37 C
Phnom Penh

កម្មករ​រោង​ចក្រ​កាត់​ដេរ​ចំនួន​៣៥​នាក់​​រង​របួស​​ដោយសារ​រថយន្ត​ក្រឡាប់​នៅ​ក្នុង​ខេត្ត​ស្វាយ​រៀង​

ដោយ ឌឹ ខេមបូឌា ដេលី

បទវិភាគ

នគ​​​របាល​​​ និង​​​មន្ត្រី​​​សុខាភិបាល​​​បាន​​​ឲ្យដឹង​​​កាល​​​ពីម្សិលមិញ​​​ថា កម្មករ​​​រោង​​​ចក្រ​​​​កាត់​ដេរ​រាប់សិប​​​នាក់​​​បាន​​​រង​​​របួស​​​ក្នុង​​​នោះ​​​មាន​​​បី​​​នាក​​​់​​​រង​​​របួស​​​ធ្ងន់​​​ បន្ទាប់​​​ពី​​​រថយន្ត​​​ដែល​​​ដឹក​​​ពួក​​​គេ​​​ទៅ​​​ធ្វើ​​​ការ​​​បាន​​​ក្រឡាប់​​​នៅ​​​លើ​​​ផ្លូវ​​​ជាតិ​​​លេខ​​​១​​​ ក្នុង​​​ខេត្ត​​​ស្វាយ​​​រៀង​​​កាល​​​ពី​​​ថ្ងៃ​​​សុក្រ​​​។

យោង​​​តាម​​​លោក គួយ យ៉ាង នាយ​​​នគរ​​​បាល​​​ចរាចរ​​​ខេត្ត​​​ស្វាយ​​​រៀង​​​នេះ​​​បាន​​​ឲ្យដឹង​​​ថា ហេតុ​​​ការណ៍​​​គ្រោះ​​​ថ្នាក់​​​ចរាចរណ៍​​​នេះ​​​បាន​​​កើត​​​ឡើង​​​នៅ​​​ព្រឹក​​​ថ្ងៃ​​​សុក្រ​​​ ខណៈ​​​រថយន្ត​​​មួយ​​​គ្រឿង​​​កំពុង​​​ដឹក​​​កម្មករ​​​ចំនួន​​​៣៥​​​នាក់​​​ទៅ​​​កាន់​​​តំបន់​​​សេដ្ឋ​​​កិច្ច​​​ពិសេស Dragon King នៅ​​​ក្នុង​​​ក្រុង​​​បាវិត​​​។

លោក គួយ យ៉ាង​​​ បាន​​​លើក​​​ឡើង​​​ទៀត​​​ថា រថយន្ត​​​នេះ​​​អាច​​​ដឹក​​​អ្នក​​​ដំណើរ​​​ប្រកប​​​​ដោយ​​​សុវត្ថិភាព​​​ត្រឹម​​​តែ​​​១៥​​​នាក់​​​ប៉ុណ្ណោះ​​​ ប៉ុន្តែ បែរ​​​ជា​​​ដឹក​​​លើស​​​ចំណុះ​​​ច្រើន​​​ទៅវិញ​​​ ដែល​​​ជា​​​ហេតុ​​​ធ្វើ​​​ឲ្យ​​​ក្រឡេ​​​រថយន្ត​​​ដាច់​​​។

លោក​​​បាន​​​មាន​​​ប្រសាសន៍​​​ថា “រថយន្ត​​​បាន​​​ក្រឡាប់​​​ដោយ​​​សារ​​​ក្រឡេ​​​មុខ​​​ដាច់​​​ ហើយ​​​បោក​​​ទៅ​​​នឹង​​​ថ្នល់​​​។ រថយន្ត​​​នេះ​​​ចាស់​​​ខ្លាំង​​​ណាស់​​​ ហើយ​​​អ្នក​​​បើក​​​បរ​​​ដឹក​​​អ្នក​​​ដំណើរ​ជាង​​​៣០​​​នាក់​​​”។

នាយ​​​នគរបាល​​​ចរាចរ​​​រូប​​​នេះ​​​បាន​​​លើក​​​ឡើង​​​បន្ត​​​ទៀត​​​ថា នគរ​​​បាល​​​កំពុង​​​តាម​​​​​​ចាប់​​​ខ្លួន​​​អ្នក​​​បើក​​​បរ​​​ឈ្មោះ អឹុង សារួត ​​​​​​​​​ដែល​​​រត់​​​គេច​​​ខ្លួន​​​ចេញ​​​ពី​​​កន្លែង​​​កើត​​​ហេតុ​​​។

យោង​​​តាម​​​លោក កែវ រដ្ឋា ប្រធាន​​​មន្ទីរ​​​សុខាភិបាល​​​ខេត្ត​​​នេះ​​​បាន​​​ឲ្យ​​​ដឹង​​​ថា កម្មករ​​​ទាំង​​​អស់​​​សុទ្ធ​​​តែ​​​រង​​​របួស ហើយ​​​ត្រូវ​​​បាន​​​បញ្ជូន​​​ទៅ​​​ព្យាបាល​​​នៅ​​​មន្ទីរ​​​ពេទ្យ​​​ជីភូ ក្នុង​​​ក្រុង​​​បាវិត​​​។

កម្មករចំនួ​​​ន​​​បីនាក់​​​ត្រូវ​​​បាន​​​​បញ្ជូន​ទៅ​ព្យាបាល​នៅ​មន្ទីរ​ពេទ្យ​កាល់​ម៉ែត​កាលពី​ម្សិលមិញ​ ដោយ​សារ​តែ​រង​របួស​ធ្ងន់​ ខណៈ​​​បួន​​​​​​នាក់​​​ទៀត​​​កំពុង​​​ព្យាបាល​​​នៅ​​​មន្ទីរ​​​ពេទ្យ​​​បង្អែក​​​ខេត្ត​​​។

លោក​​​បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា “នៅមាន​​​កម្មករ​​​ប្រហែល​​​ប្រាំ​​​មួយ ឬប្រាំពីរ​​​នាក់​​​ដែល​​​កំពុង​​​ស្ថិត​​​នៅ​​​ក្នុង​​​ស្ថានភាព​​​ធ្ងន់​​​ធ្ងរ​​​នៅ​​​ឡើយ​​​នៅ​​​​​​ថ្ងៃ​​​េនះ​​​”។

លោក​​​ រដ្ឋា បាន​​​លើក​​​ឡើង​ទៀត​​​​ថា កម្មករ​​​ចំនួន​​​ពី​​​រនាក់​​​ក្នុង​​​ចំណោម​​​កម្មករ​​​ចំនួន​​​បីនាក់​​​ដែល​​​​​​ត្រូវ​​​បាន​​​បញ្ជូន​​​ទៅ​​​កាន់​​​មន្ទីរ​​​ពេទ្យ​​​កាល់​​​ម៉ែត​​​កំពុង​​​ត្រូវ​​​បាន​​​ព្យាបាល​​​របួស​​​បាក់​​​ឆ្អឹង​​​ដង​​​កាំបិត​​​ រីឯ​​​ជន​​​រង​​​គ្រោះ​​​ទី​​​​​​៣​​​វិញ​​​​​​កំពុង​​​ត្រូវ​​​បាន​​​ព្យាបាល​​​របួស​​​ធ្ងន់​​​ត្រង់​​​ក្បាល​​​។

លោក​វេជ្ជបណ្ឌិត​​​​ ប្រាក់​​​ សម្បត្តិ​​​ ប្រធាន​​​មន្ទីរ​​​ពេទ្យ​​​ជីភូ បាន​​​លើក​​​ឡើង​​​ថា ក្នុង​​​ចំណោម​​​កម្មករ​​​ទាំង​​​៣៥​​​នាក់​​​ភាគ​​​ច្រើន​​​រង​​​របួស​​​ក្បាល។

​លោក​វេជ្ជបណ្ឌិត សម្បត្តិ​ បាន​ឲ្យ​ដឹង​ថា មក​ដល់​ត្រឹម​ថ្ងៃ​ម្សិលមិញ​ កម្មករ​ចំនួន​​២៨​នាក់​បាន​ចេញ​ពី​មន្ទីរ​ពេទ្យ​ហើយ​។ ថ្លៃ​ចំណាយ​លើ​​ការ​ព្យាបាល​ពួក​គេ​គឺ​បេឡា​ជាតិ​របប​សន្តិសុខ​សង្គម​ជា​អ្នក​​រ៉ាប់​រង​។

គ្រោះ​ថ្នាក់​ចរាចរណ៍​នៅ​ក្នុង​ខេត្ត​ស្វាយ​រៀង​នេះ​ គឺ​ជា​គ្រោះ​ថ្នាក់​​ថ្មី​​បំផុត​ នៅ​ក្នុង​គ្រោះថ្នាក់​ជា​ច្រើន​ពាក់​ព័ន្ធ​នឹង​រថយន្ត​ធុន​ធំ និង​រថយន្ត​ដឹក​កម្មករ​កាត់​ដេរ​​ ​ទៅ​កាន់​រោង​ចក្រ ឬ​ត្រឡប់​មក​វិញ​ជារៀង​រាល់​ថ្ងៃ​​នៅ​ទូទាំង​ប្រទេស​។ រថយន្ត​ដែល​ដឹក​កម្មករ​ជា​រឿយ​ៗ​តែង​តែ​​មិន​ត្រូវ​បាន​ថែ​ទាំ​បាន​ល្អ​ឡើយ​ ហើយ​ដឹក​លើស​ចំណុះ​ និង​​បើកបរ​ដោយ​អ្នក​បើក​បរ​ដែល​គ្មាន​ប័ណ្ណ​បើក​បរ​ និង​ការ​រៀន​បើក​បរ​ត្រឹម​ត្រូវ​៕ស៊ុយឈាង​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស