34 C
Phnom Penh

ក្រុម​​គ្រួសារ និង​មិត្ត​ភក្ដិ​របស់​មហាសេដ្ឋី​រុស្ស៊ី​ ប៉ូលុនស្គី ចោទ​កម្ពុជា​ថា​បំពាន​សិទ្ធិ​​មនុស្ស​

ដោយ ឌឹ ខេមបូឌា ដេលី

បទវិភាគ

មួយ​ថ្ងៃ​បន្ទាប់ពី​មហាសេដ្ឋី​​រុស្ស៊ី សេរហ្គេ ប៉ូលុនស្គី ត្រូវ​បាន​​​និរទេស​ចេញពី​ប្រទេស​កម្ពុជា​ ​ក្រុម​គ្រួសារ​ និង​មិត្ត​ភក្ដិ​របស់​មហាសេដ្ឋី​ដែល​មាន​​ចរិត​ចម្លែក​ខុស​គេ​រូប​េនះ​ បាន​ចោទ​ប្រកាន់​អាជ្ញាធរ​​កម្ពុជា​​​ជា​សាធារណៈ​កាលពី​ម្សិលមិញ​ថា “បំពាន​​សិទ្ធិ​របស់​លោក ប៉ូលុនស្គី និង​បំពាន​ទាំង​ច្បាប់​កម្ពុជា និង​ច្បាប់​អន្តរជាតិ​”។

លោក ប៉ូលុនស្គី ត្រូវ​បាន​ចាប់​ខ្លួន​កាលពី​ថ្ងៃ​សុក្រ​រួម​ជាមួយ​សហការី​ប្រាំនាក់​នៅ​លើ​កោះ​ដំឡូង ជា​កោះ​មួយ​ក្នុង​ចំណោម​កោះ​ចំនួន​ប្រាំបី​​​របស់​គាត់​នៅ​ឆ្នេរ​​សមុទ្រ​ក្រុង​ព្រះសីហនុ ​ពីបទ​​ស្នាក់​នៅ​​ដោយ​ផុត​សុពលភាព​​ទិដ្ឋាការ។ លោក ប៉ូលុនស្គី ត្រូវ​បាន​បញ្ជូន​ខ្លួន​តាម​ឧទ្ធម្ភាគចក្រ​មក​កាន់​រាជធានី​ភ្នំពេញ​​នៅ​រសៀល​ថ្ងៃ​នោះ ​មុន​ពេល​បញ្ជូន​ខ្លួន​ឡើង​ជើង​ហោះហើរ​ឆ្ពោះ​ទៅ​ក្រុង​មូស្គូ​ កាត់​តាម​ក្រុង​ហូជីមិញ។

យោង​តាម​ រូបលី (Ruptly) ដែល​ជា​ទីភ្នាក់​ងារ​សារព័ត៌មាន​រដ្ឋ​របស់​រុស្ស៊ី​បាន​ឲ្យ​ដឹង​ថា យន្ត​ហោះ​ដែល​ដឹក​លោក ប៉ូលុនស្គី បាន​ចុះ​ចត​នៅ​អាកាសយាន​ដ្ឋាន​អន្តរជាតិ​ដូម៉ូដេដូវ៉ូ (Domodedovo International Airport) ក្នុង​ទីក្រុង​មូស្គូ​កាលពី​​​​ល្ងាច​ថ្ងៃ​អាទិត្យ​ ហើយ​អ្នកស្រី​ អូលហ្គា ដេរីប៉ាស្កូ (Olga Deripasko) ភរិយា​របស់​លោក និង​មេធាវី​ ស្លាវិក ប្រសូយា៉ន (Slavik Brsoyan) និង​មេធាវី​ សេរហ្គេ វ្លា៉ឌី (Sergei Vladi)​ បាន​ធ្វើ​សន្និសីទ​កាសែត​នៅ​ទីនោះ។ ​

លោក​ ស្លាវិក ប្រសូយ៉ាន បាន​ថ្លែង​ទៅ​កាន់​​ក្រុម​អ្នក​សារព័ត៌មាន​ដែល​ជួប​ជុំគ្នា​​នៅ​ទីនោះ​ថា កូន​ក្ដី​របស់​លោក​មិន​បាន​បំពាន​ច្បាប់​អន្តោប្រវេសន៍​នៅ​ក្នុង​ប្រទេស​កម្ពុជា​ទេ។ មេធាវី​រូប​នេះ​បាន​លើក​ឡើង​ថា “​មិន​ចាំបាច់​ឆ្ងល់​ទេ រាល់​វិធាន​ការ​នៅ​ក្នុង​ប្រទេស​កម្ពុជា​ត្រូវ​បាន​ធ្វើ​ឡើង​ផ្ទុយ​ទាំង​ច្បាប់​របស់​កម្ពុជា និង​ច្បាប់​អន្តរជាតិ​”។

ផៅវើ​ខត គ្រុប (Powerscourt Group) ជា​ទីភ្នាក់ងារ​​ផ្នែក​ទំនាក់​ទំនង​សាធារណៈ​​ដែល​មាន​មូលដ្ឋាន​នៅ​ក្នុង​ទីក្រុង​ឡុងដ៍​ និង​ដែល​តំណាង​ឲ្យ​លោក ប៉ូលុនស្គី បាន​ចេញ​សេចក្ដី​ថ្លែង​ការណ៍​មួយ​កាលពី​​ម្សិលមិញ ជួស​មុខ​ឲ្យ​ “​មិត្តភក្ដិ និង​សាច់ញាតិ​” របស់​គាត់​។ សេចក្ដី​ថ្លែងការណ៍​នោះបញ្ជាក់​ថា ការ​ចាប់​ខ្លួន និង​ការ​​និរទេស​​មហាសេដ្ឋី​ជនជាតិ​រុស្ស៊ី​រូប​នេះ​ចេញ គឺ​​ “បំពាន​សិទ្ធិ​របស់​គាត់” និង​មាន​ “​​កិច្ច​ព្រមព្រៀង​សម្ងាត់” ​រវាង​កម្ពុជា និង​រុស្ស៊ី​។

សេចក្ដី​ថ្លែង​ការណ៍​នេះ​មាន​ខ្លឹមសារ​យ៉ាង​ដូច្នេះ​ថា “​សូម្បីផ្នែក​មួយ​នៃ​ដំណើរ​ការ​និរទេស​​ធម្មតា​ ក៏​បុគ្គល​ដែល​ត្រូវ​និរទេស​ត្រូវ​បាន​ផ្ដល់​ឱកាស​ឲ្យ​ចាក​ចេញ​ទៅ​កាន់​ប្រទេស​មួយ​ទៀតដែរ​។ ប៉ុន្តែ​លោក ប៉ូលុនស្គី ត្រូវ​បាន​​គេ​បង្ខំ​ឲ្យ​ឡើង​ជិះ​យន្តហោះ​ឆ្ពោះ​ទៅ​ប្រទេស​រុស្ស៊ី អម​ដំណើរ​ដោយ​​​នគរ​បាល​រុស្ស៊ី”។

សេចក្ដី​ថ្លែងការណ៍​នេះ​​ក៏​បាន​លើកឡើង​ដែរ​ថា មេធាវី​មួយ​រូប​ដែល​តំណាង​ឲ្យ​លោក ប៉ូលុនស្គី នៅ​ក្នុង​ប្រទេស​កម្ពុជា​​​​ “​បាន​ចាញ់​បោក​” មន្ត្រី​ដែល​ធានា​អះអាង​ចំពោះ​លោក​ថា លោក​អាច​ចូល​ជួប​កូន​ក្ដី​របស់​ខ្លួន​​បាន​កាលពី​ម្សិលមិញ ដោយ​មិន​​បាន​​រំឭក​លោក​ថា​ការ​និរទេស​​នឹង​ត្រូវ​ធ្វើ​ឡើង​នៅ​ថ្ងៃ​អាទិត្យ​នោះ​ទេ។

លោក ប៉ែន សុនសម័យ ជា​មេធាវី​កម្ពុជា​ដែល​តំណាង​ឲ្យ​លោក ប៉ូលុនស្គី មិន​អាច​ទាក់​ទង​សុំ​ការ​បំភ្លឺ​បាន​ទេ​កាលពី​ម្សិលមិញ។ លោក​ ប៉ែន សុនសម័យ​ បាន​មាន​ប្រសាសន៍​កាល​ពី​ថ្ងៃ​អាទិត្យ​ថា លោក​លែង​ទទួល​បាន​ព័ត៌មាន​ស្ដីពី​សំណុំ​រឿង​នេះ​ទៀត​ហើយ​។

យោងតាម​ប្រព័ន្ធ​ផ្សព្វ​ផ្សាយ​រដ្ឋ​របស់​រុស្ស៊ី​បាន​​ឲ្យ​ដឹង​ថា លោក ប៉ូលុនស្គី ដែល​ត្រូវ​ក្រសួង​មហាផ្ទៃ​​រុស្ស៊ី​ចោទ​ប្រកាន់​កាលពី​ខែ​កក្កដា ឆ្នាំ​២០១៣ ពីបទ​បន្លំ​កិបកេង​ប្រាក់​ជា​ច្រើន​លាន​ដុល្លារ​ពី​វិនិយោគិន​នៅ​​ក្នុង​​គម្រោង​អភិវឌ្ឍន៍​​អចលនទ្រព្យ​ចំនួន​ពីរ​ ត្រូវ​បាន​ដឹក​​ចេញពី​អាកាសយានដ្ឋាន​ក្នុង​ក្រុង​មូស្គូ​​ឆ្ពោះ​ត្រង់​ទៅ​ពន្ធនាគារ។

ទីភ្នាក់​ងារ​ទំនាក់​ទំនង​សាធារណៈ​របស់​លោក​ ប៉ូលុនស្គី បាន​អះអាង​​​នៅ​ក្នុង​​សេចក្ដី​ថ្លែង​ការណ៍​ខាង​លើ​ថា ការ​ចោទ​ប្រកាន់​ទាំង​នេះ​​មិន​​មែនជា​ការ​ពិត​ទេ ហើយ​វា​ជា​ហេតុ​ផល​នយោបាយ​ ដោយ​និយាយ​ថា រដ្ឋអាជ្ញា​ អូឡេក ស៊ីល​ឆេនកូ (Oleg Silchenko) បាន​ផ្ដើម​​ “​យុទ្ធនាការ​​ធ្វើ​ទុក្ខ​បុក​ម្នេញ​​ជាយូរ​មក​ហើយ​” ចំពោះ​លោក ប៉ូលុនស្គី។ សេចក្ដី​ថ្លែង​ការណ៍​ដដែល​​បាន​លើក​ឡើង​ថា “​នៅ​ក្នុង​ដំណើរ​ការមួយ​ដែល​​​អយុត្តិធម៌​​​​​បែប​នេះ​ ឱកាស​ដែល​លោក ប៉ូលុនស្គី ទទួល​បាន​សវនាការ​ជំនុំជម្រះ​​ដោយ​យុត្តិធម៌​ គឺ​មាន​តិច​តួច​ណាស់​”។

លោក ប៉ូលុនស្គី ​ធ្លាប់​​គេច​រួច​ពី​ការ​ប៉ុន​ប៉ង​ធ្វើ​បត្យាប័ន​លោក​ពី​ប្រទេស​កម្ពុជា​ទៅ​កាន់​ប្រទេស​រុស្ស៊ី​ប៉ុន្មាន​លើក​រួច​មក​ហើយ​ ដោយ​ទាំង​សាលា​ឧទ្ធរណ៍ និង​តុលាការ​កំពូល​​បាន​ច្រាន​ចោល​សំណើ​ធ្វើ​បត្យាប័ន​ពី​ក្រុង​មូស្គូ។ កាលពី​ខែ​មីនា មាន​ព័ត៌មាន​លេច​ឮ​ថា ​ប្រទេស​ទាំង​ពីរ​បាន​ចាប់​ផ្ដើម​ធ្វើ​សេចក្ដី​ព្រាង​សន្ធិសញ្ញា​បត្យាប័ន​ផ្លូវ​ការ​មួយ ​ប៉ុន្តែ​​អ្នក​នាំពាក្យ​ក្រសួង​យុត្តិធម៌​បាន​លើក​ឡើង​កាលពី​ថ្ងៃ​សុក្រ​ថា សេចក្ដី​​​ព្រាង​បត្យាប័ន​នេះ​មិន​ទាន់​​ឈាន​ដល់​ដំណាក់​កាល​បញ្ចប់​នៅ​ឡើយ​ទេ ហើយ​អាជ្ញាធរ​បាន​អះអាង​ថា លោក ប៉ូលុនស្គី ត្រូវបាន​​និរទេស​​ដោយ​សារ​បញ្ហា​អន្តោប្រវេសន៍។

អ្នក​ស្រី អូលហ្គា ដេរីប៉ាស្កូ ដែល​ជា​ភរិយា​របស់​លោក ប៉ូលុនស្គី បាន​បញ្ជាក់​ជា​ថ្មី​ម្ដង​ទៀត​នៅ​ឯ​សន្និសីទ​កាសែត​កាលពី​ថ្ងៃ​អាទិត្យ​ថា ស្វាមី​របស់​អ្នក​ស្រី​មាន​ទិដ្ឋាការ​ដែល​មាន​សុពលភាព​ ទោះបី​ជា​មន្ត្រី​អះអាង​ផ្ទុយ​ពី​នេះ​ក្ដី​។ អ្នក​ស្រី​និយាយ​ថា “​វា​មិន​សម​ហេតុ​ផល​ទាល់​តែ​សោះ ពីព្រោះ​យើង​បាន​ពន្យារ​ទិដ្ឋាការ​របស់​យើង​រួម​គ្នា​កាលពី​ខែ​វិច្ឆិកា​រួច​ហើយ​។ ទាំង​គាត់​ទាំង​ខ្ញុំ​មាន​ទិដ្ឋាការ​កម្ពុជា​ប្រចាំ​ឆ្នាំ​”។

នគរ​បាល​បាន​និយាយ​កាលពី​ថ្ងៃ​អាទិត្យ​ថា លោក ប៉ូលុនស្គី ត្រូវ​បាន​ចាប់​ខ្លួន​ផ្អែក​តាម​ពាក្យ​បណ្ដឹង​របស់​ប្រជា​ពលរដ្ឋ​​ក្នុង​មូលដ្ឋាន​​ដែល​ប្ដឹង​​ចោទ​ថា លោក​បាន​បង្ក​ចលាចល​នៅ​ក្នុង​ក្រុង​ព្រះសីហនុ ហើយ​ថា លោក​បាន​បង្កើត​ក្រុម​អង្គរក្ស​ប្រដាប់​អាវុធ​ទៀត​ផង។ ដំបូង​ឡើយ​ថា លោក ប៉ូលុនស្គី គ្មាន​ទិដ្ឋាការ​ដែល​មាន​​សុពលភាព​ ប៉ុន្តែ​នគរ​បាល​បាន​លើក​ឡើង​កាលពី​ថ្ងៃ​អាទិត្យ​ថា មហាសេដ្ឋី​ជនជាតិ​រុស្ស៊ី​រូប​នេះ​​ត្រូវ​បាន​​និរទេស​ដោយ​សារ​គ្មាន​លិខិត​ឆ្លង​ដែន​។

លោកស្រី អេលីណា អាឡេកសេយេវ៉ា (Elena Alekseyeva) អ្នក​នាំពាក្យ​ក្រសួង​​កិច្ច​ការ​ផ្ទៃ​ក្នុង​​រុស្ស៊ី​​​ បាន​ប្រាប់​​ទីភ្នាក់​ងារ​សារព័ត៌មាន​រ៉យទ័រ​ថា ប្រទេស​របស់​លោកស្រី​គឺ​ជា​អ្នក​រៀបចំ​​ឲ្យ​មាន​​ការ​និរទេស​​នេះ​។ លោកស្រី​ត្រូវ​បាន​ដក​ស្រង់​សម្ដី​យ៉ាង​ដូច្នេះ​ថា “​​មន្ត្រី​ក្រសួង​កិច្ច​ការ​ផ្ទៃ​ក្នុង​រុស្ស៊ី​បាន​​និរទេស​លោក ប៉ូលុនស្គី ទៅ​កាន់​ទឹក​ដី​នៃ​សហព័ន្ធ​រុស្ស៊ី ហើយ​គាត់​នឹង​ត្រូវ​ផ្ដន្ទាទោស​ទៅ​តាម​ច្បាប់​រុស្ស៊ី​”។

កាលពី​ម្សិលមិញ លោក ជួន ណារិន ស្នង​ការ​ខេត្ត​​ព្រះសីហនុ​បាន​ច្រាន​ចោល​​ការ​អះអាង​​​ថា មន្ត្រី​នគរ​បាល​កម្ពុជា​បាន​ចាត់​វិធានការ​​ដោយ​មិន​ត្រឹម​ត្រូវ​។

លោក​បានមាន​ប្រសាសន៍​ថា “​មេធាវី​បរទេស​ ពួកគេ​និយាយ​អ្វី​តាម​​ពួកគេ​ចង់ ហើយ​មេធាវី​បរទេស​មិន​យល់​ច្បាស់​អំពី​ច្បាប់​របស់​កម្ពុជា​ទេ”។ លោក​បាន​លើក​ឡើង​បន្ថែម​ថា ​បច្ចុប្បន្ន​ កង​កម្លាំង​របស់​លោក​កំពុង​ល្បាត​កោះ​ដែក​គោល​របស់​លោក​ ប៉ូលុនស្គី ​​ដើម្បី​ការ​ពារ​ទ្រព្យ​សម្បត្តិ​របស់​គាត់ ខណៈ​រដ្ឋាភិបាល​​ពិចារណា​ថាត្រូវ​សម្រេច​ចាត់​ចែង​​ទ្រព្យ​សម្បត្តិទាំង​នោះ​ដោយ​របៀប​ណា​។

មហាសេដ្ឋី​រូប​នេះ​បាន​​បោះ​ទុន​ជា​ច្រើន​លាន​ដុល្លារ​​ដើម្បី​អភិវឌ្ឍកោះ​របស់​លោក​ ហើយ​លោក​មាន​គម្រោង​ប្រែក្លាយ​កោះ​ទាំង​នោះ​​ទៅ​ជា​គោល​ដៅ​ទេសចរណ៍​ធម្មជាតិ​មួយ​ ដែល​ចំណាយ​អស់​ទឹក​ប្រាក់​១ពាន់​លាន​ដុល្លារ​។

លោក ឈិត សុខុន អភិបាល​ខេត្ត​ព្រះសីហនុ​បាន​មាន​ប្រសាសន៍​ថា ​គួរតែ​ស្វែង​រក​​វិនិយោគិន​មួយ​​រូប​​​ទៀត​​ដើម្បី​គ្រប់​គ្រង​កោះ​របស់​លោក ប៉ូលុនស្គី ប៉ុន្តែ​ថា នគរ​បាល​​ និង​កង​ទ័ពជើង​ទឹក​នឹង​បន្ត​ល្បាត​តំបន់​នោះ​រហូត​ទាល់​តែ​មាន​​អ្នក​អភិវឌ្ឍន៍​ថ្មី​រើ​ចូល​ទៅ​ទីនោះ។ លោក​បាន​លើក​ឡើង​បន្ថែម​ថា ពេល​នេះ​កង​ពល​តូច​លេខ​៣១​នៃ​កង​យោធពល​ខេមរភូមិន្ទ​កំពុង​ “ការ​ពារ​” កោះ​មួយ​ចំនួន​ក្នុង​ចំណោម​​កោះ​ទាំង​នោះ​។

លោក ឈិត សុខុន បាន​មាន​ប្រសាសន៍​ថា “កោះ​ទាំង​អស់​​របស់​គាត់​ដែល​គាត់​បាន​ជួល​សម្រាប់​ការ​វិនិយោគ​ គួរ​តែ​មាន​នរណា​ម្នាក់​ថែរក្សា​ទ្រព្យសម្បត្តិ​របស់​គាត់​។ ការ​វិនិយោគ​នេះ​ត្រូវ​មាន​ការ​សម្រេច​ពី​លោក សុខ ចិន្តា ដែល​មកពី​ក្រុម​ប្រឹក្សា​អភិវឌ្ឍន៍​កម្ពុជា​ [CDC] យើង​មិន​អាច​ឆ្លើយ​បាន​ទេ​ ប៉ុន្តែ​ពេល​នេះ​យើង​ចាំបាច់​ត្រូវ​ការ​ពារ​វា ខណៈ​ម្ចាស់​មិន​នៅ​ក្នុង​ប្រទេស”។

លោក​ សុខ ចិន្តា អគ្គលេខាធិការ​នៃ​ក្រុម​ប្រឹក្សា​អភិវឌ្ឍន៍​កម្ពុជា​​បាន​មាន​ប្រសាសន៍​ថា លោក​មិន​ដឹង​អ្វី​ទេ​ជុំវិញ​ករណី​នេះ។

សូម​បញ្ជាក់​ថា សហការី​ប្រាំនាក់​ដែល​ត្រូវ​បាន​ចាប់​ខ្លួន​រួម​ជាមួយ​លោក ប៉ូលុនស្គី កាលពី​ថ្ងៃ​សុក្រ​ សុទ្ធតែ​ជា​ជន​បរទេស​។ លោក អ៊ុក ហៃសិលា ប្រធាន​​នាយកដ្ឋាន​​ស៊ើបអង្កេត​ និង​អនុវត្តន៍​​នីតិវិធី​នៃ​អគ្គនាយកដ្ឋាន​អន្តោប្រវេសន៍​ក្រសួង​មហាផ្ទៃ​ បានមាន​ប្រសាសន៍​ថា សហការី​ដែល​លោក​បដិសេធ​មិន​​បញ្ចេញ​អត្តសញ្ញាណ​ទាំងនោះ ទំនង​ជា​ត្រូវ​និរទេស​​ពី​កម្ពុជា​នៅ​សប្ដាហ៍នេះ​។

លោក​បាន​មាន​ប្រសាសន៍​ថា “​ពួកគេ​កំពុង​ជាប់​ឃុំ​នៅ​អគ្គនាយកដ្ឋាន​អន្តោប្រវេសន៍ ហើយ​ពួកគេ​ប្រហែល​ជា​ត្រូវ​​និរទេស​​នៅ​ថ្ងៃ​ស្អែក ឬថ្ងៃ​ខាង​ស្អែក”៕ សុខុម

(រាយការណ៍​បន្ថែម​ដោយ Holly Robertson)​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស