មន្ត្រីតុលាការបាននិយាយកាលពីម្សិលមិញថា កូនប្រុសមន្ត្រីគយជាន់ខ្ពស់ម្នាក់ និងអង្គរក្សរបស់ខ្លួនត្រូវបានផ្ដន្ទាទោសឲ្យជាប់ពន្ធនាគារកាលពីសប្ដាហ៍មុនជុំវិញការបាញ់បោះកាលពីខែមីនា នៅមជ្ឈមណ្ឌលកម្សាន្តរ៉ក់ ដែលបានបណ្ដាលឲ្យបុរសម្នាក់រងរបួស។
កែវ វិទូ អាយុ២៤ឆ្នាំ ជាកូនប្រុសរបស់លោក កែវ សុឃាង ដែលជាប្រធានអង្គភាពអធិការកិច្ចចល័តនៅក្រសួងសេដ្ឋកិច្ច និងហិរញ្ញវត្ថុ ត្រូវបានសាលាដំបូងរាជធានីភ្នំពេញផ្ដន្ទាទោសពីបទប្រើប្រាស់អាវុធខុសច្បាប់ឲ្យជាប់ពន្ធនាគារ៨ខែ និងបានបង្គាប់ឲ្យបង់ប្រាក់ពិន័យចំនួន៥០០ដុល្លារ។
រិន ចាន់ធឿន ជាអង្គរក្សត្រូវបានផ្ដន្ទាទោសពីបទប្រើប្រាស់អាវុធខុសច្បាប់ និងបង្កការខូចខាតដោយចេតនាឲ្យជាប់ពន្ធនាគារ២ឆ្នាំ និងពិន័យជាប្រាក់១.០០០ដុល្លារ។
លោក វ៉េង ហួត ចៅក្រមសាលាដំបូងរាជធានីបានមានប្រសាសន៍ថា “មូលហេតុដែលវិទូ ជាប់ពន្ធនាគារតែ៨ខែនោះ ពីព្រោះមិនមានសាក្សីឃើញជននេះបាញ់ទេ”។
នៅម៉ោងប្រហែល២រំលងអធ្រាត្រថ្ងៃទី១៥ ខែមីនា មានការបាញ់បោះប្រហែល៣០គ្រាប់អំឡុងជម្លោះនៅមជ្ឈមណ្ឌលកម្សាន្តរ៉ក់ មុនពេលក្រុមរបស់ វិទូ បានចាកចេញ។
ការឆែកឆេរផ្ទះរបស់ វិទូ នៅល្ងាចថ្ងៃដដែលនោះ នគរបាលដកហូតបានកាំភ្លើងអាកា-៤៧មួយដើម។
នគរបាលបាននិយាយថា ចាន់ធឿន ត្រូវបានចាប់ខ្លួនរយៈពេលបួនថ្ងៃបន្ទាប់ពីហេតុការណ៍បានកើតឡើង ហើយបានសារភាពថា ខ្លួនជាអ្នកបាញ់តែម្នាក់គត់៕ សារុន