28 C
Phnom Penh

លោកស្រី មូរ សុខហួរ នៅស្ងៀម​អំឡុងការ​សាកសួរ​នៅ​តុលាការ​

ដោយ ឌឹ ខេមបូឌា ដេលី

បទវិភាគ

លោក​ស្រី មួរ​ សុខ​ហួរ ចូល​មក​តុលាការ​ក្រុង​ភ្នំពេញ ​កាលពីម្សិល​មិញ។ ស៊ីវ ចាន់​ណា​

លោកស្រី​ មូរ សុខហួរ សមាជិក​សភា​គណបក្សប្រឆាំង​​​បាន​បដិសេធ​មិន​ឆ្លើយ​សំណួរ​ទាំង​អស់​អំឡុង​ការ​សាក​សួរ​នៅ​សាលា​ដំបូង​រាជធានី​ភ្នំពេញ​កាលពីម្សិលមិញ ដោយ​បាន​ប្រាប់​ចៅក្រម​ត្រឹម​តែថា លោក​គ្មាន​សិទ្ធិ​កោះ​ហៅ​លោកស្រីទេ ដោយ​សារ​លោកស្រី​មាន​អភ័យ​ឯកសិទ្ធិ​រួចផុត​ពី​ការ​ផ្ដន្ទាទោស​។

កាលពី​ឆ្នាំ​មុន លោកស្រី មូរ សុខហួរ បាន​ដឹកនាំ​យុទ្ធនាការ​មួយ​ដើម្បី​ចូលទៅ​កាន់​ទីលាន​ប្រជាធិបតេយ្យ​ក្នុង​រាជធានី​ភ្នំពេញ អំឡុង​ការ​​ជាប់គាំង​ក្រោយ​ការ​បោះ​ឆ្នោត​ជាមួយ​គណបក្ស​ប្រជាជន​កម្ពុជា​។ បន្ទាប់ពី​ការ​តវ៉ា​បាន​ប្រែ​ក្លាយជា​ហិង្សា​កាលពី​ថ្ងៃ​ទី​១៥ ខែ​កក្កដា លោកស្រី​ត្រូវ​បាន​ចាប់ខ្លួន​ជាមួយ​សមាជិក​សភា​គណបក្ស​សង្គ្រោះ​ជាតិ​ប្រាំមួយ​រូប​ទៀត ដែល​ក្រោយ​មក​​អ្នក​ទាំង​អស់​ត្រូវ​បាន​ចោទ​ប្រកាន់ពី​បទ​ “ដឹកនាំ​កុបកម្ម​”។

បន្ទាប់​ពី​កិច្ច​ព្រមព្រៀង​រវាង​លោក​នាយក​រដ្ឋមន្ត្រី ហ៊ុន សែន និង​​លោក សម រង្ស៊ី មេដឹក​នាំ​គណបក្ស​ប្រឆាំង​​ សមាជិក​សភា​គណបក្ស​សង្គ្រោះ​ជាតិ​បាន​ទទួលយក​អាសនៈរបស់ខ្លួន​នៅក្នុងុ​​រដ្ឋសភា​ ហើយទទួល​បាន​អភ័យ​ឯកសិទ្ធិ។ ទោះជាយ៉ាង​ណា​ ចាប់​តាំងពី​ពេល​នោះ​មក សមាជិក​មួយ​ចំនួន​ត្រូវ​បាន​កោះហៅ​ទៅ​សាក​សួរ​នៅ​តុលាការ​ជុំវិញ​​ហេតុការណ៍​​កាល​ពី​ថ្ងៃ​ទី​១៥ ខែ​កក្កដា។

លោកស្រី មូរ សុខហួរ ជា​សមាជិក​សភា​ដ៏ឆ្នើម​មួយ​រូប​​ក្នុង​ចំណោម​សមាជិក​សភា​ដែល​ត្រូវ​បាន​ចាប់ខ្លួន ​បាន​មាន​ប្រសាសន៍​នៅ​ខាង​ក្រៅ​តុលាការ​កាលពី​ម្សិលមិញ​ថា លោកស្រី​នៅ​តែ​មិន​ឆ្លើយ​អំឡុង​ការ​សាក​សួរ​ បន្ទាប់ពី​សួរ​ចៅក្រម​ថា​តើ​ហេតុ​អី​បាន​ជា​លោក​មិន​យក​ចិត្ត​ទុក​ដាក់​នឹង​អភ័យ​ឯកសិទ្ធិសភា​របស់លោកស្រី។

លោកស្រី​ មូរ សុខហួរ បាន​មាន​ប្រសាសន៍​​​សំដៅ​ដល់​មាត្រា​ក្នុង​រដ្ឋធម្មនុញ្ញ​ដែល​ផ្ដល់​អភ័យ​ឯកសិទ្ធិ និង​លក្ខខណ្ឌ​ដែលក្នុង​នោះអាច​ត្រូវ​បាន​ដក​ថា ” ខ្ញុំ​បាន​សួ​រ​តុលាការ លោក កែវ មុនី ចៅក្រម​ស៊ើបសួរថា ​មុន​ពេល​កោះ​ហៅ​រូប​ខ្ញុំ​ថា តុលាការ​ត្រូវ​អនុវត្ត​តាម​មាត្រា​៨០”។

លោកស្រី​បាន​បន្ថែម​ថា ” ចៅក្រម​រូប​នោះ​បាន​ប្រាប់​ខ្ញុំ​ថា គាត់​​មាន​សិទ្ធិ​មិន​ឆ្លើយ​​សំណួរ​របស់​ខ្ញុំ។ មាន​១០ ឬ​ប្រហែល​១១​ឬ១២​សំណួរ​ឯណោះ​ទាក់​ទង​នឹង​ការ​តវ៉ា​កាលពី​ថ្ងៃ​ទី១៥ ខែ​កក្កដា ឆ្នាំ​២០១៤ នៅ​ទីលាន​ប្រជាធិបតេយ្យ”។

លោកស្រី​បាន​មាន​ប្រសាសន៍​ថា ” ដោយ​សារ​តុលាការ​មិន​បាន​អនុវត្ត​តាម​មាត្រា​៨០ ស្ដីពី​នីតិវិធី​ក្នុង​ការ​កោះ​ហៅ​សមាជិក​សភា​នោះ ដូច្នេះ​ហើយ​ខ្ញុំ​មាន​សិទ្ធិ​​​មិន​ឆ្លើយ​តប​នឹង​សំណួរ​ដែល​តុលាការ​បាន​សួរ”។

នៅ​ពេល​ត្រូវ​បាន​សួរ​ថា តើ​អ្វីដែល​លោកស្រីគិត​ថា​នឹង​កើត​ឡើង​បន្ទាប់​ពាក់​ព័ន្ធ​​ករណី​ប្រឆាំង​លោកស្រី និង​សមាជិក​សភា​ដទៃ​ទៀត​នោះ លោកស្រី​ មូរ សុខហួរ បានមាន​ប្រសាសន៍​ត្រឹម​តែ​ថា លោកស្រី​បាន​ស្នើឲ្យ​មាន​ការ​លើក​លែង​ករណី​នេះ។

លោកស្រី​បាន​មាន​ប្រសាសន៍​ថា “ខ្ញុំ​មិន​ដឹង​ទេ ប៉ុន្តែ​ខ្ញុំ​មាន​សំណូមពរ​ពីរ​ចំពោះតុលាការ​នៅ​ថ្ងៃ​នេះ…។ ទី១ តុលាការ​ត្រូវ​អនុវត្ត​តាម​ច្បាប់​រដ្ឋធម្មនុញ្ញ។ សំណូមពរ​ទី២ គឺ​ថា​តុលាការ​ត្រូវ​លើក​លែង​ការ​ចោទ​ប្រកាន់​មក​លើ​រូប​ខ្ញុំ​ដែល​ជា​សមាជិក​សភា​មួយ​រូប”។

លោកស្រី​បាន​បន្ថែម​ថា ” តុលាការ​មិន​បាន​ឆ្លើយ​តប​នឹង​សំណូមពរ​​ទាំង​នេះ​ទេ”។ ចៅក្រម​ កែវ មុនី ​មិន​​អាច​ទាក់​​ទង​បាន​ទេ​កាលពី​ម្សិលមិញ​។

យោង​តាម​មាត្រា​៨០ នៃ​រដ្ឋធម្មនុញ្ញ​ សមាជិក​សភា​​អាច​ត្រូវ​បាន​ដក​អភ័យ​ឯកសិទ្ធិ​របស់ខ្លួន​ដោយ​សំឡេង​ឆ្នោត​ដាច់​ខាត​ពីរ​ភាគ​បី​នៃ​សមាជិក​សភា។ សមាជិក​សភា​បច្ចុប្បន្ន​​មាន​៦៨​រូប​មក​ពី​គណបក្ស​ប្រជាជន​កម្ពុជា និង​៥៥រូប​មក​ពី​គណបក្ស​សង្គ្រោះជាតិ​ ដោយមិន​មាន​គណបក្ស​ណាមួយ​មាន​សំឡេង​ភាគ​ច្រើន​ដាច់​ខាត​ឡើយ​៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស