សវនាការជំនុំជម្រះសកម្មជនគណបក្សប្រឆាំង១១នាក់ ដែលត្រូវបានចោទប្រកាន់ពីបទចូលរួមក្នុងកុបកម្មចំពោះវត្តមានរបស់ពួកគេនៅការតវ៉ាកាលពីថ្ងៃទី១៥ ខែកក្កដា ទាមទារឲ្យអាជ្ញាធរបើកទីលានប្រជាធិបតេយ្យក្នុងរាជធានីភ្នំពេញឡើងវិញនោះ បានបន្តនៅសាលាដំបូងរាជធានីភ្នំពេញកាលពីម្សិលមិញ។
សមាជិកសភាគណបក្សប្រឆាំង៧រូប និងសកម្មជន១១រូបត្រូវបានជាប់ពន្ធនាគារបន្ទាប់ពីការតវ៉ាកាលពីឆ្នាំមុន ដែលបានបណ្ដាលឲ្យមានការប៉ះទង្គិចគ្នាតាមផ្លូវនៅពេលក្រុមអ្នកតវ៉ាបានតដៃជាមួយសន្តិសុខរដ្ឋាភិបាល។
សមាជិកសភាទាំងនោះទទួលបានអភ័យឯកសិទ្ធិរួចផុតពីការផ្ដន្ទាទោសនៅពេលពួកគេស្បថចូលកាន់តំណែងជាសភាជិករដ្ឋសភានៅខែបន្ទាប់ ប៉ុន្តែសកម្មជន១១នាក់ត្រូវបានបើកសវនាការជំនុំជម្រះលើកដំបូងកាលពីខែមុន។
បួននាក់ក្នុងចំណោមពួកគេទាំង១១នាក់ត្រូវបានសាកសួរលើកទី២កាលពីម្សិលមិញ ដែលម្នាក់ៗបានប្រាប់អង្គចៅក្រមមានគ្នាបីនាក់ថា ពួកគេជឿថា ការប៉ះទង្គិចគ្នានៅតាមផ្លូវបង្កឡើងដោយសន្តិសុខ ហើយបានបដិសេធការចោទប្រកាន់មកលើពួកគេ។
លោក ឃិន ជំរឿន ប្រធានក្រុមយុវជនគណបក្សសង្គ្រោះជាតិក្នុងរាជធានីភ្នំពេញបានមានប្រសាសន៍ថា “ខ្ញុំបានឃើញមនុស្សកាន់ទង់ជាតិ ហើយខ្ញុំបានឃើញសន្តិសុខចែកដំបងឈើដែលយកពីខាងក្រោយរថយន្តនៅខណ្ឌដូនពេញ។ មនុស្សទាំងនោះមិនបានកាន់កាប់តំបន់ស្ពាននាគទេ ពួកគេគ្រាន់តែទៅទាមទារឲ្យដោះលែងទីលានប្រជាធិបតេយ្យតែប៉ុណ្ណោះ”។
សកម្មជនផ្សេងទៀតដូចជាលោក កែ ឃីម អ្នករត់រ៉ឺម៉កម៉ូតូកង់បីដែលតែងតែមានវត្តមាននៅក្នុងការតវ៉ានៅក្នុងរាជធានីភ្នំពេញ ប៉ុន្តែបានលើកឡើងថា លោកមិនមែនជាសមាជិកគណបក្សសង្គ្រោះជាតិនោះ បានបដិសេធថា គាត់មិនបានចូលរួមក្នុងកុបកម្មប្រឆាំងរដ្ឋាភិបាលកាលពីថ្ងៃទី១៥ ខែកក្កដាឡើយ។
លោកបាននិយាយថា “ខ្ញុំមិនដឹងថា ហេតុអ្វីបានជាមនុស្សទាំងនោះទៅទីនោះទេ ប៉ុន្តែខ្ញុំទទួលបានព័ត៌មានតាមរយៈកាសែត និងវិទ្យុ ដូច្នេះខ្ញុំគ្រាន់តែទៅចូលរួមនៅទីនោះដើម្បីប្រើប្រាស់សេរីភាពរបស់ខ្ញុំនៅក្នុងសង្គមប្រជាធិបតេយ្យតែប៉ុណ្ណោះ”។
ប៉ុន្តែលោក ឃីម បានទទួលស្គាល់ថា គាត់មានដុំថ្ម រយៈពេលខ្លីនៅពេលការប៉ះទង្គិចគ្នាមែន។ គាត់បាននិយាយថា នៅពេលស្ថានភាពចលាចល ខ្ញុំកាន់ដុំថ្មដើម្បីការពារខ្លួន ពីព្រោះខ្ញុំខ្លាចគេវាយខ្ញុំ ជាពិសេសនៅពេលខ្ញុំឃើញចារកម្មរបស់អាជ្ញាធរពីរបីនាក់ដើរតាមខ្ញុំ”។
លោក អ៊ុក ពេជ្រសំណាង សកម្មជនម្នាក់ទៀតដែលត្រូវបានចាប់ខ្លួនបាននិយាយថា លោកជឿថា មនុស្សស្លៀកពាក់ស៊ីវិលដែលរដ្ឋបានជួលបានចាប់ផ្ដើមវាយប្រហារ។
លោកបាននិយាយថា នគរបាល និងកងរាជអាវុធហត្ថមិនហ៊ានវាយមនុស្សក្នុងទីសាធារណៈទេ ពីព្រោះពួកគេខ្លាចរំលោភសិទ្ធិមនុស្ស ដូច្នេះហើយពួកគេជួលក្រុមបាតដៃទី៣ដែលបង្កើតឡើងដោយរដ្ឋ និងខណ្ឌនានាក្នុងរាជធានីភ្នំពេញ”។
លោក សាន សីហៈ សមាជិកគណបក្សសង្គ្រោះជាតិជាអ្នកចុងក្រោយក្នុងចំណោមសកម្មជនដែលត្រូវបានសាកសួរកាលពីម្សិលមិញបានប្រាប់តុលាការថា លោកធ្វើតាមបញ្ជារបស់លោក ជំរឿន កុំឲ្យចូលរួមក្នុងការប៉ះទង្គិចគ្នានោះ។
លោក សីហៈ បាននិយាយថា “ខ្ញុំទទួលបានសំឡេងលោក ឃិន ជំរឿន តាមរយៈវិទ្យុទាក់ទងឲ្យដកថយ ហើយថា កុំចូលរួមប្រើអំពើហិង្សា។ ខ្ញុំបានដើរចេញពីកន្លែងហិង្សានោះ ដូច្នេះខ្ញុំមិនដឹងថា នរណាវាយគ្នាឡើយ”។
លោក លឹម មករន្ទ ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា សវនាការនឹងបន្តនៅថ្ងៃអង្គារ៕ សារុន