វិវាទ​ដីធ្លី​ដ៏​ជូរចត់​​រវាង​គ្រួសារ​​មួយ និង​ឧកញ៉ា​ ឃុន សៀ ជិត​ឈាន​ដល់​ទី​បញ្ចប់​ហើយ​

លោក​ស្រី​ ម៉ក ស៊ីវហុង រៀបចំអីវ៉ាន់​នៅផ្ទះ​លោក​ស្រី​ក្នុង​ខណ្ឌ​ទូលគោក​ ក្រុង​ភ្នំពេញ​ កាលពីម្សិលមិញ​។​ រូបថតៈ ស៊ីវ ចាន់​ណា​

នៅឯ​​ផ្ទះ​ខ្ទម​របស់​ខ្លួន​នៅ​កាច់​ជ្រុង​នៃ​ចំណុច​ផ្លូវ​ប្រសព្វ​ដ៏​មមាញឹក​មួយ​ក្នុង​ខណ្ឌ​ទួលគោក រាជធានី​ភ្នំពេញ​​កាលពី​ម្សិលមិញ លោក លី ស្រា៊ង​ខេង វ័យ​៥៨​ឆ្នាំ ​បាន​យក​ដុំថ្ម​គប់​ជើង​របស់​ខ្លួន​ ហើយ​គ្រវីក្បាល​​ នៅ​ពេល​គិត​ដល់​ខុន​ដូ​មួយ​ដែល​គេ​​សាង​សង់​នៅ​លើ​ដី​ដែល​គាត់​បាន​តស៊ូការ​ពារ​អស់​រយៈ​ពេល​ជាច្រើន​ឆ្នាំ​មក​ហើយ​។

គាត់​បាន​និយាយ​សំដៅ​ដល់​អតីត​អ្នក​ជិត​ខាង​ដែល​បាន​ទទួល​យក​សំណង​កាលពី​ប៉ុន្មាន​ឆ្នាំមុន​ហើយ​រើ​ចេញ​ថា “​ខ្ញុំ​​ក្រៀម​ក្រំ​ណាស់​ដែល​បាត់​បង់​ផ្ទះ​របស់​ខ្ញុំ។ ខ្ញុំ​ជា​ម្ចាស់របស់​វា​ជាយូរ​មក​ហើយ។ អ្នក​ផ្សេង​ៗ​​​ទៀត​គ្មាន​ឯកសារ​ដូច​ខ្ញុំ​​ទេ”។

ដោយ​កូន​ស្រី​របស់​គាត់​​​ជាប់​ពន្ធនាគារ​ដោយ​សារ​តែ​វិវាទ​ដីធ្លី​នេះ​ជាមួយ​ឧកញ៉ា ឃុន សៀ នៅ​ទីបំផុត​​ពោល​គឺ​កាលពី​ខែមុន លោក​ លី ស្រា៊ងខេង និង​ក្រុម​គ្រួសារ​បាន​ចុះ​កិច្ច​ព្រមព្រៀង​ទទួល​យក​សំណង​ជា​ថ្នូរ​នឹង​ដី​ឡូតិ៍​របស់​គាត់​។ ប៉ុន្តែ​គាត់​និយាយ​ថា វា​ជា​កិច្ច​ព្រមព្រៀង​មួយ​ដែល​ធ្វើ​ឡើង​ដោយ​ការ​បង្ខិត​បង្ខំ​ពួកគាត់​។ គាត់​បាន​និយាយ​ទៀត​ថា “មែន យើង​បាន​យល់​​ព្រម​ ប៉ុន្តែ​យើង​មិន​គួរ​ណា​យល់​ព្រមទេ​”។

គាត់​អះអាង​ថា ពួកគាត់​បាន​​រស់​នៅ​លើ​ដីឡូតិ៍​នេះ​តាំង​ពី​ឆ្នាំ​១៩៧៩​មក​ម្លេ៉ះ។ ​ក្នុង​រយៈ​ពេល​ជាច្រើន​ឆ្នាំ​មក​នេះ​ ការិយាល័យ​រដ្ឋបាល​មូលដ្ឋាន​ និង​ទីស្នាក់​ការ​របស់​គណបក្ស​ប្រជាជន​កម្ពុជា​ស្ថិត​នៅ​ពី​​លើ​ផ្ទះ​​ប្រក​ស័ង្កសី​របស់​គាត់ ប៉ុន្តែ​ដី​នេះ​ត្រូវ​បាន​ដោះ​ដូរ​ជាមួយ​ក្រុម​ហ៊ុន​ឃុន​សៀ អាហរ័ណ នីហរ័ណ ក្នុង​ឆ្នាំ​២០១០។

ក្នុង​រយៈ​ពេល​៥ឆ្នាំ​ចាប់​តាំង​ពី​ពេល​នោះ​មក​ គ្រួសារ​មួយ​នេះ​បាន​តស៊ូ​​ទប់​ទល់​ការ​គំរាម​កំហែង​​ពី​សំណាក់​ក្រុមអន្ធពាល​ដែល​គេ​ចោទ​ថា​ជួល​ដោយ​ក្រុម​ហ៊ុន​របស់​លោក ឃុន សៀ ដោយ​សារ​តែ​​គ្រួសារ​នេះ​មិន​ព្រមទទួល​យក​សំណង​​១៥.០០០​ដុល្លារ​ជា​ថ្នូរ​នឹង​ការ​រើ​ចេញ។

តាម​ច្បាប់​ភូមិ​បាល​របស់​កម្ពុជា​ លោក លី ស្រា៊ងខេង មាន​សិទ្ធិ​ក្លាយ​ជា​ម្ចាស់​ដី​នោះ​តាម​ផ្លូវ​ច្បាប់ ដោយ​សារ​តែ​គាត់​បាន​កាន់​កាប់​​ដី​នោះ​ជាង​៥ឆ្នាំ​មុន​ឆ្នាំ​២០០១។ ទោះ​ជាយ៉ាង​ណា ការ​ខំប្រឹង​ប្រែង​របស​់​គាត់​ដើម្បី​ធ្វើ​ប័ណ្ណ​កម្មសិទ្ធិ​ដីធ្លី​មិន​ទទួល​បាន​ជោគ​ជ័យទេ ហើយ​សាលា​ដំបូង​រាជធានី​ភ្នំពេញ​បាន​សម្រេច​ឲ្យ​លោក ឃុន សៀ ឈ្នះ​ខណៈ​វិវាទ​នេះ​បាន​បន្ត​អូស​បន្លាយ​រយៈ​ពេល​វែង​។

នៅ​ទីបំផុត​ការ​​តតាំង​របស់​​គ្រួសារ​នេះ​ត្រូវ​គេ​បំបែក​បានកាលពី​ខែមីនា នៅ​ពេល​ពួកគាត់​​ទទួល​យក​សំណង​ដើម្បី​រើចេញពី​ដី​នេះ។ នៅ​ពេល​នោះ​ លោក លី ស្រា៊ងខេង និយាយ​ថា គាត់​សុខ​ចិត្ត​ចាញ់​ ប៉ុន្តែ​មិន​មែន​ដើម្បី​​ប្រាក់​ទេ។​ គាត់​និយាយ​ថា គាត់​សង្ឃឹម​ថា​នឹង​មាន​ការ​ដោះលែង​កូនស្រី​របស់​គាត់​ឈ្មោះ លី ស៊ាវមិញ អាយុ​២៣​ឆ្នាំ ដែល​បាន​ជាប់​ពន្ធនាគារ​តាំង​ពី​ខែ​វិច្ឆិកា​មក ក្រោយ​ពី​ក្រុម​ហ៊ុន​បាន​ធ្វើ​ការ​ចោទ​ប្រកាន់​បន្ទាប់ពី​មាន​ហេតុការណ៍​ប្រវាយ​ប្រតប់​គ្នា​ជាមួយ​សន្តិសុខ​ក្រុម​ហ៊ុន​​នេះ​។

លោក ជូង ជូងី មេធាវី​តំណាង​ឲ្យ​គ្រួសារ​នេះ​បាន​មាន​ប្រសាសន៍​កាលពី​ម្សិលមិញ​ថា ​ពេល​នេះ​មាន​កិច្ច​ព្រមព្រៀង​​ជា​ចុង​ក្រោយ​​ហើយ​​ បន្ទាប់ពី​កញ្ញា លី ស៊ាវមិញ ត្រូវ​បាន​ដោះ​លែង​​ពី​ពន្ធនាគារ ហើយ​ថា ការ​ជាប់​ពន្ធនាគារ​របស់​នាង​មិន​មែន​ជា​កត្តា​មួយ​នៅ​ក្នុង​ការ​សម្រេច​ចិត្ត​របស់​គ្រួសារ​នេះ​ទេ។

លោក​បាន​មាន​ប្រសាសន៍​ទៀត​ថា ” ពួកគាត់​បាន​​យល់​ព្រម​ទទួល​យក​សំណង ពីព្រោះ​ម្ដាយ​និង​កូនស្រី​ពួកគាត់​បាន​ព្យាយាម​​​បញ្ចុះ​បញ្ចូល​ឲ្យ​ដោះ​ស្រាយ​​រឿង​នេះ​តាម​ផ្លូវ​តុលាការ​ ហើយ​ក៏​សម្រេច​ចិត្ត​ថា ការ​បន្ត​សំណុំ​រឿង​នេះ​នឹង​ធ្វើ​ឲ្យ​រង់ចាំ​កាន់​តែ​យូរ ហើយ​​ទទួល​បាន​ [លទ្ធផល​] ដដែល”។

លោក​បាន​មាន​ប្រសាសន៍​បន្ថែម​ទៀត​ថា សំណង​ចុង​ក្រោយ​ចំនួន​១៨ម៉ឺន​ដុល្លារ​​ត្រូវ​បាន​ព្រមព្រៀង​គ្នា​កាលពី​​២​សប្ដាហ៍​មុន ដោយ​ប្រគល់​ប្រាក់​ឲ្យ​ចំនួន​៥ម៉ឺនដុល្លារ​នៅ​ពេល​ចុះ​ហត្ថលេខា ហើយ​​ចំណែក​ដែល​នៅ​សេសសល់​ចំនួន​១៣​ម៉ឺន​ដុល្លារទៀត​ត្រូវ​បង់​ឲ្យ​ពួកគាត់​នៅ​ពេល​ពួកគាត់​ចាក​ចេញពី​ដី​នេះ​តាម​ការ​គ្រោង​ទុក​នៅ​ថ្ងៃ​ទី​២០ ខែ​ឧសភា។

លោក ឃុន សៀ មិន​អាច​ទាក់​ទង​សុំ​ការ​បំភ្លឺ​បាន​ទេ​កាលពី​ម្សិលមិញ​ជុំវិញ​បញ្ហា​នេះ​។ លោក យឹម លាង ដែល​ជា​ដៃគូ​រក​ស៊ី​របស់​លោក​បាន​បញ្ជាក់​ថា ពិត​ជាមាន​កិច្ច​ព្រមព្រៀង​នេះ​មែន។ លោក​បាន​មាន​ប្រសាសន៍​ទៀត​ថា “មែន យើង​បាន​ផ្ដល់​សំណង​ឲ្យ​ពួកគាត់​។ អស់​លោក​អាចទៅ​សាក​សួរ​គ្រួសារ​នេះ​បាន​ថា ប្រាក់​នោះ​មាន​ចំនួន​ប៉ុន្មាន”៕ សុខុម​​​​​​​

 

 

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.