សារព័ត៌មានម៉ាឡេស៊ីបានរាយការណ៍កាលពីថ្ងៃព្រហស្សតិ៍ថា រដ្ឋមន្ត្រី បាននិយាយថា អង្គការសហប្រជាជាតិ គួរបញ្ជូនអ្នកស្វែងរកសិទ្ធិជ្រកកោនរ៉ូហ៊ីងយ៉ា និងបង់ក្លាដែស ដែលអណ្តែតតាមទូកនៅតាមឆ្នេរសមុទ្រប្រទេសលោក មកកាន់ប្រទេសកម្ពុជា និងហ្វីលីពីន ជាជាងប៉ុនប៉ងបញ្ចុះបញ្ចូលរដ្ឋាភិបាលរបស់លោកឲ្យទទួលយកពួកគេ។
លោក ដាទុក សេរិ កាស្សិម រដ្ឋមន្ត្រីទទួលបន្ទុកគណៈរដ្ឋមន្ត្រី ត្រូវបានរាយការណ៍ប្រាប់កាសែត New Straits Times ថាប្រទេសកម្ពុជានិងហ្វីលីពីន គួរទទួលខុសត្រូវចំពោះអ្នកស្វែងរកសិទ្ធិជ្រកកោន ពីព្រោះប្រទេសទាំងពីរ គឺជាប្រទេសហត្ថលេខីនៃអនុសញ្ញាជនភៀសខ្លួនឆ្នាំ១៩៥១។
យោងតាមកាសែតMalay Mailឲ្យដឹងថា លោក សាហិដាន កាស្សិម ត្រូវបានដកស្រង់សម្តីដោយនិយាយថា”ប្រសិនបើពួកគេឆ្លងកាត់តាមដែនសមុទ្ររបស់យើង ហើយការពិចារណាផ្នែកមនុស្សធម៌ត្រូវតែអនុវត្ត យើងនឹងសង្គ្រោះពួកគេ ចាប់ពួកគេឃុំ ហើយប្រគល់ពួកគេទៅអន្តោប្រវេសន៍ដើម្បីឃុំខ្លួន”។
តាមសេចក្តីរាយការណ៍ លោករដ្ឋមន្ត្រី បានមានប្រសាសន៍ចាត់ទុកប្រទេសកម្ពុជាជាជម្រើសមួយ ដោយសារតែប្រទេសនេះ ស្ថិតនៅជិតប្រទេសភូមាថា”ពីទីនោះ ឧត្តមស្នងការសហប្រជាជាតិទទួលបន្ទុកជនភៀសខ្លួន ត្រូវទទួលខុសត្រូវ ហើយបញ្ជូនពួកគេទៅប្រទេសមួយទៀត ឬក៏បញ្ជូនពួកគេត្រឡប់ទៅប្រទេសពួកគេវិញ”។
អ្នកស្វែងរកសិទ្ធិជ្រកកោន និងជនអន្តោប្រវេសន៍រ៉ូហ៊ីងយ៉ានិងបង់ក្លាដែសប្រហែល៨០០០នាក់ ត្រូវគេជឿថាអណ្តែតតាមទូកក្នុងឆ្នេរសមុទ្រម៉ាឡេស៊ី និងឥណ្ឌូនេស៊ី។ ការកើនឡើងនូវជនអន្តោប្រវេសន៍ដែលជាប់ក្នុងសមុទ្រ បានកើតឡើងបន្ទាប់ពីមានការបង្ក្រាបលើបណ្តាញជួញដូរមនុស្សនៅក្នុងប្រទេសថៃ ដែលអ្នកស្វែងរកសិទ្ធិជ្រកកោនរ៉ូហ៊ីងយ៉ាសំដៅទៅកាន់ដើម្បីភៀសខ្លួនពីការធ្វើទុក្ខបុកម្នេញនៅក្នុងប្រទេសភូមា។
លោក គឹម សារិន ប្រធាននាយកដ្ឋានជនភៀសខ្លួននៃក្រសួងមហាផ្ទៃ បានបង្វែរសំណួរទាំងអស់ដែលទាក់ទងនឹងជនអន្តោប្រវេសន៍ទៅក្រសួងការបរទេស ប៉ុន្តែបានមានប្រសាសន៍ថាប្រទេសកម្ពុជានឹងដោះស្រាយការដាក់ពាក្យសុំជ្រកកោនស្របតាមអនុសញ្ញាជនភៀសខ្លួន។
លោក សារិន បានមានប្រសាសន៍ថា”ជនភៀសខ្លួន អាចស្នើសុំសិទ្ធិជ្រកកោន ប្រសិនបើពួកគេមានលក្ខខណ្ឌសមស្របនិងសក្តិសមជាជនអន្តោប្រវេសន៍”។
មន្ត្រីក្រសួងការបរទេស មិនអាចទាក់ទងបានទេ។
លោក ម៉ាធូ ស្មីត នាយកប្រតិបត្តិនៃអង្គការការពារសិទ្ធិ ជាក្រុមតស៊ូមតិដែលធ្វើការនៅក្នុងអាស៊ីអគ្នេយ៍ បានហៅការឲ្យយោបល់ថាជនភៀសខ្លួនរ៉ូហ៊ីងយ៉ាគួរបញ្ជូនមកប្រទេសកម្ពុជាថា”គួរឲ្យខឹងសម្បា”។
លោក ស្មីត បាននិយាយថា” រដ្ឋាភិបាលនៅក្នុងតំបន់នេះ មិនអាចបន្តលេងពិងប៉ុងជាមួយជីវិតមនុស្សទេ។ ប្រទេសម៉ាឡេស៊ី ត្រូវទទួលខុសត្រូវ យ៉ាងហោចណាស់ផ្តល់ការការពារបណ្តោះអាសន្នដល់រ៉ូហ៊ីងយ៉ា ដែលកំពុងមកដល់សមុទ្ររបស់ខ្លួន”។
លោក ស្មីត បាននិយាយបន្តថា”ខ្ញុំមិនអាចនិយាយថាតើកម្ពុជានឹងត្រូវស្នើសុំទេ…ប៉ុន្តែខ្ញុំគិតថា យើងមិនបានឃើញទូកចុងក្រោយទាំងនោះទេ ហើយការរំលោភបំពាននៅក្នុង[ប្រទេសភូមា] កំពុងបន្ត ពោលគឺស្ថានការណ៍នៅក្នុងរដ្ឋរ៉ាគីន កាន់តែអាក្រក់ទៅៗ”។
លោក ភិល រ៉ូប៊ឺតសុន អនុប្រធានអាស៊ីនៃអង្គការឃ្លាំមើលសិទ្ធិមនុស្ស Human Rights Watch បានចង្អុលទៅលើការបណ្តេញម៉ុងតាញ៉ាចេញនាពេលថ្មីៗនេះរបស់អាជ្ញាធរកម្ពុជា ដែលពួកគេរត់គេចពីការធ្វើទុក្ខបុកម្នេញនៅក្នុងប្រទេសវៀតណាម ជាឧទាហរណ៍ដែលប្រទេសនេះ មិនគួរចាត់ទុកជាកន្លែងទទួលអ្នកស្វែងរកសិទ្ធិជ្រកកោនទេ”។
លោក រ៉ូប៊ឺតសុន បាននិយាយនៅក្នុងអុីម៉េលថា”ប្រទេសកម្ពុជា មិនមានសមត្ថភាពមើលថែជនភៀសខ្លួនប្រហែល៨០បានផង ដូច្នេះច្បាស់ណាស់ថា ខ្លួនមិនមានសមត្ថភាពទទួលយកជនភៀសខ្លួនតាមទូករ៉ូហ៊ីងយ៉ានិងបង់ក្លាដែសបានទេ”។
លោក រ៉ូប៊ឺតសុន បាននិយាយសំដៅលើកិច្ចព្រមព្រៀងដ៏ចម្រូងចម្រាស់របស់កម្ពុជាជាមួយប្រទេសអូស្ត្រាលី ដើម្បីទទួលយកជនភៀសខ្លួនមួយចំនួនដែលកំពុងឃាត់ទុកលើប្រទេសកោះណូរូថា”ប៉ុន្តែ ចំណុចខ្លះ ប្រទេសកម្ពុជា បាននាំមកនូវបញ្ហាទាំងនេះដោយខ្លួនឯង ដោយចុះកិច្ចព្រមព្រៀងជាមួយអូស្ត្រាលី ហើយយល់ព្រមធ្វើជាកន្លែងចាក់ចោលជនភៀសខ្លួនរបស់រដ្ឋាភិបាលក្រុងកង់បេរ៉ា”។
លោក រ៉ូប៊ឺតសុន បាននិយាយបន្ថែមថា”តើយើងភ្ញាក់ផ្អើលទេ ដែលថាប្រទេសម៉ាឡេស៊ីគិតថា ខ្លួនអាចចូលរួមក្បួនហែ ហើយធ្វើដូចគ្នាឬទេ?”៕