នគរបាលបាននិយាយកាលពីម្សិលមិញថា បុរសម្នាក់ដែលត្រូវគេរឹតករហូតដល់ស្លាប់ និងច្រកចូលក្នុងបាវយកទៅបោះចោលនៅក្នុងគំនរសំរាមក្បែរចិញ្ចើមផ្លូវកាលពីចុងសប្ដាហ៍កន្លងទៅនេះ អាចត្រូវជនល្មើសសម្លាប់ប្លន់យករថយន្តតូយ៉ូតាកាមរីរបស់ខ្លួន។
សាកសពបុរសរងគ្រោះឈ្មោះ ស្រ៊ុន សុភ័ក្ត្រ អាយុ៣៥ឆ្នាំ ត្រូវបានគេប្រទះឃើញនៅក្នុងគំនរសំរាមកាលពីព្រឹកថ្ងៃសៅរ៍ ស្ថិតតាមបណ្ដោយផ្លូវលេខ៣៧១ក្នុងសង្កាត់ទឹកថ្លា ខណ្ឌសែនសុខ។ ការធ្វើកោសល្យវិច័យលើសាកសពបានសន្និដ្ឋានថា ជនរងគ្រោះត្រូវជនល្មើសរឹតករហូតដល់ស្លាប់។
លោក ម៉ក់ ហុង អធិការនគរបាលខណ្ឌសែនសុខបានមានប្រសាសន៍កាលពីម្សិលមិញថា រថយន្តតូយ៉ូតាកាមរីរបស់លោក ស្រ៊ុន សុភ័ក្ត្រ បានបាត់ ហើយសន្និដ្ឋានថាត្រូវចោរប្លន់។ លោកបានមានប្រសាសន៍ទៀតថា “យើងសន្និដ្ឋានថា វាជាករណីប្លន់ ពីព្រោះទ្រព្យសម្បត្តិរបស់ជនរងគ្រោះត្រូវចោរប្លន់យកទៅបាត់។ នគរបាលរបស់យើងកំពុងស៊ើបអង្កេតដើម្បីស្វែងរកជនល្មើស”។
នគរបាលបាននិយាយថា សាកសពលោក ស្រ៊ុន សុភ័ក្ត្រ ដែលគ្រួសាររបស់គាត់និយាយថា បម្រើការងារនៅក្នុងឧស្សាហកម្មកាត់ដេរជាអ្នករត់ការឯកសារ ត្រូវបានប្រទះឃើញដោយមានប្រឡាក់ស្នាមទឹកថ្នាំនៅលើមេដៃខាងស្ដាំ និងមានស្លៀកតែខោខ្លី។
កាលពីម្សិលមិញ លោក សុខ សុផល នាយប៉ុស្តិ៍សង្កាត់ទឹកថ្លាបានបដិសេធមិននិយាយអំពីជីវប្រវត្តិរបស់លោក ស្រ៊ុន សុភ័ក្ត្រ ឬសេចក្ដីលម្អិតផ្សេងៗទៀតករណីនេះទេ។ លោកបានលើកឡើងថា “យើងមិនដឹងថា មានមូលហេតុអ្វីនៅពីក្រោយករណីនេះទេ ហើយយើងកំពុងតែចាត់ការរឿងនេះ”។
លោក អេង សោភា នាយការិយាល័យនគរបាលព្រហ្មទណ្ឌរាជធានីភ្នំពេញ បានមានប្រសាសន៍ថា មន្ត្រីនគរបាលក្រោមឱវាទរបស់លោកបានសហការជាមួយកងរាជអាវុធហត្ថរាជធានីលើករណីនេះ ហើយថា មាន “តម្រុយខ្លះៗ” ដែលអាចឈានទៅដល់ការវែកមុខជនសង្ស័យ។
អ្នកស្រី ជួន ដានី អាយុ៣១ឆ្នាំ ដែលត្រូវជាប្អូនជីដូនមួយរបស់លោក ស្រ៊ុន សុភ័ក្ត្រ បាននិយាយថា លោក ស្រ៊ុន សុភ័ក្ត្រ បានចាកចេញពីផ្ទះរបស់ពួកគាត់ដែលស្ថិតនៅក្នុងសង្កាត់ចាក់អង្រែលើកាលពីយប់ថ្ងៃសុក្រ ដើម្បីទៅចូលរួមពិធីមង្គលការមួយ។ អ្នកស្រីនិយាយទៀតថា “គាត់បានចេញពីផ្ទះកាលពីល្ងាចថ្ងៃសុក្រ ដើម្បីទៅស៊ីការគេ ហើយគាត់មិនបានត្រឡប់មកវិញទេ។ យើងមិនបានសង្ស័យថា មានអ្វីកើតឡើងចំពោះគាត់ឡើយ ពីព្រោះពេលខ្លះគាត់ដាច់យប់មិនចូលផ្ទះទេ”។
អ្នកស្រី ជួន ដានី ដែលបញ្ជាក់ថាលោក ស្រ៊ុន សុភ័ក្ត្រ ជាអ្នករត់ការឯកសារឲ្យរោងចក្រមួយចំនួនបានលើកឡើងបន្តថា បងជីដូនមួយរបស់គាត់គ្មានស្នាមទឹកថ្នាំប្រឡាក់នៅលើមេដៃរបស់គាត់ទេ នៅពេលគាត់ចាកចេញពីផ្ទះ។ អ្នកស្រីនិយាយទៀតថា “ខ្ញុំមិនហ៊ានសន្និដ្ឋានទេ ពីព្រោះយើងមិនដឹងថាគាត់មានបញ្ហាអ្វីឡើយ”៕ សុខុម