30 C
Phnom Penh

សកម្មជន​​គំរាម​តវ៉ា​ប្រឆាំងលោក​ ហោ ណាំហុង រដ្ឋមន្ត្រី​ក្រសួង​ការបរទេស

ដោយ ឌឹ ខេមបូឌា ដេលី

បទវិភាគ

ប្រធាន​សហព័ន្ធ​និស្សិត​បញ្ញវន្ត​កម្ពុជា​បាន​លើក​ឡើង​កាលពី​ម្សិលមិញ​ថា លោក​មាន​គម្រោង​ធ្វើ​ការ​តវ៉ា​ដើម្បី​ទាមទារ​ឲ្យ​លោក​ ហោ ណាំហុង រដ្ឋមន្ត្រី​ក្រសួង​ការ​បរទេស​សូម​អភ័យ​ទោស​ចំពោះ​ការដែល​និយាយ​ថា ដី​ទំហំ​១៦,៦​ហិកតា​ដែល​មាន​វិវាទ​នៅ​តាម​ព្រំ​ប្រទល់​ខេត្ត​ត្បូងឃ្មុំ​ជា​របស់​វៀតណាម​​នោះ​។

លោក ម៉ៅ ពិសេស សកម្មជន​ជាតិ​និយម​ដែល​បាន​ជួយ​រៀបចំ​ការ​តវ៉ា​ស្រដៀង​គ្នា​នេះ​កាលពី​ឆ្នាំ​មុន​ទាម​ទារ​ឲ្យ​ស្ថាន​ទូត​វៀតណាម​​សូម​អភ័យ​ទោស​ចំពោះ​ការ​និយាយ​ថា ប្រទេស​កម្ពុជា​បាត់​បង់​តំបន់​ដីសណ្ដ​ទន្លេមេគង្គ​ទៅ​ប្រទេស​វៀតណាម “​យូរ​លង់​ណាស់​មក​ហើយ” នោះ​ កាលពី​ម្សិលមិញ​បាន​ដឹកនាំ​និស្សិត​​ប្រហែល​១៥០​នាក់​ចុះ​ទៅ​ពិនិត្យ​មើល​ដី​នោះ​ដែលស្ថិត​នៅ​តាម​​ព្រំដែន​ស្ថិត​ក្នុង​ស្រុក​មេមត់។

ក្រុម​អ្នក​ភូមិ​ជនជាតិ​ខ្មែរ​ដែល​បានធ្វើ​ស្រែចម្ការ​លើ​ដីនេះ​លើក​ឡើង​ថា ទាហាន​វៀត​ណាម​បាន​បំផ្លាញ​ដំណាំ​របស់​ពួកគាត់​ដោយ​បាញ់​ថ្នាំ​គីមី​លើ​ដំណាំ​ទាំង​នោះ​កាលពី​ខែ​មេសា។

ឆ្លើយ​តប​ទៅ​នឹង​លិខិត​របស់​​ក្រុម​សមាជិក​សភា​គណបក្ស​សង្គ្រោះ​ជាតិ​ជុំវិញ​ហេតុ​ការណ៍​នោះ លោក ហោ ណាំហុង បាន​មាន​ប្រសាសន៍​កាលពី​ថ្ងៃទី៤ ខែ​ឧសភា​ថា ​តាម​ពិត​ដី​នេះ​ស្ថិត​​ក្នុង​ប្រទេស​វៀតណាម​ទេ​ ដោយ​​បណ្ដាល​ឲ្យ​លោក ម៉ៅ ពិសេស ចុះ​ទៅ​ខេត្ត​ត្បូង​ឃ្មុំ ដែល​សកម្មជន​រូប​នេះ​លើក​ឡើង​កាលពី​ម្សិលមិញនោះ​​​បាន​បង្ហើប​ឲ្យ​ដឹង​ថា លោក​ ហោ ណាំហុង និយាយ​មិន​ត្រឹម​ត្រូវ​ឡើយ​។

លោក ពិសេស បាន​មាន​ប្រសាសន៍​ថា ដី​ទំហំ​១៦,៦​ហិកតា​​មាន​វិវាទ​​ដែល​ស្ថិត​នៅ​ចន្លោះ​​បង្គោល​ព្រំដែន​ចំនួន​ពីរ​នោះ​ ត្រូវ​បាន​ធ្វើ​ស្រែ​ចម្ការ​ដោយអ្នកភូមិ​ជន​ជាតិ​ខ្មែរ​ច្រើន​ជំនាន់​មក​ហើយ ប៉ុន្តែ​ថា ក្រុម​មន្ត្រី​វៀតណាម​​និង​កម្ពុជា​កាលពី​ពេល​ថ្មីៗ​នេះ​ទើប​តែ​បាន​ចាប់​​ផ្ដើម​អនុវត្ត​​​ព្រំដែន​​នេះ​ជា​ខ្សែ​បន្ទាត់ត្រង់​រវាង​បង្គោល​នេះ​តែ​ប៉ុណ្ណោះ។

លោក ពិសេស បានមាន​ប្រសាសន៍​ថា “​យើង​អាច​សន្និដ្ឋានបាន​ថា ដី​នេះជា​របស់​ប្រជាជន​ខ្មែរ​យើង ហើយ​ថា អាជ្ញាធរ​កម្ពុជា​​បាន​បោះ​បង្គោល​ព្រំដែន​មួយ​ចំនួន​កាលពី​ឆ្នាំ​២០០៨ ប៉ុន្តែ​ពួកគេ​មិន​បាន​ប្រាប់​ប្រជាជន​អំពី​បន្ទាត់​ព្រំដែន​ឡើយ​។ ប្រជាជន​ខ្មែរ​បាន​ធ្វើ​ស្រែ​ចម្ការ​លើ​ដីនោះ​ចាប់​តាំង​ពី​ជំនាន់​ដូន​តា​របស់​ខ្លួន​មក​ម្លេ៉ះ”។

យោង​តាម​លោក ពិសេស បាន​ឲ្យ​ដឹង​ថា ពីមុន​ព្រំដែន​មិន​មែនស្ថិត​នៅ​ត្រឹម​ខ្សែ​បន្ទាត់​រវាង​បង្គោល​ទាំង​នេះទេ​ ដែល​លោក​លើក​ឡើង​ថា គឺ​នៅ​ឆ្ងាយ​ជាងនេះទៅទៀត​​។

លោក​បាន​មាន​ប្រសាសន៍​ថា “​យើង​នឹង​រៀបចំ​កិច្ច​ប្រជុំ​​ជាមួយ​ក្រុម​យុវជន​របស់​យើង បន្ទាប់​ពី​យើង​មក​ដល់​រាជធានី​ភ្នំពេញ​វិញ ពីព្រោះ​យើង​មាន​គម្រោង​ធ្វើ​ការ​តវ៉ា​ទាម​ទារ​ឲ្យ​លោក ហោ ណាំហុង កែតម្រូវ​​សកម្មភាព​របស់​លោក បើ​មិន​ដូច្នោះទេ​យើង​នឹង​ទាមទារ​ឲ្យ​លោក​លាលែង​ពី​តួនាទី ពីព្រោះ​លោក​ធ្វើ​ផ្ទុយ​ទៅ​នឹង​មាត្រា​៥២ និង​៥៥​នៃ​រដ្ឋ​ធម្មនុញ្ញ”។

មាត្រា​៥២​នៃ​រដ្ឋធម្មនុញ្ញ​ចែង​ថា រដ្ឋាភិបាល​ “​ត្រូវ​ការ​ពារ​ឯករាជភាព​ អធិបតេយ្យភាព និង​បូរណភាព​ទឹក​ដី​នៃ​ព្រះរាជាណាចក្រ​កម្ពុជា​” រីឯ​មាត្រា​៥៥​ចែង​ថា សន្ធិសញ្ញា​ណា​ដែល​មិន​ស្រប​គ្នា​នឹង​ការ​ទទួល​ខុស​ត្រូវ​ទាំង​នេះ​ ត្រូវ​ទុក​ជាមោឃៈ។

លោក លី ឡេង អភិបាល​រង​ខេត្ត​ត្បូងឃ្មុំ​បាន​មាន​ប្រសាសន៍​ថា លោក​បាន​ចុះ​ទៅ​ពិនិត្យ​មើល​ដី​ដែល​មាន​វិវាទ​នេះ​ដាច់​ដោយ​ឡែក​កាលពី​ថ្ងៃ​សៅរ៍ ដោយ​ប្រាប់​ក្រុម​អ្នកភូមិ​ថា ផែន​ទី​ផ្លូវ​ការបញ្ជាក់ថា ​ខ្សែបន្ទាត់​ត្រង់​រវាង​បង្គោល​​ទំាង​ពីរ​ កំណត់​យ៉ាងច្បាស់​ពី​ទឹកដី​​កម្ពុជា។

លោក​ លី ឡេង បាន​មាន​​ប្រសាសន៍​ថា “​យើង​អាច​សន្និដ្ឋាន​​បាន​ថា តំបន់​នេះ​ជា​​របស់​​វៀតណាម​ ពីព្រោះ​​អ្នក​ជំនាញ​ព្រំដែន​បាន​បង្ហាញ​ផែន​ទី​ព្រំដែន​នៃ​ប្រទេស​ទាំង​​ពីរ”។

លោក​បាន​បន្ថែម​ថា “​យើង​បាន​ជួប​ជាមួយ​ក្រុម​អ្នកភូមិ ហើយ​បាន​ពន្យល់​ប្រាប់​ប្រជាជន​ទាំង​នោះ​ថា ពួកគាត់​ត្រូវ​ស្វែង​យល់​ពី​បន្ទាត់​ព្រំដែន​រវាង​ប្រទេស​ទាំង​ពីរ ហើយ​ចៀស​វាង​ការ​យល់​ខុស​អំពី​បន្ទាត់​ព្រំដែន​។ ក្រុម​អ្នកភូមិ​បាន​បង្ហាញ​ប្រាប់​យើងពី​តំបន់​ដែល​​ពួកគាត់​ធ្លាប់​ធ្វើ​ស្រែចម្ការ ប៉ុន្តែ​ពួកគាត់​ខក​ចិត្ត​បន្ទាប់​ពី​យើង​បាន​ពន្យល់​ពី​​បង្គោល​ព្រំដែន​​ និងវិធី​សាស្ត្រ​ច្បាប់”។

ប៉ុន្តែ​លោក ម៉ៅ មុន្នីវណ្ណ សមាជិក​​សភា​គណបក្ស​ប្រឆាំង​ដែល​បានស​រសេរ​លិខិត​ផ្ញើជូន​លោក ហោ ណាំហុង ស្នើ​សុំ​ឲ្យ​លោក​ធ្វើ​អន្តរាគមន៍​ក្នុង​ករណី​នេះ​កាលពី​ខែ​មុន និង​ដែល​បាន​រៀបចំ​វេទិកា​​សាធារណៈ​ផ្ទាល់​ខ្លួន​ស្ដីពី​បញ្ហា​នៅ​ក្នុង​ខេត្ត​ត្បូងឃ្មុំ​កាលពី​ថ្ងៃ​សៅរ៍​នោះ​បាន​មាន​ប្រសាសន៍​ថា លោក​មិន​ពេញ​ចិត្ត​នឹង​សេចក្ដី​សម្រេច​ផ្លូវ​ការ​នេះ​ទេ​។

លោក មុន្នីវណ្ណ បាន​មាន​ប្រសាសន៍​ថា “​ក្រុម​អ្នកភូមិ​បាន​ចោទ​អាជ្ញាធរ​កម្ពុជា​ថា មិន​បាន​ការ​ពារ​ទ្រព្យ​សម្បត្តិ​របស់​ប្រជាជន ប៉ុន្តែ​ផ្ទុយ​ទៅវិញ​ពួកគេ​ស្ដាប់​​សម្ដី​របស់​​​អាជ្ញាធរ​វៀត​ណាម​ទៅវិញ”។

លោក​បាន​មាន​​ប្រសាសន៍​ថា “​ខ្ញុំ​នឹង​សរសេរ​លិខិត​​​ផ្ញើជូន​លោក​ឧបនាយក​រដ្ឋមន្ត្រី ហោ ណាំហុង នៅ​សប្ដាហ៍​ក្រោយ​សុំ​ឲ្យ​លោក​មក​ធ្វើ​ការ​ពន្យល់​នៅ​រដ្ឋ​សភា”។ លោក​បាន​បន្ថែម​ថា លោក​គាំទ្រ​ផែន​ការ​របស់​លោក ពិសេស។

លោក​បាន​មាន​ប្រសាសន៍​ថា “​ខ្ញុំ​សូម​គាំទ្រ​ទាំង​ស្រុង​ចំពោះ​ការ​តវ៉ា​ទាមទារ​ឲ្យ​លោក​ឧប​នាយក​រដ្ឋមន្ត្រី​រូប​នេះ​ចុះ​ចេញ​ពី​តំណែង​”៕ សារុន​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស