30 C
Phnom Penh

ប្រទេស​ចិន​ផ្តល់​អាវុធ​ធុនធ្ងន់​ឲ្យ​យោធា​ប្រទេស​កម្ពុជា

ដោយ ឌឹ ខេមបូឌា ដេលី

បទវិភាគ

កាំភ្លើង​ប្រឆាំង​យន្ត​ហោះ​ដាក់​បង្ហាញ​ក្នុង​ពិធី​ប្រគល់​សម្ភារ​យោធា​របស់​ប្រទេស​ចិន​ដល់​ប្រទេស​កម្ពុជា​នៅឯ​វិទ្យាស្ថាន​កងទ័ព​នៅ​ក្នុង​ខេត្ត​កំពង់ស្ពឺ​ កាលពី​ថ្ងៃសៅរ៍។​ រូបថតៈ​ ខឹម​ សុវណ្ណរ៉ា​
កាំភ្លើង​ប្រឆាំង​យន្ត​ហោះ​ដាក់​បង្ហាញ​ក្នុង​ពិធី​ប្រគល់​សម្ភារ​យោធា​របស់​ប្រទេស​ចិន​ដល់​ប្រទេស​កម្ពុជា​នៅឯ​វិទ្យាស្ថាន​កងទ័ព​នៅ​ក្នុង​ខេត្ត​កំពង់ស្ពឺ​ កាលពី​ថ្ងៃសៅរ៍។​ រូបថតៈ​ ខឹម​ សុវណ្ណរ៉ា​

សាធារណរដ្ឋ​ប្រជាមានិត​ចិន​បាន​ប្រគល់​សម្ភារ​យោធា​ឲ្យ​ក្រសួង​ការពារ​ជាតិ​នៃ​ព្រះ​រាជា​ណា​ចក្រ​កម្ពុជា​កាលពី​ថ្ងៃ​សៅរ៍ ដែល​ក្រុម​មន្ត្រី​បាន​និយាយ​ថា ពួកគេ​នឹង​ប្រើ​សម្រាប់​តែ​ការ​ហ្វឹកហាត់ ក្នុង​នោះ​មាន​ទាំង​គ្រឿង​បន្លាស់​និង​រថយន្ត​មាន​ជើង​ទម្រ​រ៉ុកកែត​ផង។

យោង​តាម​សេចក្តី​រាយការណ៍​ថ្មីៗ​របស់​ទីភ្នាក់ងារ​ព័ត៌មាន​រ៉យទ័រ​បាន​ឲ្យ​ដឹង​ថា ជា​អ្នក​ផ្តល់​ជំនួយ​យោធា​ច្រើន​បំផុត ព្រម​ទាំង​ជា​អ្នក​វិនិយោគ​ធំ​បំផុត​របស់​ប្រទេស​កម្ពុជា ប្រទេស​ចិន​បាន​ធ្វើ​ការ​ប្រគល់​នេះ​នៅ​ពិធី​មួយ​ក្នុង​ខេត្ត​កំពង់​ស្ពឺ នៅ​វិទ្យាស្ថាន​កង​ទ័ព​ជើង​គោក​កម្ពុជា ដែល​ក្រុង​ប៉េកាំង​ជួយ​សាងសង់​ផង​ដែរ។

ឧត្តម​សេនីយ៍​ឯក ចៅ ភិរុណ ដែល​ដឹកនាំ​អគ្គ​នាយកដ្ឋាន​សម្ភារ​បច្ចេកទេស​ក្រសួង​ការពារ​ជាតិ បាន​មាន​ប្រសាសន៍​នៅ​ក្នុង​ពិធី​ប្រគល់-ទទួល​សម្ភារ​យោធា​ពី​សាធារណរដ្ឋ​ប្រជាមានិត​ចិន​ថា “ការ​ទទួល​សម្ភារ​យោធា​ពិសេស​នៅ​ថ្ងៃ​នេះ​ពី​ក្រសួង​ការពារ​ជាតិ​របស់​ប្រទេស​ចិន​ជា​សមិទ្ធ​កម្ម​ប្រវត្តិសាស្ត្រ​មួយ​ទៀត​ក្នុង​ចំណោម​ជំនួយ​ដែល​រដ្ឋាភិបាល​ចិន​បាន​ប្រគល់​ជូន​ក្រសួង​ការពារ​ជាតិ​កម្ពុជា”។

លោក​បាន​មាន​ប្រសាសន៍​ថា “ចំពោះ​ជំនួយ​ដែល​ទទួល​បាន​នៅ​ថ្ងៃ​នេះ កង​យោធពល​ខេមរ​ភូមិន្ទ​នឹង​ប្រើ​វា​សម្រាប់​ការ​ហ្វឹកហាត់​ដើម្បី​ពង្រឹង​វិស័យ​យោធា”។

លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ ក៏​បាន​ពិនិត្យ​អំណោយ​នេះ​ផ្ទាល់​ដែរ រួម​ជាមួយ​លោក​ស្រី ពូ ជៀនគ័រ ឯកអគ្គរដ្ឋទូត​ចិន​ប្រចាំ​នៅ​កម្ពុជា។

ជំនួយ​នេះ​រួម​មាន​រថយន្ត​៤៤​គ្រឿង ក្នុង​នោះ​មាន​រថយន្ត​ហ្ស៊ីប រថយន្ត​មាន​ជើង​ទម្រ​រ៉ុកកែត និង​កាំភ្លើង​បាញ់​យន្តហោះ​ប្រហែល​ប្រាំមួយ​គ្រឿង។ សម្ភារ​ទាំង​នោះ​ក៏​មាន​រថយន្ត​លើក​គ្រឿង​សម្ភារ​២០​គ្រឿង ផ្ទះ​បាយ​ចល័ត​បួន សារធាតុ​គីមី​មិន​ស្គាល់​ឈ្មោះ​ប្រហែល​២.០០០​គីឡូក្រាម និង​គ្រឿង​បន្លាស់​១០.០០០​គីឡូ​ក្រាម។ មជ្ឈមណ្ឌល​ហ្វឹកហាត់​មាន​ផ្ទៃ​៥០០​ម៉ែត្រ​ក្រឡា​ក៏​ស្ថិត​លើ​បញ្ជី​ដែរ។

ឧត្តម​សេនីយ៍​ឯក ភិរុណ បាន​មាន​ប្រសាសន៍​ថា សម្ភារ​នេះ​នឹង​ត្រូវ​ប្រើ​ជាពិសេស​ដើម្បី​ហ្វឹកហាត់​អង្គភាព​ទ័ព​ពិសេស​បី​អង្គភាព​របស់​កង​ខេមរ​ភូមិន្ទ ក្នុង​ចំណោម​អង្គភាព​ផ្សេងទៀត ដេញ​ចាប់​អ្នក​នេសាទ​និង​ឈ្មួញ​ឆ្លង​ដែន​ខុស​ច្បាប់។​ លោក​មិន​បាន​បញ្ជាក់​​ឲ្យ​ដឹង​ថា អង្គភាព​ណា​នឹង​ទទួល​បាន​ប្រយោជន៍​នេះ​ទេ។

មន្ត្រី​ក្រសួង​ការពារ​ជាតិ​កាលពី​ថ្ងៃ​អាទិត្យ​បាន​បដិសេធ​មិន​ប្រាប់​ល្អិតល្អន់​អំពី​អំណោយ​ថ្មីៗ​នេះ ឬ​មិន​អាច​ទាក់ទង​បាន​ទេ។

លោក ចេង ហុង ប៉ូ អ្នក​នាំ​ពាក្យ​ស្ថានទូត​ចិន​បាន​បង្វែរ​សំណួរ​ទៅ​លេខាធិការ​អនុព័ន្ធ​យោធា​របស់​ស្ថានទូត​នេះ ដែល​បាន​និយាយ​ថា លោក​មិន​មាន​សិទ្ធិ​និយាយ​ជាមួយ​បណ្តាញ​ព័ត៌មាន​ទេ។

ប្រទេស​ចិន​ផ្តល់​អំណោយ​ជារឿយៗ​ដល់​ប្រទេស​កម្ពុជា ក្នុង​នោះ​មាន​រថយន្ត​យ៉ាង​ហោច​ណាស់​២០​គ្រឿង​ដល់​កងទ័ព​កាលពី​ឆ្នាំមុន និង​ប្រាក់​៣០០.000​ដុល្លារ ដោយ​ក្រសួង​មហាផ្ទៃ​បាន​សន្យា​ថា​នឹង​ទិញ​គ្រឿង​ផ្គត់ផ្គង់​ពី​ប្រទេស​ចិន​សម្រាប់​កម្លាំង​ប៉ូលិស​របស់​ខ្លួន។

ក្រុម​អ្នក​រិះគន់​បាន​ចោទ​សួរ​អំពី​តម្លៃ​នៃ​ទំនាក់​ទំនង​យោធា​កាន់តែ​ធំ​របស់​កម្ពុជា​ចំពោះ​ប្រទេស​ចិន ក្នុង​នោះ​មាន​ទាំង​ការ​គាំទ្រ​របស់​កម្ពុជា​ចំពោះ​ក្រុង​ប៉េកាំង ក្នុង​ជម្លោះ​ទាក់ទិន​នឹង​សមុទ្រ​ចិន​ខាង​ត្បូង​ផង​ដែរ៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស