នគរបាលជាតិនឹងចាប់ផ្តើមចេញផ្សាយកាសែតប្រចាំថ្ងៃពណ៌ធម្មជាតិរបស់ខ្លួនដែលមាន១២ទំព័រ នៅថ្ងៃសៅរ៍ ដោយច្បាប់ដំបូងរំឭកដល់ខួប៧០ឆ្នាំ ចាប់តាំងពីកងកម្លាំងនគរបាលជាតិត្រូវបានបង្កើតឡើងក្រោមការកាន់កាប់របស់ជប៉ុន នេះបើតាមនិពន្ធនាយកកាសែតនេះបានលើកឡើងកាលពីម្សិលមិញ។
លោក អាត ប៊ុន្នី អតីតអ្នកយកព័ត៌មានទូរទស្សន៍បាយ័ន ដែលនឹងធ្វើជានិពន្ធនាយកកាសែតនេះបានមានប្រសាសន៍ថា “កាសែតនគរបាលជាតិ” នឹងចាប់ផ្តើមចេញផ្សាយលេខពិសេសរំឭកខួបមុនពេលចេញផ្សាយព័ត៌មានជាទៀងទាត់អំពីបទល្មើស សន្តិសុខ និងសណ្តាប់ធ្នាប់សាធារណៈ។
លោក ប៊ុន្នី បានមានប្រសាសន៍ថា “នៅថ្ងៃទី១៦ ខែឧសភាសប្តាហ៍ក្រោយ កាសែតនគរបាលជាតិនឹងចេញផ្សាយជាផ្លូវការដើម្បីរំឭកខួបលើកទី៧០នៃការបង្កើតនគរបាលជាតិ”។
កាលពីឆ្នាំ២០០៦ ព្រះមហាក្សត្រនរោត្តម សីហមុនី ទ្រង់បានសម្រេចកំណត់កាលបរិច្ឆេទផ្លូវការនៃការបង្កើតនគរបាលជាតិគឺថ្ងៃទី១៦ ខែឧសភា ឆ្នាំ១៩៤៥ នៅពេលរដ្ឋាភិបាលកម្ពុជាឯករាជ្យមានតែឈ្មោះស្ថិតក្រោមការគ្រប់គ្រងរបស់ជប៉ុន បានបង្កើតកងកម្លាំងរបស់ខ្លួន។
លោក ប៊ុន្នី បានមានប្រសាសន៍ថា “សម្រាប់ការបោះចេញផ្សាយលើកដំបូង យើងនឹងសរសេរអំពីប្រវិត្តរបស់នគរបាលជាតិ សមិទ្ធផលរបស់នគរបាលជាតិ និងប្រវត្តិរបស់អគ្គនាយកដ្ឋានអន្តោប្រវេសន៍ អគ្គនាយកដ្ឋានអត្តសញ្ញាណកម្ម និងអគ្គនាយដ្ឋានពន្ធនាគារ”។
លោកបានបន្ថែមថា “ជាផ្លូវការ យើងនឹងបោះពុម្ពផ្សាយកាសែតនេះដោយមាន១២ទំព័រ ប៉ុន្តែសម្រាប់លេខពិសេសនេះ យើងនឹងបោះពុម្ពផ្សាយចន្លោះពី២៤ទៅ៣២ទំព័រ”។
លោក ប៊ុន្នី បានមានប្រសាសន៍ថា កាសែតនេះនឹងមិនមានព័ត៌មានទាក់ទងនយោបាយទេ ប៉ុន្តែនឹងមានព័ត៌មានស្តីពីសកម្មភាពផ្សេងៗដែលនគរបាលបានធ្វើ ដូចជាផ្នែកវប្បធម៌ជាដើម ប្រសិនបើនគរបាលបានចូលរួម។
និពន្ធនាយកថ្មីរូបនេះបានមានប្រសាសន៍ថា “វានឹងផ្តោតលើសន្តិសុខ និងសកម្មភាពរបស់នគរបាល…។ វាជាកាសែតនគរបាល។ ដូច្នេះ យើងនឹងរាយការណ៍អំពីនគរបាល។ វានឹងធ្វើសេចក្តីរាយការណ៍អំពីកីឡា ឬសិល្បៈដែរ ប្រសិនបើទាក់ទងនឹងនគរបាល”។
កាសែតនេះនឹងមានតម្លៃ១.០០០រៀល ហើយត្រូវបានផ្តល់មូលនិធិដោយរដ្ឋាភិបាលនិងតាមរយៈការផ្សាយពាណិជ្ជកម្ម។
លោក បែន រ័ត្ន ស្នងការនគរបាលខេត្តកំពង់ចាមបានមានប្រសាសន៍ថា លោកគាំទ្រការដែលនគរបាលបង្កើតកាសែតផ្ទាល់ខ្លួន បន្ទាប់ពីរយៈពេលប្រហែលមួយឆ្នាំនៃការបើកដំណើរការគេហទំព័រព័ត៌មានរបស់ខ្លួន។
លោក បែន រ័ត្ន បានមានប្រសាសន៍ថា “យើងត្រៀមរួចរាល់ក្នុងការបញ្ជូនព័ត៌មាន។ យើងបានបញ្ជូនព័ត៌មានតាមគេហទំព័ររយៈពេលជិតមួយឆ្នាំមកហើយ។ ព័ត៌មានភាគច្រើនទាក់ទងសន្តិសុខ និងសណ្តាប់ធ្នាប់សាធារណៈ។ ខ្ញុំរីករាយណាស់ដោយឃើញកាសែតនគរបាលជាតិ។
លោកបានមានប្រសាសន៍ថា ” ពីមុន យើងមានកម្មវិធីព័ត៌មានសន្តិសុខតាមទូរទស្សន៍ បន្ទាប់មកយើងមានគេហទំព័រ ប៉ុន្តែឥឡូវនេះយើងមានកាសែតទៀត”៕សារុន