31 C
Phnom Penh

សាលាដំបូង​ខេត្ត​កំពង់​ចាម​​ចោទ​ប្រកាន់​ស្ត្រីម្នាក់ពី​បទ​ជួញដូរ​មនុស្ស​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​ឲ្យ​ដឹង​ថា កាលពី​មិ្សលមិញ​សាលា​ដំបូង​ខេត្ត​កំពង់ចាម​បាន​ចោទ​ប្រកាន់​ស្ត្រី​អាយុ​៣៩​ឆ្នាំ​ម្នាក់​ពីបទ​ជួញដូរ​មនុស្ស​ បន្ទាប់ពី​តាម​ចោទ​ថា​​ស្ត្រី​រូប​នេះ​បាន​បោក​ប្រាស់​មនុស្ស​ជាង​១២​នាក់​ឲ្យ​ទៅ​ធ្វើការ​នៅ​ប្រទេស​ម៉ាឡេស៊ី​ក្រោម​ការ​សន្យា​ក្លែង​ក្លាយ​។

លោក មិន​ សុវិសាល នាយការិល័យនគរ​បាល​ប្រឆាំង​ការ​ជួញដូរ​មនុស្ស​ខេត្ត​បាន​មាន​ប្រសាសន៍​ថា អ្នកស្រី ហម ឡី ត្រូវ​បាន​ចាប់​ខ្លួន​ក្នុងឃុំ​ស្ពឺ​ ស្រុក​ចម្ការលើ នៅ​ម៉ោង​ប្រហែល​១០និង​៣០​នាទី​ព្រឹក​ថ្ងៃ​សៅរ៍។

លោក សុវិសាល បានមាន​ប្រសាសន៍​ថា “​យើងបាន​ចាប់​ខ្លួន​ស្ត្រី​រូប​នេះ​តាម​ដីកា​របស់​តុលាការតាមការ​ចោទប្រកាន់​​ពីបទ​បោក​ប្រាស់​មនុស្ស​​ឲ្យ​ទៅ​ធ្វើ​ការ​នៅ​ប្រទេស​ម៉ាឡេ​ស៊ី…។ យើង​បាន​ចាប់​ខ្លួន​ស្ត្រី​រូប​នេះ​រយៈពេលជិត​១សប្ដាហ៍ បន្ទាប់ពី​គាត់​បាន​ត្រឡប់​មកពី​ប្រទេស​ម៉ាឡេស៊ី​វិញ”។

លោក​បាន​មាន​ប្រសាសន៍​ថា ការ​ចាប់​ខ្លួន​អ្នកស្រី ឡី ធ្វើ​ឡើង​បន្ទាប់ពី​ពលករ​ចំណាក​ស្រុក​ប្រាំបី​នាក់​ដែល​ស្ត្រី​រូប​​នេះ​បាន​បោក​ប្រាស់​ត្រូវ​​បានអាជ្ញាធរ​ម៉ាឡេស៊ី​ឃុំ​ខ្លួន​​កាលពី​ថ្ងៃទី​៦ ខែ​មីនា នៅ​ប៉ុស្តិ៍​ត្រួត​ពិនិត្យ​មួយ​តាម​ព្រំដែន​ថៃ ខណៈ​ដែល​ពួកគេ​បាន​ព្យាយាម​​​ត្រឡប់​មក​ស្រុក​កំណើត​របស់​ខ្លួន​វិញ បន្ទាប់ពី​រត់គេច​ពី​ចម្ការ​ដូង​ប្រេង​ដែល​លិខិត​ឆ្លង​ដែន​របស់​ពួកគេ​ត្រូវ​បាន​រឹប​អូស​។

លោក សុវិសាល បាន​មាន​ប្រសាសន៍​ថា ” ជន​រងគ្រោះទាំង​នេះ​បាន​ប្រាប់​នគរ​បាល​ថា ពួកគេ​ត្រូវ​បាន​បោក​ប្រាស់​ ហើយ​ត្រូវ​បាន​ប្រាប់​ថា ពួកគេ​នឹង​ទទួល​បាន​ការ​ងារ​ល្អ មាន​ប្រាក់​ខែ​ខ្ពស់ ប៉ុន្តែ​ផ្ទុយ​ទៅនឹង​ការ​សន្យានោះ ​​ពួកគេ​ត្រូវ​បាន​នគរ​បាល​ម៉ាឡេស៊ី​ចាប់​ដាក់​ពន្ធ​នាគារ”។

លោក​បាន​មាន​ប្រសាសន៍​ថា អ្នកស្រី ឡី បាន​សារភាព​ចំពោះ​ការ​ជួញដូរ​ក្រុម​នេះ ហើយ​សារភាព​ថា បាន​ទទួល​ប្រាក់​​២០០​ដុល្លារ​​​ពីពលករ​​ម្នាក់ៗ​ពី​មេខ្លោង​ជនជាតិ​ខ្មែរ​ក្នុង​ប្រទេស​ម៉េឡេស៊ី​។

អ្នកស្រី កិល ស្រីនាថ អាយុ​៣០​ឆ្នាំ ជា​ប្រពន្ធ​របស់​លោក ឌឹម វ៉ា អាយុ​៣៤​ឆ្នាំ ដែល​បច្ចុ​ប្បន្ន​នេះ​កំពុង​​រង់​ចាំ​សវនាការ​ជំនុំជម្រះ​​​នៅ​ប្រទេស​ម៉ាឡេស៊ី​បន្ទាប់ពី​ត្រូវ​បាន​ចាប់​ខ្លួន​ដោយ​មិន​មាន​លិខិត​ឆ្លង​ដែន​នោះ បាន​ពន្យល់​ពី​ស្ថានភាព​ធ្ងន់ធ្ងរ​ដែល​ប្ដី​របស់​អ្នកស្រី​ត្រូវ​បាន​បង្ខំ​ឲ្យ​ធ្វើ​ការ​​នៅ​ក្នុង​ប្រទេស​ម៉ាឡេស៊ី បន្ទាប់ពី​អ្នកស្រី​ ឡី បាន​សម្រប​សម្រួល​ការ​ធ្វើ​ដំណើរ​របស់​គាត់​ទៅកាន់ប្រទេស​នេះ។

អ្នកស្រី ស្រីនាថ បាន​​និយាយ​ថា “​ប្ដី​របស់​ខ្ញុំ​បាន​ទូរស័ព្ទ​មក​ខ្ញុំ​នៅពេល​គាត់​​សម្រេច​ចិត្ត​រត់​គេច​ចេញពី​ចម្ការ​ដូង​ប្រេង ពីព្រោះ​ថៅកែ​របស់​គាត់​បាន​បង្ខំ​ឲ្យ​គាត់​ធ្វើ​ការ​ថែម​ម៉ោង​ដោយ​ខ្វះ​​ការ​ថែទាំ​សុខភាព​”។

លោក ផាន់ សុភ័ក្ត្រ ព្រះរាជអាជ្ញារង​អម​សាលា​ដំបូង​ខេត្ត​កំពង់ចាម​បាន​មាន​ប្រសាសន៍​ថា អ្នកស្រី ឡី ត្រូវ​បាន​ចោទ​ប្រកាន់ពី​បទ​ជួញដូរ​មនុស្ស ហើយ​ថា ក្រសួង​ការ​បរទេស​​ និង​ស្ថាន​ទូត​កម្ពុជា​​​ប្រចាំ​ទីក្រុង​គូឡាឡាំពួរ​បាន​ព្យាយាម​ស្វែង​រក​ពលករ​ប្រាំមួយ​នាក់​ទៀត​ដែល​គេ​គិត​ថា ត្រូវ​បាន​ជួញដូរ​ជាមួយ​ក្រុម​នេះ​ដែរ។

លោក​បាន​មាន​ប្រសាសន៍​ថា “​ខ្ញុំ​បាន​សម្រេច​ចោទ​ប្រកាន់​ស្ត្រី​រូប​នេះ​ហើយ​តាម​មាត្រា​១១ នៃ​ច្បាប់​ប្រឆាំង​ការ​ជួញដូរ​មនុស្ស​”។ លោក​បាន​បន្ថែម​ថា ស្ត្រីរូប​នេះ​​​ត្រូវ​បាន​ឃុំ​ខ្លួន​បណ្ដោះ​អាសន្ន​នៅ​ពន្ធនាគារ​ខេត្ត​។

លោក សុភ័ក្ត្រ បានមាន​ប្រសាសន៍​ថា តុលាការ​បាន​ស៊ើប​អង្កេត​លើ​ជន​សង្ស័យផ្សេង​ទៀត​នៃ​ក្រុម​ជួញដូរ​មនុស្ស​នេះ​៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស