35 C
Phnom Penh

ឧត្ដម​សេនីយ៍​​ផ្កាយពីរ​សារភាព​​ក្នុង​តុលាការ​ថា ខ្លួន​ពិត​ជា​បាន​សម្លាប់​ប្រពន្ធ​ និង​កូនស្រី​

ដោយ ឌឹ ខេមបូឌា ដេលី

បទវិភាគ

Siv channa21

អំឡុង​សវនាការ​ជំនុំជម្រះ​ទោស​នៅ​ឯ​សាលា​ដំបូង​រាជធានី​ភ្នំពេញ​​​កាលពី​ម្សិលមិញ ឧត្ដម​សេនីយ៍​ទោ​ម្នាក់​នៅ​​ក្នុង​ជួរ​យោធា​​ បាន​រៀបរាប់​ពី​ហេតុការណ៍​សម្លាប់​ប្រពន្ធ និង​កូនស្រី​វ័យ​៦ឆ្នាំ​​របស់​​ខ្លួន មុន​ពេល​លើក​សាក​សព​ជន​រងគ្រោះ​ញាត់​ចូល​ក្នុង​ធុង​ក្លាសេ ប៉ុន្តែ​បាន​​តវ៉ា​ថា តុលាការ​មិន​គួរ​ចោទ​ប្រកាន់​ខ្លួន​ពីបទ​មនុស្ស​ឃាត​គិត​ទុក​ជាមុន​នោះ​ទេ ពីព្រោះ​ខ្លួន​សម្លាប់​ជន​រងគ្រោះ​ “​ដោយ​ចៃដន្យ” ប៉ុណ្ណោះ។

លោក គឹម ម៉ារិន្ថា ឧត្ដម​សេនីយ៍​​ទោ​នៅ​ក្នុង​​ជួរ​កង​យោធពល​ខេមរភូមិន្ទ បាន​ប្រាប់​តុលាការ​ថា គាត់​បាន​ច្របាច់​ក​ប្រពន្ធ​របស់​ខ្លួន​ឈ្មោះ វ៉ា ដារី អាយុ​៣០​ឆ្នាំ អំឡុង​ពេល​ឈ្លោះ​គ្នា​កាលពី​ខែ​កុម្ភៈ​ឆ្នាំ​មុន​ ហើយ​​ការ​ប្រវាយ​ប្រតប​់​គ្នា​នោះ​បាន​បុក​ត្រូវ​កូនស្រី​របស់​គាត់​ឈ្មោះ គឹម ថាវិជ្ជតា បណ្ដាល​ឲ្យ​នាង​ធ្លាក់​ជណ្ដើរ​រហូត​ដល់​ស្លាប់​។

បន្ទាប់ពី​ហេតុការណ៍​នេះ លោក​ គឹម ម៉ារិន្ថា បាន​ភៀស​ខ្លួន​ទៅ​ប្រទេស​ថៃ ហើយ​គាត់​ក៏​ត្រូវ​បាន​ចាប់​ខ្លួន​នៅ​​ទីនោះ​កាលពី​ខែ​កញ្ញា ខណៈ​ពេល​គាត់​ព្យាយាម​ជិះ​រថយន្ត​ឆ្លង​ដែន​ចូល​ទៅ​ក្នុង​ប្រទេស​ឡាវ។

នៅ​ក្នុង​តុលាការ​កាលពី​ម្សិលមិញ លោក គឹម មា៉រិន្ថា ​បាន​និយាយ​ថា គាត់​បាន​សម្លាប់​ប្រពន្ធ​របស់​ខ្លួន​ក្រោយ​ពី​ដឹង​ថា ជន​រងគ្រោះ​លេង​ល្បែង​ស៊ីសង និង​មាន​សាហាយ​។ គាត់​បាន​ប្រាប់​តុលាការ​ថា “​ខ្ញុំ​សូម​សារភាព​ថា ខ្ញុំ​ពិត​ជាបាន​សម្លាប់​មនុស្ស​មែន​។ នាង​លេង​ល្បែង​ស៊ីសង ហើយ​មាន​ស្នេហា​លួច​លាក់​ជាមួយ​​បុរស​ម្នាក់​ទៀត​។ ខ្ញុំ​មិន​ចិត្ត​អ្នក​លេង​ល្បែង និង​អ្នក​ភូត​កុហក​ទេ”។

