31 C
Phnom Penh

កម្មាភិបាល​ខ្មែរ​ក្រហម​បន្លំ​ខ្លួន​ដើម្បី​ឈ្លេច​យក​ការ​សារភាព​ពី​សត្រូវ

ដោយ ឌឹ ខេមបូឌា ដេលី

បទវិភាគ

អតីត​ប្រធាន​ភូមិ​នៅ​ខេត្ត​កំពង់​ធំ​ក្នុង​របប ប៉ុល ពត បាន​ប្រាប់​សាលា​ក្តី​ខ្មែរ​ក្រហម​កាលពី​ថ្ងៃ​អង្គារ​ថា កម្មាភិបាល​បន្លំ​ធ្វើជា​អ្នក​ជម្លៀស​ថ្មីៗ បន្ទាប់ពី​ការ​ដួល​រលំ​ក្រុង​ភ្្នំពេញ​នៅ​ថ្ងៃទី​១៧​មេសា​ឆ្នាំ​១៩៧៥ ដើម្បី​តាម​កម្ចាត់​ចោល​នូវ​ទាហាន​នៃ​រដ្ឋាភិបាល​ដែល​ដួល​រលំ។

ឱ ហូ ដែល​ជា​ប្រធាន​ភូមិ​ព្រៃ​ស្រង៉ែ នៅ​ស្រុក​បារាយ បាន​ក្លាយ​ជា​សាក្សី​ទី​១​នៅ​សាលាក្តី ដើម្បី​ផ្តល់​ភ័ស្តុតាង​ទាក់ទិន​នឹង​ការដ្ឋាន​ការងារ​សង់​ទំនប់​១​មករា​ដ៏​ធំ នៅ​ក្នុង​ខេត្ត​កំពង់ធំ។

លោក ហូ បាន​និយាយ​ថា ក្រោយពី​ការ​ជម្លៀស​មនុស្ស​ចេញ​ពី​ទីក្រុង កម្មាភិបាល​ក្នុង​ខេត្ត​នេះ​ព្យាយាម​ធ្វើ​ខ្លួន​ជា​ប្រជាជន​ជម្លៀស ដើម្បី​បំភាន់​ធ្វើ​ឲ្យ​អ្នក​មក​ដល់​ថ្មី​ប្រាប់​មុខងារ​របស់​ពួកគេ​ក្នុង​របប​មុន។

លោក​បាន​និយាយ​ថា “តាម​ការ​ចងចាំ​របស់​ខ្ញុំ​នៅ​ពេល​នោះ កង​ឈ្លប​ស្លៀក​ពាក់​ខោអាវ​ពណ៌​ភ្លឺ។ ពួកគេ​បាន​និយាយ​ថា ពួកគេ​ជា​ប្រជាជន​១៧​មេសា ហើយ​ពួកគេ​បាន​និយាយ​ថា ពួកគេ​ជា​អនុសេនីយ៍​ឯក។ ពួកគេ​ដើរ​ចុះ​ឡើង​និង​ស្នើ​ឲ្យ​ប្រជាជន​ប្រាប់​ការ​ពិត ថា​តើ​[គេ]​ជា​អតីត​ទាហាន​ឬ​យ៉ាង​ណា”។

សាក្សី​រូ​ប​នេះ​បាន​និយាយ​ថា អតីត​គ្រូ​បង្រៀន​ម្នាក់​ដែល​គេ​ទុក​ជីវិត ត្រូវ​បាន​ចាត់​តាំង​ឲ្យ​បញ្ឆោត​ទាហាន​ឲ្យ​សារភាព​ថា​បាន​ធ្វើការ​ក្នុង​របប​សាធារណរដ្ឋ​ខ្មែរ។

លោក​បាន​និយាយ​ថា “បើ​ដោយ​ចៃដន្យ ពួកគេ​បាន​និយាយ​ពាក្យ​ទាំង​នោះ ពួកគេ​មិន​អាច​ជួយ​​បាន​ទេ ពួកគេ​ត្រូវតែ​ស្លាប់”។

លោក ហូ បាន​និយាយ​ដែរ​ថា គេ​ចេញ​បទបញ្ជា​ឲ្យ​សម្លាប់​កម្មករ​នៅ​ការដ្ឋាន​ទំនប់ ប្រសិនបើ​ពួកគេ​ធ្វើ​មិន​បាន​តាម​ការ​ចាត់តាំង។

លោក​បាន​និយាយ​ថា “ខ្ញុំ​មិន​ដឹង​ថា​នរណា​បាន​[ធ្វើការ​សម្លាប់​នេះ​ទេ] ប្រជាជន​ត្រូវ​គេ​ចាប់​បញ្ជូន​ទៅ​ឃុំ​នៅ​មន្ទីរ​សន្តិសុខ ហើយ​ពួកគេ​ភាគ​ច្រើន​មិន​បាន​វិល​មក​ការដ្ឋាន​វិញ​ទេ”។

នៅ​ពេល​សួរ​ដោយ​សហ​ព្រះរាជ​អាជ្ញា នីកូឡាស គូមជៀន (Nicholas Koumjian) ថា​តើ​មាន​គេ​ចោទ​នរណា​ម្នាក់​ជា “ខ្មាំង” បដិវត្តន៍ ព្រោះ​រឿង​បន្តិច​បន្តួច​ ដូចជា​មិន​អាច​រែក​ដី​តាម​ការ​កំណត់​ឬ​ទេ សាក្សី​រូប​នេះ​បាន​យល់​ស្រប។

លោក​បាន​និយាយ​ថា “អ្វី​ដែល​ប្រជាជន​និយាយ គឺអ្នក​ទាំង​នោះ​នឹង​ត្រូវ​គេ​ចាត់​ទុក​ថា ជា​ខ្មាំង​ស៊ី​រូង​ផ្ទៃ​ក្នុង ហើយ​ថា ពួកគេ​ជា​អ្នក​ធ្វើ​ឲ្យ​រាំង​ស្ទះ​ដល់​ការ​ជឿន​លឿន​របស់​កម្មករ ឬ ចលនា​កម្មករ”។

លោក​បាន​អះអាង​ថា ប៉ុល ពត ធ្លាប់​បាន​មក​មើល​ការដ្ឋាន​នេះ​ម្តង ប៉ុន្តែ​គាត់​បាន​ដឹង​វត្តមាន​របស់​មេដឹកនាំ​រូ​ប​នេះ​តែ​ក្រោយ​ពេល លោក កែ ពក ប្រធាន​តំបន់​មជ្ឈិម​បាន​លើក​ឡើង​ប៉ុណ្ណោះ។

សក្ខីកម្ម​របស់​លោក ហូ ក្នុង​ដំណាក់​កាល​ទី​២​នៃ​សំណុំ​រឿង០០២ ដែល​ក្នុង​សំណុំ​រឿង​នេះ មេដឹកនាំ​ខ្មែរ​ក្រហម នួន ជា និង ខៀវ សំផន កំពុង​ត្រូវ​ជំនុំ​ជម្រះ​ពី​បទ​ឧក្រិដ្ឋកម្ម មាន​ទាំង​ការ​ប្រល័យ​ពូជសាសន៍​ផង ធ្វើ​បន្ត​នៅ​ថ្ងៃ​នេះ៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស