38 C
Phnom Penh

ក្រុម​សាស្ត្រាចារ្យ​ធ្វើកូដកម្ម​ទាម​ទារ​ប្រាក់ថ្លៃបង្រៀន​​​ដែលមិនទាន់បាន​បើក​

ដោយ ឌឹ ខេមបូឌា ដេលី

បទវិភាគ

សាស្ត្រាចារ្យ​​៤០​នាក់​​នៅ​វិទ្យាស្ថានជាតិ​ពាណិជ្ជសាស្ត្រ​ក្នុង​រាជធានី​ភ្នំពេញ​បាន​ធ្វើ​កូដកម្ម​​កាលពី​ម្សិលមិញ​ ដោយ​អះអាង​ថា នាយកវិទ្យាស្ថាន​​​មិន​បាន​បើក​​ប្រាក់​​ជាង​៣០.000​ដុល្លារ​ដល់​ពួកគាត់ជា​ប្រាក់​បង់​ថ្លៃ​សាលា​របស់​សិស្ស​ឡើយ​។

លោក ឈឹម ធឿន សាស្ត្រាចារ្យ​ផ្នែក​ភាសាអង់គ្លេស​​បាន​មាន​ប្រសាសន៍​ថា លោក​និង​សហសេវិក​របស់​លោក​​​មិន​ទាន់​ទទួល​បាន​​​ប្រាក់​បង់​ថ្លៃសាលា​របស់​សិស្ស​៤០​ភាគ​រយក្នុង​ចំណោម​ប្រាក់​ទាំងនោះ​​សម្រាប់​​ឆ្នាំ​សិក្សា​២០១៣-២០១៤​ដែល​បាន​សន្យា​ផ្ដល់​ឲ្យ​ពួកគេ​បន្ថែម​ពី​លើ​ប្រាក់​ខែ​របស់​ពួកគាត់​ឡើយ។

លោក​បានមាន​ប្រសាសន៍​ថា សាស្ត្រាចារ្យ​៤០​នាក់​ក្នុង​ចំណោម​៤៨​នាក់​​នៅ​វិទ្យាស្ថាន​នេះ​បាន​ចូល​រួម​ធ្វើ​កូដកម្ម​។

លោក​ ឈឹម ធឿន បាន​មាន​ប្រសាសន៍​ថា “​តាម​គោល​ការណ៍​វិទ្យាស្ថា​ន ប្រាក់​ដែល​បាន​មក​ពី​ការ​បង់ថ្លៃ​សាលា​របស់​សិស្ស​ត្រូវ​ផ្ដល់​ឲ្យ​សាស្ត្រាចារ្យ​៤០ភាគរយ ហើយ​វិទ្យាស្ថាន​ទុក​៦០​ភាគ​រយ​ ប៉ុន្តែ​ក្នុង​ឆ្នាំ​សិក្សា​២០១៣-២០១៤​ គណៈគ្រប់​គ្រង​សាលា​មិន​បាន​​បើក​ប្រាក់​នោះ​ដល់​សាស្ត្រាចារ្យ​ឡើយ ហើយ​វា​រហូត​ដល់​៣១.៥០០​ដុល្លារ​ឯណោះ​”។

លោក​បាន​បន្ថែម​ថា “យើង​ត្រូវ​លះបង់​ពេល​វេលា និង​​ការ​ប្រឹង​ប្រែង​បង្រៀន​។ យើង​ចង់​បាន​យុត្តិធម៌ និង​ចង់​ដឹង​ថា តើ​ប្រាក់​៤០​ភាគរយ​នោះ​ទៅ​ណា?”។

លោក ឈឹម ធឿន បាន​មាន​ប្រសាសន៍​ថា សាស្ត្រាចារ្យ​ទាំង​អស់​បាន​ដាក់​ពាក្យ​បណ្ដឹង​ទៅ​ក្រសួង​ការ​ងារ​​កាលពី​ថ្ងៃទី​២៥ ខែ​មេសា ប៉ុន្តែ​មិន​ទាន់​ទទួល​បាន​ការ​ឆ្លើយ​តប​នៅ​ឡើយ​ទេ។ មន្ត្រី​នៅ​ក្រសួង​​ការ​ងារ​​មិន​អាច​ទាក់​ទង​បាន​ទេ​កាលពី​ម្សិលមិញ។

លោក ឈឹម ធឿន បានមាន​ប្រសាសន៍​ថា សាស្ត្រាចារ្យ​ទាំង​អស់​នឹង​​បន្ត​មិន​ចូល​បង្រៀន​ឡើយ​ ដែល​ធ្វើ​ឲ្យ​ប៉ះពាល់​​និស្សិត​ប្រហែល​​៣.០០០​នាក់​​រហូត​ដល់​​ពួកគាត់​​ទទួល​បាន​ប្រាក់​តាមការ​ទាមទារ​។

លោក​បាន​មាន​ប្រសាសន៍​ថា “ប្រសិន​បើ​មិន​មាន​ដំណោះ​ស្រាយទេ​នោះ យើង​នឹង​​បន្ត​មិន​ចូល​បង្រៀន​ឡើយ រហូត​ដល់​មាន​ដំណោះ​ស្រាយ​ ពីព្រោះ​អ្វី​ដែល​យើង​ទាម​ទារ​គឺ​ស្រប​ច្បាប់​ នេះ​គឺ​ជា​ញើស​ឈាម និង​ការ​ប្រឹងប្រែង​​របស់​យើង”​។

លោក ទឹម​ ផាណាត និស្សិត​ឆ្នាំ​ទី២​នៅ​វិទ្យាស្ថាន​នេះ​បាន​សម្ដែង​ការ​គាំទ្រ​ចំពោះ​សាស្ត្រាចារ្យ​ដែល​ធ្វើ​កូដកម្ម​ទាំង​នោះ ហើយ​បាន​លើក​ឡើង​ថា និស្សិត​ទាំង​អស់​នឹង​ចូល​រួម​ជាមួយ​ពួកគាត់​ដែរ​ប្រសិន​បើ​ស្ថានភាព​នេះ​មិន​ប្រសើរ​ឡើង​ទេ​នោះ។

លោក​​បាន​និយាយ​ថា “​យើង​មាន​ការព្រួយ​​បារម្ភ​ ពីព្រោះ​យើង​មិន​អាច​សិក្សា​បាន ហើយ​យើង​ស្នើ​ឲ្យ​រដ្ឋបាល​ជួយ​រក​ដំណោះ​ស្រាយ ដើម្បី​ឲ្យ​សាស្ត្រាចារ្យ​ទាំង​អស់​ត្រឡប់​មក​បង្រៀន​វិញ។ យើង​ចង់​ឲ្យ​នាយក​វិទ្យាស្ថាន​ទទួល​ខុស​ត្រូវ​ចំពោះ​សាស្ត្រាចារ្យ​ទាំង​អស់”។

លោក ទា អុិនហួត នាយក​រង​វិទ្យាស្ថានជាតិ​ពាណិជ្ជសាស្ត្រ​បាន​បដិសេធ​មិន​ឆ្លើយ​សំណួរ​នៅ​ខាង​ក្រៅ​វិទ្យាស្ថាន​ឡើយ​កាល​ពី​ម្សិលមិញ។

លោក លី សុធា នាយក​វិទ្យាស្ថាន​នេះ​មិន​អាច​ទាក់​ទង​សុំ​អត្ថាធិប្បាយ​បាន​ទេ​៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស