39 C
Phnom Penh

អភិបាល​​​ក្រុង​​​ប្រកាស​​​ថា គ្មានការ​​​ដោះ​​​ដូរ​​​ដី​​​ទៀត​​​ទេ

ដោយ ឌឹ ខេមបូឌា ដេលី

បទវិភាគ

លោក ប៉ា សុជាតិវង្ស អភិបាល​​​ក្រុង​​​ភ្នំ​​​ពេញ បាន​​​មាន​​​ប្រសាសន៍​​​កាល​​​ពី​​​ថ្ងៃ​​​ពុធ​​​ថា ដរាបណា​​​លោក​​​នៅ​​​ជា​​​ចៅ​​​ហ្វាយ​​​ក្រុង​​​ ដរាប​​​នោះ​​​​​​នឹង​​​មិន​​​មាន​​​ការ​​​ដោះ​​​ដូរ​​​អចលនទ្រព្យ​​​ក្រុង​​​ជាមួយ​​​ក្រុមហ៊ុនឯកជន​​​ទៀតទេ ជា​​​ការ​​​​​​អនុវត្ត​​​យូរ​​​អង្វែង​​​មក​​​ហើយ​​​របស់​​​រដ្ឋាភិបាល​​​​​​ដែល​​​មាន​​​​​​ការ​​​លាក់​​​លៀម​​​ និង​​​ជាប់ពាក់​​​ព័ន្ធ​​​នឹង​​​​​​ការ​​​ចោទ​​​ថា​​​មាន​​​អំពើ​​​ពុក​​​រលួយ។​​​​​​

ការ​​​ដោះ​​​ដូរ​​​ឃើញ​​​រដ្ឋាភិបាល​​​ផ្តល់​​​​​​ដី​​​ធ្លី​​​ដែលមាន​​​តម្លៃថ្លៃ​​​ឲ្យ​​​ក្រុមហ៊ុន​​​ឯកជន ដែល​​​សន្យាថា​​​​​​​​​សាង​​​សង់​​​អគារ​​​ជា​​​ថ្នូរ​​​នៅ​​​លើ​​​ដី​​​ដែល​​​មាន​​​តម្លៃ​​​ថោក​​​និង​​​ដាច់​​​ស្រយាល។​​​​​​

លោក​​​អភិបាល​​​ក្រុង​​​រូប​​​នេះ បាន​​​​​ធ្វើ​​​ជា​​​អធិបតី​​​ក្នុង​​​កិច្ច​​​ប្រជុំ​​​មួយនៅ​​​ឯ​​​សាលា​​​ក្រុង​​​ភ្នំពេញកាលពី​​​ថ្ងៃ​​​អង្គារ ដើម្បី​​​ពិភាក្សា​​​អំពី​​​ការ​​​អនុវត្ត​​​ជាមួយ​​​មន្ត្រី​​​​​​ក្រុង​​​ភ្នំពេញ​​​ ដោយ​​​ប្រកាស​​​ថា លោក​​​នឹង​​​ចាប់​​​ផ្តើម​​​រៀប​​​ចំ​​​ធ្វើ​​​បញ្ជី​​​សារពើ​​​ភណ្ឌរាល់​​​អចលនទ្រព្យ​​​ក្រុង​​​ទាំង​​​អស់។ ក្នុង​​​បទ​​​សម្ភាសមួយ​​​កាល​​​ពី​​​ថ្ងៃ​​​ពុធ​​​ លោក សុជាតិ​​​វង្ស បាន​​​មាន​​​ប្រសាសន៍​​​ថា ការ​​​ដោះ​​​ដូរ​​​ដី​​​ បាន​​​ធ្វើ​​​ឲ្យ​​​កា​​​រិយាល័យ​​​រដ្ឋ​​​មួយ​​​ចំនួន​​​ត្រូវ​​​ផ្លាស់​​​ទៅ​​​កាន់​​​ជាយ​​​ក្រុងឆ្ងាយៗ។​​​​​​

លោក សុជាតិវង្ស​​​ ដែល​​​ចូល​​​កាន់​​​តំណែង​​​ជា​​​ចៅហ្វាយ​​​ក្រុង​​​​​​បន្ទាប់ពី​​​លោក កែប ជុតិមា​​​កាល​​​ពី​​​ខែ​​​ឧសភា​​​ ឆ្នាំ​​​២០១៣ បាន​​​មាន​​​ប្រសាសន៍​​​ថា”​​​យើង​​​ត្រូវ​​​តែ​​​បញ្ចប់​​​ការ​​​ដោះ​​​ដូរ”។

លោក សុជាតិវង្ស បាន​​​មាន​​​ប្រសាសន៍​​​សំដៅ​​​លើចៅ​​​ហ្វាយ​​​ក្រុង​​​មុន​​​ថា”យើង​​​ត្រូវ​​​តែ​​​បញ្ចប់​​​បញ្ហាកាលពី​​​មុន។ ការិយាល័យ​​​ខ្លះ​​​ មាន​​​កន្លែង​​​ស្រួល​​​ធ្វើការ​​​ ប៉ុន្តែ ត្រូវ​​​​​​ដូរ​​​ទី​​​តាំងទៅ​​​ជាយ​​​ក្រុង​​​ ដូច្នេះ វា​​​ធ្វើ​​​ឲ្យ​​​មាន​​​ការ​​​លំបាក​​​ច្រើន”។​​​​​​

លោក ជុតិមា ដែល​​​បាន​​​ធ្វើ​​​​​​​​​ជាចៅហ្វាយ​​​ក្រុង​​​ភ្នំពេញ​​​អស់​​​រយៈ​​​ពេល​​​១០​​​ឆ្នាំ ហើយ​​​​​​បច្ចុប្បន្ន​​​ជា​​​​​​តំណាង​​​រាស្ត្រ​​​​​​គណបក្ស​​​ប្រ​​​ជាជន​​​កម្ពុជា បដិសេធមិន​​​ធ្វើ​​​អត្ថា​​​ធិប្បាយទេ។​​​

ការ​​​ដោះ​​​ដូរ​​​ដី​​​រដ្ឋ មិនមែន​​​ជាបញ្ហា​​​ផ្តាច់​​​មុខ​​​របស់​​​សាលា​​​ក្រុង​​​ភ្នំពេញ​​​ទេ ជួន​​​កាល​​​មាន​​​ការ​​​ទាក់​​​ទិន​​​នឹង​​​ក្រសួង​​​រដ្ឋាភិបាល​​​ផងដែរ។ ប៉ុន្តែ​​​ការ​​​​​​ដោះ​​​ដូរ​​​ មាន​​​ភាព​​​សម្ងាត់ តែង​​​តែ​​​មិនមាន​​​ព័ត៌មានទេ​​​​​​ដែល​​​ទាក់ទង​​​នឹង​​​ក្រុមហ៊ុន​​​ដែលទទួល​​​កាន់​​​កាប់​​​ដី​​​ដែល​​​មាន​​​តម្លៃនោះ តើគេ​​​បង់​​​លុយ​​​ប៉ុន្មាន​​​ ហើយ​​​ថា​​​តើ​​​មាន​​​ហេតុផលអ្វីដែល​​​នាំ​​​ឲ្យ​​​មាន​​​ការ​​​ដោះ​​​ដូរនោះ​​​ទេ។​​​​​​​​​

កង្វះតម្លា​​​ភាព បាន​​​នាំ​​​ឲ្យ​​​មាន​​​ការ​​​ចោទ​​​ថា ការ​​​ដោះ​​​ដូរ​​​ដី​​​ គឺ​​​ជា​​​គម្រោង​​​​​​រក​​​លុុយ​​​កាក់​​​សម្រាប់​​​មន្ត្រី​​​រដ្ឋាភិបាល ដែល​​​រក​​​បាន​​​​​​ប្រាក់​​​ចំណេញ​​​ពី​​​ការ​​​ដោះ​​​ដូរ​​​នោះ។​​​

លោក អំ សំអាត មន្ត្រី​​​​​​បច្ចេកទេស​​​ជាន់​​​ខ្ពស់​​​អង្គ​​​ការ​​​លីកាដូ បាន​​​ស្វាគមន៍​​​ចំពោះ​​​ការ​​​​​​​​សម្រេច​​​របស់​​​លោក​​​អភិបាល​​​ក្រុង​​​ ហើយ​​​​​​បាន​​​ស្នើ​​​​​​ឲ្យ​​​រដ្ឋា​​​ភិបាល​​​​​​ជួស​​​ជុល​​​​​​អគារ​​​ចាស់ៗ​​​ជា​​​ជាង​​​លក់ដូរ​​​។​​​

លោក សំអាត បាន​​​និយាយ​​​ថា” ខ្ញុំគិត​​​ថា ការ​​​ដោះ​​​ដូរ​​​ដី​​​​​​មិន​​​ល្អ​​​ទេ ពី​​​ព្រោះ​​​​​​ប្រាក់​​​ចំណេញ​​​​​​បាន​​​ពី​​​ការ​​​ដោះ​​​ដូរ ភាគ​​​ច្រើន​​​ចូល​​​ហោប៉ៅបុគ្គល ជាជាង​​​ចូល​​​រដ្ឋ”៕

​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស