36 C
Phnom Penh

សារមន្ទីរ​អាមេរិក​ប្រគល់​រូប​ចម្លាក់​ហនុមាន​ឲ្យ​ប្រទេស​កម្ពុជា

ដោយ ឌឹ ខេមបូឌា ដេលី

បទវិភាគ

មន្ត្រី​ទទួល​រូប​ចម្លាក់​ហនុមាន​នៅ​ឯ​​អាកាសយានដ្ឋាន​អន្តរជាតិភ្នំពេញ​ កាលពី​ម្សិលមិញ​។ បន្ទាប់​ពីត្រូវ​គេលួច​ពី​ប្រាសាទ​កោះ​កេរ​ ក្នុង​ខេត្ត​ព្រះវិហារ​ រូបចម្លាក់​ហនុមាន​បាន​តម្កល់​នៅ​ឯ​សារមន្ទីរ​ក្លេវីឡែន ក្នុង​សហរដ្ឋអាមេរិក​អស់​រយៈពេល​៣៣​ឆ្នាំ​ មុន​នឹង​បញ្ជូន​មក​ប្រទេស​កម្ពុជា​វិញ​ កាលពី​ម្សិល​មិញ​។​ ​  ​         ​       រូបថតៈ​ ស៊ីវ ចាន់​ណា​
មន្ត្រី​ទទួល​រូប​ចម្លាក់​ហនុមាន​នៅ​ឯ​​អាកាសយានដ្ឋាន​អន្តរជាតិភ្នំពេញ​ កាលពី​ម្សិលមិញ។​ បន្ទាប់​ពីត្រូវ​គេលួច​ពី​ប្រាសាទ​កោះ​កេរ​ ក្នុង​ខេត្ត​ព្រះវិហារ​ រូបចម្លាក់​ហនុមាន​បាន​តម្កល់​នៅ​ឯ​សារមន្ទីរ​ក្លេវីឡែន ក្នុង​សហរដ្ឋអាមេរិក​អស់​រយៈពេល​៣៣​ឆ្នាំ​ មុន​នឹង​បញ្ជូន​មក​ប្រទេស​កម្ពុជា​វិញ​ កាលពី​ម្សិល​មិញ​។​ ​ ​ ​
រូបថតៈ​ ស៊ីវ ចាន់​ណា​

រូប​ចម្លាក់​ហនុមាន ដែល​ត្រូវ​បាន​លួច​ពី​ប្រាសាទ​​​កោះ​កេរ ក្នុង​ខេត្ត​ព្រះ​វិហារ ត្រូវ​បាន​ប្រគល់​មក​ឲ្យ​ប្រទេស​កម្ពុជា​វិញ​កាលពី​ថ្ងៃ​អាទិត្យ ក្រោយ​ពី​រយៈ​ពេល​៣៣​ឆ្នាំ​ជា​ទ្រព្យ​របស់​សារមន្ទីរ​សិល្បៈ ក្លេវីឡិន នៅ​សហរដ្ឋ​អាមេរិក

លោក ប្រាក់ ស៊ុនណារ៉ា អគ្គ​នាយក​នៃ​អគ្គ​នាយក​ដ្ឋាន​បេតិក​ភណ្ឌ ​ក្រសួង​វប្បធម៌​ និង​វិចិត្រ​សិល្បៈ បាន​បញ្ជាក់​កាលពី​ថ្ងៃ​អាទិត្យ​ថា រូប​ចម្លាក់​នេះ​គ្រោង​មក​ដល់​កាលពី​យប់​​​មិញ​​​នៅ​អាកាស​យានដ្ឋាន​អន្តរជាតិ​ភ្នំពេញ។

លោក​បាន​មាន​ប្រសាសន៍​ថា “រូប​ចម្លាក់​នឹង​មក​ដល់​នៅ​ម៉ោង​៨​និង​៣០​នាទី​យប់ ហើយ​រូប​ចម្លាក់​នេះ​ធ្វើ​ក្នុង​រចនា​បទ្ម​កោះ​កេរ​នា​សតវត្សរ៍​ទី​១០។ គេ​បាន​ប្រគល់​វា​មក​វិញ​ពី​អាមេរិក”។

លោក​មិន​អធិប្បាយ​បន្ថែម​ទេ ​តែ​បាន​ប្រាប់​ថា សន្និសីទ​ព័ត៌មាន​ផ្លូវការ​មួយ​ស្តីពី​រូប​ចម្លាក់​នេះ នឹង​ត្រូវ​ធ្វើ​នៅ​ទីស្តី​ការ​គណៈ​រដ្ឋមន្ត្រី​នៅ​ថ្ងៃ​អង្គារ។

យោង​តាម​វិបសាយ​របស់​សារមន្ទីរ​សិល្បៈ ក្លេវីឡិន បាន​ឲ្យ​ដឹង​​​ថា រូប​ចម្លាក់​ធ្វើ​ពី ថ្ម​ភក់​សត​វត្សរ៍​ទី​១០​នេះ​មាន​កម្ពស់​ប្រហែល​១១៦​សង់ទី​ម៉ែត្រ និង​ទទឹង​៥៤​សង់ទី​ម៉ែត្រ អង្គុយ​លុត​ជង្គង់ មាន​ដងខ្លួន​ជា​មនុស្ស​និង​ក្បាល​ស្វា។

លោក​ស្រី អាន ឡឺ​ម៉េស តំណាង​អង្គការ​យូណេស្កូ​នៅ​កម្ពុជា បាន​មាន​ប្រសាសន៍​ថា ច្បាស់​ណាស់​រូប​ចម្លាក់​នេះ​ពី​ដើមឡើយ​នៅ​ជាប់​នឹង​ជើង​ទ្រ ប៉ុន្តែ​វា​បាន​​​បាត់​ពី​ទីនោះ នៅ​ពេល​បុរាណ​វត្ថុ​វិទូ​ជីក​កកាយ​រក​ឃើញ​​​ជើង​ទម្រ​ដែល​​​រក​​​មិន​ឃើញ​ពី​មុន នៅ​ក្នុង​​​ប្រាសាទ​ចិន​​​នៃ​​​បរិវេណ​ប្រាសាទ​កោះ​កេរ​កាលពី​ឆ្នាំ​មុន ហើយ​​​បាន​​​កំណត់​​​ទីតាំង​​​ជាក់លាក់​​​របស់​​​រូប​​​ចម្លាក់​​​នោះ។

និយាយ​ពី​ប្រាសាទ​ចិន លោក​ស្រី ឡឺម៉េស បាន​មាន​ប្រសាសន៍​ថា “ខ្ញុំ​គិត​ថា ភ័ស្តុតាង​បញ្ជាក់​ថា វា​មក​ពី​កន្លែង​នោះ ពីព្រោះ​វា​ជា​ការ​​​ផ្គូផ្គង​ជើង​ទម្រ​ជាមួយ​រូប​ចម្លាក់​នោះ”។

លោក​ស្រី​បន្ថែម​ថា “អង្គការ​យូណេស្កូ ​ពេញ​ចិត្ត​ជា​ខ្លាំង​និង​ដឹង​គុណ​ចំពោះ​សារ​មន្ទីរ​ក្លេវីឡិន​ដែល​យល់​ព្រម​ប្រគល់​វា​មក​វិញ”។

លោក គង់ វីរៈ ប្រធាន​សារមន្ទីរ​​ជាតិ​កម្ពុជា​ក្នុង​ក្រុង​ភ្នំពេញ បាន​មាន​ប្រសាសន៍​ថា រូប​ចម្លាក់​នេះ​នឹង​ត្រូវ​ប្រគល់​ទៅ​ឲ្យ​សារមន្ទីរ​ជាតិ​នៅ​ថ្ងៃ​ច័ន្ទ ហើយ​នឹង​ត្រូវ​តាំង​បង្ហាញ​នៅ​ទីនោះ។

កាលពី​ខែ​ឧសភា​ឆ្នាំ​មុន កាសែត The Plain Dealer របស់​ក្លេវីឡិន បាន​រាយការណ៍​ថា លោក​ស្រី សុនីញ៉ា រី គីនតានីលឡា អ្នក​អភិរក្ស​សិល្បៈ​ឥណ្ឌា​និង​អាស៊ី​អាគ្នេយ៍​របស់​សារមន្ទីរ​ក្លេវីឡិន បាន​ធ្វើ​ដំណើរ​មក​ប្រទេស​កម្ពុជា ជាច្រើន​ខែ​មុន​នោះ ដើម្បី​ព្យាយាម​កំណត់ ថា​​​តើ​រូប​ចម្លាក់​នេះ​មកពី​ប្រាសាទ​ចិន មែន​ឬ​យ៉ាងណា។

កាសែត​នេះ​បាន​ដក​ស្រង់​សម្តី លោក​ស្រី គីនតានីលឡា ដែល​និយាយ​នៅ​ពេល​នោះ​ថា “ការងារ​របស់​យើង​អំពី​រូប​ចម្លាក់​នេះ​និង​ប្រភព​ដើម​របស់​វា​កំពុង​ដំណើរការ​នៅ​ឡើយ និង​ប្រើ​ពេល​វេលា​ច្រើន ប៉ុន្តែ​រហូត​មក​ដល់​ពេល​នេះ ផ្អែក​លើ​ការ​ស្រាវជ្រាវ​ដល់​ទី​កន្លែង​របស់​ខ្ញុំ​ក្នុង​ប្រទេស​កម្ពុជា​កាលពី​ដើម​ឆ្នាំ​នេះ ខ្ញុំ​អាច​រាយការណ៍​ថា ខ្ញុំ​មិន​បាន​រក​ឃើញ​ភ័ស្តុតាង​ជាក់​ស្តែង​ណាមួយ​ដើម្បី​បញ្ជាក់​ថា ហនុមាន​នៅ​ក្លេវីឡិន មាន​ប្រភព​មកពី​ប្រសាទ​ចិន​នោះ​ទេ”។

ទាំង​លោក​ស្រី គីនតានីលឡា ទាំង​លោក​ស្រី ខារ៉ូលីន ហ្គូសស្កត់ អ្នក​នាំ​ពាក្យ​របស់​សារ​មន្ទីរ មិន​បាន​ឆ្លើយ​តប​ភ្លាមៗ​ទៅ​នឹង​សំណើ​សុំ​ការ​ពន្យល់​ទេ។

លោក​ស្រី ឡឺម៉េស បាន​និយាយ​ថា លោក​ស្រី​មិន​បាន​ដឹង​ថា​អ្វី​ដែល​បាន​ជំរុញ​ឲ្យ​សារ​មន្ទីរ​​នេះ​ប្រគល់​រូប​ចម្លាក់​នេះ​មក​វិញ​នោះ​ទេ ប៉ុន្តែ​​​វា​មិន​ទាន់​ដល់​ពេល​ត្រូវ​ស្នើ​សុំ​ឲ្យ​ប្រគល់​​​ទេ មុន​ពេល​ជើង​ទម្រ​បន្ថែម​ទៀត​នៅ​ប្រាសាទ​នោះ​ត្រូវ​បាន​រក​ឃើញ​កាលពី​ឆ្នាំ​មុន​​​នោះ។

លោក​ស្រី​បាន​និយាយ​ថា “ខ្ញុំ​គិត​ថា យើង​មិន​អាច​ស្នើ​សុំ​ពិត​ប្រាកដ ដោយ​គ្មាន​ការ​បញ្ជាក់​ភ័ស្តុតាង​ឡើយ”៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស