អតីតអ្នកបច្ចេកទេសម្នាក់អំឡុងរបប ប៉ុល ពត បានប្រាប់សាលាក្ដីខ្មែរក្រហមកាលពីម្សិលមិញពីរបៀបដែលលោកត្រូវបានគ្រូរបស់ខ្លួនប្រាប់ឲ្យ “ធ្វើគធ្វើថ្លង់” ដើម្បីរស់។
លោក ប៉ិច សុខា អាយុ៥៥ឆ្នាំដែលត្រូវបានបញ្ជូនពីសាលាឫស្សីកែវ ក្រុងភ្នំពេញទៅការដ្ឋានជីកទំនប់១មករា ក្នុងខេត្តកំពង់ធំ ក្នុងឆ្នាំ១៩៧៧ បាននិយាយថា គ្រូបង្រៀនម្នាក់បានប្រាប់លោកឲ្យធ្វើគធ្វើថ្លង់ ដើម្បីចៀសវាងការតាមដានរបស់ពួកខ្មែរក្រហម។
លោកបាននិយាយថា “ខ្ញុំចាំពាក្យនេះពីគ្រូរបស់ខ្ញុំ នៅពេលនោះខ្ញុំនៅក្មេង ហើយខ្ញុំបានសួរគ្រូរបស់ខ្ញុំអំពីរបបនោះ ហើយគ្រូរបស់ខ្ញុំប្រាប់ខ្ញុំឲ្យធ្វើគធ្វើថ្លង់ដើម្បីរស់”។
សាក្សីដែលត្រូវបានបញ្ជូនទៅការដ្ឋានជីកទំនប់ក្នុងស្រុកបារាយណ៍ជាមួយសិស្សបីនាក់ទៀតបានរៀបរាប់ពីជីវិតលំបាកវេទនានៅទីនោះ។
លោកក៏បាននិយាយពីចម្រៀងបដិវត្តន៍ដែលគេចាក់នៅការដ្ឋាននោះដែលស្ដាប់ទៅហាក់ដូចជាសប្បាយ ដើម្បីព្យាយាមបិទបាំងការពិតពីជីវភាពប្រចាំថ្ងៃ។
លោក សុខា បាននិយាយថា “រូបភាពទាំងអស់ហាក់ដូចជាសប្បាយ ប៉ុន្តែការពិតអ្វីៗគួរឲ្យភ័យខ្លាច…។ វាមិនសមថាយើងនៅរស់ឡើយ”។ សវនាការបន្តនៅថ្ងៃនេះ៕ សារុន