27 C
Phnom Penh

តុលាការ​ចោទ​ប្រកាន់​បុរសម្នាក់ពីបទ​យក​ដំបង​វាយ​ព្រះសង្ឃមួយអង្គរហូត​សុគត

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពីម្សិលមិញ​ថា សាលា​ដំបូង​ខេត្ត​កំពង់ចាម​កាលពី​ម្សិល​មិញ បាន​ចោទ​ប្រកាន់បុរស​អាយុ​៤៧​ឆ្នាំ​ម្នាក់​ពីបទ​​មនុស្សឃាត​​​ជុំវិញ​ការ​ចោទ​ប្រកាន់​ថា បានយក​​ដំបង​វាយ​ព្រះសង្ឃ​ព្រះជន្ម​១៨​ព្រះ​វស្សា​មួយ​អង្គ​រហូត​ដល់​សុគត​នៅ​ក្នុង​ស្រុក​ជើង​ព្រៃ​កាល​ពី​ថ្ងៃសៅរ៍។

លោក ប្លង់ សុផល ព្រះរាជអាជ្ញារង​អម​សាលា​ដំបូង​ខេត្ត​បាន​មាន​​ប្រសាសន៍​ថា លោក​បាន​ចោទ​ប្រកាន់​បុរស​ឈ្មោះ ញឹក វណ្ណា ពីបទ​មនុស្ស​ឃាត​ដោយ​តាម​ចោទ​ថា បាន​ធ្វើ​គត​ព្រះសង្ឃ​ ឆើត រា៉ាឆាន់ ​គង់​នៅ​វត្ត​គោក​ពង្រ ក្នុង​ឃុំ​ស្រម៉។

លោក​បាន​មាន​ប្រសាសន៍​ថា “​ខ្ញុំ​បាន​ចោទ​ប្រកាន់​ជន​នេះ​ពីបទ​មនុស្ស​ឃាត​រួចហើយ​នៅ​ថ្ងៃ​នេះ។ ខ្ញុំ​បាន​បញ្ជូន​ករណី​នេះ​ទៅ​ចៅក្រម​ស៊ើបសួរហើយ​”។

លោក សុផល បានមាន​ប្រសាសន៍​ថា ការ​អះអាង​ពី​អ្នកភូមិ​ដែលថា ជន​សង្ស័យ​រូប​នេះ​ជាមនុស្ស​​មិន​គ្រប់ទឹកនោះ​​ នឹង​ត្រូវ​បញ្ជាក់​ដោយ​គ្រូពេទ្យ​ដែល​ត្រូវ​បាន​ស្នើ​សុំ​ឲ្យ​ធ្វើ​កោសល្យ​វិច័យ​ពី​​ចៅក្រម​ស៊ើបសួរ។

លោក​បានមាន​ប្រសាសន៍​ថា “​អ្នក​ឬខ្ញុំ​មិន​អាច​និយាយ​ថា ជន​សង្ស័យ​រូប​នេះ​ជាមនុស្ស​មិន​គ្រប់​ទឹកបាន​​ឡើយ ពីព្រោះ​មិន​មាន​ឯកសារ​ដើម្បី​បញ្ជាក់​ឡើយ​។ មាន​តែ​គ្រូពេទ្យ​ប៉ុណ្ណោះ​ទើប​អាច​បញ្ជាក់​ថា ​នរណា​ម្នាក់ជាមនុស្ស​​គ្រប់​ទឹក​ឬមិន​គ្រប់​ទឹក​នោះ​”។ ​

លោក តុំ ចាន់ណា នាយការិយាល័យ​​នគរ​បាល​ព្រហ្មទណ្ឌ​កម្រិត​ធ្ងន់​ខេត្ត​បាន​​មាន​ប្រសា​សន៍​ថា សាច់​ញាតិរបស់​ វណ្ណា បាន​ប្រាប់​លោក​ថា ជន​នេះ​ត្រូវ​បាន​យក​ទៅ​នៅ​វត្ត​ពីរ​បី​សប្ដាហ៍​កន្លង​មក ដើម្បី​​ដោះ “អំពើ​”​ចេញពីក្បាល​របស់ខ្លួន។

លោក ចាន់ណា បាន​និយាយ​ដល់​ការ​សាក​សួរ​បុរស​ឈ្មោះ វណ្ណា ថា “​គាត់​និយាយ​ដូច​ជា​មនុស្ស​មិន​គ្រប់​ទឹក​អ៊ីចឹង។ ខ្ញុំ​អាច​យល់​តែឃ្លា​មួយ​ប៉ុណ្ណោះ​ពី​គាត់​ថា ‘ខ្ញុំ​មិន​ដឹង​ទេ’”។

លោក ចាន់ណា បាន​មាន​ប្រសាសន៍​ថា តាម​ចោទ​ថា ជន​សង្ស័យ​រូប​នេះ​បាន​វាយ​ព្រះ​តេជគុណ ឆើត រ៉ាឆាន់ កាល​ពីព្រឹក​ថ្ងៃ​សៅរ៍ នៅ​ពេល​ព្រះសង្ឃ​អង្គ​នេះ​និមន្ត​ទៅ​កាន់​ព្រះវិហារ។

លោក​បាន​មាន​ប្រសាសន៍​ថា “​ខណៈ​ដែល​ព្រះសង្ឃ​អង្គ​នេះ​កំពុង​និមន្ត​ទៅ​នោះ ជន​សង្ស័យ​រូប​នេះ​បាន​យក​ដំបង​វាយព្រះអង្គ​ពី​ខាង​ក្រោយ​ចំព្រះកេស​តែម្ដង”។ លោក​បាន​បន្ថែម​ថា ព្រះសង្ឃ​និង​អ្នកភូមិ​បាន​ឡោម​ព័ទ្ធ​​ វណ្ណា រហូត​ដល់​នគរ​បាល​មក​ដល់​ដើម្បី​ចាប់​ខ្លួន​។

លោក ចាន់​ណា បានមាន​ប្រសាសន៍​ថា “​ព្រះសង្ឃ​អង្គ​នេះ​បាន​សុគត​នៅ​នឹង​កន្លែង តែម្តង​ ពីព្រោះ​ព្រះអង្គ​រង​របួស​ធ្ងន់ធ្ងរ​ត្រង់​ព្រះកេស​”។

លោក ធូ ឡងឌី នាយរង​ការិយាល័យ​នគរ​បាល​ព្រហ្មទណ្ឌ​កម្រិត​ធ្ងន់​ខេត្ត​បាន​មាន​ប្រសា​សន៍​ថា លោក​បានព្យាយាម​ផ្សព្វ​ផ្សាយព័ត៌មាន​បន្ត​ទាក់​ទង​នឹង​សភាព​មិន​គ្រប់​ទឹក​របស់​​ឈ្មោះ វណ្ណា នេះ​ទៅ​តុលាការ។

លោក ឡងឌី បានមាន​ប្រសាសន៍​ថា តុលាការ​បាន​លើក​ឡើង​ថា យើង​មិន​អាច​និយាយ​ថា គាត់​ជា​មនុស្ស​មិន​គ្រប់​ទឹក​បាន​ទេ ពីព្រោះ​មិន​មាន​ឯកសារ​ផ្លូវ​ច្បាប់​ឡើយ​”៕ សារុន​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស