ក្រុម មន្ត្រីបាននិយាយកាលពីម្សិលមិញថា ខ្លួនមិនទាន់រកឃើញជនសង្ស័យនៅក្នុងករណីបាញ់សម្លាប់ស្ត្រីម្នាក់ កាលពីយប់ថ្ងៃអាទិត្យ ខណៈពេលកំពុងជិះម៉ូតូពីក្រោយនៅក្នុងក្រុងតាខ្មៅ ខេត្តកណ្ដាលនៅឡើយទេ ប៉ុន្តែនគរបាលជឿថា វាជាករណីបាញ់សម្លាប់ដោយការសងសឹក។
យោង តាមលោក ហ៊ុយ សុខា នាយប៉ុស្តិ៍ឃុំបានឲ្យដឹងថា អ្នកស្រី ទ្រី សុធាវី អាយុ៣២ឆ្នាំ ជាកម្មការិនីកាត់ដេររស់នៅក្នុងឃុំស្វាយរលំ ស្រុកស្អាង បានជិះម៉ូតូពីក្រោយ សេង ស្រីលាភ អាយុ២១ឆ្នាំ ជាបងប្អូនជីដូនមួយរបស់ខ្លួនកាត់តាមសង្កាត់តាខ្មៅ។
លោក សុខា បានមានប្រសាសន៍ថា ស្រី លាភ បានប្រាប់នគរបាលថា បុរសពីរនាក់ជិះម៉ូតូមួយគ្រឿងបានមកជិតពួកគេទាំងពីរ។
លោកបានមានប្រសាសន៍ថា “នៅ ពេលដល់កន្លែងស្ងាត់នៅផ្លូវលេខ២១ពួកគេបានហៅនាងឈប់ម៉ូតូ ប៉ុន្តែនាងមិនព្រមឈប់។ បន្ទាប់មកពួកគេបានបាញ់ជនរងគ្រោះចំខ្នង ហើយស្ត្រីរូបនេះបានស្លាប់ភ្លាមៗនៅកន្លែងកើតហេតុ”។
លោក សុខា បានមានប្រសាសន៍ថា ខ្មាន់កាំភ្លើងបានដកកាំភ្លើងខ្លីកា-៥៩ បាញ់បីគ្រាប់ប៉ុន្តែត្រូវ ទ្រី សុធាវី តែមួយគ្រាប់ប៉ុណ្ណោះ ចំណែកប្អូនស្រីជីដូនមួយរបស់នាងរងរបួសស្រាលបន្ទាប់ពីធ្លាក់ពី ម៉ូតូ។
លោក បានបន្ថែមថា នគរបាលជឿថា ការបាញ់នេះជាការសងសឹក មិនមែនជាអំពើប្លន់ទេ ពីព្រោះមិនបានយកអ្វីពីស្ត្រីទាំងពីនាក់នេះឡើយ។
ស្រីលាភ ក៏បានប្រាប់នគរបាលផងដែរថា ទ្រី សុធាវី និងប្ដីរបស់គាត់ទើបតែបានលែងលះគ្នាថ្មីៗតែប៉ុណ្ណោះ ប៉ុន្តែលោក សុខា មិននិយាយថា តើបុរសរូបនេះជាជនសង្ស័យឬយ៉ាងណានោះឡើយ ប្រសិនបើនគរបាលមានគម្រោងសាកសួរគាត់នោះ។
លោកបានមានប្រសាសន៍ថា “ឥឡូវ នេះ យើងមិនអាចចោទប្រកាន់នរណាម្នាក់បានឡើយ។ វាគ្រាន់តែជាព័ត៌មានពីបងប្អូនជីដូនមួយតែប៉ុណ្ណោះ ដូច្នេះយើងត្រូវការពេលវេលាដើម្បីស៊ើបអង្កេត និងស្វែងរកជនសង្ស័យ”។
លោក អុីវ ចំរើន ស្នងការនគរបាលខេត្តកណ្ដាលបានមានប្រសាសន៍ថា ផ្អែកតាមព័ត៌មានដែលទទួលបានពី ស្រីលាភ លោកគិតថា ការបាញ់សម្លាប់ ទ្រី សុធាវី អាចជាប់ពាក់ព័ន្ធទៅនឹងជម្លោះនៅកន្លែងនាងធ្វើការ។
យោងតាមលោក ចំរើន បានឲ្យដឹងថា ទ្រី សុធាវី ដែលធ្វើការនៅរោងចក្រ Cambo Hong Xing International Knitting ជាប្រធានក្រុមកាត់ដេរ ថ្មីៗនេះមានជម្លោះជាមួយមិត្តរួមការងាររបស់ខ្លួន។
លោកបានមានប្រសាសន៍ថា “អំពើមនុស្សឃាតនេះកើតចេញពីការសងសឹកផ្ទាល់ខ្លួន” ដោយលោកបដិសេធមិនផ្ដល់ព័ត៌មានលម្អិតបន្ថែមអំពីជម្លោះនេះទេ។
លោកបានមានប្រសាសន៍ថា “យើងកំពុងធ្វើការស៊ើបអង្កេតនៅឡើយ ហើយស្វែងរកចាប់ខ្លួនជនសង្ស័យ”៕ សារុន