ក្រុមមន្ត្រីបាននិយាយកាលពីម្សិលមិញថា នៅក្នុងករណីដាច់ដោយឡែកពីគ្នាកាលពីចុងសប្ដាហ៍ នគរបាលរាជធានីភ្នំពេញដកហូតថ្នាំញៀនមេតំហ្វេតាមីនបានប្រហែល៥០០ក្រាមពីបុរសជនជាតិខ្មែរម្នាក់បន្ទាប់ពីពួកគេបានចាប់ខ្លួនជននេះពីបទចែកចាយថ្នាំញៀន ចំណែកអាជ្ញាធរខេត្តព្រះវិហារបានចាប់ខ្លួនបុរសជនជាតិឡាវម្នាក់ពីបទជួញដូរថ្នាំមេតំហ្វេតាមីនទម្ងន់ប្រហែល២គីឡូក្រាមពីប្រទេសឡាវ។
លោក អុិន សុង អនុប្រធាននាយកដ្ឋានប្រឆាំងគ្រឿងញៀនក្រសួងមហាផ្ទៃបានមានប្រសាសន៍ថា នៅក្នុងរាជធានីភ្នំពេញកាលពីព្រឹកម្សិលមិញ នគរបាលបានចាប់ខ្លួនបុរសឈ្មោះ ទេព សុគន្ធ អាយុ៣១ឆ្នាំនៅក្នុងភូមិត្រពាំងឈូក ខណ្ឌសែនសុខ ដែលគេស្គាល់ថា ជាកន្លែងសម្រាប់អ្នកប្រើប្រាស់ថ្នាំញៀននោះ ពីបទចែកចាយថ្នាំញៀន ហើយដកហូតបានថ្នាំញៀនមេតំហ្វេតាមីនទម្ងន់៥០០ក្រាម។
លោក អុិន សុង បានមានប្រសាសន៍ថា “យើងបានចំណាយពេលជាច្រើនខែដើម្បីឃ្លាំមើលជននេះ ហើយបានចំណាយថវិកាមួយចំនួនដើម្បីទិញថ្នាំញៀន ដូច្នេះយើងអាចលួចចូលទៅក្នុងបណ្ដាញរបស់អ្នកចែកចាយថ្នាំញៀន ហើយកំណត់អត្តសញ្ញាណបុរសរូបេនះ”។
លោកបានបន្ថែមថា នគរបាលនឹងបញ្ជូនលោក ទេព សុគន្ធ ទៅសាលាដំបូងរាជធានីភ្នំពេញនៅថ្ងៃនេះ។
លោក យ៉ែន បញ្ញារិទ្ធ នាយការិយាល័យប្រឆាំងគ្រឿងញៀនបានមានប្រសាសន៍ថា កាលពីថ្ងៃសៅរ៍ មន្ត្រីនាយកដ្ឋានប្រឆាំងគ្រឿងញៀនក្រសួងមហាផ្ទៃបានចាប់ខ្លួន ពិត សាប៊ុន ស៊ីម៉ាវ៉ាត់ អាយុ៣៨ឆ្នាំ ជាជនជាតិឡាវនៅក្នុងស្រុកឆែប ខេត្តព្រះវិហារ បន្ទាប់ពីជននេះបានឆ្លងព្រំដែន ហើយបានដើរតាមផ្លូវលំចម្ងាយប្រហែល១គីឡូម៉ែត្រចូលក្នុងទឹកដីកម្ពុជា។
លោក បញ្ញារិទ្ធ បានមានប្រសាសន៍ថា “យើងបានចំណាយពេល៣ខែដើម្បីឃ្លាំមើលជននេះ ហើយបានព្យាយាមចាប់ខ្លួនគាត់បីលើកមកហើយ ប៉ុន្តែលើកទី១ និងលើកទី២ជននេះមិនមានថ្នាំញៀនជាប់ខ្លួនឡើយ”។ លោកបានបន្ថែមថា អ្នកឲ្យការណ៍បានប្រាប់នគរបាលនៅពេល ស៊ីម៉ាវ៉ាត់ បានឆ្លងព្រំដែន។
លោក បញ្ញារិទ្ធ បានមានប្រសាសន៍ថា នគរបាលដកហូតបានថ្នាំញៀនមេតំហ្វេតាមីនទម្ងន់ជិត២គីឡូក្រាមពី ស៊ីម៉ាវ៉ាត់ ដែលត្រូវបានឃុំខ្លួននៅនាយកដ្ឋានប្រឆាំងគ្រឿងញៀនខេត្តព្រះវិហារ ហើយនឹងត្រូវបញ្ជូនទៅសាលាដំបូងខេត្តនៅថ្ងៃនេះ។
ការចាប់ខ្លួនកាលពីថ្ងៃសៅរ៍ គឺជាការចាប់ខ្លួនថ្មីបំផុតនៅក្នុងអ្វីដែលនគរបាលលើកឡើងថា ជាការព្យាយាមបង្ក្រាបការជួញដូរថ្នាំញៀនឆ្លងព្រំដែនរវាងប្រទេសឡាវ និងប្រទេសកម្ពុជា។
បន្ទាប់ពីការស៊ើបអង្កេតរយៈពេល១ខែមក នគរបាលប្រឆាំងគ្រឿងញៀនខេត្តស្ទឹងត្រែង បានផ្ដល់ព័ត៌មានកាលពីថ្ងៃពុធទៅសមភាគីរបស់ខ្លួនក្នុងប្រទេសឡាវ ទើបឈានដល់ការចាប់ខ្លួនបុរសជនជាតិឡាវបីនាក់ ដែលគេជឿថាបានជួញដូរថ្នាំញៀនមេតំហ្វេតាមីនចូលក្នុងប្រទេសកម្ពុជា។ អាជ្ញាធរឡាវបានចាប់ខ្លួនបុរសទាំងនេះជាមួយនឹងថ្នាំញៀនទម្ងន់ប្រហែល២គីឡូក្រាម។
កាលពីថ្ងៃទី១០ ខែឧសភា នគរបាលបានចាប់ខ្លួនស្ត្រីជនជាតិខ្មែរម្នាក់ និងជនជាតិឡាវពីរនាក់បន្ទាប់ពីពួកគេបានឆ្លងព្រំដែនពីខេត្តស្ទឹងត្រែង ដោយមានថ្នាំញៀនមេតំហ្វេតាមីនទម្ងន់៦គីឡូក្រាម៕ សារុន