ក្រុម​គ្រួសារ​របស់​អ្នកស្រី វ៉ា ដារី ​បាន​និយាយ​កាលពី​ឆ្នាំ​មុន​ថា អ្នកស្រី​ វ៉ា ដារី បាន​លួច​មាន​ទំនាក់​ទំនង​តាម​អុីនធើណិត​ជាមួយ​បុរស​ខ្មែរ​ម្នាក់​​ដែល​រស់​នៅ​ក្នុង​ប្រទេស​ជប៉ុន។

​លោក គឹម មា៉រិន្ថា ដែល​ជា​ម្ចាស់​ក្រុម​ហ៊ុន​រថយន្ត​ក្រុង​ ជី អេស ធី (GST Express Bus) នៅ​ក្នុង​រាជធានី​ីភ្នំពេញ ​បាន​និយាយ​កាលពី​ម្សិលមិញ​ថា គាត់​បាន​ត្រឡប់​​មក​រាជធានី​ភ្នំពេញ​វិញ​កាលពី​ថ្ងៃទី​១៤ ខែ​កុម្ភៈ​ឆ្នាំ​មុន ​បន្ទាប់ពី​ទៅ​សួរ​សុខទុក្ខ​សាច់​ញាតិ​នៅ​ក្នុង​ខេត្ត​កំពង់​ចាម។ គាត់​បាន​និយាយ​ថា ពេល​នោះ គាត់​និង​អ្នកស្រី វ៉ា ដារី បាន​ចាប់​ផ្ដើម​ឈ្លោះ​គ្នា។

គាត់​បាន​រៀបរាប់​ថា “​បន្ទាប់ពី​ខ្ញុំ​ទះ​កំផ្លៀង​នាង ​នាង​បាន​យក​ស្បែក​ជើង​វ៉ៃក្បាល​ខ្ញុំ។ ខ្ញុំ​ខឹង​យ៉ាង​ខ្លាំង មិន​អាច​ទប់អារម្មណ៍​បាន​ក៏​ច្របាច់​ក​នាង​ ហើយ​រុញ​នាង​ផ្ទប់​ទៅ​នឹង​គ្រែ​”។

គាត់​បាន​និយាយ​ទៀត​ថា អំឡុង​ពេល​ប្រវាយ​ប្រតប់​គ្នា​ជាមួយ​ប្រពន្ធ​ គាត់​​បាន​បុក​ត្រូវ​កូនស្រី​របស់​ខ្លួន​បណ្ដាល​ឲ្យ​នាង​ធ្លាក់​ជណ្ដើរ​បាក់ក​។ គាត់​និយាយ​ថា “​ខ្ញុំ​បាន​​ទៅ​​មើល​កូនស្រី​របស់​ខ្ញុំ ប៉ុន្តែ​នាង​​ស្លាប់​ទៅ​ហើយ”។

គាត់​បាន​ប្រាប់​តុលាការ​ថា បន្ទាប់ពី​សម្លាប់​ប្រពន្ធ​ និង​កូនស្រី​របស់​ខ្លួន​រួច​ គាត់​បាន​​យក​ថង់​ប្លាស្ទិក​រុំ​សាកសព​ជន​រងគ្រោះ​​ ហើយ​​ញាត់​ចូល​ក្នុង​ធុង​ក្លាសេ​ ហើយ​បាន​ប្រាប់​ឲ្យ​សន្តិសុខ​របស់​គាត់​លើក​ធុង​ក្លាសេ​នោះ​ដាក់​លើ​រថយន្ត​លុច​ស៊ីស​របស់​គាត់។

យោង​តាម​នគរបាល​បាន​ឲ្យ​ដឹង​ថា ពេល​នោះ​លោក គឹម ម៉ារិន្ថា បាន​ប្រាប់​ឲ្យ​កូន​ប្រសារ​ប្រុស​របស់​គាត់​ឈ្មោះ ជា សុខសំណាង និង​កូនប្រុស​របស់​គាត់​ឈ្មោះ គឹម សែមរិទ្ធី ឲ្យ​យក​ធុង​ក្លាសេ​នោះ​ទៅ​បោះ​ចោល​នៅ​ក្នុង​ព្រៃ​មួយ​ក្នុង​ខេត្ត​កំពង់ស្ពឺ។

ពេល​នេះ ឈ្មោះ គឹម សែមរិទ្ធី កំពុង​រត់គេច​ខ្លួន​នៅ​ឡើយ ប៉ុន្តែ​ឈ្មោះ ជា សុខសំណាង ត្រូវ​បាន​ចាប់​ខ្លួន​កាលពី​ខែ​សីហា ឆ្នាំ​២០១៤ ពីបទ​ជាប់​ពាក់ព័ន្ធ​នៅ​ក្នុង​ឃាតកម្មនេះ ហើយ​ត្រូវ​បាន​ជំនុំជម្រះ​ទោស​រួម​ជាមួយឪពុក​ក្មេក​របស់​ខ្លួន​កាលពី​ម្សិលមិញ។

