32 C
Phnom Penh

កម្មករ​១១នាក់ក្នុង​ចំណោម​កម្មករ​ជន​ជាតិ​ចិន​៩៦នាក់​​ត្រឡប់ទៅ​​ស្រុក​វិញ

ដោយ ឌឹ ខេមបូឌា ដេលី

បទវិភាគ

យោង​តាម​មន្ត្រីនគរ​បាល​ម្នាក់​​បាន​ឲ្យ​ដឹង​ថា ​កម្មករ​សំណង់​១១​នាក់​​ក្នុង​ចំណោម​កម្មករ​សំណង់​ជនជាតិ​ចិន​ជាង​៩០​នាក់​ ដែល​បច្ចុប្បន្ន​នេះ​ស្នាក់​នៅ​ការដ្ឋាន​សំណង់​នៅ​​កោះពេជ្រ​ ក្នុង​រាជធានី​ភ្នំពេញ​អះអាង​ថា និយោជក​របស់​ខ្លួន​មិន​បើក​​ប្រាក់​ខែ​ឲ្យ​ពួកគេ​ ហើយ​បាន​ដក​ហូត​លិខិត​ឆ្លង​ដែន​របស់​ពួកគេ​​នោះ បាន​វិល​ត្រឡប់​ទៅ​ប្រទេស​ចិន​វិញ​​កាល​ពី​ម្សិល​មិញ។

កម្មករ​សំណង់​ទាំងនោះដែល​បាន​តវ៉ា​នៅ​ខាង​ក្រៅ​ស្ថាន​ទូត​ចិន​កាលពី​ថ្ងៃ​សុក្រ​ទាក់​ទង​នឹង​ស្ថានភាពលំបាក​​របស់ពួកគេ​ បច្ចុប្បន្ន​នេះ​ស្នាក់នៅ​ការដ្ឋាន​សំណង់​ដែល​ប្រតិបត្តិការ​​ដោយ​​ក្រុម​ហ៊ុន​ China State Construction Engineering Corporation (CSCEC) ដែល​គ្រប់​គ្រង​ដោយ​រដ្ឋ​នៅ​កោះពេជ្រ​ក្នុង​រាជធានី​ភ្នំពេញ​។

លោក​ ប្រាក់ វណ្ណា ប្រធាន​ការិយាល័យ​នគរ​បាល​​ជន​បរទេស​ក្នុង​រាជធានី​ភ្នំពេញ​បាន​មាន​ប្រសាសន៍​ថា កម្មករ​១១​នាក់​ក្នុង​ចំណោម​កម្មករ​៩៦​នាក់​បាន​ត្រឡប់​ទៅ​ប្រទេស​ចិន​វិញ​កាលពី​ម្សិលមិញ ខណៈ​ដែល​អាជ្ញាធរ​បន្ត​ស៊ើបអង្កេត​ការ​អះអាង​របស់​​ពួកគេ​។

លោក​បាន​មាន​ប្រសាសន៍​ថា ​”​យើង​កំពុង​ធ្វើការ​ដើម្បី​​ដោះ​ស្រាយ​បញ្ហានេះ​​។ ថ្ងៃ​នេះ​យើង​បាន​ដោះ​ស្រាយ​ពួកគេ​បាន​១១​នាក់​ ហើយ​ពួកគេ​បាន​យក​លិខិត​ឆ្លង​ដែនរបស់ខ្លួន​​ពី​ពួកយើង​ដើម្បី​ត្រឡប់​ទៅ​ស្រុករបស់​ខ្លួន​វិញ ហើយសំបុត្រ​របស់​ពួកគេ​​ត្រូវ​ត្រឡប់​ទៅស្រុក​វិញ​នៅ​ថ្ងៃ​នេះ។ យើង​នៅ​មាន​លិខិត​ឆ្លង​ដែន​ជាង​៨៥​ទៀត”។

លោក​បាន​មាន​ប្រសាសន៍​ថា “​យើង​បាន​ធ្វើ​ការ​ជាមួយ​ម្ចាស់​ក្រុម​ហ៊ុន​ដើម្បី​ទិញ​សំបុត្រ​បញ្ជូន​ពួកគេ​ត្រឡប់​ទៅស្រុក​វិញ។ ពួកគេ​ [កម្មករ​] មិនសប្បាយចិត្ត​នឹង​ប្រាក់​ខែ​របស់​ខ្លួន​ឡើយ។ យើង​មិន​ប្រាកដ​ថា តើ​ក្រុម​ហ៊ុន​ប៉ុន្មាន​ដែល​ពួកគេ​បាន​ធ្វើ​ការ​ឲ្យនោះ ហើយ​យើង​កំពុង​ធ្វើ​ការ​ស៊ើបអង្កេត​។ ក្រុម​ហ៊ុន​ដែល​ទិញ​សំបុត្រ​​នោះគឺ​នៅ​កោះពេជ្រ”។

​អ្នក​គ្រប់​គ្រង​នៅ​ការដ្ឋាន​សំណង់​កាលពី​ថ្ងៃ​អាទិត្យ​បាន​និយាយ​ថា ក្រុម​ហ៊ុន​ម៉ៅការ​បន្ត ពីក្រុមហ៊ុន​CSCEC ឈ្មោះ Sino Great Wall មិន​បាន​បើក​ប្រាក់​ខែ​ឲ្យ​កម្មករ​ទាំង​នោះ​​២ខែ​មក​ហើយ ហើយ​ថា លិខិត​ឆ្លង​ដែន​របស់ពួកគេ​ស្ថិត​ក្នុង​ដៃ​មន្ត្រី​អន្តោប្រវេសន៍​។

ទោះ​ជាយ៉ាង​ណា លោក វណ្ណា បាន​មាន​ប្រសាសន៍​ថា អ្នក​គ្រប់​គ្រង​កម្មករ​មាន​លិខិត​ឆ្លង​ដែន​របស់ពួកគេ ហើយ​បាន​ផ្ដល់​លិខិត​ឆ្លង​ដែន​នោះ​ដល់​អាជ្ញាធរ។

អ្នក​គ្រប់​គ្រង​ក្រុម​ហ៊ុន CSCEC នៅ​កោះពេជ្រ​បាន​មាន​ប្រសាសន៍​កាលពី​ថ្ងៃអាទិត្យ​ថា ក្រុម​ហ៊ុន​ CSCEC នឹង​ទិញ​សំបុត្រ​យន្តហោះ​ដើម្បី​បញ្ជូន​កម្មករ​ទាំង​នោះទៅស្រុកវិញ។

នៅ​សាខា​ក្នុង​រាជធានី​ភ្នំពេញ​របស់​ក្រុម​ហ៊ុន​ Sino Great Wall International Engineering ដែល​មាន​មូលដ្ឋាននៅ​ប្រទេស​ចិន​កាលពី​ម្សិលមិញ បុរស​ម្នាក់​ដែល​​បុគ្គលិក​ប្រាប់​ថា​ជា​អ្នក​គ្រប់​គ្រង​បាន​បដិសេធ​ថា កម្មករ​ទាំង​នោះ​មិន​ត្រូវ​បាន​ក្រុម​ហ៊ុន​ Sino Great Wall ជួល​ទេ។

និយាយ​តាម​រយៈ​អ្នក​បក​ប្រែ​ភាសា ហើយ​បាន​បដិសេធ​មិន​ប្រាប់​អត្តសញ្ញាណ​ខ្លួនឯង​អ្នកគ្រប់​គ្រង​រូប​នេះ​បាន​និយាយ​ថា “​មិន​មាន​ទំនាក់​ទំនង​ផ្ទាល់​ចំពោះ​ក្រុម​ហ៊ុន Sino Great Wall ទេ​​។ កម្មករ​ដែល​ធ្វើ​ការ​តវ៉ា​ទាំងនោះ​មក​ពី​ក្រុម​ហ៊ុន​ផ្សេង”។

អ្នកគ្រប់​គ្រង​រូប​នេះ​បាន​មាន​ប្រសាសន៍​ថា ក្រុម​ហ៊ុន​ Sino Great Wall បាន​ម៉ៅការ​បន្ត​​ឲ្យ​ក្រុម​ហ៊ុន CityKey Construction Engineering ជា​ក្រុម​ហ៊ុន​ខួង​​ដែល​ពួកគេ​តែងតែមានទំនាក់​ទំនង​ជាមួយ ហើយ​បន្ទាប់​មក​បាន​​ម៉ៅការ​បន្ត​ឲ្យ​ក្រុម​ហ៊ុន​ Dan Dong Shi Hong Bo Engineering Company ដែល​លោក​បានមាន​ប្រសាសន៍​ថា បាន​បោក​ប្រាស់​កម្មករ​។

លោក ចេង ហុងបូ អ្នក​​នាំពាក្យ​ស្ថានទូត​ចិន​បាន​បដិសេធមិន​​​និយាយ​អំពី​ករណី​នេះ​ទេ ដោយ​លើក​ឡើង​ថា លោក​កំពុង​ស្វែង​រក​ព័ត៌មាន​បន្ថែម​”៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស