យោង តាមអភិបាលខណ្ឌជ្រោយចង្វាបានឲ្យដឹងថា គ្រួសារជិត៤០០ដែលអះអាងសិទ្ធិកាន់កាប់ដីនៅក្នុងតំបន់ដែលគេ បម្រុងទុកសម្រាប់គម្រោងអភិវឌ្ឍន៍មានទឹកប្រាក់៣ពាន់លានដុល្លារ ក្នុងតំបន់ជ្រោយចង្វានោះ នឹងត្រូវផ្ដល់ឲ្យនូវដីរួមទំហំ២៨ហិកតា។
លោក ឃ្លាំង ហួត បានប្រកាសពេលជួបប្រជុំជាមួយអ្នកភូមិចំនួន៣៧៤គ្រួសារ ដែលមកពីសង្កាត់ព្រែកតាសេក និងដែលប្រឆាំងនឹងការរុះរើផ្ទះរបស់ពួកគាត់ដើម្បីបើកផ្លូវ សម្រាប់គម្រោងរបស់ក្រុមហ៊ុនវិនិយោគទុនអាណិកជនកម្ពុជា (OCIC) ជាយូរមកហើយនោះថា សាលារាជធានីភ្នំពេញនឹងកាត់ដីមួយផ្នែកចេញពីដីសម្បទានទំហំ៣៨៧ហិកតាមកឲ្យគ្រួសារទាំងនេះ។
លោក ឃ្លាំង ហួត បានលើកឡើងទៀតថា លោកនឹងសុំសាលារាជធានីឲ្យស្នើទៅរដ្ឋាភិបាលដើម្បីចេញប័ណ្ណ កម្មសិទ្ធិដីធ្លីជូនអ្នកភូមិទាំងនេះ។
លោកបានមានប្រសាសន៍តាមរយៈទូរស័ព្ទថា “ព្រឹក នេះ ខ្ញុំបានទៅជួបជាមួយអ្នកភូមិនៅក្នុងស្កាត់ព្រែកតាសេក ព្រោះពីមុនពួកគាត់ព្រួយបារម្ភអំពីផលប៉ះពាល់ដល់ភូមិរបស់ខ្លួន ដោយសារក្រុមហ៊ុន OCIC”។
លោកបានមានប្រសាសន៍បន្ថែមទៀតថា “យើងជឿជាក់លើការដឹកនាំរបស់សម្ដេចតេជោ [ហ៊ុន សែន] ដែល មានប្រសាសន៍ថា ការអភិវឌ្ឍមិនគួរអភិវឌ្ឍលើទឹកភ្នែករបស់ប្រជាពលរដ្ឋនោះ ហើយយើងក៏ទទួលបានការយល់ព្រមពីក្រុមហ៊ុនដែរ”។
កាលពីខែកុម្ភៈ សាលារាជធានីបានលើកឡើងថា ខ្លួននឹងបែងចែកដីរបស់ក្រុមហ៊ុន OCIC នៅក្នុងតំបន់ជ្រោយចង្វា ដោយផ្ដល់១០ភាគរយទៅឲ្យអ្នកភូមិដែលអះអាងសិទ្ធិកាន់កាប់ដីនេះ។
ដី មានវិវាទដែលភាគច្រើនត្រូវបានគេបូមខ្សាច់ពីចំណុចប្រសព្វនៃ ទន្លេមេគង្គ និងទន្លេសាបមកចាក់បំពេញនោះ រួមមានផ្នែកនៃសង្កាត់ជ្រោយចង្វា សង្កាត់ព្រែកតាសេក និងសង្កាត់ព្រែកលៀប។
លោក ឃ្លាំង ហួត មិនបានលើកឡើងថា តើអ្នកភូមិនៅក្នុងសង្កាត់ផ្សេងៗទៀតនឹងទទួលបានដីដែរឬក៏អត់ទេ។
លោក សម សៀង អាយុ៦៤ឆ្នាំ ជាអ្នកភូមិនៅក្នុងភូមិព្រែកតាសេកបានស្វាគមន៍ចំពោះការប្រកាសរបស់អភិបាលខណ្ឌ។
លោកបានមានប្រសាសន៍ថា “ខ្ញុំ ពិតជាសប្បាយចិត្តណាស់ដែលបានឮអំពីការសម្រេចនេះ។ ប៉ុន្តែខ្ញុំនៅមិនទាន់ជឿជាក់១០០ភាគរយឡើយ ព្រោះពួកយើងនៅមិនទាន់ទទួលបានប័ណ្ណកម្មសិទ្ធិដីធ្លីនៅឡើយទេ សូម្បីតែម្នាក់”។
ទោះ ជាយ៉ាងណា អ្នកភូមិចំនួន១៨គ្រួសារនៅក្នុងសង្កាត់ព្រែកតាសេក ដែលផ្ទះរបស់ពួកគាត់ស្ថិតនៅភាគខាងកើតនៃផ្លូវដែលត្រូវបាន ស្ថាបនាដោយក្រុមហ៊ុន OCIC នោះ មិនរាប់បញ្ចូលក្នុងសេចក្ដីសម្រេចនេះទេ នេះបើយោងតាមលោក ឃ្លាំង ហួត។
អភិបាលខណ្ឌរូបេនះបានមានប្រសាសន៍ថា “ខ្ញុំនឹងអញ្ជើញអ្នកភូមិទាំង១៨គ្រួសារនេះមកពិភាក្សាដើម្បីស្វែងរកដំណោះស្រាយឲ្យបានឆាប់តាមដែលអាចធ្វើទៅបាន”។
លោក ទូច សំណាង អ្នកគ្រប់គ្រងរបស់ក្រុមហ៊ុន OCIC បានលើកឡើងថា ជាគោលការណ៍ ក្រុមហ៊ុននឹងមិនធ្វើអ្វីដែលប៉ះពាល់ដល់ផ្ទះអ្នកភូមិឡើយ។ ក្រុមហ៊ុន OCIC ពីមុនមកធ្លាប់រុះរើផ្ទះរបស់គ្រួសារណាដែលមិនព្រមចាកចេញ៕ ស៊ុយឈាង