ស្ត្រី​​​រក​​​ស៊ី​​ផ្លូវ​​​ភេទ​​​អះ​​​អាង​​​ថា មាន​​​ការ​​​រំលោភ​​​បំពាន និង​​​រំលោភ​​​នៅ​​​ក្នុង​​​មន្ទីរ​​​ឃំុ​​​ឃាំង​​​របស់​​​នគរ​​​បាល​​​

យោ​​​ង​​​តាម​​​អង្គការ​​​តស៊ូ​​​មតិ​​​មួយ​​​ដែល​​​រៀប​​​ចំ​​​សិក្ខាសាលា​​​នៅ​​​ក្នុង​​​រាជ​​​ធានី​​​ភ្នំពេញ​​​កាល​​​ពីម្សិលមិញ​​​បាន​​​ឲ្យ​​​ដឹង​​​ថា ស្ត្រី​​​រក​​​ស៊ី​​​ផ្លូវ​​​ភេទ​​​ប្រហែល​​​២.០០០នាក់​​​ ត្រូវ​​​បាន​​​ចាប់ខ្លួន​​​នៅ​​​តាម​​​ផ្លូវ​​​ក្នុង​​​រាជ​​​ធានី​​​ភ្នំពេញ​​​ក្នុង​​​រយៈ​​​ពេល​​​​​​ប្រាំពី​​រ​​​ឆ្នាំ​​​កន្លង​​​មក​​​នេះ​​​ ហើយ​​​ជា​​​រឿយ​​​ៗ​​ត្រូវ​​​បាន​​​គេ​​​រំលោភ​​​បំពាន​​​ និង​​​ជំរិត​​​ទារ​​​ប្រាក់​​​ ខណៈ​​​ត្រូវ​​​បាន​​​ឃុំ​​​ខ្លួន​​​នៅ​​​មន្ទីរ​​​ឃុំឃាំង​​​របស់​​​នគរ​​​បាល​​​។​​​

លោក​​​ស្រី កែវ ថា ប្រធាន​​​អង្គការ​​​បណ្តាញ​​​ការ​​​ងារ​​​ស្ត្រី​​​រួប​​​រួម​​​គ្នា​​​បាន​​​ឲ្យ​​​ដឹង​​​ថា ទោះ​​​បី​​​ជា​​​សិក្ខា​​​សាលា​​​នេះ​​​ត្រូវ​​​បាន​​​គេ​​​រៀប​​​ចំ​​​ដើម្បី​​​ជួយ​​​ឲ្យ​​​ស្ត្រី​​​រក​​​ស៊ី​​​ផ្លូវ​​​ភេទ​​​បាន​​​ពិភាក្សា​​​ជា​​​មួយ​​​អាជ្ញាធរ​​​មូល​​​ដ្ឋាន​​​ស្តី​​​ពី​​​បញ្ហា​​​សុវត្ថិភាព​​​ក្តី​​​ ប៉ុន្តែ មាន​​​តែ​​​មន្ត្រី​​​ចំនួន​​​ពីរ​​​នាក់​​ប៉ុណ្ណោះ​​​ ក្នុង​​​ចំណោម​​​មន្ត្រី​​​មូល​​​ដ្ឋាន​​​​​​ ដែល​​​ត្រូវ​​​បាន​​​អញ្ជើញ​​​ចំនួន​​​ប្រាំ​​​បួន​​​នាក់​​​បាន​​​មក​​​​​​ចូល​​​​​​រួម​​​​​​ក្នុង​​​សិក្ខាសាលា​​​នេះ។

លោកស្រី កែវ ថា បាន​​​លើក​​​ឡើង​​​ថា មន្ត្រី​​​នគរ​​​បាល​​​គឺ​​​ជា​​​បុគ្គល​​​ដែល​​​បង្ក​​​ការ​​​គំរាម​​​កំហែង​​​ខ្លាំង​​​បំផុត​​​ចំពោះ​​​ស្ត្រី​​​រក​​​ស៊ី​​​ផ្លូវ​​​ភេទ​​​ក្នុង​​​រាជ​​​ធានី​​​។

លោក​​​ស្រី​​​បាន​​​អះ​​​អាង​​​ថា “នៅ​​​ពេល​​​នគរ​​​បាល​​​ខណ្ឌ​​​ចាប់​​​ខ្លួន​​​ស្ត្រី​​​រក​​​ស៊ីផ្លូវ​​​ភេទ​​​ ពួក​​​គេ​​​បាន​​​វាយ​​​ដំ​​​ ​​​រើស​​​អើង​​​ ជំរិត​​​ទារ​​​ប្រាក់​​​ពី​​​ស្ត្រី​​​រក​​​ស៊ី​​​ផ្លូវ​​​ភេទ​​​។​​​ ហើយ​​​បង្ខំ​​​ឲ្យ​​​ស្ត្រី​​​ទាំង​​​នេះ​​​លាង​​​បង្គន់​​​និង​​​បង្ខំ​​​ពួក​​​គេ​​​ឲ្យ​​​រួមភេទ​​​ ប្រសិន​​​បើ​​​ចង់​​​ត្រូវ​​​បាន​​​ដោះ​​​លែង​​​វិញ​​​”។

ចាប់​​​តាំង​​​ពី​​​​​ច្បាប់​​​ស្តី​​​ពី​​​ការ​​​បង្ក្រាប​​​ការ​​​ជួញ​​​ដូរ​​​មនុស្ស​​​និង​​​ការ​​​កេង​​​ប្រវ័ញ្ច​​​ផ្លូវ​​​ភេទ​​​បាន​​​ចូល​​​ជា​​​ធរមាន​​​កាល​​​ពីឆ្នាំ​​​២០០៨​​​មក​​​ លោកស្រី កែវ ថា បាន​​​បា៉ន់​​​ប្រមាណ​​​ថា មាន​​​ស្ត្រី​​​រក​​​ស៊ី​​​ផ្លូវ​​​ភេទ​​​ជាង​​​២.០០០នាក់​​​ត្រូវ​​​បាន​​​ចាប់ខ្លួន​​​នៅ​​​ក្នុង​​​រាជ​​​ធានី​​​ភ្នំពេញ​​​។ លោក​​​ស្រី​​​បាន​​​លើក​​​ឡើង​​​ទៀត​​​ថា ច្បាប់​​​ដែល​​​ធ្វើ​​​ឲ្យ​​​ស្ត្រី​​​ពេស្យាចារ​​​​​​ត្រូវ​​​គេ​​​ដាក់​​​ទោស​​​ទណ្ឌ​​​ពី​​​មួយ​​​ថ្ងៃ​​​ដល់​​​ប្រាំ​​​មួយ​​​ថ្ងៃ​​​នៅ​​​ក្នុង​​​ពន្ធនាគារ​​​ គឺ​​​ត្រូវ​​​​​​បាន​​​រំលោភ​​​បំពាន​​​យ៉ា​​​ង​​​ខ្លាំង​​​។

លោក​​​ស្រី​​​បាន​​​មាន​​​ប្រសាសន៍​​​ថា “វា​​​គឺ​​​ជា​​​ច្បាប់​​​ដែល​​​ត្រូវ​​​បាន​​​ប្រើ​​​ជា​​​លេស​​​ដើម្បី​​​រំលោភ​​​បំពាន​​​ស្ត្រី​​​រក​​​ស៊ី​​​ផ្លូវ​​​ភេទ​​​ ហេតុដ​​​ូច្នេះ​​​យើង​​​ចង់​​​លុប​​​បំបាត់​​​ចោល​​​មាត្រា​​​ទាំង​​​នេះ​​​នៅ​​​ក្នុង​​​ច្បាប់​​​នេះ​​​​​​”។

នៅ​​​ពេល​​​ត្រូវ​​​បាន​​​សួរ​​​ថា តើ​​​អ្វីដែល​​​អាជ្ញាធរ​​​មូល​​​ដ្ឋាន​​​នឹង​​​ធ្វើ​​​ដើម្បី​​​​​​ដោះ​​​ស្រាយ​​​​​​បញ្ហា​​​នេះ​​​ លោក​​​ស្រី​​​ ញឿន មុំ មន្ត្រី​​​ខណ្ឌ​​​ទួល​​​គោក​​​ ដែល​​​បាន​​​ចូល​​​រួម​​​ក្នុង​​​សិក្ខាសាលា​​​េនះ​​​បាន​​​លើក​​​ឡើង​​​ថា លោក​​​ស្រី​​​នឹង​​​ “លើក​​​ឡើង​​​ពី​​​បញ្ហា​​​នេះ​​​​​​ យក​​​មក​​​សិក្សា និង​​​​​ធ្វើ​​​របាយការណ៍​​​​​​​​​​​​”។ លោកស្រី​​​បន្ថែម​​​ថា “យើង​​​មាន​​​ការ​​​សោក​​​ស្តាយ​​​ដែល​​​គ្មាន​​​នគរ​​​បាល​​​មក​​​នៅ​​​ក្នុង​​​ថ្ងៃ​​​នេះ​​​”។

នៅ​​​ពេល​​​ទាក់​​​ទង​​​តាម​​​ទូរស័ព្ទ​​​ លោក គួច ចំរើន​​​ អភិបាល​​​ខណ្ឌ​​​ដូន​​​ពេញ​​​ដែល​​​មិន​​​បាន​​​បញ្ជូន​​​តំណាង​​​មក​​​ចូល​​​រួម​​​សិក្ខាសាលា​​​កាល​​​ពី​​​ម្សិលមិញ​​​ បាន​​​បដិសេធ​​​ថា គ្មាន​​​ការ​​​រំលោភ​​​បំពាន​​​ស្ត្រី​​​រក​​​ស៊ីផ​​​្លូវ​​​ភេទ​​​ទេ​​​នៅ​​​ក្នុង​​​ខណ្ឌ​​​របស់​​​លោក​​​។

លោក​​​បាន​​​មានប្រសាសន៍​​​ថា “សូម​​​រក​​​ឲ្យ​​​ឃើញ​​​ភ័ស្តុ​​​តាង​​​ដែល​​​ថា​​​យើង​​​ជា​​​អ្នក​​​ទទួល​​​ខុស​​​ត្រូវ​​​។ ហើយ​​​សូម​​​​​​បោស​​​សំអាត​​​ [ស្ត្រី​​​រក​​​ស៊ី​​​ផ្លូវ​​​ភេទ​​​]​​​ ពីផ្លូវ​​​សាធារណៈ​​​”៕ស៊ុយឈាង​​​