ជា សុខសំណាង ដែល​ត្រូវ​បាន​ចោទ​ប្រកាន់​ពីបទលាក់​ទុក​សាកសព​ បាន​ប្រាប់​តុលាការ​ថា គាត់​មិន​ដឹង​ថា​មាន​អ្វី​នៅ​ក្នុង​ធុង​ក្លាសេ​នោះ​​ទេ។ គាត់​និយាយ​ទៀត​ថា “​​ក្រោយ​មក​ខ្ញុំ​បាន​សួរ​គាត់​ថា មាន​អ្វី​នៅ​ក្នុង​ធុង​នោះ ប៉ុន្តែ​គាត់​បាន​ប្រាប់​ខ្ញុំ​ថា កុំសួរ​ទៀត​។ ខ្ញុំ​ទើប​តែ​ដឹង​នៅ​ពេល​ខ្ញុំ​ឃើញ​ព័ត៌មាន​ចុះ​ផ្សាយ​តាម​កាសែត​​ប្រហែល​​១ខែ​ក្រោយ​មក”។

លោក គឹម ម៉ារិន្ថា បាន​និយាយ​ថា ដោយ​សារ​តែ​គាត់​មិន​បាន​រៀបគម្រោង​សម្លាប់​​ប្រពន្ធ​ និង​កូនស្រី​របស់​ខ្លួន តុលាការ​មិន​គួរ​ចោទ​ប្រកាន់​គាត់​ពីបទ​មនុស្ស​ឃាត់​គិត​ទុក​ជាមុន​ដែល​ត្រូវ​មានទោស​ជាប់​ពន្ធនាគារ​អស់​មួយ​ជីវិត​​​ឡើយ​។

គាត់​និយាយ​ថា “​ខ្ញុំគ្មាន​បំណង​សម្លាប់​ប្រពន្ធ​ និង​កូនស្រី​របស់​ខ្ញុំ​ទេ សូម្បី​សត្វ​ក៏​ខ្ញុំ​មិន​ហ៊ាន​សម្លាប់​ផង​”។

នៅ​ពេល​​មេធាវី​ ម៉ក់ ប៊ុណ្ណា ដែល​តំណាង​ឲ្យ​ជន​រងគ្រោះ​សាកសួរ​ថា​ ហេតុ​អ្វី​បាន​ជា​គាត់​មិន​នាំ​ប្រពន្ធ​ និង​កូន​ស្រី​ទៅ​មន្ទីរ​ពេទ្យ​នោះ​ លោក គឹម មា៉ារិន្ថា បាន​និយាយ​ថា គាត់​ដឹង​ថា ពួកគេ​បាន​ស្លាប់​ទៅ​ហើយ។ គាត់​អះអាង​ថា “​ខ្ញុំ​ក៏​ជា​ពេទ្យ​ដែរ”។

បន្ទាប់ពី​ស្ដាប់​ភ័ស្តុតាង​​ផ្ដល់​ដោយ​មេធាវីការ​ពារ​របស់​ឧត្ដម​សេនីយ៍ទោ គឹម ម៉ារិន្ថា ព្រះ​រាជអាជ្ញារង​ ស៊ឺ វា៉ន់នី បាន​មាន​ប្រសាសន៍​ថា តុលាករ​នឹង​មិន​កាត់​បន្ថយ​បទ​ចោទ​ប្រកាន់​លើ​គាត់​ឡើយ។ លោកស្រី​បាន​មាន​ប្រសាសន៍​ទៀត​ថា ផ្អែក​តាម​ចម្លើយ​ពី​ដើម​ចោទ​ និង​ចុង​ចោទ​បង្ហាញ​ថា​​ ជន​ជាប់​ចោទ​មាន​បំណង​សម្លាប់​ដោយ​គិត​ទុក​ជាមុន​”។

លោក ហេង កេសារ៉ូ ចៅក្រម​ជំនុំជម្រះ​ បាន​មាន​ប្រសាសន៍​ថា សាល​ក្រម​​តុលាការ​នេះ​​នឹង​ចេញ​នៅ​ថ្ងៃទី​២៤ ខែ​មិថុនា៕ សុខុម​​​​​

 

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស