នគរបាលប្រឆាំងការជួញដូរគ្រឿងញៀនបានឲ្យដឹងកាលពីម្សិលមិញថា នគរបាលនៅក្នុងប្រទេសឡាវបានចាប់ខ្លួនស្ត្រីខ្មែរម្នាក់រួមជាមួយនឹងជនជាតិឡាវពីរនាក់ទៀតបន្ទាប់ពីអ្នកទាំងបីព្យាយាមឆ្លងដែននៅភាគឦសានរបស់កម្ពុជាជាមួយនឹងថ្នាំញៀនមេតំហ្វេតាមីនទម្ងន់៦គីឡូក្រាមកាលពីថ្ងៃអាទិត្យ។
លោក អុិន សុង អនុប្រធាននាយកដ្ឋានប្រឆាំងគ្រឿងញៀននៃក្រសួងមហាផ្ទៃ បានមានប្រសាសន៍ថា ជនសង្ស័យទាំងបីដែលរួមមានទាំងស្ត្រីខ្មែរម្នាក់ឈ្មោះ ប៊ុន នាថ អាយុ៤៨ឆ្នាំផង បានស្ថិតក្រោមការឃ្លាំមើលពីសំណាក់កងកម្លាំងសន្តិសុខខេត្តស្ទឹងត្រែង។ នៅពេលពួកគេជិះរថយន្តមួយបាំងកន្លះឆ្លងដែនភ្លាមៗកាលពីរសៀលថ្ងៃអាទិត្យ នគរបាលឡាវបានឃាត់ខ្លួនពួកគេ ហើយដកហូតបានថ្នាំញៀនទាំងនេះដែលគេស្គាល់ថា “ម៉ាទឹកកក” ក្នុងចំនួនយ៉ាងច្រើន។
លោកបានមានប្រសាសន៍យ៉ាងដូច្នេះថា “យើងសង្ស័យថា ពួកគេគឺជាអ្នករត់ពន្ធគ្រឿងញៀនឆ្លងដែនចូលទៅក្នុងប្រទេសឡាវ ហើយនគរបាលប្រឆាំងគ្រឿងញៀនរបស់យើងបានរាយការណ៍រឿងនេះទៅនគរបាលឡាវ ហើយយើងបានបន្តឃ្លាំមើលពួកគេ។ នៅពេលរថយន្តវីហ្គោមួយបាំងកន្លះរបស់ពួកគេត្រូវបានឃាត់ទុក នគរបាលបានឆែកឆេរឃើញម៉ាទឹកកកទម្ងន់៦គីឡូក្រាមដែលពួកគេរក្សាទុក។
លោកបានលើកឡើងទៀតថា នគរបាលព្រំដែននៃប្រទេសទាំងពីរបានធ្វើសហប្រតិបត្តិការជិតស្និទ្ធចាប់តាំងពីដើមឆ្នាំ២០១៥មក ដើម្បីបង្ក្រាបការរត់ពន្ធឆ្លងដែន។
លោកបានមានប្រសាសន៍បន្តថា “រហូតមកទល់ពេលនេះ មានប្រតិបត្តិការចំនួនបួន ដែលក្នុងនោះមានការដោះដូរព័ត៌មានគ្នាឈានទៅដល់ការដកហូតម៉ាទឹកកកបានទម្ងន់១៣គីឡូក្រាម ហើយជនជាប់សង្ស័យជាអ្នករត់ពន្ធគ្រឿងញៀនចំនួន២១នាក់ត្រូវបានចាប់ខ្លួន ក្នុងនោះរួមមានកម្ពុជាបួននាក់ផង”។
ព្រំដែនដែលធូររលង់របស់កម្ពុជាជាប់ប្រទេសឡាវ លានសន្ធឹងប្រវែងប្រហែល៥០០គីឡូម៉ែត្រ ហើយភ្ជាប់ទៅតំបន់ផលិតថ្នាំញៀនដែលគេឲ្យឈ្មោះថាតំបន់ត្រីកោណមាស ជាតំបន់ភ្នំត្រួតស៊ីគ្នារវាងប្រទេសឡាវ ប្រទេសថៃ និងប្រទេសភូមា ដែលបង្កើតបានជាចំណុចស្នូលមួយក្នុងចំណោមចំណុចស្នូលនៃរបររត់ពន្ធគ្រឿងញៀនខុសច្បាប់។
នៅមុនការចាប់ខ្លួនកាលពីម្សិលមិញ នគរបាលព្រំដែនកម្ពុជាបានឃាត់ខ្លួនជនជាតិឡាវប្រាំពីរនាក់ចាប់តាំងពីខែមករាមក ហើយដកហូតបានថ្នាំញៀនទម្ងន់១៨គីឡូក្រាម ដែលភាគច្រើនជាម៉ាទឹកកក និងមេតំហ្វេតាមីន។
លោក មាស វីរិទ្ធ អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ការចាប់ខ្លួនក្នុងពេលថ្មីៗនេះបានបង្ហាញពីភាពជោគជ័យកាន់តែច្រើនឡើងនៃកិច្ចសហប្រតិបត្តិការឆ្លងដែនរវាងនគរបាលប្រឆាំងការជួញដូរគ្រឿងញៀននៃប្រទេសទាំងពីរ។
តួលេខដែលអាជ្ញាធរជាតិប្រយុទ្ធប្រឆាំងគ្រឿងញៀនបានបញ្ចេញកាលពីឆ្នាំមុន បង្ហាញពីការកើនឡើងការចាប់ខ្លួនពាក់ព័ន្ធគ្រឿងញៀន និងការដកហូតគ្រឿងញៀននៅក្នុងរយៈពេលបួនខែដើមឆ្នាំនេះ ពោលគឺកើនឡើង១៦៣ភាគរយបើធៀបនឹងរយៈពេលដូចគ្នាក្នុងឆ្នាំ២០១៤៕ សុខុម