មន្ត្រីកងរាជអាវុធហត្ថម្នាក់បាននិយាយថា រថយន្តបីគ្រឿង រួមមានរថយន្តដែលពាក់ស្លាកលេខខេមរភូមិន្ទ ត្រូវបានមន្ត្រីរដ្ឋបាលព្រៃឈើឃាត់ក្នុងខេត្តមណ្ឌលគិរីកាលពីព្រឹកម្សិលមិញ ខណៈដែលរថយន្តទាំងនេះដឹកឈើប្រណីតឆ្ពោះទៅព្រំដែនវៀតណាម។
លោក ព្រំ សារ៉េន មេបញ្ជាការកងរាជអាវុធហត្ថស្រុក ពេជ្រាដា បានមានប្រសាសន៍ថា មន្ត្រីមកពីខណ្ឌរដ្ឋបាលព្រៃឈើខេត្តមណ្ឌលគិរីបានឃាត់រថយន្តទាំងនោះ ដែលដឹកឈើធ្នង់ និងនាងនួន ជាប្រភេទឈើលេខ១ ខណៈដែលបើកបរតាមផ្លូវជាតិលេខ៧៦ ក្នុងស្រុកពេជ្រាដាឆ្ពោះទៅច្រកព្រំដែនណាំលៀ ប៉ុន្តែថា មិនមានការចាប់ខ្លួនឡើយ។
លោក សារ៉េន បានមានប្រសាសន៍ថា “ខ្ញុំឮថា ពួកគេបានយកឈើនិងរថយន្តទៅទីស្នាក់ការរដ្ឋបាលព្រៃឈើ។ ខ្ញុំមិនដឹងអ្វីផ្សេងទៀតទេ ពីព្រោះពួកគេមិនបានស្នើសុំជំនួយរបស់យើងឡើយ”។
លោក កែប កុត នាយខណ្ឌរដ្ឋបាលព្រៃឈើខេត្តមណ្ឌលគិរីបានបញ្ជាក់ពីសេចក្តីរាយការណ៍របស់លោក សារ៉េន ប៉ុន្តែបានបដិសេធមិនផ្តល់ព័ត៌មានលម្អិតបន្ថែមឡើយ។
ដោយបង្វែរសំណួរបន្ថែមទៅលោក សារូ រតនា ជានាយរងខណ្ឌដែលមិនអាចទាក់ទងបាន លោកបានមានប្រសាសន៍ថា “ខ្ញុំបានឆ្លងព្រំដែនទៅប្រជុំនៅប្រទេសវៀតណាម ដូច្នេះខ្ញុំមិនដឹងព័ត៌មានលម្អិតទេ”។
គេហទំព័រព័ត៌មានក្នុងស្រុកបានចុះផ្សាយរូបថត រថយន្តទាហានមានទ្រុងដឹកបន្ទះឈើធំៗជាច្រើនបន្ទះ និង រថយន្តឡង់គ្រីស័រដឹកឈើនៅខាងក្នុងពេញ។
កាលពីខែឧសភាឆ្នាំមុន បន្ទាប់ពីកម្លាំងចម្រុះមួយក្រុមឃាត់រថយន្តដឹកឈើប្រណីតតាមផ្លូវជាតិលេខ៧៦ លោក ស៊ូ មារិទ្ធ មន្ត្រីកងរាជអាវុធហត្ថបានមកដល់កន្លែងកើតហេតុ ហើយបានយកកាំភ្លើងខ្លីភ្ជង់ក្បាលលោក ស៊ិន វណ្ណវុធ អភិបាលស្រុកកែវសីមា ទារយកសោរថយន្តដែលចាប់ទុកនោះ មុនពេលបើកចេញយ៉ាងលឿន។
កាលពីខែតុលា កងរាជអាវុុធហត្ថបានដេញតាមរថយន្តពីគ្រឿងនៅផ្លូវជាតិលេខ៧៦ ហើយរឹបអូសបានឈើ៨៦ដុំ ប៉ុន្តែជនល្មើសបានរត់គេចខ្លួន។
លោក ឯម សុភ័ក្ត្រ អ្នកសម្របសម្រួលនៅមជ្ឈមណ្ឌលអប់រំច្បាប់សម្រាប់សហគមន៍ប្រចាំខេត្តនេះបានលើកឡើងថា ការចាប់ខ្លួនកម្រកើតមានក្នុងតំបន់នេះណាស់ ពីព្រោះអាជ្ញាធរជាផ្នែកមួយនៃរបរទុច្ចរិតលួចឈើក្នុងប្រទេសកម្ពុជា ហើយដឹកឈើភាគច្រើនឆ្លងកាត់ព្រំដែន។
លោកបានមានប្រសាសន៍ថា នរគបាលសេដ្ឋកិច្ច មន្ត្រីគយ មន្ត្រីខេត្ត ពួកគេសុទ្ធតែល្បាតនៅច្រកព្រំដែនទាំងអស់។ ហេតុអ្វីបានជាមានអ្នកកាប់ឈើខុសច្បាប់ឆ្លងព្រំដែនរាល់ថ្ងៃ?។ ប្រសិនបើមិនមានការឃុបឃិត ឬអំពើពុករលួយទេនោះ គ្មានករណីបែបនេះកើតឡើងឡើយ”៕ សារុន