្នុងបទសម្ភាសមួយកាលពីខែសីហា លោករដ្ឋមន្ត្រីក្រសួងអប់រំបានមានប្រសាសន៍ថា ចំនួននិស្សិតដែលចុះឈ្មោះចូលរៀននៅសាកលវិទ្យាល័យនានាបានកើនទ្វេដងក្នុងរយៈពេល៦ឆ្នាំ គឺពីចំនួន១២៥.០០០នាក់ក្នុងឆ្នាំ២០០៨ដល់២៥០.០០០នាក់ក្នុងឆ្នាំ២០១៤។
លោក ជួនណារ៉ុន បានមានប្រសាសន៍ថា “ចំនួននិស្សិតបានកើនរហ័សណាស់ ប៉ុន្តែការនេះមានន័យថាគុណភាពធ្លាក់ចុះ។ ឯកជនភាវូបនីយកម្មនៃឧត្តមសិក្សាជានិន្នាការមួយក្នុងតំបន់។ លោកបានបន្ថែមថា ប្រជាពលរដ្ឋគិតអំពីការអប់រំកម្រិតឧត្តមសិក្សាសម្រាប់ធ្វើជំនួញ ប៉ុន្តែឥឡូវនេះ ដោយសារតែចំនួននិស្សិតកើនឡើងលឿនពេក យើងចង់ឲ្យប្រាកដអំពីគុណភាព”។
លោកបានមានប្រសាសន៍ថា “ទិសដៅរបស់ក្រសួងគឺបង្កើតមនុស្សដែលអាចរកការងារធ្វើបាន។ សាកលវិទ្យាល័យមានន័យថា អ្នកមានកន្លែងមួយបណ្តុះបណ្តាលមនុស្សដែលអាចរកការងារធ្វើបាន។ នោះជាការរួមចំណែករបស់សាកលវិទ្យាល័យ។ បើពុំនោះទេ អ្នកមិនអាចហៅថាសាកលវិទ្យាល័យបានទេ អ្នកអាចហៅសាកលវិទ្យាល័យទាំងនោះថា រោងចក្របង្កើតសញ្ញាប័ត្រ”។
រដ្ឋមន្ត្រីក្រសួងអប់រំបានមានប្រសាសន៍ថា ក្រសួងរបស់លោកចាំបាច់ត្រូវចាប់ផ្តើមធ្វើការកែប្រែសំខាន់ៗចំពោះគណៈកម្មាធិការទទួលស្គាល់គុណភាពអប់រំនៃកម្ពុជា ដើម្បីធានាឲ្យបានថា ស្ថាប័ននេះមានប្រសិទ្ធភាពក្នុងការធ្វើឲ្យសញ្ញាប័ត្រសាកលវិទ្យាល័យមានតម្លៃ ដោយលោកបានលើកឡើងថា កំណែទម្រង់នឹងត្រូវការពេលរវាង៥ទៅ១០ឆ្នាំដើម្បីឲ្យមានប្រសិទ្ធភាពពេញលេញ។
លោក ជួនណារ៉ុន មានប្រសាសន៍ថា “ជួនកាល ពេលយើងបញ្ជូនអធិការទៅ ពួកគេយកលុយពីសាកលវិទ្យាល័យ ហើយបន្ទាប់មកចុះហត្ថលេខាទទួលស្គាល់។ ដូច្នេះហើយ យើងចង់កែប្រែវប្បធម៌នោះ។ ពួកគេត្រូវធ្វើការឲ្យល្អត្រឹមត្រូវដើម្បីផ្តល់អនុសាសន៍ កុំចេះតែយកលុយហើយចុះហត្ថលេខា”។
លោកបានមានប្រសាសន៍ថា “ដូច្នេះគម្រោងថ្មីនេះនឹងឲ្យយើងអាចមានអ្នកវាយតម្លៃឯករាជ្យច្រើនទៀត មិនត្រឹមតែមនុស្សដែលទៅនិងចុះហត្ថលេខានោះទេ ដើម្បីផ្តល់ឯករាជ្យភាពនិងមិននៅក្រោមសម្ពាធ ក្រសួង ឬ សាកលវិទ្យាល័យឡើយ”។
លោកបានបន្ថែមថា ពេលណាក្រុមអធិការបានធ្វើការវាយតម្លៃមានតម្លាភាពលើសាកលវិទ្យាល័យហើយនោះ ព័ត៌មានដែលគេប្រមូលបាននឹងត្រូវឲ្យសាធារណជនដឹង ដើម្បីឲ្យមានជម្រើសដែលមានព័ត៌មានច្បាស់លាស់ និងមានបរិយាកាសឧត្តមសិក្សាកាន់តែប្រកួតប្រជែង។
លោក ខៀវ វិជ្ជានន្ទ អគ្គលេខាធិការរងគណៈកម្មាធិការទទួលស្គាល់គុណភាពអប់រំនៃកម្ពុជា បានមានប្រសាសន៍កាលពីថ្ងៃព្រហស្បតិ៍ថា ចាប់តាំងពីគណៈកម្មាធិការទទួលស្គាល់គុណភាពអប់រំនៃកម្ពុជានៅជាមួយក្រសួងអប់រំកាលពីខែតុលាឆ្នាំ២០១៣មក គណៈកម្មាធិការនេះបានបង្កើតសូចនាករប្រហែល៧០ ដែលអ្នកវាយតម្លៃថ្មីម្នាក់ក្នុងចំណោម៥០នាក់នឹងប្រើដើម្បីធ្វើអធិការកិច្ចលើសាកលវិទ្យាល័យនានា។
លោក វិជ្ជានន្ទ បានមានប្រសាសន៍ថា “ចំពោះសូចនាករនីមួយៗក្នុងចំណោមជាង៧០នោះ ស្ថាប័នអប់រំឧត្តមសិក្សាត្រូវតែរាយការណ៍មានភ័ស្តុតាង ហើយអ្នកវាយតម្លៃត្រូវប្រាប់ពីភ័ស្តុតាងនេះ”។
សូចនាករដែលនឹងត្រូវវាយតម្លៃរួមមានគុណភាពហេដ្ឋារចនាសម្ព័ន្ធ ការចូលប្រើបណ្ណាល័យតាមអីុនធឺណិត លក្ខណៈសម្បត្តិរបស់សាស្ត្រាចារ្យ ភាគរយនៃមហាវិទ្យាល័យពេញម៉ោង និងចំនួនសៀវភៅសិក្សាក្នុងវគ្គសិក្សា។
ពេលសួរថាតើសាកលវិទ្យាល័យនឹងត្រូវបិទទ្វារដោយគណៈកម្មាធិការទទួលស្គាល់គុណភាពអប់រំនៃកម្ពុជាឬយ៉ាងណា លោក វិជ្ជានន្ទ បាននិយាយថា គណៈកម្មាធិការនេះ “មិនមានបំណងបិទទ្វារសាកលវិទ្យាល័យទេ គឺចង់ធ្វើឲ្យគុណភាពប្រសើរឡើង”។
លោក ជួនណារ៉ុន បានមានប្រសាសន៍ថា មានព័ត៌មានច្រើនអំពីសាកលវិទ្យាល័យនោះ សាធារណជននឹងវិនិច្ឆ័យចំពោះស្ថាប័នសិក្សាណាជឿនលឿន និងមួយណាក្ស័យធន។
លោកបានមានប្រសាសន៍ថា “បញ្ហាគឺថា អាជ្ញាធរបានឲ្យច្បាប់អនុញ្ញាតដល់[សាកលវិទ្យាល័យទាំងនេះ] ដូច្នេះប្រសិនបើអ្នកបិទវា អ្នកត្រូវផ្តល់ហេតុផលដែលអ្នកត្រូវបិទ។ ហេតុអ្វីអ្នកអនុញ្ញាតឲ្យបើក ហើយឥឡូវបិទខ្ញុំ? ដូច្នេះហើយសម្រាប់យើង សាធារណជនគួរសម្រេច”៕ និត (រាយការណ៍បន្ថែមដោយ Colin Meyn and Phorn Bopha)